17.5 C
Tirana
E diel, 13 Korrik, 2025
type here...

Prokuroria: Letra nga Italia për pajisjen e përgjimit e pavlerë, nuk ka firmë dhe vulë

Prokuroria e Tiranës e cilëson të pavlefshme përgjigjen që ka ardhur nga Italia pas hetimeve të nisur në bazë të indicieve se një pajisje e paligjshme po përdoret për të përgjuar krerë të institucioneve kryesore në kryeqytet. Burime të “Ora News” nga Prokuroria e Tiranës deklarojnë se “letra e ish-drejtorit të policisë italiane, Alesandro Panza, në formën e mbërritur në Prokurorinë Shqiptare, nuk mund të konsiderohet si material proçedurial”. “Shkresa e Panzas nuk ka firmë, vulë dhe datë. Nuk ka të përcaktuar se me çfarë cilësie e ka shkruar letrën e përcjellë nga ambasadori i Italisë në Shqipëri”, bëjnë të ditur burime të “Ora News”, ndërsa shtojnë se Prokuroria Tiranë ka kërkuar informacion nga Interforza.  “Nëse Panza ka dërguar shkresë në cilësinë e eprorit më të lartë të Interforza, atëherë në letrën e tij nuk gjenden përgjigjet mbi informacionin e kërkuar nga Prokuroria Tiranë”. Sakaq bëhet e ditur se ky institucion është në pritje të informacionit të kërkuar nga Interforza. Reagimi vjen dy ditë, pasi Alesandro Panza, në cilësinë e drejtorit të policisë italiane i dërgoi një letër Prokurorit të Përgjithshëm  ku theksohet se pala italiane ka dërguar një pajisje që nuk është përdorur për asnjë lloj përgjimi dhe se ka qenë gjithmonë në zotërim të palës italiane vetëm për qëllime trajnimi.
Pas një letre të mbërritur në Tiranë një ditë më parë me autor Alesandro Panza drejtorin e larguar, disa ditë më parë nga kreu i Policisë Italiane, kanë lindur dyshime të reja. Siç shkruan Corriere della Sera Franco Gabrielli, ish-prefekti i Romës dhe Akuilas, ka marrë zyrtarisht detyrën  mëngjesin e sotëm. E po pikërisht dy ditë më parë në Tiranë mësohet se ka mbërritur edhe letra e nënshkruar nga Panza, i cili sipas të njëjtës gazetë italiane ishte larguar nga detyra që në datën 29 prill, ditë para se të plaste skandali i përgjimeve në Tiranë. “Franco Gabrielli është bërë kreu i Policisë Italiane. Prefekti dhe polici, që më parë ka mbajtur edhe detyrën e drejtorit të Sisde, pastaj prefekt i Akuilas dhe shef i Departamentit të Mbrojtjes Civile dhe që nga prilli i 2015 zbuloi “Mafia Capitale”, që 29 prillit ishte emëruar si kreu i Policisë”, shkruan Corriere Della Sera.
Ish drejtori i Policisë Italiane, Alesandro Panza i çon Adriatik Llallës përmes Ambasadës italiane, konfirmon se pajisja nuk është përdorur për asnjë lloj përgjimi dhe se ka qenë gjithmonë në zotërim të palës italiane vetëm për qëllime trajnimi. Sipas ish numrit një të Policisë italiane, me vënien në zbatim të kësaj marrëveshje, në 11 mars të 2016 janë nisur në Tiranë dy operatorë të specializuar nga forcat e policisë italiane me detyrën për të zhvilluar aktivitete ne për trajnimin e policisë lokale. “Në këtë pikë, personeli italian merr me vete, për aktivitet stërvitore të cituara, një autoveturë me në ekuipazh një aparaturë të quajtur ‘IMSICATCHER’, modeli Vortex i prodhuar nga kompania Ercom, e instaluar në brendësi të makinës”.
Nga ana tjetër, Prokuroria shqiptare vijon hetimet për këtë pajisje përgjimi dhe ka marrë në pyetje disa titullarë të institucioneve ligjzbatuese në vend.

