22.5 C
Tirana
E hënë, 25 Gusht, 2025
type here...

Mashtrimi me formularët, të zgjedhurit do të burgosen

Në formularët e vetdeklarimit për dekriminalizimin, me dhjetra zyrtarë kanë mashtruar me të dhënat që kanë referuar mbi përfshirjen apo jo të tyre në vepra penale. Është një numër i konsiderueshëm zyrtarësh, deputetësh e kryebashkiakësh tw majtë, të cilët, të vetdeklarimet e tyre kanë mashtruar mbi veprat penale për të cilat janë akuzuar apo vuajtur dënimin në vitet e kaluara. Një numër i konsiderueshëm deputetësh, madje edhe ministrash rezultojnë të jenë ndjekur penalisht ndonëse i kanë shpëtuar dënimit me burg ndërsa nga ana tjetër shumë deputetë të njohur për preçedentët e tyre penalë kanë fshehur të dhënat duke kryer një tjetër shkelje që i çon ata drejt burgut.
Rasti tipik është ai i Elvis Rroshit, kryetarit të Bashkisë së Kavajës, i cili ndonëse ka deklaruar se është ndjekur penalisht në Gjermani e nga ana tjetër nuk mban mend arsyet përse, ka mashtruar në pjesën tjetër të vetdeklarimit duke fshehur dënimet penale që ka marrë nga Zvicra nën akuzën e trafikut të drogës.
Nga ana tjetër, Kryebashkiaku socialist i Poliçanit, Adriatik Zotaj, nuk e ka deklaruar të gjithë të shkuarën e tij në raport me hetimin apo shkeljen e ligjit në formularët e vetëdeklarimit që janë plotësuar nga zyrtarët në kuadër të ligjit për dekriminalizimin.
Zotaj ka fshehur arrestimin e 20 shkurtit 1997, për shkak se ka vjedhur një sasi kablli dhe 2 goma në Uzinën Mekanike të Poliçanit, si dhe ka tentuar të përdhunojë një shtetase nga ky qytet.  Zotaj është një nga prototipet e njohura pranë Ramës, i cili shpesh herë bëhet objekt i sulmeve të dhunshme në publik.
Probleme me ligjin ka pasur deputeti i Partisë Socialiste, Armando Prenga. Ai është përjashtuar nga kjo parti vitin e shkuar pas përplasjes me armë në Komisariatin e Kurbinit. Sikundër akuzohej nga opozita se ai më parë quhej Mondi Prengaj dhe e ka ndryshuar për shkak të së kaluarës kriminale me prostitucion në Itali, deputeti socialist i Laçit e pranon ndryshimin e emrit.
Por nga ana tjetër, bie në sy që ai nuk ka deklaruar asnjë hetim apo procedim nga autoritete të huaja, siç është akuzuar nga opozita. Në formula ai ka përfshirë vetëm ngjarjen e vitit të shkuar, për të cilën është ende në proces gjyqësor.
Gjithashtu, edhe Kryetari socialist i Bashkisë së Pustecit, Edmond Themelko rezulton se nuk ka treguar të vërtetën në plotësimin e formularit të vetëdeklarimit, që vjen në kuadër të ligjit për dekriminalizimin. Themelko pretendon se nuk ka qenë në hetim ose gjykim nga një autoritet i huaj për kryerjen e veprave penale, nuk është ndaluar dhe as arrestuar dhe as i është caktuar ndonjë masë sigurie.
Deputeti tjetër i PS-së, Parid Cara, rezulton të jetë dënuar nga një gjykatë në Itali për shkelje të Kodit Rrugor. Pjerin Ndreu, gjithashtu nga Partia Socialiste ka deklaruar se ka qenë nën hetim në vitin 2004 në Tiranë për përdorim me keqdashje të thirrjeve telefonike, por ka dalë i pafajshëm në Gjykatë. Ndërkohë, deputeti Tom Doshi, gjithashtu i përjashtuar nga Partia Socialiste deklaron se është dënuar me 1 vit burgim nga një gjykatë ushtarake shqiptare në vitin 1990 për akuzën “Shkelje e padenjë në shoqëri”.

Kryebashkiaku i Poliçanit ka fshehur arrestimin për tentativë përdhunimi

Kryebashkiaku i Poliçanit, Adriatik Zotaj, nuk e ka deklaruar të gjithë të shkuarën e tij në raport me hetimin apo shkeljen e ligjit në formularët e vetëdeklarimit që janë plotësuar nga zyrtarët në kuadër të ligjit për dekriminalizimin.
Zotaj ka fshehur arrestimin e 20 shkurtit 1997, për shkak se ka vjedhur një sasi kablli dhe 2 goma në Uzinën Mekanike të Poliçanit, si dhe ka tentuar të përdhunojë një shtetase nga ky qytet. Në formularin që Zotaj ka depozituar në KQZ, figurojnë vetëm dënimet e mëposhtme:
-Pranon se ka qenë i dënuar me 3 vjet burg nga Gjykata e Korçës në vitin 1991 për “shkelje të rregullave të qarkullimit rrugor”.
-Pranon se ka qenë i dënuar me 10 muaj burg nga Gjykata e Skraparit në vitin 2001 për “kundërshtim të punonjësve të rendit publik”.
-Pranon se ka qenë i dënuar me 1 vit burg nga Gjykata e Tiranës në vitin 2002 për kundravajtje penale. Në të gjitha rastet ndaj tij është caktuar masa e sigurisë “arrest me burg”.

Mashtrimi i kryetarit të Bashkisë së Pustecit

Kryetari i Bashkisë së Pustecit, Edmond Themelko rezulton se nuk ka treguar të vërtetën në plotësimin e formularit të vetëdeklarimit, që vjen në kuadër të ligjit për dekriminalizimin. Themelko pretendon se nuk ka qenë në hetim ose gjykim nga një autoritet i huaj për kryerjen e veprave penale, nuk është ndaluar dhe as arrestuar dhe as i është caktuar ndonjë masë sigurie.
Por në shkurt të vitit 2016, Prokuroria Speciale në Maqedoni përfshiu në hetimin për çështjen “Titaniku” edhe Edmond Themelkon, dhe u lajmërua zyrtarisht se Themelko u arrestua së bashku me zyrtarë të tjerë të lartë maqedonas. Themelko u akuzua për manipulim të zgjedhjeve në Maqedoni pasi rreth 400 banorë të kësaj bashkie që mbajnë dhe pasaportë maqedonase votuan në shtetin fqinj. Themelko fitoi postin e kryebashkiakut të Pustecit, në zgjedhjet lokale të vitit 2015, nën siglën e ASHE.

Klodeta Dibra nuk ka dorëzuar formularin e dekriminalizimit, humbet mandatin

Kandidatja për rektore të Universtitetit të Tiranës, dhe anëtarja e Këshillit bashkiak të PS, Klodeta Dibra nuk ka dorëzuar formularin e dekriminalizimit. Kjo bën që Dibra të humbasë mandatin e këshilltares në Bashki. Dibra u bë e njohur pasi kryekrimineli Shullazi kërcënoi kandidatin tjetër për rektor të Universitetit që të tërhiqej nga kandidimi për ti hapur rrugën kandidaturës së Ramës.

