Partia Demokratike deklaroi dje se Rama është nën akuzë për krim shtetëror. Përmes një deklarate për mediat, sekretari i Përgjithshëm i PD, Arben Ristani bëri të ditur se pajisja e përgjimit gjendet prej disa kohësh në duart e Saimir Tahirit dhe përgjimi është kryer. “Saimir Tahiri ka arritur një nivel edhe më të lartë kriminal, duke kryer përgjim të paligjshëm të Presidentit, opozitës, krerëve të institucioneve, mediave dhe ambasadorëve të huaj të akredituar në Tiranë. Vetë Tahiri e pranoi mbrëmë se pajisja ekziston, ndërkohë që ishte shprehur më parë se pajisja nuk ekziston. Tahiri pranoi po ashtu se pajisja është e paligjshme, pasi nuk është e regjistruar”, tha Ristani. Ai reagoi edhe ndaj deklaratave të Tahirit bërë në emisionin “Top Story”, ku dënoi faktin se Tahiri nuk bëri transparencë, por iu shmang pyetjeve. “Tre herë u pyet në ‘Top Story’, nëse është regjistruar pajisja, kur ka hyrë në Shqipëri dhe në të tre rastet, ai u shmang, iu fsheh këtij fakti, duke sulmuar opozitën. Ky është një moment kritik për vendin. Ky krim shtetëror e kapërcen masën e mundësive të Tahirit dhe është drejtpërdrejt përgjegjësi e Edi Ramës. Ai hesht prej ditësh për këtë ngjarje, duke i vënë vulën sundimit mafioz në vend dhe veprimit të qeverisë si bandë kriminale, mbi ligjin dhe Kushtetutën. Edi Rama është i thirrur të japë llogari e të mbajë përgjegjësi publikisht për krimin shtetëror të përgjimit të paligjshëm. Edi Rama është nën akuzë për këtë krim shtetëror dhe sa më shumë hesht, aq më shumë e rëndon pozicionin e tij në këtë shkelje brutale të ligjit, të Kushtetutës dhe të çdo norme demokratike”, u shpreh Ristani.
Tahiri para drejtësisë, i pastroi kartelën baronit të drogës
Klement Balili, i kërkuar për trafik ndërkombëtar droge nga gjysma e Europës dhe nga DEA amerikane, i emëruar drejtor i Transportit Rajonal të Sarandës nga Edi Rama, jo vetëm kishte mbështetjen e nevojshme politike e qeveritare për biznesin e tij kriminal, por shërbimet dhe favoret e Saimir Tahirit ndaj tij kanë arritur kulmin me pastrimin e të kaluarës së tij kriminale.
Kreu i Departamentit për Sigurinë dhe Rendin në PD, Enkelejd Alibeaj deklaroi dje se Saimir Tahiri ka pastruar kartelën e Klement Balilit duke fshirë gjithë precedentët penalë të tij.
“Është zbuluar se janë hequr në kartelën e Balilit krimet e precedentët e mëparshëm. I shpalluri në kërkim ndërkombëtar, i konsideruar nga ‘CNN’ si Eskobari i Ballkanit, rezulton me një të shkuar të pastër, edhe pse në vitin 2006 u kap me 750 kilogramë drogë, edhe pse Bashkia Sarandë e ka kallëzuar për ndërtim pa leje, edhe pse ka pasur probleme të tjera dhe konflikte për të cilat është denoncuar.
Saimir Tahiri ka futur duart në kartelën e Balilit, duke ia fshirë të gjithë precedentët. Është kjo arsyeja pse policitë e vendeve fqinje dhe DEA amerikane nuk kishin besim tek autoritetet shqiptare dhe i përjashtuan nga aksioni ndërkombëtar, pasi e dinin se Balili kishte lidhje të forta me qeverinë. Saimir Tahiri ka dalë kështu zbuluar në lidhje të gjithanshme me krimin me trafikun e drogës. Duke ofruar jo vetëm imunitet, paprekshmëri, vënie në dispozicion të pikave kyçe të Policisë të Kufirit e duke ndihmuar në arratisjen e Balilit, por duke e nxjerrë Eskobarin e Ballkanit edhe të pastër, pa asnjë krim të mëparshëm”, u shpreh Alibeaj.
Ai theksoi se ky inkriminim i ministrit të Brendshëm është një rekord i zi në shkallë botërore dhe Tahiri është sot në sytë e shqiptarëve dhe ndërkombëtarëve i provuar me lidhje të thella e të çdo lloji me krimin e trafikun e drogës. Nuk mjafton më largimi i tij një orë e më parë nga detyra. Ai duhet të hetohet e të shkojë para drejtësisë për të gjitha rastet e shërbimit që ka kryer ndaj bandave, ndaj Balilit, Habilajve, Shullazit.
Arben Shahini
Ky grusht shteti në Triadë
Frrok ÇUPI
Kush nuk shikon, nuk shikon! Madje nuk është aq i qartë për t’u parë. Ky që po ndodh tani është një grusht shteti i atij tipi që nuk shihet me “sy të lirë”, sipas fjalorit ushtarak. Presidenti i Republikës dëshmoi publikisht elementët e një “Grushti”, por nuk e emërtoi kështu. Ndoshta pse ka nevojë për më shumë qartësime.
Ka dy arsye pse “Grushti” nuk shihet qartë e me sy të lirë: E para, pse “grushti” ndodhi në kohën më të shkurtër të mundshme, veç 40 orë u deshën për t’u kryer (nga ora 10:00 e datës 11 maj deri në ora 10:00 të datës 13 maj). E dyta, se ky “coup d’etat”, është i atij tipi që quhet grusht shteti “me veto”, jo grusht shteti me rrethim ose me armë të dukshme. Qeveria ka vënë veton mbi shtetin; dhe kjo është tërë arkitektura e këtij grushti shteti. Kaq e thjeshtë…
Ka edhe një arsye më shumë pse “grushti” nuk u ndje vertikalsiht, siç ndodh me tërmetet. Tërmetet vertikale vijnë, bëjnë kërdinë e ikin sa hap e mbyll sytë. Thjesht ka ndodhur që pllakat tektonike të tokës kanë lëvizur vertikalisht.
Ja edhe ky grusht, që akoma nuk është kapur me “sy të lirë”, kështu erdhi e iku. Qeveria goditi shtetin njëherësh në tri pika.
E para,
Qeveria rrethoi Gjykatën.