Interforza përgënjeshtroi policinë shqiptare

Interforca pranon se ka një aparaturë përgjimi, por që shërben për identifikimin e numrave serial së kartave SIM dhe kodin IMEI të aparatit celular ose numrin identifikues të tij. Në fakt, ajo që Interforca ka pranuar dje është një shkelje e hapur e ligjit shqiptar,  pasi Parlamenti e rrëzoi projektin e qeverisë për përgjimin përmes IME-it. Kjo bën direkt përgjegjës shkelësit e ligjit. Kur Tahiri u pyet mbrëmë në lidhje me këtë fakt, ministri nuk dha përgjigje. Ai heshti duke pranuar shkeljen e ligjit. Ajo çfarë dihet publikisht, ministri Tahiri dhe  titullarët e ministrisë janë shprehur se ajo ka qëndruar në ambjentet e Shkollës së Policisë. Atëherë pyetja që shtrohet është kush dhe pse po gënjen shqiptarët? Mësohet se të dhënat e Interforca-s janë dërguar pas interesimit të Prokurorisë shqiptare nëpërmjet ambasadës italiane. Në dokumente pranohet ekzistenca e kësaj pajisje. Interforca në letrën e kthimit të përgjigjes, thotë se kjo pajijse ndodhet në zyrat e tyre dhe përdoret vetëm për trajnimin e agjentëve të policisë.  Në shkresën që mban firmën e kreut të Interforcës italiane, Michele Grillo, thuhet se kjo pajisje shërben vetëm për identifikimin e numrave serik të kartës SIM dhe numrin identifikues të aparatit celular që njihet ndryshe si IME-i i telefonit. Kjo pajisje, thotë Grillo në shkresën dërguar prokurorisë, është përdorur në kuadër të bashkëpunimit dhe ndihmës që interforca italiane i jep policisë shqiptare dhe asnjëherë nuk është përdorur për ndonjë operacion policor. Edhe gjatë trajnimeve, thuhet në shkresë, përdorimi i saj asistohet vetëm me ekspert të policisë italiane, pasi pajisja është mjaft delikate. Pohimet e bëra sa më sipër nga autoritetet italiane nxjerrin mashtrimin e palës shqiptare, sipas të cilave nuk ka pasur pajisje përgjimi.

Dogana thotë se nuk ka zhdoganuar pajisje përgjimi

Drejtoria e Doganave duket se nuk ka asnjë dijeni për hyrjen e pajisjes së përgjimeve në Shqipëri. Në përgjigje të kërkesës zyrtare të Prokurorisë, mësohet se Drejtoria e Doganave ka kthyer përgjigje zyrtare, ku shprehet se nuk është identifikuar apo zhdoganuar një pajisje e tillë në pikat e kalimit kufitar të Republikës së Shqipërisë. Përgjigja ka ardhur pas kërkesës që Prokuroria ka bërë në lidhje me praktikën e hyrjes së pajisjes së sjellë nga Italia në Shqipëri, shkruan “Panorama”. Gjatë tri ditëve të fundit, Prokuroria ka marrë në pyetje disa agjentë të Forcave Lëvizëse Operacionale të Policisë së Shtetit. Ata kanë marrë pjesë në seancat e trajnimit me pajisjen nga instruktorët italianë. Mësohet se gjatë deklarimeve në Prokurori, efektivët e Policisë kanë deklaruar se gjatë trajnimit ekspertët italianë nuk lejonin që pajisja të përdoret pa prezencën e tyre. Prokuroria e Tiranës ka nisur hetimet në datën 13 maj për akuzën “shpërdorim detyre”, në lidhje me përdorimin e dyshuar të pajisjes së përgjimeve dhe futjen e saj në Shqipëri pa njoftuar autoritetet ligjore të vendit tonë. Ligji e kërkon që hyrja e një pajisjeje të tillë të bëhet me njoftim dhe me autorizim të Prokurorit të Përgjithshëm.

