Propagandë me qëllim shkatërrimin e vlerave demokratike të Europës – këtë bën qeveria ruse. Me këtë ajo fokusohet tek gazetarë të veçantë dhe politikanë në BE. Kështu shkruhet në një rezolutë të Komisionit të Jashtëm të Parlamentit Europian, që u miratua në fillim të javës (10.10).
Më tej në rezolutë thuhet se, “qeveria ruse përdor në mënyrë agresive një gamë të gjerë mjetesh si thinktank, televizione në shumë gjuhë (për shembull, ‘Russia Today’), pseudoagjenci lajmesh, rrjetet sociale dhe troller në internet, për të sulmuar vlerat demokratike, për ta përçarë Europën, për të grumbulluar mbështetës në Rusi dhe për të krijuar përshtypjen, se ka shtete të dështuara në fqinjësinë lindore të BE-së”.
Eurodeputetët u bënë thirrje përfaqësuesve të mediave në BE, që të mbledhin dëshmi për këtë propagandë dhe artikuluan shqetësimin e tyre, se disa shtete anëtare të BE-së për shkak të mungesës së sensibilitetit mbi aktivitetet ruse bëhen objekt i propagandës së intensifikuar ruse dhe dezinformimit.
Në BE një grup pune për komunikimin strategjik duhet t’i kundërvihet kësaj propagande. Rezoluta tani nxit, që ky grup pune të zgjerohet në një “njësi të plotë” brenda diplomacisë së BE-së dhe të pajiset “konform me personel dhe mjete financiare”.
Anna Fotyga, raportuese për rezolutën i tha “DW” se, duhet bërë më shumë për t’i demaskuar “mekanizmat e propagandës”, që fokusohen ndaj vendeve të veçanta anëtare, BE-së dhe Perëndimit në tërësi.
Margarita Simonjan, kryeredaktore e RT (ish-“Russia Today”), mendon në bisedë me “DW”, se rezoluta do të thotë ndërhyrje në lirinë e mendimit në BE: “Ky është një interpretim mjaft interesant i vlerave të shumëvlerësuara, kryesisht sa i përket shprehjes së mendimit. Në praktikë kjo do të thotë, që ndër mijëra sipërmarrje mediatike europiane të sulmosh një ndër zërat e paktë ndryshe”, thotë Simonjan në një deklaratë me shkrim. “Nëse ka diçka që e minon besimin publik ndaj institucioneve europiane, atëherë është pikërisht kjo”.

Metodat “mjaft të rafinuara”
Tomas Olivier, shef i firmës konsultuese për shërbimet informative me seli në Holandë Lowlands Solutions thotë se, fushata ruse e ka zanafillën e saj në faktin se Perëndimi vazhdimisht i ka nxjerrë në pah deficitet demokratike të Rusisë. “Propaganda ruse synon gjithmonë që të minojë vlerat demokratike të Europës, sepse Perëndimi sistemin politik në Moskë përgjatë historisë shpesh e ka damkosur si totalitar, të keq dhe jo njerëzor”, i tha “DW” Olivier.
Olivier shpreh dyshim që rezoluta do të ketë vërtet efekt ndaj strategjisë së mediave ruse dhe përkrahësve të tyre: “Shumë masa ruse janë mjaft të rafinuara dhe të kamufluara, sa nuk mund të luftohen ose të neutralizohen. Rezoluta nuk do të çojë në forcimin e vetëdijes apo në qëndrim aktiv, për t’iu kundërvënë me efikasitet fushatës së propagandës dhe dezinformimit”.