Në fakt, më datën 11 maj, qeveria rrethoi Gjykatën Administrative të Apelit. Dikush mund të thotë se, “ja ndodhi me një gjykatë, veç me një një, e rrethuan dhe kaq”. Ky është momenti kur shfaqet fenomeni që “grushti” nuk shihet me sy të lirë. Rrethimi i Gjykatës nga qeveria është fenomen Grushti, pavarësisht sa është numri i gjykatave. Nuk mund të jenë disa gjykata në rrethim, madje as është e nevojshme për të kuptuar se shteti është nën Grusht.
Me aktin e rrethimit shtetëror të Gjykatës Administrative të Apelit, u kryen tri goditje mbi shtetin juridik. E para, që qeveria përdori fuqinë e makinës shtetërore për të tmerruar gjykatën dhe gjykatësit dhe për të dëshmuar se gjykata është nën sundimin e qeverisë. Në këtë rast, grushti mbi shtetin u shfaq i drejtpërdrejtë; qeveria theu një nga nenet e Kushtetutës së Shtetit që mbron pavarësinë e Gjykatës nga qeveria…
E dyta,
se kjo është Gjykata Administrative. Grupimi politik i Rilindjes, që qeveris; gjatë gjithë jetës ka qenë kundër krijimit të kësaj Gjykate. Kur u pranua në Kuvendin e dominuar nga të djathtët, edhe kjo u arrit me zor të madh, me ndërhyrjen e vetë Shteteve të Bashkuara. Por sot akoma më keq, këta janë kundër Administratives. Sepse kjo është Gjykata e të drejtave të biznesit. Biznesin këta e kanë kapur në fyt dhe po e mbysin. Kjo është pjesa e dukshme e grushtit. Këta, biznesin po e marrin për vete, po e mbysin dhe ky është mbytje e shtetit, dmth., Grushti.
E treta,
sepse në rrethimin e Gjykatës morën pjesë ushtarë misteriozë. Lloji i parë i ushtarëve ishin punëtorët që paguhen nga taksat publike dhe që mund të përdoren si kamikazë kundër lirisë së kujtdo. Të dytët ishin deputetë të inkriminuar, të pasuruar dhe me biznese kriminale. Kjo miksturë mes llojeve, është bombë kundër shtetit dhe të të Drejtës.
Pika e dytë e Triadës së Grushtit:
Instalimi i mjeteve të përgjimit nga Policia është goditja më e rëndë që i bëhet shtetit. Presidenti i Republikës vuri alarmin. Ata që akoma flenë pas alarmit, duhet të dinë se ndodhen pranë një tsunami: O shteti po bie, o shteti po i shtyp njerëzit e vet! Në të dyja rastet po rrënohet njeriu. Edhe sikur shteti të bjerë, përsëri mbi njerëzit që flenë bie dhe këta rrënon.
Ja kaq e rëndë është “këmba” e dytë e Triadës së Grushit. Policia, duke përgjuar në mënyrë të fshehtë, pa ligj e pa të drejtë, e ka dhunuar shtetin. Organet e autorizuara për përgjim, të kontrolluara nga ligji dhe delegatët e popullit, hidhen në lumë, dmth., spostohen e nëpërkëmben. Këto që ka zgjedhur populli dhe i ka miratuar në ligj, nuk ekzistojnë më. Mbi shtetin vihet veto e dy a tre personave që përgjojnë e dhunojnë. Dhunojnë të drejtën e individit, pozitën e kundërshtarit në demokraci, sistemin pluralist, diplomacinë e aleatëve.
Shteti ka dalë prej boshtit. Siguria ka rënë. Edhe e drejta shuhet. Ky është Grushti, ose “coup d’edat”.
E treta e Triadës:
Lejimi për arratisje i njeriut të kërkuar botërisht për krimin mbi njeriun. Ky është quajtur “Escobari shqiptar”, sipas emrit të Paolo Emilio Escobar, lordi kolumbian i drogës, ose i quajtur “Mbret i kokainës”, më i pasuri mes gjithë kriminelëve të botës, me 30 miliardë dollarë pasuri në vitin 1990.
“Escobari shqiptar” nuk u perceptua nga qeveria shqiptare, por nga qeveritë botërore. Qeveria shqiptare, përkundrazi, e kishte angazhuar brenda makinës shtetërore të vendit, si funksionar i lartë shteti. Ky është grushti i parë mbi shtetin. Në Kolumbi, mafia nuk është legalisht pjesë e shtetit.
Qeveria këtu akuzohet se është bërë pjesë e mafies së kokainës. Këtu mbillet drogë dhe dërgohet drogë në Europë me avionë, me anije, me makinë, me kafshë dhe më këmbë… Kryeministri dhe ministri i Brendshëm janë akuzuar direkt…
Këta i dhanë hapësira zotit “Escobar”.
Kur u perceptua trafikanti shqiptar, u la i lirë, aq kohë i lirë sa të mund të arratisej nga vendi. Shteti ra para mafies. Pra, ra me dashjen e qeverisë, si në një grusht shteti.
Me këtë rast, shteti ra edhe në sy të të gjithë botës.
Pse e shkeli Rama Sigurinë Kombëtare?
Skandali i përgjimeve të paligjshme të Policisë së Shtetit për krerët më të lartë të shtetit, kundërshtarë të Edi Ramës, ka identifikuar publikisht ministrin e Brendshëm, Saimit Tahiri, si përgjegjësin kryesor. Qëkurse plasi skandali, në tre ditë, ministri i Brendshëm ka thënë tri gjëra të ndryshme, për të krijuar alibi në varësi të informacioneve që publikoheshin nga ish-Kryeministri Sali Berisha, Partia Demokratike apo media. Ditën e parë, kur ish-Kryeministri Berisha informoi shqiptarët se Edi Rama dhe banda e tij në Ministrinë e Brendshme po përgjojnë Presidentin, kryetarin e Parlamentit, kryetarin e PD-së dhe eksponentë të lartë të opozitës, drejtues të lartë të institucioneve shtetërore, ambasadorë dhe gazetarë e pronarë mediash, Tahiri tha se nuk ka pajisje. Ditën e dytë Tahiri pranoi se ka një pajisje, por pajisja nuk bën përgjime. Ditën e tretë, Tahiri tha se ka pajisje, janë bërë përgjime, por për këtë ka një marrëveshje të firmosur 9 vjet më parë nga ish-ministri i Brendshëm i asaj kohe, sot Presidenti i Republikës.