Ministria e Mbrojtjes nuk dha leje për përgjimet

Sipas informacioneve që Instituti i Studimeve të Inteligjencës dhe Sigurisë posedon Ministria e Mbrojtjes nuk ka dhënë një leje për pajisjen e “përgjimit”. Sipas ligjeve në fuqi, nën varësinë e Ministrisë së Mbrojtjes ka një agjenci, e cila është përgjegjëse për çdo lloj dhënie leje apo licence për “Materialet apo pajisjet me përdorim të dyfishtë”. Kjo është Agjencia e Kontrollit shqiptar të Eksporteve, (AKSHE).
E vetmja mënyrë që këto pajisje të hyjë në territorin e Shqipërisë është vetëm atëherë kur këto pajisje janë të vendosura në një marrëveshje midis dy vendeve apo ndonjë organizate ndërkombëtare dhe shtetit shqiptar.
Pra, nëse në marrëveshjen që ish-ministri i Brendshëm i asaj kohe zoti Nishani ka nënshkruar me palën italiane në lidhje me trajnimin, bashkëlidhur kësaj marrëveshje do të duhet të ishte edhe kjo pajisje dhe të tjera, të cilat nevojiten për trajnim.
Gjithsesi debati politik në Shqipëri është akoma i ndezur dhe pritet të shohim në ditët në vazhdim se si do të rrjedhin ngjarjet.

Dy protesta para Kryeministrisë: Naftëtarët duan pagat, ekspertët kundër HEC mbi Vjosë

Godina e Kryeministrisë ishte epiqendra e dy protestave. Naftëtarët e Ballshit për të dytën ditë radhazi kërkojnë nga qeveria të marrin pagat e 10 muajve. Protesta tjetër ishte ajo e ekspertëve të mjedisit, shoqërisë civile dhe turistëve të huaj kundër ndërtimit të hidrocentralit mbi Vjosë në Poçëm të Mallakastrës. Protestuesit thonë se ky projekt rrezikon të përmbytë shtëpitë e banorëve të zonës dhe shkatërron biodiversitetin. Pjesë e kësaj proteste ishte dhe një shtetase amerikane e cila dha këtë apel për të gjithë qytetarët shqiptarë.
Qindra punëtorë të rafinerisë së naftës në Ballsh protestuan të enjten përballë godinës së Parlamentit, nga ku marshuan drejt ministrisë së Energjisë dhe Industrisë dhe godinës së kryeministrisë, duke kërkuar ndërhyrjen e qeverisë për zgjidhjen e problemeve të ARMO-s.
Ata e përshkruan bulevardin kryesor të kryeqytetit me thirrjet “duam punë, duam bukë”, “jo korrupsionit” dhe “duam jetë me dinjitet”. Të papaguar prej 10 muajsh, pasi ish-gjiganti i privatizuar i naftës pezulloi prodhimin prej borxheve të akumuluara ndaj bankave, punëtorët kanë protestuar vazhdimisht në kërkim të një zgjidhjeje.
Naftëtarët kërkuan marrjen e rrogave të papaguara dhe ndërhyrjen e shtetit për rifutjen në punë të rafinerisë.
“Kërkojmë nga kryeministri Rama të mbajë premtimin e dhënë për ndërhyrjen në zgjidhjen e krizës që ka varfëruar naftëtarët e Ballshit,” tha Kastriot Avdiu, punonjës i rafinerisë.
“Ne duam të punojmë ashtu sikurse kemi bërë prej vitesh, duam ta fitojmë jetesën tonë me djersë dhe për këtë duhet të ndërhyjë shteti në mënyrë urgjente” shtoi ai.
Uzina e naftës është burimi kryesor i punësimit në zonën e Ballshit, ndaj mungesa e pagesave të 1200 punëtorëve ka paralizuar ekonominë e qytezës, duke i çuar naftëtarët drejt skajit të varfërisë, mbulimit në borxhe dhe ndërprerjessë financimit të shkollimit të fëmijëve të tyre.
Pjesë e protestës ishin edhe 29 punëtorë të Filialit të Import-Eksport Tregtimit të Karburantit (FIETEK) të kompanisë ARMO në Vlorë. Të gjithë me mbi 25 vite pune në industrinë e përpunimit të naftës, ata i thanë BIRN se jetesa e tyre është bërë e pamundur dhe se qeveria duhet të marrë masat për të rikthyer në punë naftëtarët.
“Kërkojmë të marrim  rrogate papaguara, sepse jemi mbytur sa më s’ka në borxhe. Qeveria duhet të marrë në dorë ARMO-n që të rifuqizojë të gjithë filialet si atë të Ballshit, Vlorës dhe Librazhdit,” tha një punëtor 58-vjeçar për BIRN, i cili kërkoi të mbetej anonim.
“Ne kemi informacion që vetëm 250 punonjës të Fierit vazhdojnë të marrin rrogat dhe të nxjerrin naftë për përfitim të kompanisë, ndërsa ne të tjerëve na kanë hedhur në rrugë,” shtoi ai.
Në Ditën e Punëtorëve më 1 maj, qindra naftëtarë të Ballshit shprehën zemërimin e tyre me gjendjen e kompanisë dhe akuzuan qeverinë se po merr shumë kohë për të ndërhyrë në  zgjidhjen e gjendjes së vështirë ku ndodhen punëtorët.
“Ne duam vetëm ta nxjerrim bukën e gojës me dinjitet dhe të punojmë për të mbajtur familjet tona. Derisa kjo të bëhet realitet, nuk do të largohemi nga sheshi përballë kryeministrisë,” paralajmëruan naftëtarët.