Perëndimi “i korruptuar dhe dekadent”
Në gusht qendra thintank në Uashington Center for European Policy Analysis publikoi një raport, që analizon tendencat e propagandës ruse dhe propozon strategjitë e përballjes me të. Në të thuhet: “Fushata ruse e dezinformimit në Europën Qendrore dhe Lindore i tejkalon kufijtë gjuhësorë dhe politikë. Ajo i shfrytëzon politikanët e protestës, që drejtohen kundër establishmentit, nga të dyja anët e spektrit politik, për t’i diskredituar qeveritë, politikën dhe institucionet e Perëndimit si BE-në apo NATO-n. Njëkohësisht konfirmohet mesazhi i Kremlinit”.
Instituti i Uashingtonit e quan portalin rus të lajmeve “Sputnik” si një vegël vendimtare për të përhapur në Perëndim botëkuptimin rus. “Ajo që vlen për Kremlinin, nuk është ekuiblibri, por e kundërta: tendenca të njëanshme kundrejt linjës së përgjithshme. Sputnik u jep hapësirë politikanëve të protestës dhe kundër establishmentit nga vendet e Europës Qendrore dhe Lindore, e këtë e bën sistematiksiht. Edhe kur citon politikanë të qendrës ky portal përzgjedh ato deklarata, që i përshtaten imazhit për një Perëndim të korruptuar, dekadent dhe antirus”, thuhet në raport.
Me rezolutën e miratuar tani, BE-ja paralajmëron në mënyrë të përsëritur për pasojat e mundshme të propagandës ruse. Megjithatë kjo rezolutë hap një kapitull të ri në përpjekjet për të fituar influencë ndaj informacionit dhe formimit të opinionit. Votimi i rezolutës në mbledhje plenare është planifikuar për në nëntor.

“Shqipëria në krye me Kryeministrit e qeverisë Edi Rama të jetë ndërmjetës në dialogun me Prishtinën”, ka thënë drejtori i Qendrës për Rajonalizim, Aleksandar Popov, citon “Presheva jonë” mediat e Boegradit.
“Edi Rama me Shqipërinë, e cila përveç në Shtetet e Bashkuara, ka ndikimin më të madh ndaj qeverisë së Kosovës dhe të qytetarëve të Kosovës, mund të luajnë rolin e ndërmjetësuesit në dialogun mes Beogradit dhe Prishtinës, duke bërë të mundur një normalizim të shpejtë të marrëdhënieve mes dy popujve”, tha për “Tanjug”-un drejtori i Qendrës për Rajonalizim, Aleksandar Popov.
Popov këto deklarata i dha në margjinat e Forumit të gjashtë të Sigurisë në Beograd.
Ai ka shtuar se deklarata e Ramës për një Kosovë të pavarur, dhe në lidhje me minierën e Trepçës, në fakt ka dërguar një mesazh te shqiptarët e Kosovës se në Shqipëri që do të qëndrojnë pas tyre, e cila, siç tha ai, duke u përpjekur për të fituar kredibilitet në mënyrë që “prapa perdes e bën pak më delikate”.
“Pengesa e qeverisë së Kosovës e marrëveshjes së Brukselit gërmon një gropë vetë, sepse ajo i eliminon vetes një perspektivë evropiane, duke menduar se për të bërë Serbinë. Ata duan të vijnë sa më shpejt në ‘listën e bardhë të Shengenit’, sepse kjo kërkohet prej tyre nga ana e qytetarëve, të cilët ndjehen si të ishin në geto”, tha Popov.
Ai shtoi se nëse shqiptarët e Kosovës do të vazhdojnë të pengohen në Bruksel bien dakord, kjo mund të tolerohet për një kohë, por konsiderohet, se më vonë mund të çojë në atë që ata që e kanë njohur Kosovën e pavarur të ndryshojnë vendim.