Arben Shahini

Përgjimet, Berisha: Hetime të përbashkëta nga Italia e Shqipëria

Ish-Kryeministri Berisha ka kërkuar hetime të përbashkëta nga Italia dhe Shqipëria për përgjimet dhe ekspertizë e plotë nga institute të pavarura të pajisjes së përgjimit. Përmes një postimi në profilin e tij në rrjetin social Facebook, Berisha ka reaguar në lidhje me letrën që ish Drejtori i Policisë së Shtetit italian i ka dërguar Prokurorisë së Përgjithshme shqiptare, pas një shkrese të dërguar prej kësaj të fundit.
Në reagimin e tij, Berisha sjell në vëmendje se i gjithë teksti i letrës së ish drejtorit italian është në sintoni të plotë me deklaratat e mbajtura nga Kryeministri Rama.
“Së pari, dua të shpreh respektin tim për ish-drejtorin e policisë italiane, Alesandro Panza për kontributin e tij në bashkëpunimin e suksesshëm bilateral dhe ndihmën e çmuar dhënë ndër vite policisë shqiptare. Letra e ish-kryepolicit të Italisë ngjason si e shkruajtur në Tiranë në zyrat e Edi Ramës. Ajo, jo vetëm që nuk zgjidh problemin e përgjimit, nuk ju përgjigjet pyetjeve të ngritura nga institucionet shtetërore dhe opozita shqiptare, por i bën më të mëdha dimensionet e këtij skandali.
Teksti i letrës përsërit fjalë për fjalë thëniet e autoriteteve zyrtare shqiptare të akuzuara, por problem i veçantë në letër është citimi që i bëhet nenit të marrëveshjes për imunitetin e anëtarëve të Interforcës italiane në Shqipëri.
Ky nen është i vërtetë, por ai, në një marrëveshje midis dy vendeve mike nuk nënkupton kurrsesi bllokimin e transparencës, aq më tepër kur bëhet fjalë apo ka akuza për regjistrimin e Presidentit të Republikës, kryetarit të opozitës, diplomatëve të vendeve mike” shprehet Berisha.
Ndaj ish kryeministri, ka kërkuar si të domosdoshëm nisjen e një hetimi të përbashkët të dy prokurorive, shqiptare dhe asaj italiane për çështjen e përgjimeve ndërsa sugjeron edhe kontributin e komisioneve parlamentare të sigurisë së dy vendeve për të bërë transparencën e gjithë ngjarjes.
“Këto akuza nuk mund të mbyllen me një letër, në të cilën është njëlloj si të thuhet mace është po nuk gjuan minj. Prandaj dhe mendoj që kjo letër bën edhe më të domosdoshme sa vijon:
1-Hetim të përbashkët nga Prokuroria e dy vendeve tona partnere eficiente në luftën kundër krimit të të gjithë kësaj afere
2-Ekspertizë e plotë nga institute të pavarura të pajisjes së përgjimit futur në Republikën e Shqipërisë në kundërshtim me ligjet e vendit.
3- Në rast nevoje, kontributin e komisioneve parlamentare të sigurisë së dy vendeve për transparencën e plotë” thekson Berisha në reagimin e tij.

Pikëpyetjet mbi pajisjen

Drejtoria e Doganave nuk e ka regjistruar pajisjen e përgjimit që u fut në Shqipëri më 11 mars 2016 nga dy ekspertë të policisë italiane nëpërmjet portit të Durrësit. Ajo nuk ka patur dijeni për ekzistencën e saj. Pajisja përgjuese ishte në bordin e një autoveture, siç thotë në një letër dërguar Prokurorit të Përgjithshëm Adriatik Llalla, kreu i policisë italiane Alessandro Pansa, një ditë më parë e la këtë detyrë. Më 11 mars 2016 u dërguan në Tiranë  dy specialistë të policisë italiane për të kryer trajnime të policisë shqiptare. Për trajnimet, personeli italian mori me vete një autoveturë të pajisur me një aparaturë të quajtur “IMSI CATCHER, me modelin Vortex prodhuar nga Ditta Ercom, të instaluar në bordin e saj”, thuhet në shkresën e Alessandro Pansa. Një aparaturë e tillë duhej të ishte regjistruar në zyrat e doganës dhe për më tepër, për përdorimin e saj duhet të ishte njoftuar edhe Prokurori i Përgjitshëm, thotë opozita. Një rasti i ngjashëm ka ndodhur në vitin 2015. Kjo pajisje përgjimi rezulton të ketë hyrë në territorin e Shqipërisë një vit më parë, është regjistruar në doganë, është njoftuar dhe prokurori i Përgjitshëm dhe në fillim të verës, me vënien në përdorim të saj, është arritur të kapet një i shumëkërkuar nga drejtësia shqiptare.  Po përse kjo pajisje nuk u deklarua në doganë kur u fut sërish një vit më vonë? Pëse nuk u ndoq e njëjta procedurë? Përse e mbajtën të fshehtë specialistët e policisë italiane? Shefi i policisë italiane, Alessandro Pansa, nuk jep sqarime në lidhje me këtë çështje në letrën për kryeprokurorin.

Në zyrën e Tahirit gjendet një çimkë

Ish kryeministri ka bërë të ditur dje se zyra e Ministrit të Brendshëm, Saimir Tahiri është përgjuar. Berisha bën të ditur se
“Në zyrën e Saje qorrit gjendet një çimkë! Të dashur miq, parmbrëmë, në zyrën e Saje qorrit, konkretisht në anën e pasme të grirëses së letrave gjendet një goxha çimkë! Kjo e ka tmerruar Saje qorrin, i cili ka dyshim kryesor:1- zëvendësministrin e LSI dhe 2-njërin nga asistentët e tij.  Por njerëzit afër tij flasin edhe për dy burime të tjera më të mundshme, njëri i huaj kurse burimi tjetër është intim! “ shprehet Berisha në postimin e tij.

Basha Fillimi i fundit për Perandorinë e Krimit

Kryetari i Partisë Demokratike, Lulzim Basha e ka cilësuar dje zbardhjen e rekordeve kriminale të deputetëve dhe kryebashkiakëve të majtë si fillimin e fundit të Perandorisën së Krimit. Në një reagim në profilin e tij në rrjetin social Facebook, Basha ironizon formularin e vetdeklarimit të Ramës, në të cilin ai ka ndryshuar emrin e tij nga Edvin në Edi. Basha theksoi se shumë prej banditëve të Ramës kanë fshehur të dhënat ndërsa paralajmëroi se ky është vetëm fillimi i fundit të pushtetit të inkriminuar.
“Edvini deri më 2002 apo Edi prej atij viti e këtej, duhej të kërkonte falje publikisht sot që doli në sytë e shqiptarëve se si ai ka zgjedhur me dorën e tij deputetë e kryetarë bashkie, që megjithëse kanë ndërruar disa emra, në secilin prej tyre kanë një krim. Nëse nuk e ka këtë minimum integriteti, të paktën sot të fshihej, duhej të mbyllte gojën. Por joooo, del e kakaris majë stivës së të zgjedhurve të inkriminuar, më të besuarve që ka. Dhe sfidon, a janë 19. Nëse janë fjala vjen 18, ai del i pastër. Po Frrokun vrasës, e quan? Po Ndokën tutor e rrëmbyes, e quan? Hoqi nga lista dy gra për ta bërë deputet.
Po Mondin e gjakderdhjes në derë të komisariatit, kush e bëri deputet? Apo e njeh për Armando. Të mos shkojmë tek Bushi e Roshi që nuk u dilte formulari për të treguar sa herë janë ndaluar nga policitë europiane për krime e drogë. Apo Tur Bardhi që edhe pse ka deklaruar plot 4 emra ka lënë edhe 2 emra pa deklaruar e ndaj e pret ndjekja penale dhe largimi njësoj. Ka shumë prej banditëve të Ramës që kanë fshehur të dhënat. Ne, bashkë me qytetarët do t’i gjejmë. Do ta pastrojmë politikën nga kriminelët. Po me të vërtetë ky është fillimi. Fillimi i fundit për Perandorinë e Krimit që ngriti në pushtet me dorën e tij Edi(vini)”.