Si po kërkon Gjiknuri të ristrukturojë ARMO-n dhe për llogari të kujt?

Ministri i Industrisë, Damian Gjiknuri, i është përgjigjur interesit të mediave rreth punonjësve të papaguar të ARMO-s.
“Nuk është protesta e parë dhe realisht problemi është më i thellë. Problemi fillon që tek privatizimi, një privatizim i dështuar. E kemi thënë edhe më parë, se u shit një aset strategjik në duar të gabuara, u falimentua dhe u mbyt me qindra milionë euro borxhe. Tashmë është një kompani private, e cila ka falimentuar. Një shitës spekulant ja rishiti disa të tjerëve. Investitorët e rinj nga Azerbaxhani dështuan, pasi patën edhe problemet e tyre në Azerbaxhan.
Publiku duhet ta dijë se, po flasim për një aset që është ndërmarrje private dhe është si çdo ndërmarrje tjetër private, e cila falimenton. Patjetër, interesi është i madh për shtetin, pasi është një aset strategjik, rafinimi është shumë i rëndësishëm për ekonominë e vendit. Prandaj dhe ne kemi ndërmarrë çfarë kemi patur mundësi, qoftë edhe një vit më parë, për të garantuar furnizimin me naftë bruto. Qoftë për të parë mundësinë, bashkë me bankat, pasi jemi duke diskutuar edhe me bankat, për të gjetur një formë ristrukturimi, por që i takon sektorit privat, pasi janë bankat private që kanë hyrë në borxhet e kësaj kompanie. Janë Tatimet dhe Albpetroli që janë borxhlinj më të mëdhenj, por të shikohet çfarë mund të ristrukturohet. Është e kotë t’i kërkosh qeverisë një gjë që e kishte qeveria e mëparshme, e shiti ‘badiava’, e shiti në duar të gabuara dhe faturën ia la kësaj qeverie”, tha Gjiknuri.
Gjiknuri tha se, rishtetëzimi është i pamundur, sepse aty janë të përfshira shumë banka. I bie të futesh në një cikël krize se të gjithë sistemit bankar. “Ajo çfarë po bëjmë ne si qeveri është se po shikojmë mundësitë që përmes bankave të bëhet një ristrukturim i kësaj ndërmarrjeje. Kuptohet, edhe shteti të shohë çfarë mund të heqë dorë ndonjë gjë, por realisht është një proces jashtëzakonisht i vështirë. Disa bëjnë paralelizëm me rastin e kompanisë së shpërndarjes së energjisë elektrike, por nuk është njësoj. Në rastin e kompanisë së energjisë ishte një aset unik që është energjia e vendit dhe është e pamundur që të shkojë në falimentim. Në rastin që flasim, kemi të bëjmë me një ndërmarrje private, e cila falimentoi dhe kjo është situata”.