Nëse presim ditën e katërt dhe ditët e tjera, vegla e krimit të organizuar në Shqipëri do të na thotë rrenën e katërt dhe të pestë, por asnjëherë të vërtetën. Afërmendsh nuk mund të bëjë ndryshe. Së pari, Tahiri po mbron veten, pasi janë një sërë ligjesh të shkelura përmes përgjimeve të paligjshme, që i garantojnë atij burgun e sigurtë. Së dyti, mbron shefin e tij, Kryeministrin Edi Rama, që ka porositur dhe urdhëruar bandën e tij në Ministrinë e Brendshme që të ndërmarrë këtë operacion kriminal, me shumë pasoja për sigurinë kombëtare të vendit. Së treti, Tahiri duhet të mbrojë mafiozët shqiptarë dhe të huaj me uniformë dhe pa uniformë policie, që me vetëdije janë bërë pjesë e këtij skandali.
Mashtrimet publike të Tahirit janë të mjaftueshme për të bërë arrestimin e tij, pasi çdo orë në detyrë është një mundësi më shumë që i jepet atij për të fshehur të vërtetën, për të bërë presion mbi ata që po merren me hetimin, për të nxjerrë të palarë shefin e tij Kryerministër, por edhe shërbëtorët e tij në polici. Pavarësisht, se mënyra si po mbrohet është tërësisht e mjerë, idiote dhe vetëm sa rëndon veten dhe të tjerët të përfshirë në këtë skandal, në ditën e gjykimit.
Pretendimi më i fundit i ministrit të Brendshëm se pajisja është përdorur për të përgjuar Presidentin dhe të gjithë titullarët e tjerë të lartë të shtetit për arsye trajnimi, është njësoj si të thuash se trajnimi i policëve në përdorimin e armëve të bëhet duke qëlluar qytetarët në rrugë. Këto gjëra mund të kenë sens vetëm në një vend të kontrolluar nga krimi i organizuar dhe kam dyshime nëse do të gjenin zbatim edhe në Korenë e Veriut.
Ministri i Brendshëm duhet të japë dorëheqjen e menjëhershme dhe t’i dorëzohet drejtësisë. Skandali i përgjimeve ka shumë anë të errëta, që duhet të hetohen dhe të përcaktojnë përgjegjësitë e secilit që është i përfshirë. Duhet parë me detaje se kush ka porositur dhe paguar për aparaturën e përgjimit; kush e ka futur në Shqipëri duke thyer të gjitha ligjet; kush ka ofruar ambientet dhe lehtësitë për instalimin e pajisjes në Akademinë e Rendit (sikurse ka pohuar Tahiri); kush ka urdhëruar, rekrutuar dhe drejtuar skuadrën e përgjuesve; kush ka krijuar listën e subjekteve të përgjuar; kush është përgjuar; kush dhe për çfarë janë përdorur informacionet e nxjerra nga përgjimi; kush ka patur akses në ambientet ku ishte vendosur aparati i përgjimit. Janë këto dhe dhjetëra pyetje të tjera që kërkojnë përgjigje.
Por, më e rëndësishmja për shqiptarët është përgjigjja se për çfarë u fut Rama në këtë betejë ekstreme me ligjin dhe institucionet kushtetuese të vendit të tij. A është Kryeministri Rama i kapur dhe kush e kërcënon atë që të ndërmarrë veprime kaq thellësisht antiligjore dhe antikushtetuese? A është duke punuar për pushtetin e tij personal apo për interesa okulte dhe antishqiptare? Përfundimisht, institucionet përgjegjëse për sigurinë kombëtare me urgjencë duhet të marrin në shqyrtim këtë rast dhe të sigurojnë se sovraniteti, integriteti territorial, rendi publik dhe kushtetues janë të mbrojtur. Largimi i kësaj qeverie, një qeveri teknike për të përgatitur zgjedhjet e parakohshme do të ishte rrugëdalja e vetme nga kjo krizë e rëndë.
Një gjë është e sigurtë, gjithçka që mbart ky skandal përgjimesh nuk ka qenë në funksion të rolit të Shqipërisë si vend anëtar i NATO-s, nuk ka qenë në funksion të plotësimit të detyrimeve të Shqipërisë për anëtarësim në BE, nuk ka qenë pjesë e angazhimeve të Shqipërisë në koalicionet apo organizmat ndërkombëtarë në luftën kundër terrorizmit dhe luftën kundër krimit të organizuar. Hetimi do të na tregojë se sa janë dëmtuar shqiptarët dhe sa është dëmtuar Shqipëria në ambiciet e veta.
Europol: Përjashtuam Tahirin nga hetimi i Balilit
Prej më shumë se 1 viti, policia greke në bashkëpunim me DEA-n amerikane kanë kryer hetime për organizatën ndërkombëtare të drogës të drejtuar nga baroni shqiptar, Klement Balili nga Saranda. Një efektiv i policisë greke tha për gazetën helene “Newsit.gr” se të gjithë e dinin për rrjetin e drogës të drejtuar nga 44-vjeçari shqiptar, por nuk kishin prova për t’i arrestuar. “Në Evropë të gjithë e dinin për disa prej tyre (anëtarët e bandës) dhe aktivitetet që ata kryenin, por nuk kishin prova për t’i arrestuar. Këto informacione ju dhanë nga policia greke, pas hetimeve që bëri për çmontimin e rrjetit të drogës”, i tha gazetës efektivi i policisë greke.
Gazeta shkruan gjithashtu se, drejtuesi grek i hetimeve për këtë bandë të drejtuar nga 44-vjeçari shqiptar, do të shkojë gjatë fundjavës në Hagë, ku ndodhet selia e Europol, për t’i dorëzuar kolegëve europianë dokumentet e hetimit dhe që, sipas tyre, ata hasën në “dyer të mbyllura” për çmontimin e organizatës së baronit shqiptar.
Rasti i Klement Balilit ka tërhequr vëmendjen edhe të mediave italiane, të cilat shkruajnë se ngarkesa e fundit prej 768 kg kanabis e kapur në brigjet e Greqisë kishte si destinacion zonën e Salentos, në Itali. Prej këtej, shkruan “Corriere”, ngarkesa do të përfundonte në qytetin e Milanos, që është dhe zona e preferuar e trafikantëve për shkak të çmimit.
Sipas gazetës, që citon burime pranë njësisë së antikrimit të organizuar pranë Guardia di Finanza, marijuana në qytetin verior të vendit fqinj arrin në 700-800 euro për kg. “Në krye të organizatës së kësaj ngarkese dhe dhjetëra të tjerave është një person i pagëzuar si “Eskobari i Ballkanit” dhe i kërkuar nga gjysma e vendeve të Europës”, shkruan “Corriere di Milano”.