Gjykata Kushtetuese e Republikës së Kosovës në mënyrë të përshpejtuar duhet të trajtojë lëndën e proceduar nga Lista Serbe për ligjin mbi Trepçën dhe të japë një interpretim ligjor para datës 2 nëntor, pasi kjo datë është afati i fundit kohor kur Trepça mund të shkojë në likuidim, thonë ekspertë të çështjeve juridike dhe ekonomisë.
Ndërkohë që zyrtarë të qeverisë së Kosovës kishin deklaruar se likuidimi i Trepçës nuk mund të vijë në shprehje, pasi që Gjykata Kushtetuese mund t’i pezullojë të gjitha veprimet e tjera ligjore, qoftë zbatimin e ligjit apo masën e likuidimit, deri në nxjerrjen e interpretimit final.
Deputetët e Listës Serbe i janë drejtuar të enjten Gjykatës Kushtetuese të Republikës së Kosovës, me kërkesën për shqyrtimin e ligjshmërisë së miratimit të ligjit për Trepçën nga Kuvendi i Kosovës më datën 7 tetor.
Sipas Listës Serbe, me miratimin e ligjit për Trepçën, nuk janë respektuar interesat vitale të bashkësisë serbe dhe se ligji nuk është shqyrtuar në Komisionin parlamentar për Komunitete dhe Këshillin Konsultativ për Komunitet.

Edhe Gjykata Speciale në Beograd ka refuzuar kërkesën për anulimin e arrestit të drejtorit rajonal të Policisë së Mitrovicës, Nehat Thaçit. Gjykata serbe ka vendosur që Thaçi të qëndrojë në burg, edhe pse Kuvendi i Kosovës miratoi një rezolutë në të cilën i kërkohej Serbisë që ta lironte menjëherë Thaçin.
“Me vendimin e gjyqtarit për procedurë paraprake më 13 tetor është refuzuar propozimi i palës mbrojtëse të të pandehurit për përfundimin e arrestimit”, ka thënë zëdhënësja e kësaj gjykate, Tanja Koljensiç për mediat serbe.
Një gjykatë në qytetin e Nishit në Serbinë Jugore i caktoi masën e paraburgimit prej 30 ditësh drejtorit rajonal të Policisë së Kosovës, për rajonin e Mitrovicës, Nehat Thaçi.
Gjykata në Nish tha se masa e paraburgimit u vendos për shkak të “rrezikut të ikjes nga drejtësia”.
Thaçi është arrestuar më datën 28 shtator me vendim të Gjykatës së Lartë në Nish që sipas tyre kishte një fletë arrest të lëshuar në vitin 2010.
Thaçi më pas u transferua në Beograd më datën 10 tetor, ku u theksua se ndaj tij po bëhet një hetim si i dyshuar për vepër penale, terrorizëm.

Donald Trump i mohoi akuzat për ngacmim seksual dhe para mbështetësve të tij në Florida tha se ato janë plotësisht të rreme. Kandidati republikan për presidencën tha se, femrat që i bënë këto akuza ishin gjënjeshtare dhe po bëjnë reklamë, pasi mediat bashkëpunojnë me rivalen e tij Hillary Clinton.
Disa femra pretendojnë se Donald Trump i ka prekur në mënyrë të pahijshme apo i ka puthur kundër vullnetit të tyre. Në shfaqjen e tij të parë publike që pas këtyre akuzave, Trump tha se këto histori ishin një komplot kundër popullit amerikan nga media dhe politika. Miliarderi njujorkez tha se ka prova që tregojnë se akuzat nuk kanë bazë, por shtoi se do t’i publikojë ato në kohën e duhur.
Trump kërcënoi se do ta padisë gazetën “New York Times”, e cila publikoi akuzat e dy femrave. Gazeta reagoi duke thënë se është e gatshme dhe e mirëpret mundësinë që të mbrojë çështjen e saj në gjyq. Në debatin e fundit me Clinton, Trump deklaroi se kurrë nuk kishte puthur apo prekur femrat pa lejen e tyre, ndërsa theksoi se i respekton ato. Por, femrat që e akuzuan për këtë thanë se ishte pikërisht mohimi që ai bëri gjatë debatit që i shtyu të dilnin publikisht, pavarësisht se shumë vite pas incidenteve të tyre me Trumpin, në njërin rast, më shumë se 3 dekada.
Javën e shkuar, publikimi i një videoje në të cilën Trump bënte komente ofenduese për femrat, shkaktoi mjaft debat që përfshiu ashpër fushatën e tij. Megjithëse turmat në mitingjet e tij duket sikur shtohen, dhjetëra republikanë deklaruan se nuk mund ta mbështesin më dhe Trump është mjaft mbrapa Clintonit në sondazhe kombëtare dhe në rang shtetesh.