Serbia bllokon kodin telefonik të Kosovës

Kosova nuk arriti të startojë me kodin e ri telefonik as në mars të këtij viti, ashtu siç ishte premtuar pas negociatave të gjata rreth kësaj çështjeje në Bruksel. Marrëveshja ishte që një palë e tretë, në këtë rast Austria, të aplikonte tek Organizata Ndërkombëtare e Telekomunikacionit (ITU) për kodin telefonik të Kosovës. Ministrja për Dialog në Qeverinë e Kosovës, Edita Tahiri, ka thënë për Radion Evropa e Lirë se Serbia ka bllokuar marrëveshjen për kodin telefonik të Kosovës.
“Në përgjithësi në krejt këtë proces të dialogut në Bruksel ku janë arritur shumë marrëveshje, pjesa që nuk është zbatuar apo zbatohet pjesërisht është me fajin e Serbisë e cila nuk i ka përmbushur obligimet zbatuese të dialogut”. “Sa i takon Kosovës si palë në këto bisedime, të gjitha obligimet tona i kemi kryer më kohë dhe cilësi. Sa i përket kodit telefonik, veprimi konkret në praktikë është bllokuar për shkak se Serbia nuk i ka kryer disa obligime”, ka theksuar Tahiri.
Ministrja Tahiri, ka ritheksuar se Austria tashmë ka aplikuar në Organizatën Ndërkombëtare të Telekomunikacionit (ITU) për kodin telefonik të Kosovës, në pajtim me marrëveshjen e Brukselit për telekomunikacion. Sipas saj, kodi telefonik i Kosovës do të jetë 383 dhe se ai i mundëson Kosovës njohje dhe sovranitet ndërkombëtar në fushën e telekomunikacionit. Përveç kodit telefonik, Tahiri ka fajësuar autoritetet serbe për moszbatimin e marrëveshjeve tjera, përfshirë edhe atë për energjinë.
Ndërkohë, Milovan Dreçun, kryetar i Këshillit për Kosovën në Kuvendin e Serbisë, ka thënë për Radion Evropa e Lirë se për çështjen e kodit të telefonisë autoritetet në Prishtinë nuk po i përmbahen marrëveshjes së Brukselit. “Sa i përket kodit telefonik, marrëveshja nuk është që Prishtina si e pavarur të kërkoj kodin, i cili u ndahet shteteve”, ka thënë ai.  Aktualisht në Kosovë ekzistojnë tre operatorë të telefonisë mobile dhe fikse, të cilët shfrytëzojnë kode të huaja ndërkombëtare. Telefonia mobile “Vala” shfrytëzon kodin e Monakos (+377), ajo e IPKO-s kodin e Sllovenisë (+386), kurse telefonia fikse shfrytëzon kodin (+381) të Serbisë, e për të cilat Kosova duhet të paguajë kosto të lartë të shpenzimeve.
Drejtori teknik i Telekomit të Kosovës, Mehdi Latifaj, ka treguar për Radion Evropa e Lirë se mungesa e kodit telefonik, Kosovës po vazhdon t’i shkaktojë kosto të lartë. “Çdo muaj që kalon ne kemi një kosto të lartë operative për shkak të mungesës së kodit shtetëror dhe ajo kosto sillet prej 3.5 milionë euro kosto direkte që paguan kodin e Monakos dhe janë kostot variabile që ndryshojnë varësisht nga volumi i trafikut që marrim brenda një viti nga thirrjet ndërkombëtare e që kalojnë përmes Monakos dhe ajo kosto është 6 deri në 8 milionë euro në vit”, sqaron Latifaj. Derisa, sipas të dhënave të Qeverisë së Kosovës kostot e përgjithshme të shkaktuara deri më tani nga mungesa e kodit telefonik kanë arritur shifrën në mbi 200 milionë euro.
Në anën tjetër, zyrtarët e Telekomit të Kosovës kanë treguar për Radion Evropa e Lirë se kishin filluar përgatitjet për kalimin në kodin telefonik shtetëror qysh nga marsi i këtij viti, kur edhe ishte premtuar se Kosova do ta ketë kodin e vet. Përgatitjet, sipas drejtori teknik të Telekomit të Kosovës, Mehdi Latifaj kishin filluar të bëhen pasi që me marrjen e kodit të ri telefonik duhet të bëhen shumë ndryshme teknike dhe konfigurime. Ai tregon që për kalimin në kodin e ri telefonik duhet një fazë transitore më shumë se një vit . “Gjatë fazës së trazicionit praktikisht planifikohet është e domosdoshme të punohet me më shumë kode , duke përdorur këto kodë aktuale dhe duke e shtuar edhe kodin e ri telefonik shtetërorë që është 383 dhe kjo do të zgjasë 1 vit e gjysmë. Është një kohë kur duhet të propagandohet kodi i ri Kosovës dhe të zbatohet nga të gjithë operatorët telekomunikues ndërkombëtarë në mënyrë që të mund të realizohen thirrjet”, sqaron Latifaj.
Një kohë të gjatë, shton Latifaj, do të merr edhe ndërrimi i mbi 1 milionë sim kartelave të konsumatorëve.  Ndryshe, sipas marrëveshjes së Brukselit dhe deklaratave të zyrtarëve të institucioneve, pavarësisht se aplikimin për kodin telefonik do ta bënte Austria, shteti i Kosovës nuk do të ngarkohej me obligime financiare për këtë shërbim. Në dialogun ndërmjet Prishtinës dhe Beogradit në Bruksel, si kompromis ishte paraparë që një vend i Bashkimit Evropian të aplikonte për Kosovën. Austria kishte dalë si vullnetare për ta ndihmuar Kosovën në këtë fushë.