Marrëveshja e Balilit me grekët për trafikun e drogës u bë në Fier

Gazeta greke “Kathimerini” ka botuar këtë të premte një tjetër shkrim për rrjetin e trafikut të lëndëve narkotike të drejtuar nga Klement Balili. Aty jepen pjesë nga dosja hetimore e policisë greke mbi përgjimet dhe mënyrën si funksiononte ky rrjet. Njëri nga shtetasit grekë të arrestuar për trafikun e 700 kg hashash ka pranuar se drogën e ka marrë në Shqipëri. Ai ka deklaruar se marrëveshja për këtë transport droge është bërë në Fier me njerëzit e Klement Balilit. Gazeta greke “Kathimerini”, në një shkrim publikuar lidhur me procesin gjyqësor pas arrestimeve të rrjetit të trafikantëve të drogës, pas të cilit u shpall në kërkim edhe Klement Balili, raporton se të ndaluarit i mohuan akuzat. Ata i quajtën marrëveshjet e dyshimta si plane tregtare për eksport karpuzi dhe sufllaqesh në Holandë me të akuzuarit kryesorë të trafikut të hashashit nga Shqipëria për në Belgjikë e Holandë.
Para hetuesve, shumica e tyre nuk pranuan të kenë lidhje me trafikun e drogës dhe u përpoqën t’i justifikonin lidhjet e tyre dhe “vajtje-ardhjet” në Greqi, Shqipëri, Holandë e Belgjikë si veprimtari të ligjshme tregtare. 59-vjeçari Th. A, ose “Tom”, i cili sipas Policisë greke koordinonte nga Belgjika lëvizjet e hashashit, u shpreh para hetueses se, “qëllimi im ishte që të koordinoja importin e produkteve bujqësore dhe ushqimore nga Greqia dhe vendet e treta në Holandë. Për këtë kisha ardhur në kontakt me njerëz në Holandë, si z. Dhimitër P, si dhe me tregtarë grekë si Z. ….., importues karpuzi nga Killini”.
Ndërkohë, 56-vjeçari M.S, i cili akuzohet se modifikonte kamionët me vende të fshehta për transportin e drogës, u shpreh në lidhje me udhëtimet e tij në Holandë dhe kontaktet me të bashkëakuzuarin: “Z. A, e njoh prej 2005 për shkak të punës sime, sepse merresha me importin e makinave. Prej qershorit 2014, shkova në Holandë që të punoja në një fast-food sufllaqesh dhe ta bleja nëse shkonte mirë. Unë kam para nga shitja e makinave”.
Tjetër qëndrim mbajti para hetueses 46-vjeçari J.A, i cili sipas dosjes hetimore, kishte detyrën e magazinimit të drogës në Greqi para se të shkonin në Europën Qëndrore dhe Perëndimore. Ai pranoi përfshirjen në trafikun e 673 kg hashash përmes Zakinthos dhe tha emrat e 3 shqiptarëve, me të cilët, siç u shpreh, kishte rënë dakord për transportin e drogës. “Në fillim të 2015, shkova në Fier të Shqipërisë, ku njoha disa zotërinj me emrat…. Vura re një lehtësim të madh  ekonomik, pasi, siç më thanë, kishin një rrjet zinxhir taksish dhe restorantesh. Më pyetën nëse isha i interesuar të bëja një transport “të veçantë”.
Ndërkohë 33-vjeçari K.P, i cili ishte shofer në disa raste transporti droge, tha: “Njoha J.A para 5 vjetësh. Më ofroi të hapja kompaninë TSAF TRANS në Petrici të Bullgarisë. Në fillim kompania kishte veprimtari të ligjshme, ndërsa më vonë më kërkoi të transportoja hashash nga Shqipëria në Holandë”.
Ndërkohë, krahu i djathtë i Klement Balilit, shtetasi grek Ksenofondos Anagnostopoulo ka hyrë disa herë në Shqipëri dhe e ka takuar ish-drejtorin e Transportit në Sarandë. Ksenofondos Anagnostopoulo ishte përgjegjës për sigurimin e shoferëve të rinj për transportin e lëndës narkotike drejt Gjermanisë dhe që kishte rolin e kujdestarit për të arrestuarit e grupit të Kelment Balilit. “Tv Klan” informoi se, Anagnostopoulo rezulton se ka qenë disa herë në Shqipëri. Sipas të dhënave, për herë të fundit, ai ka hyrë në Shqipëri nga pika kufitare e Kakavijës më 5 mars të këtij viti dhe ka dalë dy ditë më pas.
Kryesisht, hyrje-daljet në pikat kufitare, 52-vjeçari i bënte në këmbë dhe përgjithësisht, përdorte pikën kufitare të Qafë Botës, për të arritur më shpejt në Sarandë. Në informacionet e mbledhura, Anagnostopoulo rezulton se herën e fundit, në Shqipëri ka qëndruar në resortin e  Balilit, ku dyshohet se është planifikuar transporti nëpërmjet detit i 700 kg kanabis të papërpunuar.

Hetim i pasurisë së “Escobarit të Ballkanit”

Pasi u shpall në kërkim për llogari të autoriteteve greke, pasuria që Klement Balili zotëron në Shqipëri apo jashtë vendit është vënë nën hetim nga Prokuroria, Drejtoria e Parandalimit dhe Pastrimit të Parave dhe ILDKPI.
ILDKPKI pranon se ka urdhëruar dhe po kontrollon pasurinë e Balilit, i cili ka mbajtur për rreth dy vjet e gjysmë, detyrën e Drejtorit Rajonal të Transportit Rrugor Sarandë, raporton “Tv Klan”.
Balili thuhet se është pronar i një kompleksi të njohur turistik në Sarandë. Por në deklaratën e pasurisë, ai nuk ka të regjistruar një pronë të tillë.
Në deklaratën e fundit të dorëzuar më datën 21 mars të vitit 2015, rezulton se Balili ka para “cash” të kursyera, në vlerën e 3.3 milionë lekëve dhe 400 mijë lekë të përfituara nga shitja e një automjeti tip “Benz”. Ai ka deklaruar një banesë private në proces legalizimi në fshatin Stjar të Delvinës, me vlerë çmimi të papërcaktuar.
Ndërsa bashkëshortja e tij ka deklaruar se ka marrë hua pa interes, rreth 30 mijë euro, që djali i Balilit të fillojë shkollën jashtë vendit. I ashtuquajtur “Eskobari i Ballkanit”, Balili akuzohet si kreu i një rrjeti të trafikut ndërkombëtar të drogës, që transportonte sasi të mëdha marijuanë nga Shqipëria në drejtim të Greqisë, Italisë, Holandës e Belgjikës.

R.POLISI

Kush ka ndryshuar emrat dhe pse?