Menaxheri i shtetit dhe njeriu i besuar i qeverisë shqiptare, siç e quajnë mediat që citojnë burime investigative, është parë disa herë në Milano, si për takime zyrtare për shkak të detyrës, ashtu edhe për bisedime “informale” me bashkëkombas që lëvizin në këtë qytet dhe rrethinat e tij.
“Grupet shqiptare të drogës që lëvizin në Milano dhe provincë janë shumë aktivë në zonën Abbiategrasso. Nuk ushtrojnë një kontroll të fortë të territorit, por kanë zënë vend, e njohin ambientin dhe kanë një rrjet efikas”, deklaron një zyrtar i lartë i karabinierëve. Sipas “Corriere”, gjatë qëndrimit në Milano, Balili preferonte të vizitonte pikat kryesore të qytetit, si Galeria pranë Sheshit “Duomo”, dyqanet e shtrenjta dhe zona si Porta Venezia, apo Sheshi “Repubblica”.
Ato shkruajnë se, “Eskobari”, i cili mund të fshihet në Greqi, përdorte rolin e tij prej zyrtari për të transportuar drogën dhe për të marrë vesh në kohë reale lëvizjet e prokurorëve dhe policisë. “Që në drejtësinë shqiptare diçka nuk funksionon, kjo dihet”, shkruan më tej “Corriere”, e cila vijon, “kriminelë në prag të arrestimit nga hetues të huaj marrin befas lajmin dhe zhduken”.
Klement Balili, i akuzuar si “Baroni i Ballkanit”, vijon të jetë në arrati dhe nuk ka asnjë gjurmë prej tij. Dilema qëndron në faktin se si mundi të arratisej, kur akuzat nga mediat greke drejtoheshin direkt ndaj tij gjatë javës së kaluar. Balili u arratis dy ditë, pasi u mësua se emri i tij figuronte në dosjen hetimore të Policisë së Atikës dhe zyrës së DEA-s amerikane në Athinë. Zyrtari shqiptar fillimisht i mohoi akuzat, duke i quajtur sulme politike të opozitës, por më pas humbi gjurmët, duke i shpëtuar vëzhgimit të policisë. Gjatë kontrolleve që policia ushtroi në banesën e tij, familjarët thanë se nuk kishin dijeni për vendndodhjen e Balilit, ndërsa nga këqyrja e sistemit TIM, ai rezulton të mos ketë dalë jashtë vendit, por nuk përjashtohet mundësia që ai ta ketë kaluar kufirin në mënyrë ilegale.
Klement Balili akuzohet si kreu i kartelit më të madh të narkotrafikut në Europë, ku kishte rolin e financuesit dhe furnizuesit me kanabis nga Shqipëria drejt vendeve të Europës. Sipas policisë greke, zyrtari shqiptar kishte organizuar edhe trafikimin me gomone të rreth 700 kilogramëve kanabis nga Saranda drejt ishullit të Zakinthos.
Në këtë operacion ranë në pranga 15 persona, mes të cilëve edhe disa shqiptarë, dy prej të cilëve vëllezërit Xhevahir e Dhimitër Poti, që u arrestuan në Belgjikë. Hetimet e policisë greke dhe DEA-s amerikane kanë faktuar se Balili mundësonte transportin e sasive të mëdha të drogës në rrugë detare, por edhe përmes shoqërive të transportit, duke ndërhyrë në dogana, që kamionët të mos kontrolloheshin. Ndaj Balilit do të ketë edhe një hetim për pasurinë e tij, pasi dyshohet se ka llogari bankare në 10 vende të Evropës dhe pasuri të paluajtshme në Greqi dhe Itali.
Rama dhe Tahiri padrinot e vërtetë të Klement Balilit
Europol njoftoi dje opinionin se, në hetimin e grupit të Klement Balilit kanë bashkëpunuar vetëm policia greke, DEA amerikane dhe policia italiane. Pas këtij njoftimi ka reaguar ish-Kryeministri Berisha, i cili në një postim në Facebook shkruan se Europol u çorri maskën Edi Ramës, Saje qorrit dhe Haki Çakos, duke faktuar se ata janë padrinot e vërtetë të Klement Balilit dhe vëllezërve Poti.
“Europol me komunikatën e tij hodhi poshtë dhe përgënjeshtroi deklaratat e Edvin Shullazit, Saje qorrit dhe Haki Çakos, që në garë me njëri-tjetrin mashtruan shqiptarët, duke deklaruar se policia shqiptare prej kohësh po hetonte së bashku me policinë greke dhe DEA-n amerikane grupin trafikant të Edeskobarit të Ballkanit. Europol sot njoftoi opinionin se në hetimin e këtij grupi kanë bashkëpunuar vetëm policia greke, DEA amerikane dhe policia italiane, pra jo policia shqiptare”, shkruan Berisha.
Ish-Kryeministri Berisha shkruan më tej se, pas deklaratës së Europol faktohet katërcipërisht se krerët, padrinot e grupit trafikant janë vetë Edvin Shullazi dhe Saje qorri. “Me këtë mashtrim të turpshëm e të paskrupullt të Ramës, Sajes dhe Hakiut dhe arratisjen me urdhër të Ramës dhe Sajes të Balilit nga Shqipëria, faktohet katërcipërisht se krerët, padrinot e grupit trafikant janë vetë Edvin Shullazi dhe Saje qorri! Sb”, përfundon Berisha.
“Escobari i Ballkanit”, 250 kg drogë për çdo rrugë në vendet e BE
Mediat greke shkruajnë se “Escobari i Ballkanit” dërgonte 250 kg drogë për çdo rrugë në vendet e BE. Xhevahir Poti, i arrestuar pak ditë më parë në Belgjikë, bashkë me të vëllain Dhimitrin, si pjesë e trafikut ndërkombëtar të lëndëve narkotike, në muajin prill dyshohet se ka negociuar trafikimin e një sasie prej rreth 250 kilogramë kanabis në drejtim të Gjermanisë.
46-vjeçari ka mbërritur në Shqipëri në fund të muajit mars, ku ka negociuar për gjetjen e sasisë së drogës. Policia greke ka raportuar se kjo sasi drogë iu është dorëzuar me datën 8 prill disa bashkëpunëtorëve ende të panjohur në Gjermani, në zonën e quajtur Konstandinopoja e vogël në kryeqytetin Berlin. Kjo sasi droge nuk është arritur të kapet nga autoritetet gjermane.