Europa “ndizet” nga 4 finale futbollistike

Të shtunën, Europa e futbollit mban frymën për një tjetër fundjavë të ngjeshur futbollistike me 4 finale që i vendosin kapakun një sezoni të gjatë dhe të lodhshëm. 4 kupa në 4 vende të ndryshme, që të gjitha bashkohen në paketën Supersport, që do të transmetojë live dhe ekskluzivisht epilogun e betejave përmbyllëse. Në Itali, Milani dhe Juventusi do të luajnë në stadiumin “Olimpico” të Romës finalen e Kupës që mund të shpëtojë sezonin e kuqezinjve, por në krahun tjetër mund të konfirmojë Juventusin dominues total të futbollit në Gadishullin Apenin. Alegri kërkon të hyjë në histori, duke u bërë i pari trajner që fiton për dy sezone rresht Kampionatin dhe Kupën, ndërsa Milani që zhvilloi një tjetër sezon të dobët, synon të hyjë në Europë nga dera e pasme e futbollit italian. Në kampin torinez, mungesat e vetme janë ato të Leonardo Bonuccit, i pezulluar për shkak kartonësh dhe mesfushorit Sami Khedira, ndërsa në krahun tjetër, Brocchi me shumë mundësi do të luajë pa Antonellin, Abaten dhe Niang. Nga Italia në Gjermani, aty ku luhet një tjetër klasike.
Bayern Munchen dhe Borussia Dortmund përplasen në 90 minutëshin e fundit të Pep Guardiolës në stolin bavarez. Pas suksesit në kampionat, Bayerni i Mynihut synon edhe trofeun e Kupës për të kurorëzuar me sukses ecurinë fantastike në Gjermani, ndërsa Borussia do të tentojë të fitojë trofeun e parë në erën Tuchel. Ndoshta kjo është finalja më e denjë për futbollin gjerman, pasi vendos përballë dy ekipet më të mira të Bundesligës, ndërsa për Hummels është ndeshja e fundit me fanellën e Dortmundit, pasi vetëm pak orë më vonë, ai do të zyrtarizohet pikërisht në kampin kundërshtar për ta vazhduar karrierën në “Allianz Arena”. Është pikërisht Borussia që ka eliminuar Bayernin në dy sezonet e fundit të Kupës, por në të dyja rastet nuk ka arritur të triumfojë në Berlin, aty ku do të luhet edhe përballja kundër Bayernit.
Në Angli, FA Cup është shansi i fundit për Van Gaal, pasi Manchesteri United sfidon Crystal Palace në garën për trofeun që mund të shpëtojë pankinën e trajnerit holandez pas dështimit në kampionat. Plot 12 vjet ka Manchester që nuk triumfon në këtë kompeticion, ndërsa ekipi londinez nuk favorizohet nga statistikat, pasi ka humbur në 15 nga 20 takimet e fundit ndaj “Red Devils”. Në rast suksesi, Manchester United do të barazonte në krye Arsenalin me 11 FA Cup. Në Francë, Kupa është stacioni i fundit për Zlatan Ibrahimoviç, i cili do të luajë ndeshjen përmbyllëse të aventurës pariziene kundër Marseille. “Stade de France” hap dyert për duelin final, ku skuadra e Blanc është në garë për trofeun e tretë sezonal që ka mundësinë për të barazuar pikërisht marsejezët me 10 Kupa të Francës.