Pas publikimit të formularëve të vetëdeklarimit, në portalet dhe mediat shqiptare është parë një numër i madh deputetësh dhe zyrtarësh të lartë të administratës që kanë ndërruar emrin. Kjo ndoshta ka ardhur për shkaqe të ndryshme, por fakt është që lista e tyre është e gjatë.
I pari është vetë Edi Rama, Kryeministër i vendit. Sipas formularit të vetëdeklarimit në KQZ, deri në vitin 2002 Kryeministri rezulton të ketë mbajtur emrin Edvin dhe pas kësaj periudhe ai e ka ndërruar atë në Edi. Ndoshta për motive estetike.
Një tjetër kryetar partie po ashtu figuron të ketë ndryshuar gjeneralitetet, por këtë radhë mbiemrin. Bëhet fjalë për kreun e Partisë Republikane, Fatmir Mehdiu, i cili më parë është quajtur Fatmir Mehdihoxha.
Ilir Xhakolli, deputet i Partisë Socialiste në Korçë rezulton që më parë të ketë mbajtur emrin Ilirjan.
Robert Bitri, deputet i Lëvizjes Socialiste për Integrim në Fier, më parë është quajtur Albert.
Nard Ndoka, deputet i PDK-së me parë ka mbajtur emrin Mark Ndokaj.
Shkëlqim Selami, deputeti i LSI në Vlorë po ashtu ka ndryshuar mbiemrin, që më parë e ka pasur Selamini.
Ndërrime emrash ka edhe në radhët e kryebashkiakëve.
Elvis Roshi, kryetari i Bashkisë së Kavajës, deri në vitin 2002 ka mbajtur emrin Ervin Roshi.
Një tjetër kryebashkiak, ai i Hasit, Adem Lala, më parë është quajtur Dem Lala.
Por zyrtari rekordmen në ndryshimin e emrit është një kryetar bashkie.
Artur Bardhi i Laçit rezulton që ta ketë ndërruar katër herë emrin e tij.
Më parë ai ka mbajtur emrat Gentian Lila, Altin Tanushi dhe Gent Bushi.

Skandali në Jetimore, Prokuroria: Një nga të miturat shenja djegieje me cigare

Zbardhen të tjera detaje nga skandali i rëndë seksual që është zbuluar në Rezidencën e Fëmijëve në Shkodër, ku 3 vajza të mitura u abuzuan seksualisht. Burime nga Prokuroria bënë të ditur se në trupin e një prej vajzave janë konstatuar shenja djegie të bëra me cigare. Po sipas këtyre burimeve, vajza ka hematoma në disa vende në trup. Skandali thellohet akoma më tej, pasi ka dyshimet se abuzimi seksual ka ndodhur brenda Shtëpisë së Fëmijës.
Vajzat, 6, 8 dhe 11 vjeç kanë rrëfyer se janë abuzuar seksualisht brenda ambjenteve të institucionit nga fëmijë të tjerë më të rritur, të cilët sipas tyre i detyronin të shikonin edhe filma porno. Por veç kësaj në raportin e Prokurorisë theksohet se, fëmijët kanë treguar edhe për dhunë që i kalonte kapacitetet njerëzore. Rrahje me shkopinj dhe këmbë karrige nga fëmijë të tjerë edhe nga punonjës të jetimores. Vajzat e mitura kanë treguar se edukatoret largoheshin me orë të tëra nga institucioni.
Madje sipas tyre, ato dinin gjithçka për abuzimet seksuale, por ju thonin të mbyllnin gojën. Një prej të miturave u ka treguar oficerëve se në 2014, dy prej vajzave në Shtëpinë e Fëmijës janë larguar, duke qëndruar jashtë gjatë gjithë natës. Dhunë kjo e pohuar edhe nga një nënë rome. Ndërkohë, drejtori i këtij institucioni thotë se duhet pritur përfundimi i hetimeve. Ka qenë pikërisht institucioni i Avokatit të Popullit, ai që i ka referuar rastin Prokurorisë, e cila më pas nisi hetimet për këtë skandal të rëndë abuzimi, ngjarje e cila ka tronditur mbarë opinionin publik.
Ish-drejtoresha e Jetimores Albana Llazani kishte përgatitur mbrojtjen e saj pas hetimeve të nisura nga Prokuroria, duke i detyruar fëmijët që të mohojnë dhunën. Pas skandalit në Shtëpinë e Fëmijës në Shkodër, ku janë rezidentë 34 fëmijë të moshës 6-18 vjeç, “Ora News” ka mundur të sigurojë dy video të xhiruar nga ish-drejtorja e Qendrës, Albana Llazani.
Burime konfidenciale të “Ora News” thanë se videot janë bërë nga Llazani dy javët e fundit, pra pas inspektimit të Avokatit të Popullit, i cili ishte në qendër në 16 prill 2016.
Në njërën video shfaqet ish-drejtorja, aktualisht në postin e psikologes, që i kërkon informacion prindërve të një fëmije 6 vjeç për shenjat e djegies që ka në trup, pasi vajza është marrë në pyetje në Prokurori.

Arrest me burg” për ish-drejtoreshën dhe 4 punonjëset e Qendrës së Fëmijëve

Mbeten në qeli 5 punonjëset e Shtëpisë së Fëmijës ku janë abuzuar seksualisht tre fëmijë të mitur. Në seancën për caktimin e masës së sigurisë të zhvilluar me dyer të mbyllura, 5 punonjëset e arrestuara si përgjegjëse për këtë skandal kanë mohuar akuzat.
Gjykata e Shkallës së Parë Shkodër i ka lënë në burg 5 punonjëset e Shtëpisë së Fëmijës, mes tyre edhe ish-drejtoreshën Albana Llazani.
Në seancën gjyqësore që zgjati rreth 3 orë, e zhvilluar me dyer të mbyllura pa praninë e mediave dhe familjarëve, gjykatësi Hasan Selimi miratoi kërkesën e Prokurores së çështjes Arta Marku, duke e cilësuar të ligjshëm arrestimin e tyre.
Pesë të pandehurat kanë deklaruar se akuzat ndaj tyre janë të pabaza, ndërsa avokatët mbrojtës kanë theksuar se dëshmitë që paraqiten si provë janë kontradiktore, përfshirë dhe ato për dhunë seksuale të ushtruar nga djali i ish-drejtoreshës, pasi 15-vjeçari vuan nga autizmi dhe prapambetja e thellë mendore.
3 fëmijët që rezultojnë të jenë abuzuar seksualisht në këtë qendër janë vajza të moshave 6, 8 dhe 12 vjeç, ndërsa nuk kanë munguar rastet e vazhdueshme të dhunës fizike e psikologjike. Avokatit të Popullit, institucionit që sinjalizoi këtë skandal, iu deshën 2 muaj hetime për të zbuluar përmasat e frikshme dhe tronditëse të tij. Një skandal që ka ndodhur në institucionin ku presupozohej se duhej të ishin më të sigurtë dhe të mbrojtur se askund tjetër.