Xhevahir Poti rezulton të ketë dalë nga Shqipëria më datën 10 prill, pasi ngarkesa ka mbërritur në destinacion. Ndërsa Dhimitër Poti, pothuajse të gjitha hyrje-daljet drejt vendit tonë i ka nëpërmjet Athinës dhe Kakavijës, pavarësisht se ka një vendqëndrim të përhershëm në Belgjikë. Poti rezulton të ketë qenë në Shqipëri në mes të dhjetorit të vitit 2015, ku ka qëndruar dy ditë dhe më pas është larguar.
Dyshohet se ka zhvilluar takime me Balilin dhe pjesëtarë të tjerë të organizatës, emrat e të cilëve nuk bëhen me dije. Vëllezërit Poti dhe Klement Balili, sipas mediave greke, janë krerët e një prej grupeve më të mëdha të narkotrafikut.
Urdhër arresti ndërkombëtar për “Eskobarin e Ballkanit”
Autoritetet greke kanë lëshuar një urdhër arresti për “Eskobarin e Ballkanit” i identifikuar si Klement Balili. Sipas mediave, hetimet kanë rezultuar se bëhet fjalë për kreun e rrjetit më të madh të trafikut të drogës, në nivel europian. Brenda 48 orëve të ardhshme, prokurori i çështjes pritet ta shndërrojë atë në urdhër arresti ndërkombëtar dhe t’u dërgohet gjithë policive europiane. Ndërkaq, një dosje e çështjes do t’u dërgohet autoriteteve kompetente shqiptare. Sapo dosja të mbërrijë në vendin fqinj, autoritetet atje duhet ta gjejnë të dyshuarin dhe ta arrestojnë. Gjithmonë sipas mediave greke, ai nuk do të ekstradohet në Greqi, por do të qëndrojë që të japë shpjegime para autoriteteve gjyqësore në Shqipëri. Krahas shpalljes së urdhër arrestit, mësohet se po hetohet për llogaritë bankare të të dyshuarit në më shumë se 10 vende të Europës.
Rrjeti i drogës në të cilin dyshohet se ka qenë përfshirë edhe Klement Balili, kishte planifikuar të fuste në Francë 60 kg kokainë. Kjo ishte planifikuar të realizohej më 18 nëntor 2015. Droga ishte magazinuar në një vend të panjohur në Belgjikë dhe që andej do të dërgohej në Itali e më pas në Francë. Mirëpo, masat e larta të sigurisë, pas sulmeve terroriste në Paris, që ishin kryer pesë ditë më parë, i detyruan krerët e organizatës që ta anulonin operacionin. Kështu bën të ditur portali grek, “The Toc”, që pretendon se ka në dorë gjithë dosjen penale të çështjes. Sipas “The Toc”, operacioni financohej nga kreu shqiptar, me moshë 44 vjeç (që sipas gjithë mediave greke në fakt, është Balili).
Një tjetër operacion ka dështuar sërish, në shkurt 2016. Një sasi droge do të transportohej nga Spanja për në Itali, me një kamion të transportit ndërkombëtar. Përgjegjës për sigurimin e drogës ishte një pjesëtar i rrjetit, shtetas shqiptar, me moshë 43 vjeç. Për transportin ishin destinuar 100.000 euro, nga të cilat, 20.000 do t’u jepeshin drejtuesve të mjetit dhe 80.000 do t’u shpërndaheshin pjesëtarëve të tjerë, me rol mbështetës. Kamioni u nis më 20 shkurt nga Vjena e Austrisë, hyri në Itali dhe përmes Portit Civitavecchia mbërriti me traget në Portin e Barcelonës, për të marrë ngarkesën e drogës. Mirëpo, edhe ky aksion u anulua, për shkak të kontrollit të kamionit nga autoritetet spanjolle, gjë që krijoi dyshime tek drejtuesit e rrjetit.
Por edhe më herët, në prill 2015, kishte dështuar një tentativë për të transportuar drogë nga Belgjika për në kryeqytetin e Norvegjisë, Oslo, siç citon dosjen penale portali grek, “The Toc”. Kamioni ishte nisur me një ngarkesë të ligjshme nga Greqia, me stacion tranzit Mynihun, ku do të shkarkohej e do të merrte një ngarkesë tjetër, gjithashtu të ligjshme, për në Oslo. Kamioni ishte planifikuar të kalonte nga Belgjika, ku në vendet e posaçme do të fshihej sasia e drogës. Por edhe ky aksion u anulua, pasi skadoi afati i marrjes në dorëzim të ngarkesës së ligjshme. Por edhe për një arsye tjetër: Karroceria e kamionit kishte lartësi më të madhe nga sa lejohej që të qarkullonte në rrugët e Norvegjisë…
Në dosjen penale, gjithmonë sipas citimeve të portalit grek “The Toc”, ka edhe një detaj interesant sa i përket qëndrimit të policisë shqiptare, kur homologët grekë u folën mbi veprimtarinë e “Kelit”, siç përmendet Balili. Përfaqësuesit e autoriteteve shqiptare, “kur dëgjuan emrin, u thanë se nevojiteshin prova të pakundërshtueshme, me qëllim që ata ta gjenin e ta arrestonin”. Dhe kjo, shpjegon “The Toc”, për arsye se “Keli” sillej të kishte lidhje të fuqishme me aparatin shtetëror të vendit fqinj”.
R.POLISI
Përgjimet, Prokuria thërret Zv.drejtorn e policisë së shtetit
Për thuajse dy orë, Ardian Çipa, Zv.drejtor i policisë së shtetit, u mor në pyetje në prokurorinë e Tiranës në lidhje me pajisjen e përgjimit që disponon policia shqiptare raporton Lapsi.al. Çipa u mor në pyetje nga prokurorja Anisa Qilimi. Çipa mësohet se ka dhënë sqarime për rrethanat në të cilat është marrë pajisja e përgjimit dhe përdorimin e saj nga policia. Në ditët në vazhdim pritet që edhe Drejtori i Përgjithshëm i Policisë Haki Çako të japë shpjegime në prokurori. Organi i akuzës ka kërkuar nga policia pajisjen e përgjimit, por sipas uniformave blu ajo i përket Interforcës italiane. Një ditë më parë, Ministri i Brendshëm tha se bëhet fjalë për një pajisje që vetëm lokalizon numrat e telefonit dhe nuk përgjon bisedat apo mesazhet në celular.
12 propozimet e PD për Reformën Zgjedhore
Votim dhe numërim elektronik i votave
Partia Demokratike prezantoi në Komisionin e posaçëm parlamentar për Reformën Zgjedhore platformën e saj për amendimin e Kodit Zgjedhor. Bashkëkryetari demokrat, Oerd Bylykbashi tha se identifikimi biometrik i zgjedhësve, votimi dhe numërimi elektronik, qëndrojnë në krye të kërkesave.