Raporti: Politikat buxhetore dëmtuan rritjen ekonomike

Politikat qeveritare në drejtim të konsolidimit fiskal të ndjekura nga qeveria shqiptare në dy vitet e fundit në disa raste kanë qenë në dëm të rritjes ekonomike të vendit.  Konkluzionin e ka nxjerrë vetë Ministria e Financave këto ditë në publikimin e Raport Progresit të Strategjisë së Menaxhimit Financiar 2014-2020.
Përpjekjet për të vënë në binarë arkën e shtetit janë përballur me sfida të tilla si një borxh publik në rritje, politika joadekuate dhe prioritizimin e shpenzimeve dhe një paragjykim i vazhdueshëm në parashikimet optimiste të rritjes së PBB-së.
Raporti i progresit thotë se, Ministria e Financave nuk mundi të përmbushë detyrimin kohor për ndryshime në ligjin organik të buxhetit brenda vitit 2015.
Reduktimi i borxhit publik gjatë periudhës afatmesme kërkon zotim politik për të mbështetur konsolidimin fiskal, prandaj rivendosja e kufijve për borxhin në ligj, në gjysmën e parë të 2016 paraqet emergjencë.
Strategjitë sektoriale nuk janë të lidhura tërësisht me parashikimet afatmesme  dhe jo gjithmonë japin informacion të plotë në lidhje me kostot e plota dhe burimeve të financimit shtesë.
Raporti i monitorimit vë në dukje se, ende nuk ka veprime konkrete për forcimin e kapaciteteve të administratës publike, të cilat të mund të vlerësojnë kthimin social-ekonomik të projekteve të investimeve kapitale. Procesi ka shumë të meta nga vlerësimi pamjaftueshëm i projekteve dhe vendimeve të fragmentuara financimit.
Gjithashtu për shkak të vonesave në blerjen e programeve, aktivitetet e planifikuara të tilla mbi monitorimin e borxhit dhe investimeve kapitale ende nuk kanë nisur.
Monitorimi vë në dukje se duhet përmirësuar efikasiteti i  Departamenteve Hetimore në Tatime dhe Dogana

Guvernatori: Duhet nxitur rritja ekonomike

Guvernatori i Bankës së Shqipërisë, Genti Sejko i ka bërë sërish thirrje politikëbërësve që të fokusohen në kryerjen e reformave. Këtë mesazh Sejko e ka dhënë gjatë fjalës që ka mbajtur në seminarin e nivelit të lartë me temë “Rishqyrtimi i bashkërendimit midis politikës monetare dhe politikës fiskale”, organizuar nga Banka e Sllovenisë në bashkëpunim me Fondin Monetar Ndërkombëtar.
Në fjalën e tij, Guvernatori Sejko diskutoi mbi kontributin dhe rolin e politikës monetare në kushtet e një politike fiskale konsoliduese referuar eksperiencës shqiptare. Në fund të fjalimit, Sejko për të disatën herë kohët e fundit e dha sërish mesazhin për politikëbërësit: “Duhet që gjithmonë t’i kujtojmë vetes se çfarë mundet dhe nuk mundet të arrijë politika monetare: ne mund të ndikojmë mbi variablat nominalë të ekonomisë, domethënë nivelin e çmimeve, por nuk mund të ndikojmë as mbi rritjen afatgjatë dhe as mbi prosperitetin e përgjithshëm në ekonomi. Në këtë drejtim, mendoj se duhet që gjithmonë t’i kujtojmë politikanët për përmbushjen e detyrave të tyre në lidhje me reformat strukturore dhe shfrytëzimin sa më mirë të frymëmarrjes që u jep politika monetare.