I ati i deputetit Armando Prenga në gjyq për grabitjen e një prone

Babai i deputetit të PS, Armando Prenga është vënë nën akuzë nga Prokuroria, pasi akuzohet për grabitjen e një prone. Prokuroria e Kurbinit bëri të ditur se ka përfunduar hetimet dhe ka dërguar për gjykim kërkesën kundër shtetasit Ndue Prenga, babai i deputetit Armando Prenga, i akuzuar për veprën penale të “Falsifikimit të dokumentave”, nëpërmjet të cilave ka ndërtuar dhe ka kërkuar regjistrimin në Hipotekë të një lokali dy¬katësh në qytetin e Laçit.
Prokuroria e Kurbinit ka nisur hetimin, në bazë të kallëzimit të personave që pretendojnë se janë trashëgimtarë të ligjshëm të truallit, në të cilin është ndërtuar biznesi privat i familjes Prenga. Nga hetimi ka rezultuar se Ndue Prenga, në vitin 2014, i është drejtuar Gjykatës me një padi civile, në bazë të të cilës kërkon njohjen e pronësisë së truallit ku është ndërtuar lokali, me pretendimin se kjo hapësirë është pronë shtet dhe e posedon atë që prej vitit 1992.
Organi i hetimit ka dërguar në Gjykatë kërkesën për gjykim ndaj Ndue Prengës. Prokuroria e Kurbinit bën me dije se, Prenga nëpërmjet falsifikimit ka ndërtuar dhe ka kërkuar regjistrim në Hipotekë të një lokali dykatësh në qytetin e Laçit. Hetimet ndaj tij kanë nisur në vitin 2014.
Në fakt, ishte vetë Prenga që ju drejtua me një padi civile Gjykatës, duke kërkuar njohjen e pronësisë së truallit ku ishte ndërtuar lokal, duke pretenduar se “kjo hapësirë është pronë shtet dhe e posedon atë që prej vitit 1992. Për të provuar pretendimet e tij, i pandehuri Ndue Prenga ka dorëzuar në Gjykatë gjatë procesit civil edhe lejen e sheshit të ndërtimit dhe lejen e ndërtimit, të cilat sipas tij i ka marrë nga autoritetet lokale në vitin 1996”.
Nga ana tjetër, sipas Prokurorisë, pjesë e procesit gjyqësor ishte edhe familja Nokaj, e cila pretendon se është trashëgimtare e ligjshme e truallit ku është ndërtuar lokali. Ishte kjo familje që ka bërë kallëzim në Prokurorinë e Kurbinit, duke deklaruar se dokumentet ishin të falsifikuara.
Sqarimi i Prokurorisë së Kurbinit:
Prokuroria e Kurbinit ka zhvilluar hetimin, në bazë të të cilave ka rezultuar e provuar me aktin e ekspertimit se, dokumentat e paraqitura në procesin civil nga ana e shtetasit Ndue Prenga, janë tërësisht të falsifikuara.
Me aktin e ekspertimit teknik-grafik, datë 01.04.2016, është arritur në konkluzionin se:
Nënshkrimi tek rubrika “Kryetari i Këshillit të Bashkisë” në dokumentin për dhënie shesh ndërtimi nr.9 datë 24.05.1996, z.Ndue Prenga, është tërësisht i falsifikuar.
Nënshkrimi te rubrika “Kryetari i KRRT Kurbin”, në dokumentin “Leje ndërtimi nr.6 datë 06.06.1996, nuk është nënshkruar nga kryetari i asaj kohe, shtetasi B. R. Shenja e vulës në këtë dokument është tërësisht e falsifikuar.
Nënshkrimi te rubrika “Miratohet P/KRRT Kurbin, B.R., në dokumentin planvendosje “bar-bufe” për Ndue Prenga, nuk është shkruar nga shtetasi B.R. Nënshkrimi në këtë rubrikë është tërësisht i falsifikuar. Shenjat e vulave në këtë rubrikë, për dokumentin plan-vendosje janë tërësisht të falsifikuara.
Nënshkrimi te rubrika “Miratohet P/KRRT Territorit Kurbin Kryetar” në dokumentin “studim urbanistik pjesor “bar-kafe” për Ndue Prenga, është tërësisht i falsifikuar.
Falsifikimi i dokumenteve të mësipërme, është realizuar nëpërmjet fotokopjimit të tyre me anën e fotokopjes me ngjyra.
Në këto kushte, Prokuroria e Kurbinit e akuzon të pandehurin Ndue Prenga për konsumimin e veprës penale “Falsifikimi i dokumenteve”.

Prokuroria nis hetimin pasuror për vëllezërit Poti të arrestuar në Belgjikë

Drejtoria e Pastrimit të Parave pranë Policisë së kryeqytetit, rihap hetimin pasuror ndaj dy vëllezërve Dhimitër dhe Xhevahir Poti, të arrestuar në Belgjikë si pjesë e grupit të trafikut të drogës, ku dyshohet se është përfshirë edhe Klement Balili. Bëhet e ditur se Drejtoria e Pastrimit të Parave, ka referuar një material voluminoz pranë Task-Forcës së Prokurorisë së Tiranës, duke kërkuar rihapjen e hetimeve të pezulluara që në vitin 2015 po nga kjo prokurori. Burimet thonë, se pas arrestimit të tyre në Belgjikë si të dyshuar për trafik droge, ka nis hetimin pasuror në Shqipëri, pasi mendohet se këtu ata kanë investuar dhe fshehin pasuri të paligjshme. Për këtë fakt, hetuesit thonë se është kërkuar nga prokurori Armand Gurakuqi të rihapë çështjen e pezulluar.
Në vitin 2015 mësohet se hetimi pasuror ndaj vëllëzërve Poti është pezulluar për shkak të mos ardhjes së përgjigjes nga autoritet greke. Në vendimin e pezullimit, thuhet se është dërguar një letër-porosi në Greqi, ku kërkohet identifikimi i origjinës së parave që vëllezërit kuksianë kanë dërguar në Shqipëri nëpërmjet bankave të nivelit të dytë. Sipas akuzës, në mars të 2008 Prokuroria ka hap çështje penale ndaj kompanisë së barnave “Chim Prod” të vëllezërve Poti, pasi gjatë viteve 2007-2009, kjo kompani ka pranuar transferta parash nga Greqia të shumës që kap shifrën e 826 mijë euro. Këto para kanë ardhur në llogarinë bankare të kompanisë farmaceutike CHIM Prod dhe në llogarin personale të Dhimitër Potit.
Në dosjen e pezulluar, thuhet se më 3 gusht të vitit 2007 në llogaritë bankare të kompanisë dhe Dhimitër Potit janë transferuar 160 mijë euro. Më pas, më 31 dhjetor të 2008 një shumë tjetër prej 80 mijë eurosh. Dhe tre transferta të ndryshme brenda vitit 2009, në shkurt, prill dhe shtator Dhimitër Potit i janë derdhur në llogarinë e tij personale një shumë në total prej 586 mijë euro. Këto para, u sekuestruan paraprakisht nga Prokuroria, por më pas u liruan, pasi autoritetet greke nuk sollën të dhëna për origjinën e tyre. Por pavarësisht kësaj, me kërkesë të Policisë, organi i akuzës ka rihapur çështjen, duke nisur verifikimin e llogarive bankare dhe pronave të familjes Poti në Shqipëri. Këto prona dhe pasuri, në momentin që do të evidentohen, thonë burimet do të kërkohet bllokimi i tyre.
Vëllezërit Poti, sipas Policisë greke, janë pjesë e rrjetit të trafikut të drogës të drejtuar në Shqipëri nga personi tashmë i shpallur në kërkim Klement Balili. Për llogari të këtij rrjeti, Policia greke dyshon se këta të dyshuar brenda dy viteve kanë trafikuar drejt vendeve të BE-së rreth 2400 kg hashash, 100 kg cannabis çokollatë, 24 kg kokainë dhe 1.2 kg heroinë.