“Të ecim përpara në futjen e identifikimit të zgjedhësve, votimit elektronik dhe tabulimit, nxjerrjes së rezultatit pa patur nevojën e numërimeve të fletëve të votimit në qendrat e përqendruara”, tha Bylykbashi. Deputeti demokrat Oerd Bylykbashi, propozi që votimi dhe numërimi elektronik të miratohen të parat në Kod për t’i dhënë mundësi përgatitjes së infrastrukturës zgjedhore, kundrejt propozimit të Finos për dy variante votimi, që të mos rrezikohen zgjedhjet e ardhshme parlamentare. Duke kërkuar që reforma të mos jetë një proces skematik, Bylykbashi propozoi votim dhe numërim elektronik.
“Duhet të sigurohet largimi i individëve kriminalë nga strukturat zgjedhore. Sfida kryesore duhet të jetë përdorimi i teknologjive, të bëhet identifikim biometrik për zgjedhësit dhe kjo është e mundur. Të bëhet votim dhe numërim elektronik. Kjo i jep fund votimit të personave më shumë se një herë. Me këtë shmanget keqpërdorimi i kartës së identitetit që është kthyer në faktor të madh risku. Identifikimi biometrik heq këtë mundësi. Fleta e votimit të jetë e administrueshme, askush të mos numërojë një fletë votimi të një subjekti për një tjetër, të gjitha këto janë të mundshme”.
Duke u ndalur tek fushata zgjedhore, Bylykbashi tha: “Shpenzojmë shumë para në procesin zgjedhor, të kufizohen me ligj shpenzimet e panevojshme e këtu fushatat janë më të shtrenjta se në SHBA. Të ndalen paratë e dyshimta në fushatë, pasi ka më shumë se sa deklarohen”.
Kryetari i Partisë Republikane, Fatmir Mediu propozi që Kodi ta ndalojë dhe trafikimin e deputetëve. “Kuvendi i Shqipërisë nuk mund të jetë Kuvendi i gjithë pazareve të gjësë së gjallë. Shtrembërimi i vullnetit qytetar duke ndryshuar kahet politike pa asnjë qëllim politik, por thjesht për pazar duhet të jetë një fenomen që ne duhet ta frenojmë”, tha Mediu. Votimi dhe numërimi elektronik sipas Partisë Demokratike do të mundësonte standarde në zgjedhjet e ardhshme në procesin e numërimit dhe votimit, si dhe uljen e kostove të zgjedhjeve.
Propozimet e PD
1. Dekriminalizimi i procesit zgjedhor. Zbatimi i plotë i ligjit të dekriminalizimit, në germë dhe frymë është kyç për një proces zgjedhor të besueshëm dhe të pranueshëm. Zbatimi i ligjit të dekriminalizimit duhet të sigurojë që asnjë kandidat me rekorde kriminale të mund të marrë një post të zgjedhur. Po kështu, këta individë nuk duhet të jenë pjesë e procesit zgjedhor dhe fushatës së partive dhe kandidatëve. Kodi Zgjedhor duhet të ndalojë që këta individë të marrin pjesë në administratën zgjedhore të çdo niveli.
Kodi Zgjedhor, në sintoni me Ligjin 138/2015 për dekriminalizimin e institucioneve publike, duhet të shtojë parashikimet për kriteret procedurat, afatet dhe dokumentacionin e nevojshëm në lidhje regjistrimin e kandidatëve për funksionet e zgjedhura me votim të drejtpërdrejtë.
Po kështu, Kodi Zgjedhor duhet të përfshijë parashikime të reja për të parandaluar penetrimin e individëve në çdo nivel të administratës zgjedhore, deri tek niveli i numëruesit.
Duhet parashikuar mundësia që në kodin zgjedhor dhe në ligjin për partitë politike të vendosen ndalime ose pengesa që persona me rekorde kriminale të marrin pozicione drejtuese ose janë anëtarë të organeve kolegjiale drejtuese të partive që kanë përfaqësim parlamentar ose në organet e pushtetit vendor. Duhet të parashikohen procedura verifikimi në përputhje me ato të Ligjit 138/2015. Ligji duhet të parashikojë sanksione të forta financiare përfshirë ndalime nga financimi vjetor apo zgjedhor për partitë që mbajnë në fuksionet e përcaktuara nga ligji persona me rekorde kriminale.
KQZ duhet të hartojë pa vonesë aktet e nevojshme nënligjore në përputhje me Ligjin 138/2015 dhe ndryshime të tjera ligjore në lidhje me dekriminalizimin e procesit zgjedhor.
2. Përdorimi i teknologjive në votim. Partia Demokratike kërkon futjen e teknologjive në votim në vitin 2017, me qëllim identifikimin e sigurtë të votuesve në qendrën e votimit, verifikimin dhe parandalimin e votimit të shumfishtë në të njëjtën qendër votimi ose në qendra të ndryshme, shmangien e kontrollit të votës (cënimin e lirisë së votës) në mënyrë politike, korruptive apo kriminale, modernizimin dhe përshpejtimin e procesit të votimit, numërimit dhe nxjerrjes së rezultatit, ndërkohë që sigurohet përdorimi i thjeshtë i teknologjive.
Duhet ngritur një sistem, i cili identifikon zgjedhësin në qendrën e votimit nëpërmjet dokumentit të identitetit dhe të dhënave biometrike, përfshirë shenjën e gishtërinjve. Komunikimi duhet të garantojë në kohë reale të dhënat në bazat shtetërore të të dhënave të gjendjes civile, listës së zgjedhësve, të dokumentave të identitetit dhe shenjave të gishtave. Gjithashtu, sistemi duhet të parashikojë verifikimin nëse zgjedhësi për të cilin po kryhet verifikimi, ka votuar më parë gjatë ditës së votimit në ndonjë QV. Verifikimi i suksesshëm duhet t’i hapë rrugë autorizimit për të votuar.
Qendra e votimit duhet të jetë e pajisur me pajisje elektronike votimi ku zgjedhja e subjektit zgjedhor nga votuesi bëhet në ekranin e pajisjes kompjuterike. Shfaqja e subjekteve në ekran duhet të jetë e qartë dhe e thjeshë për t’u kuptuar dhe zgjedhur. Zgjedhja e kryer në ekran passjell printimin e një flete votimi me karakteristika dixhitale sigurie që garantojnë unicitettin e fletës, votën e shprehur nga votuesi dhe fshehtësinë e saj. Fleta e votimit, përveç barcode apo një kodi të ngjashëm të lexueshëm në mënyrë optike, duhet të përmbajë të shtypur me gërma vetëm emrin e subjektit zgjedhor për të cilin ka votuar zgjedhësi, me qëllim që ky i fundit të ketë mundësi të verifikojë zgjedhjen e bërë.