Ofertë për Neymar

Ditët e fundit janë shtuar zërat për rinovimin e kontratës së Neymar me Barcelonën deri në vitin 2022. Marrëveshja e re thuhet se do të lajmërohet javën e ardhshme pas finales së Kupës së Mbretit, ndërsa hedhja e të zezës mbi të bardhë do të bëhet në fund të Lojërave Olimpike Rio 2016, turne ku sulmuesi brazilian do të marrë pjesë. Mirëpo sipas mediave braziliane, për 24-vjeçarin kanë mbërritur tre oferta, nga Reali i Madridit, Paris Saint Germmain dhe Manchester Unitet, të cilat përfaqësuesit e tij ligjorë po i studiojnë me shumë kujdes, pasi situata mund të marrë tjetër rrjedhë, nëse bisedimet me klubin blaugrana nuk marrin drejtimin e duhur.
Qëllimi i Neymar është të qëndrojë në Barcelonë, ndaj dhe rinovimi i kontratës me blaugranat mbetet në plan të parë, megjithatë ai pret edhe një sforco nga ana e drejtuesve për të përmbushur të gjitha kërkesat e tij ekonomike.
Që gjithçka të shkojë sipas planeve të tij, Neymar po luan edhe me ofertat e klubeve të tjera të mëdha në Europë, ku më i interesuari duket Paris Saint Germmain, që i ka paratë për të pagën e sulmuesit pas largimit të Zllatan Ibrahimoviç. Edhe Reali me United po monitorojnë atë që po ndodh me lojtarin, për t’u hedhur në sulm në momentin e duhur.
Neymar ka një klauzolë largimi nga Barcelonë që kap shifrën 190 milionë euro, ndërsa kontrata aktuale i skadon në 2018-ën. Klauzola në marrëveshjen e re me Barcelonën pritet të jetë 220 milionë euro.
Neymar arrin të hyjë në territorin britanik edhe pse nuk e kishte me vete pasaportën. Sulmuesi i Barcelonës u pa në Aeroportin e Luton ku rezultoi se ai e kishte harruar pasaportën e tij. E megjithatë punonjësit e Zyrës së Emigracionit e lejuan atë të kalonte më tej pas 15 minutash pyetjesh dhe verifikimesh. Sipas një dëshmitari, autoritetet mbetën të befasuar nga prania e brazilianit, pasi nuk ndodh çdo ditë që në këtë aeroport të shfaqet një prej futbollistëve më të mirë në botë. Ai shtoi se, Neymar u deklaroi atyre se i duhej të shkonte në një takim të rëndësishëm.
Mësohet se Neymar u tregoi autoriteteve një sërë dokumentesh identifikimi, por ajo që i bindi punonjësit e Zyrës së Emigracionit ishte karta e tij rezidenciale në Spanjë. Pasi kaloi këtë aventurë, Neymar shkoi në departamentin e veshjeve “Selfridge” për promovimin e markës së pantallonave jeans “Replay”, pasi është edhe imazhi i saj.

Van Gaal-Mourinho për ringritjen e Manchesterit

Louis Van Gal drejtor sportiv tek Manchester United dhe Jose Mourinho trajner. Është kjo ideja e fundit e drejtuesve të “Djajve të Kuq” për të zgjidhur problemet që po kalon ekipi. Ideja e bashkpunimit mes Van Gal dhe Mourinho ishte e zëvendëspresidentit të Manchester United Ed Woodward. Van Gal ka një kontratë që skadon në qershor të 2017 dhe prishja e saj do t’i kushtonte skuadrës angleze 5 milionë euro. Ndërkohë që nga ana tjetër “Special One” është në pritje për të marrë në drejtim stolin e Manchester United. Nisur nga kjo, drejtuesit e klubit anglez po mendojnë t’i mbajnë të dy. Në të kaluarën të dy trajnerët kanë bashkëpunuar me njëri-tjetrin gjatë kohës kur ishin pjesë e Barcelonës.
Por, duket se realizimi i këtij bashkëpunimi nuk do të jetë dhe aq i lehtë, pasi për një personazh si Mourinho, i cili ka një karakter disi të vështirë dhe që kërkon liri absolute në vendimmarrje, ndoshta do ta ketë të pamundur të punojë me dikë tjetër që i qëndron mbi kokë. Ndërkohë që e ardhmja e Van Gal, luhet në finalen e FA CUP, kundër skuadrës së Crystal Palace, shansi i fundit për holandezin për të realizuar një objektiv minimal. Në rast humbjeje, mundësitë që tekniku 64-vjeçar të qëndrojë në “Old Trafold” si trajner apo si drejtor sportiv janë pothuajse zero.

1...8 2078 2088 209...8 382Faqja 8 208 nga 8 382

Kryesore

Continue to the category
Më shumë
© 2024 Rilindja Demokratike Euroatlantike