Identetet e trukuara të mazhorancës

Dikur Edvin, tani Edi Rama. Dikur Ervin, tani Elvis Roshi. Dikur Gentian Lila dhe Gent Bushi, tani Artur Bardhi. Dikur Mondi Prenga, tani Armando Prenga. Dikur vrasës dhe trafikantë, tani kryeministër, deputetë dhe kryetarë bashkish. Kjo është Rilindja e krimit në Shqipëri.
Beteja disa vjeçare e Partisë Demokratike për dekriminalizimin dëshmoi se nuk ishte një luftë thjesht politike, por përpjekja më serioze që është bërë ndonjëherë në Shqipëri për të pastruar politikën nga krimi. Surprizat nuk kanë të sosur, por ajo çfarë i bashkon rilindasit është e kaluara e tyre e rënduar kriminale. Aq të nxira i kanë dosjet e tyre personale me krime të kryera në Shqipëri dhe në Europë, aq turp ju vinte për emrat që mbanin, sa kanë vendosur të shuajnë edhe emrat e tyre nga rekordet civile.
Kjo bandë kriminelësh që erdhi në pushtet në 2013, aq seriozisht e ka përjetuar ndryshimin e emrave që ju kishin vënë prindërit, sa mendonin se me këtë do të fshinin një herë e mirë të shkuarën e tyre kriminale. Jo krejt pa kuptim, paska qenë edhe emri që i vunë pushtetit të tyre rilindje. Në trurin e sëmurë të këtyre banditëve, ndryshimi i emrave është përjetuar si kalimi i ylberit.
Ndryshimi i emrave dhe kalimi nga burgjet në zyrat e shtetit, në të vërtetë nuk ka ndryshuar as Ramën, as Roshin, as Prengën, as Bardhin. Njësoj vrasës, njësoj grabitës, njësoj trafikantë, njësoj të degjeneruar kanë mbetur. Krimet e tyre, pavarësisht se kanë grabitur vota dhe kanë blerë ofiqe, kanë mbetur njësoj të rënda.
Vetë arkitekti i Rilindjes së krimit, kryeministri Edi Rama, dikur Edvin Rama është akuzuar publikisht nga Fatos Nano, paraardhësi i tij, ish-kryeministër dhe kryetar i Partisë Socialiste. Nano nuk e ka fshehur kurrë krenarinë për faktin se nxorri Edvin Ramën nga poshtë urave të Parisit ku trafikonte veprat e artit dhe e bëri ministër. Kjo akuzë është qarkulluar pafundësisht ndaj Edi Ramës, dhe është e sigurtë se ndryshimi i emrit nuk ka patur të bëjë vetëm me urrejtjen që Rama kishte ndaj të atit, që Mero Baze e ka provuar përmes transkriptimit të vendimit të gjyqit të divorcit.
Arsyeja kryesore e ndryshimit të emrit nga Edvin në Edi Rama duhet të hetohet gjatë kohës së qëndrimit në Francë. Rreth 20 vite më parë, gjatë viteve kur ai jetonte në Paris, përdorimi i drogës, homoseksualizimi dhe një sërë aspektesh të stilit të jetesës së Ramës cilësoheshin krime dhe dënoheshin nga ligjet franceze dhe Europiane.
Evidentimi i kriminelëve në politikë dhe në administratë është një prej fazave më të rëndësishme të dekriminalizimit. Shumicën e këtyre vrasësve dhe trafikantëve që Rama i katapultoi në krye të shtetit, shqiptarët i kanë njohur fare mirë dhe PD i ka denoncuar sistematikisht në përpjekjen e vet për të shtrënguar koalicionin e qelbësirave të pranonin votimin e dekriminalizimit.
Verifikimi është faza edhe më e rëndësishme e këtij ligji. Shumë prej këtyre kriminelëve mendojnë dhe mbajnë shpresë se identitetet e rreme dhe të ndryshuara mund t’i mbajnë ende në karrigen e kryeministrit, deputetit dhe kryebashkiakut. Verifikimi do të tregojë se sa të tjerë kanë gënjyer dhe kanë fshehur të dhënat në formularin, pasi në formularë shumë prej tyre nuk japin shpjegime, hiqen sikur i ka zënë skleroza, apo si modernë. Ta bësh emrin Edi, Elvis, Artur, Armando, i hap pak më shumë punë, prokurorëve shqiptarë, apo homologëve të tyre në Francë, Itali dhe Gjermani, por nuk do të thotë se nuk je njësoj vrasës, trafikant, përdhunues, apo kriminel i detyruar nga Ligji dhe Kushtetuta që të lësh detyrën, të lësh zyrat e shtetit që i kanë uzurpuar me para dhe krime.
Edvin Rama, si i pari mes të barabartëve i zgjedhur nga bota e krimit, duhet të largohet. Askush nuk mund të besojë se emrin e ndryshoi, pasi vetëm dhe thjesht kishte inat me babi Kristaqin, askush nuk mund të besojë se e ndryshoi emrin, pasi donte të largohej nga mendimet e liga që i jepte gruaja apo djali i parë. Fatos Nano na tha se e mori nga papafingot e Parisit me thonj të paprerë, pasi e gjeti në një gjendje të mjerueshme, duke shitur ikona të vjedhura poshtë urave. Fatos Nano na ka thënë shumë për të verifikuar se çfarë krimesh dhe dënimesh ka marrë Edvin Rama në Francë. Edi Rama na tha se e ndryshoi emrin në vitin 2002, tre vite pasi Nano e solli në Tiranë si Edvin, me thonj të paprerë, i palarë, por edhe trafikant i ikonave të vjedhura.