Fleta e votimit është e lexueshme nga zgjedhësi para se të hidhet në kuti, por nuk mund të merret prej tij. Pajisja mundëson leximin viziv pa pengesë. Konfirmimi i zgjedhësit sjell hedhjen e fletës së votimit në kutinë e votimit, ndërsa vota regjistrohet elektronikisht në memorien e pajisjes së votimit në mënyrë që siguron fshehtësinë e votës. Me qëllim shmangien e shit-blerjes së votës, intimidimin e zgjedhësit dhe ruajtjen e konceptit bazë të votimit, vota e printuar nuk mund të merret fizikisht nga zgjedhësi. Vota e ruajtur në memorien elektronike të pajisjes është e dhëna parësore për hartimin e rezultatit zgjedhor, ndërsa vota e printuar e depozituar në kuti shërben vetëm për qëllime verifikimi dhe auditimi të rezultatit në procesin ankimor. Shkëputja e dy të dhënave me elementë të njëjtë dhixhitalë përbën garanci për bllokimin e çdo tentative për manipulim, transparencë dhe besueshmëri nga zgjedhësi dhe subjektet.
Ky sistem mundëson identifikimin e sigurtë të zgjedhësve, parandalimin e votimit të shumëfishtë apo në emër të zgjedhësve të tjerë, eliminon fenomenin e bllokimit të zgjedhësve nëpërmjet marrjes së dokumentit të identitetit, votimin e sigurtë që ul numrin e fletëve të pavlefshme, eliminim të fenomenit të votimit “karuzel” nëpërmjet nxjerrjes së votës jashtë QV, nxjerrjen e menjëhershme dhe të sigurtë të rezultatit zgjedhor, garantimin e shmangies së ndërhyrjeve nga jashtë në sistem dhe transparencë dhe auditim të plotë e të sigurtë të rezultatit.
Përzgjedhja e teknologjisë duhet bërë në mënyrë që siguron besim tek palët. Teknologjia duhet të garantoje akses të plotë e të papenguar për opozitën tek software dhe hardware i përdorur, procesi të jetë plotësisht i auditueshëm dhe objekt ankimi sipas rastit.
Një element thelbësor është ngritja e një grupi ekspertësh auditimi IT që përfshin detyrimisht ekspertë të partive politike si dhe hartimi dhe miratimi i procedurave transparente, profesionale, efikase të auditimit të software-it dhe hardware-it të sistemit. Këto objektiva duhet të garantojnë akses dhe besim të subjekteve zgjedhore dhe të publikut.
Ligji duhet të jetë i plotë në lidhje me përdorimin e teknologjive në votim. Teknologjia duhet të garantojë identifikim të saktë të zgjedhësve.
Një sistem i tillë gjithashtu, mund t’i hapë rrugë zvogëlimit të administratës zgjedhore, duke reduktuar numrin e komisionerëve, uljen e kostove me rreth 1,6 milionë euro në çdo zgjedhje, thjeshton procesin, rrit besimin në procesin e votimit dhe numërimit e për pasojë mundëson profesionalizimin e komisionerëve nëpërmjet trajnimit në kohë të tyre, edhe kur janë të emëruar politikisht. Një zvogëlim i administratës passjell ulje të kostos së procesit. Ulje të kostos passjell edhe reduktimi i kostove për printimin dhe logjistikën e fletëve të votimit me shumë subjekte. Gjithashtu, ky sistem, për shkak të saktësisë së identifikimit, votimit dhe numërimit, ul numrin e ankimeve zgjedhore duke shkurtuar fazën paszgjedhore.
3. Financimi i partive dhe fushatës dhe ulja e kostove të politikëbërjes. Pavarësisht përputhjes me standardet e Këshillit të Evropës, korniza ligjore për financimin e partive dhe fushatës zgjedhore duhet rishikuar për të siguruar barazi sipas standardeve ndërkombëtare, mekanizma rigoroz dhe efikasë kontrolli të burimeve të financimit dhe shpenzimeve, me qëllim garantimin e financimit të ligjshëm, të mjaftueshëm dhe transparent. Afatet dhe procedurat e deklarimit dhe verifikimit duhen rishikuar dhe shtrënguar. Përzgjedhja e ekspertëve kontabël duhet të jetë e detyrueshme për ekspertët që përcaktohen për të kryer ekspertimin. Refuzimi për të kryer ekspertimin duhet të përfshijë penalitete të forta.
Partia Demokratike propozon që financimi i partive politike dhe ai për zgjedhjet të jetë 100% nga buxheti i shtetit me qëllim shmangien e financimeve private nga burime të dyshimta. Paralelisht me këtë, propozohet kriminalizimi i financimeve private. Kodi Zgjedhor dhe ligji për partitë politike duhet të përcaktojnë rregulla dhe kritere detyruese për përllogaritjen e vlerës së financimit për njësi (vlerë për një zgjedhës dhe/ose vlerë për mandat përfaqësimi parlamentar), i cili të bëjë të mundur përllogaritjen e shumës që duhet të vejë në dispozicion buxheti i shtetit. Shuma e përllogaritur sipas kritereve duhet të jetë detyruese për t’u vënë në dispozicion sipas ligjit për buxhetin e vitit përkatës.
Kostot indirekte të politikës, përveç kostos së financimit publik, rriten nga pasojat që krijon konflikti i interesit që passjell financimi privat. Për këtë, duhet ashpërsuar korniza ligjore që pengon financimin nga subjekte që kanë përfituar nga fonde publike nëpërmjet tenderash dhe koncensionesh si dhe duhet të ndalohet përfitimi i tenderave apo koncensioneve për një kohë të përcaktuar, nga kompani që kanë financuar partitë politike dhe kandidatët.
Duhet rregulluar në mënyrë strikte përfitimi i donacioneve në natyrë dhe shërbime apo favore nga partitë politike, kandidatët apo edhe institucionet shtetërore. Lista e donatorëve, shifra e donacionit ose shifra e përllogaritur e një donacioni në natyrë ose shërbime, për institucionet shtetërore duhet bërë publike.