Sipas një raporti të publikuar dje nga një grup kërkimor privat në Shtetet e Bashkuara, Rusia ka nisur një fushatë me masa të fshehta ekonomike dhe politike për të manipuluar pesë vende të Evropës Qendrore dhe Lindore, për të diskredituar modelin liberal-demokratik të Perëndimit dhe për të dëmtuar marrëdhëniet ndëratlantike. Në raport thuhet se Moska është përpjekur të bëjë për vete një numër politikanësh që kanë simpati për Rusinë.
Sipas raportit, një ndër qëllimet e Rusisë është që, me anë të këtyre politikanëve, të dominojë tregjet e energjisë dhe sektorë të tjerë ekonomikë, si dhe të minojë masat kundër korrupsionit, për të ndikuar mbi qeveritë e vendeve si Bullgaria, Hungaria, Letonia, Serbia dhe Sllovakia.
“Në disa vende, thuhet në raport, ndikimi rus është përhapur aq shumë, saqë po sfidon stabilitetin kombëtar dhe orientimin perëndimor të vendit, së bashku me stabilitetin euroatlantik”.
Raporti është fryt i një studimi 16-mujor nga Qendra për Studime Strategjike dhe Ndërkombëtare në Uashington dhe Qendra për Studimin e Demokracisë në Sofje.
Studimi titullohet: “Skenari i Kremlinit: Si duhet kuptuar ndikimi rus në Evropën Lindore dhe Qendrore”. Botimi i tij përkon me një debat të paprecedent në Shtetet e Bashkuara rreth pikëpyetjeve se, a po përpiqet Rusia të ndërhyjë në zgjedhjet presidenciale me sulme kibernetike dhe me publikimin e e-mail-eve të fushatës së kandidates demokrate, Hillary Clinton. Fushata e zonjës Clinton ka thënë se Kremlini po përpiqet të ndihmojë republikanin Donald Trump për të fituar zgjedhjet.
Të premten, qeveria amerikane për herë të parë akuzoi zyrtarisht Rusinë për hakerim të Partisë Demokrate. Presidenti rus, Vladimir Putin i hodhi poshtë akuzat.
Të dielën, ministri i Jashtëm rus, Sergei Lavrov i tha televizionit shtetëror rus se, Shtetet e Bashkuara e kanë shtuar armiqësinë ndaj Moskës. Ai u ankua se NATO-ja vazhdon të lëvizë infrastrukturë ushtarake pranë kufijve të Rusisë me vendet e Evropës Lindore.
Zyrtarët amerikanë thanë se pajtohen me konstatimet e raportit mbi përfshirjen e Rusisë në Evropën Lindore.
Një prej tyre tha se, aktivitetet e Rusisë përfshijnë ryshfetet, propagandën dhe dezinformimin, për të minuar kundërshtarët dhe për të dobësuar institucionet perëndimore.
Sipas raportit, aktivitetet e Rusisë përfshijnë projektet gjigante, të tilla si kontrata prej 12.2 miliardë eurosh për të ndërtuar dy reaktorë të rinj bërthamorë në Hungari. Kushtet e kontratës janë të errëta, por ato synojnë të kultivojnë biznesmenë pro Moskës, të cilët më vonë fitojnë poste politike dhe mbrojnë interesat e saj.
Në Bullgari, thuhet në raport, prania ekonomike e Rusisë është aq e fortë, saqë vendi rrezikon mjaft të kapet nga Rusia.
Qeveri si ajo e Hungarisë dhe Greqisë, thotë raporti, simpatizojnë hapur Putinin dhe si pasojë, në Evropën Perëndimore dhe Qendrore është krijuar një kolonë e pestë, e cila e dobëson përgjigjen perëndimore ndaj agresionit rus.