Ke fat, por e ke të zi…

Albana VOKSHI

Prej disa ditësh tashmë, mendjet e të gjithë shqiptarëve janë “mpirë” nga lajmet tronditëse që po vijnë njëri pas tjetrit.
Dëgjuam që në Sarandë, paskë kishim pasur Eskobarin e Ballkanit, i cili edhe sfidoi me intervistat pompoze nga zyrat e shtetit. Emri i Shqipërisë doli në të gjitha mediat prestigjioze që na kishin në faqe të parë, si rrallë herë ishim në vendin e parë në Ballkan, por për trafik droge. Si thonë? Ke fat, por e ke të zi… Shqiptarisë nuk iu evidentua ndonjë tipar i mirë, por u përfol si vendi që kishte prodhuar një Eskobar të dytë që mund edhe t’ja kalonte atij të parit.
Të njëjtët media prestigjioze shkruajtën që ishte nën mbrojtjen e politikës, ndaj nuk e arrestonin. U zemërua qeveria dhe i kërkoi gazetave që ta përgënjeshtronin. Filloi loja me pasa, jo i imi, jo i joti, jo i PS, por i LSI, financoi apo nuk financoi… e sa ta zgjidhnin mediat vendase apo qytetarët këtë puzzle të çështjes Balilit iu dha mjaftueshëm kohë dhe mundësi që të zhdukej.
Policia nuk hezitoi të arrestonte babain e 3 fëmijëve vetëm sepse rregulloi çatinë e shtëpisë që fëmijët e tij të kishin një strehë të sigurt.
Policia dhe institucionet nuk hezituan të shkatërronin një familje të tërë, e cila pati fatkeqësinë më të madhe të humbjes së dy fëmijëve që po shkonin të takonin babain e tyre në burg.
Por e njëjta polici nuk gjeti mjuaftueshëm fakte për të arrestuar Eskobarin e Ballkanit. Si në rastin Frroku, sistemi TIMS nuk funksionoi, çdo dënim dhe precedent u fshi nga file i tij, Eskobari i Ballkanit tani është i pastër si qelibari, më i pastër se shumë prej jush në këtë sallë, e më tej u ndihmua prej jush të arratisej deri në Kubë siç raportojne disa burime.
Por pa a e marrë veten nga Eskobari që u “arratis”, mediat denoncuan një lajm skandaloz: një pajisje përgjuese ishte futur ilegalisht në Shqipëri, po shfrytëzohej nga Rama prej muajsh për të përgjuar… prej muajsh tashmë. Për Balilin u tha s’ka fakte, s’ka komunikime e përgjime, por për ne, ju siguroj Rama na është futur në çdo shtëpi, e keni prezent në çdo orë të ditës e kudo. Lista prej 375 vetësh e publikuar nga Berisha përfshin politikanë, gazetarë, akademikë, biznesmenë, të cilët ose përbëjnë rrezik ose interes për Ramën. Kjo sjellje s’është gjë tjetër veçse diktatoriale. Të gjithë shqiptarët e moshës mbi 40 vjeç i kanë përjetuar dhe i mbajnë mend metodat e sigurimsave që të hynin në shtëpi me çimka regjistruese.
Por teoricientët rilindas, që këto ditë po merren me zbardhjen e përgjimeve të kundërshtarëve politikë e atyre mediatike, u bënë hit edhe në “Disco lajm” me “meritokracinë Shukriu”. Por siç ka ndodhur me të gjithë abuzuesit e rilindjes, jam e sigurtë që edhe Shukriu do të riintegrohet në Bashkinë e Veliut.
A ju kujtohet drejtoresha këngëtare e qendrës së fëmijëve 3-6 vjeç në Shkodër? Pas rastit të abuzimit me fëmijët në atë qendër, doli ministri Klosi dhe deklaroi se drejtoresha dhe dy kujdestarë janë pushuar nga puna. Po a e dini ku është sot drejtoresha këngëtare? Pasi e bënë anëtare të Asamblesë së PS, tani është emëruar nëndrejtoreshë e Drejtorisë së Konvikteve në Bashkinë Tiranë. Ajo tani është edhe promovuar e do të punojë përsëri me fëmijë të një moshe shumë delikate, me adoleshentë. E keni kthyer Bashkinë Tiranë se punishte riciklimi abuzuesish. I hiqni gjoja nga pushteti vendor dhe i emëroni në Bashkinë e Tiranës.
Pra, cilët janë zanatet që kryesojnë në listën e Rilindjes ku ka vende për t’u punësuar?
Fillon me zanatin: Kriminel?, pastaj abuzues me fëmijë, abuzues me gra; abuzues me postin e punës, trafikant droge, trafikant njerëzish e kështu lista vazhdon më tej me disa nga zanatet që merren nga arsimi profesional për të cilin keni dhënë shumë mbështetje e fonde.
Ishte tronditës lajmi për dhunën fizike dhe seksuale të ushtruar në Qendrën Rezidenciale të Fëmijëve Shkodër. Përshëndes punën e Avokatit të Popullit dhe të Bashkisë Shkodër për zbardhjen e këtij rasti skandaloz. Për ironi, të gjithë dhunuesit i kishin kaluar testet e ministrisë. ?Pra, sistemi i shërbimit social që ju po implementoni ka dështuar, nuk po funksionon.
Prej shumë kohësh po ulërasim sepse mekanizmat mbrojtës dhe koordinues për gratë e fëmijët janë shkatërruar e nuk funksionojnë.
Opozita është e gatshme dhe e ka prioritet ngritjen e një sistemi funksional në mbrojtje të grave e fëmijëve. Po a është ky prioriteti i qeverisë Rama? Dyshoj shumë për këtë.
Pothuajse e gjithë shoqëria reagoi nëpërmjet rrjeteve sociale, të gjithë e dënuan rastin, vetëm dy aktorë nuk reaguan, ende sot nuk kanë reaguar: shoqëria civile, (shoqatat që trajtojnë çështjet e të drejtave të grave) dhe Kryeministri Rama. E keqardhur për mosreagimin e organizatave jo qeveritare, të cilat minimalisht mund të tregonin solidaritet e të krijonin për denoncuesen një bazë sigurie e mbrojtjeje për aktin e saj të guximshëm. Por aspak e suprizuar nga Rama, i cili për çdo budallallëk komenton në faqen e tij në FB, foli edhe për homofobinë që sigurisht e ka prioritet më të madh, por nuk foli për familjen që shkatërroi në ditën ndërkombëtare të familjes. Nuk foli për mijëra familjet shqiptare që i ka rrënuar dhe i ka çuar në varfëri ekstreme. Nuk foli as për të zgjedhurin e tij në Dibër.
Rama premtoi 300 mijë vende pune. Sot, na ?tingëllon ironik deri në acarim slogani bajat i Kryeministrit: vende pune ka, por s’ka zanatçinj.
Sot, bazuar edhe në rastin Shukriu dua të pyes Kryeministrin:
– Çfarë zanati duhet të kishte vajza 20-vjeçare që të punësohej nga Shukriu që ti e përzgjodhe më shumë kujdes si drejtimin e duhur për Dibrën?
– Çfarë zanati duhet të kishte gruaja dhe fëmija e saj 14-vjeçare në Sarandë, të cilës sekretari i partisë i kërkoi favore seksuale në këmbim të një vendi pune për nënën?
– Çfarë zanati duhet të kishin vajzat dhe gratë e Lushnjës që Luiza e Partisë t’í emëronte në arsim?
Vende pune ka, por s’ka zanatçinj – thotë Rama. Vallë për cilin zanat po flet Kryeministri?
– Po cilin zanat apo kriter duhet të plotësonin ato mijëra gra që ju i hodhët në rrugë në shkelje të ligjit për nëpunësin civil?
– Cilin zanat duhet të kenë mijëra gratë që po i hedh në rrugë me të ashtuqujturën reformë spitalore e të cilat mbartin secila një histori më vete profesionalizmi, por të lëna në varfëri e vuajtjeje?
Një grua dje nga Tepelena u shtrua me urgjencë në QSUT Tiranë sapo mori vesh lajmin që u pushua nga puna. Nënë e dy fëmijëve që s’do të ketë me se t’i ushqejë ata. Po çfarë zanati duhet të ketë kjo zonjë për të mbajtur vendet e punës?
Sot, gjithsecila nga të pushuarat nga puna mund të jenë viktima e radhës e ngacmimeve seksuale në këmbim të rikthimit në vende pune?
Punë ka, por zanatçinj nuk ka…- vazhdon thotë Rama…
Gjatë fushatës elektorale për zgjedhjet vendore, Rama vajti disa herë në Dibër, bëri fushatë për Shukriun që ia sugjeruan miqtë biznesmenë, të cilët i siguruan që ai mund t’i blinte votat. S’kishte rëndësi çfarë mendonte partia, as kishte rëndësi as çfarë mendonin strukturat e partisë, s’kishin rëndësi çfarë kontribute, madje as opinioni i publikut dibran për Shukriun s’pati asnjë rëndësi. Shoku biznesmen i kishte qepur pazaret. Rama kërkoi votat e PS-istëve, LSI-stëve, qendëristëve, madje Rama guxoi pa iu dridhur syri, të kërkonte ?edhe votat e grave dibrane duke i thënë: Mos votoni për pelihvanin e madh, por votoni për Shukriun, se Shukriu është drejtimi i duhur edhe për gratë dibrane. Ndaj Rama sot i detyrohet një ndjesë të madhe dibranëve dhe një ndjesë akoma më të madhe grave dibrane.
E meqë jemi të fenomeni “Shukri” a e dini të nderuar kolegë se cili ishte dënimi që merrnin pushtetarë si ai në vitet ’30 për abuzim me postin dhe lidhje jomartesore?
Po i referohem një dokumenti ku pasqyrohen rastet kur qeveria parasheh ashpërsimin e ligjit ndaj këtyre fenomeneve:
“?Ju njoftojmë se Prefektura e Tiranës, na raporton se si në bashkinë e kryeqytetit dhe në komunat e qarkut të saj janë vërtetuar raste të bashkëjetesës ilegale, shkelje kurore, më tepër mashtrime me fejesën, me qëllim që të bëhet tregti me femrat, në dëm të moralit dhe të qetësisë publike.
Prefektura e sipërpërmendur posaçërisht në rastin e fundit, propozon internimin e disa personave si masë më efektive respektive, për shkak se gjykimi i çështjeve të paraqitura ndër gjyqet, përveç se vonojnë, ngadonjëherë për mungesë provash dalin të pafajshëm.
Mirëpo siç duket, meqenëse ligji relativ për fajet asodore, nuk parasheh masa të atilla, ju shkrue Prefekturës me fjalë që urdhërojnë organet përkatëse për procedimin e tyne dhe reformimin e akteve të Drejtësisë, për t’u bërë ndjekës në bazë të ligjeve sot në fuqi”.
Fenomeni Shukriu nuk është aspak i shkëputur. JO! Të gjithë jemi koshientë për këtë. Ai në fakt është fytyra dhe modeli i kësaj qeverie të mbërthyer nga korrupsioni, kriminaliteti dhe imoraliteti.
Fenomeni Shukriu është modeli politik i promovuar nga Rama: nuk kanë rëndësi vlerat, por ka rëndësi sigurimi i votave me çdo lloj mënyre (blerje, presion etj.) për “blerjen” e pushtetit edhe për 4 vitet e ardhshme.
Pra, cili është modeli rilindas i Ramës?
Në Parlament Rama solli dhjetëra persona me precedentë penalë në Shqipëri apo jashtë. Askush në botën demokratike nuk arrin edhe në imagjinatën më të shfrenuar të mendojë që Rama mund të sillte në Parlamentin e Shqipërisë, një vend mu në mes të Europës, një kaubojs që qëlloi si në filmat western mbi njerëz brenda një komisariati policie e provat më vonë të zhdukeshin.
Askush, as në imagjinatën më të shfrenuar nuk mund të konceptojë që një deputet i Kuvendit, me bekimin e Kryeministrit të marrë 150 tendera publikë në abuzim flagrant me postin e tij.
Por, a mbaron këtu?
Jo, ndër 46 emrat e PS për pushtetin lokal, Rama përzgjodhi me kujdes njerëz si Roshi, si Shukriu, etj., lista e emrave të kryebashkiakëve të PS me probleme me drejtësinë vazhdoi, gjatë… Roshi ishte viktima e parë e dekriminalizimit, të tjerë do të bien si ai shumë shpejt pas tij.
Dua të ndaj me ju një artikull të shkruar nga z. Ledio Braho, avokat në Dhomën e Avokatisë që e ka analizuar Shukriun si kazuz në të drejtën e punës. Çfarë shkruhet në këtë artikull?? Po citoj:
“Për të gjithë ata punëmarrës marrëdhëniet e punës të të cilëve rregulloheshin nga Kodi i Punës, me apo pa procedura dhe afate njoftimi të respektuar nga Bashkia Peshkopi, që nga dita e sotme kanë të drejtë t’i drejtohen Gjykatës Administrative të Tiranës me padi me objekt ‘Dëmshpërmblim për zgjidhje të kontratës së punës pa shkaqe të arsyeshme në masën e një viti page dhe rikthim në vendin e punës’. Një e drejtë e tillë lind pikërisht për shkak të nenit 1s6 të këtij Kodi që rrallë herë mund të jetë aplikuar në jurisprudencën shqiptare për shkak të specifikës së motivit abuziv. Në rastin konkret, jemi në kushtet e motiveve të pandashme nga personaliteti i punëmarrësit, por që nuk kanë lidhje legjitime me raportet e punës siç janë seksi, mosha, gjendja civile dhe gjendja shpirtërore. Normalisht çdo mashkull i punësuar në Bashkinë Peshkopi mund ta ngrejë si pretendim se është larguar nga puna se nuk është femër. Po ashtu çdo femër mbi 20 vjeç mund të ngrejë si pretendim faktin se nuk është 20 vjeç dhe kjo nuk përputhej me shijet e kryetarit për të vazhduar më tej me motive si gjendja civile dhe ajo shoqërore që doemos duhet të plotësojnë disa kritere specifike për t’u përputhur sërish me shijet e kryetarit.
Shukriu, me veprimet e tij është i dënueshëm moralisht dhe ligjërisht, por të paktën do të vërë një standard në jurispudencën e të drejtës së punës, rasti tipik i zbatimit të nenit 146 të Kodit të Punës (ndryshe Neni ‘Shukriu’)”.
Gjej rastin edhe një herë të denoncoj me neveri, edhe në emër të Forumit të Grave të PD, abuzimet në zyrat e shtetit me gratë e vajzat shqiptare.
Kemi denoncuar pushimet e padrejta nga puna për motive politike të mbi 3000 grave dhe vajzave, në mes tyre shumë kryefamiljare, nga administrata publike.
Po denoncojmë pushimet me motiv politik të rreth 1000 grave nga sistemi spitalor, pothuajse të gjitha me probleme sociale.
Gruaja shqiptare është viktima më e madhe e qeverisjes së Edi Ramës. INSTAT informon që papunësia ndër gra e vajza është 35-50% dhe vazhdon të rritet çdo tremujor. Rritja e taksave qendrore e vendore, mbyllja e bizneseve, rritja e çmimeve, mohimi i të drejtave kushtetuese për arsimim dhe shërbim shëndetësor, prishja e mekanizmave të mbrojtjes së të drejtave të grave e kanë përkeqësuar statusin e gruas në shoqërinë shqiptare.
Rama premtoi 300 mijë vende pune?, por solli diskriminim dhe përndjekjen gjinore.
Rama premtoi 300 mijë vende pune, por ngriti një sistem të tërë paralel korruptiv që ofron zgjidhje apo vende pune në këmbim të favoreve të llojeve të ndryshme.
Sot, dua t’i bëj thirrje aktivistëve të të drejtave të grave të mos heshtin, por të mbështesin kurajon e grave dhe vajzave që guxojnë të denoncojnë rastet abuzive.
Sot shoqëria duhet të dalë nga indiferentizmi e të reagojë në mbrojtje të grave dhe vajzave që abuzohen verbalisht, psikologjikisht apo seksualisht në zyrat e rilindasve.
I bëj thirrje organit të akuzës dhe drejtësisë të hetojnë dhe të vënë para drejtësisë të gjithë abuzuesit e grave dhe fëmijëve.
Dua ta mbyll fjalën time me një fjali në një postim të fundit të Joe Biden:
“A job is about a lot more than a paycheck. It’s about dignity and resket!!”.

1...8 2058 2068 207...8 382Faqja 8 206 nga 8 382

Kryesore

Continue to the category
Më shumë
© 2024 Rilindja Demokratike Euroatlantike