KQZ duhet të krijojë një listë kostosh reference të detyrueshme, për materiale, infrastrukturë apo aktivitete zgjedhore me qëllim matjen e shpenzimeve. KQZ duhet të jetë e autorizuar me ligj që të përllogarisë koston e aktiviteteve zgjedhore si në ambiente të hapura, edhe në ambiente të mbyllura bazuar mbi një listë shpenzimesh tip. Duhet përcaktuar kostoja për tipologji të ndryshme të zyrave elektorale, materialeve të propagandës (postera, billborde, flamuj, banera, etj). Lista e kostove-tip duhet bërë publike nga KQZ. KQZ duhet të përllogarisë shpenzimet e deklaruara sipas kostove të miratuara në rastet kur subjekti politik deklaron shifra më të ulta se kostot referencë.
Me qëllim uljen e kostove të fushatave dhe të politikëbërjes e për rrjedhojë, të ulë sasinë e nevojshme për financim dhe bërjen e këtij financimi të përballueshëm, Kodi Zgjedhor duhet të vendosë kufizime të detajuara për tipologjitë e caktuara të aktiviteteve dhe infrastrukturës së përdorur apo mjeteve të propagandës. Kështu, duhet kufizuar numri i zyrave elektorale në raport me popullsinë apo numrin e qendrave të votimit. Duhet kufizuar numri i billbordeve posterave, banerave apo flamujve të përdorur nga një subjekt. Duhen vendosur kufizime strikte për kohën totale dhe numrin e reklamave zgjedhore për çdo subjekt dhe kostoja e një reklame duhet të përcaktohet ligjërisht dhe të jetë e unifikuar. Në të njëjtën kohë duhen vendosur mekanizma që kostoja e reklamave të mos jetë e pagueshme drejtpërdrejtë, por të jetë e zbritshme nga transmetuesit televizivë dhe radiofonikë nga detyrimet që i kanë shtetit. Duhet të kufizohet numri i aktiviteteve që transmetohen live apo në çdo formë tjetër dhe që përfshin kosto për transmetim mediatik. Në çdo rast, kufizimet duhet të jenë proporcionale dhe nuk duhet të pengojnë zhvillimin dhe mediatizimin efikas të fushatës së një subjekti.
Shpenzimet zgjedhore (jo financimet) duhet të deklarohen periodikisht përpara zgjedhjeve. KQZ duhet të krijojë instrumentat për denoncimin e të dhënave në lidhje me shpenzimet e bëra nga subjektet politike sipas kostove të deklaruara prej tyre apo kostove referencë. Subjektet duhet të kenë detyrimin për të deklaruar periodikisht gjatë fushatës numrin e zyrave zgjedhore, tipologjinë e tyre dhe vendndodhjen përkatëse, numrin e aktiviteteve të kryera, sasinë e materialeve kryesore propagandistike (billborde etj), numrin e reklamave televizive dhe shpenzimet e tjera mediatike për pasqyrimin e fushatës, sondazhet e kryera dhe koston përkatëse. Subjektet duhet të regjistrojnë në KQZ kontratat për konsulencë zgjedhore apo për marrëdhëniet me publikun dhe të deklarojnë kostot përkatëse.
Përveç instrumentave zyrtarë të verifikimit në kohë dhe në vend gjatë fushatës, KQZ duhet të trajtojë me seriozitet denoncimet e bëra nga subjektet politike apo OJF edhe kur ato nuk janë të akredituara si vëzhguese apo denoncimet në media.
Duhet ngritur një sistem i pavarur verifikimi i lëvizjeve financiare të korporatave për një periudhë përpara dhe pas procesit zgjedhor. Subjektet e përfaqësuara në KQZ duhet të kenë mundësi që nëpërmjet audituesve zyrtarë të akredituar nga KQZ, të mbikëqyrin lëvizjet financiare dhe bankare që raportohen në Drejtorinë e Parandalimit të Pastrimit të Parave.
Partitë politike duhet të paraqesin raportet e detajuara financiare të financimit dhe shpenzimeve pas procesit zgjedhor në afate të shkurtuara. Subjektet politike duhet të justifikojnë paratë e shpenzuara. Shumat e pashpenzuara nga financimi i marrë, duhet të verifikohen si gjendje në llogaritë bankare të subjekteve. Kontrolli duhet të kryhet i njëjtë për të gjithë subjektet, duke shmangur selektivitetin dhe abuzimin me qëllim ushtrimin e presionit mbi subjekte të caktuara politike.
Ligji duhet të parashikojë sanksione të ashpra, përfshirë sanksione penale për deklarime të pasakta apo të rreme në lidhje financimin dhe shpenzimet politike. Duhet të sigurohet aplikimi pa ekuivok dhe konsistent i sanksioneve ligjore të përcaktuara. Duhet përcaktuar qartë përgjegjësia individuale edhe penale e funksionarëve partiakë dhe kandidatëve në kuadër të financimit politik dhe deklarimit të burimeve të financimit dhe shpenzimeve. Deklarimi i rremë i shpenzimeve duhet të passjellë humbjen e mandatit të zgjedhur dhe ndjekjen penale.
Duhet parë mundësia e krijimi të një komisioni të përhershëm parlamentar për monitorimin e financimit të partive politike në periudhë zgjedhore dhe jozgjedhore. Ky komision duhet të ngrihet mbi baza paritare dhe duhet të drejtohet nga opozita parlamentare. Komisioni duhet të ketë kapacitete të plota ligjore për të thirrur çdo institucion kompetent, përfaqësues të subjekteve deklaruese dhe çdo individ për të raportuar para tij.
4. Përdorimi i burimeve shtetërore dhe presioni mbi administratën. Duhen forcuar në Kodin Zgjedhor kriteret ndaluese për përdorimin e burimeve njerëzore dhe aseteve shtetërore në fushatën zgjedhore në favor të subjekteve zgjedhore apo kandidatëve. Për këtë qëllim duhet rishikuar edhe kuadri ligjor penal.
Duhet forcuar kuadri ligjor zgjedhor, por edhe ai që rregullon shërbimin civil dhe administratën publike në tërësi me qëllim mbrojtjen e nëpunësve nga presionet politike nëpërmjet masave disiplinore dhe largimeve nga puna. Duhet forcuar legjislacioni që pengon marrjen në punë me qëllime elektorale. Duhet forcuar kuadri ligjor penal për presionin e ushtruar ndaj punonjësve të administratës me qëllim pjesëmarrjen në aktivitetet zgjedhore, strukturat zgjedhore të subjekteve garuese dhe veçanërisht presionet për të votuar në favor të kandidatëve të caktuar.
Duhen ngritur instrumente ligjore efikase për denoncimin dhe hetimin e rasteve të presionit mbi punonjësit e administratës. Prokuroria duhet të hetojë rastet e denoncuara si akte që cenojnë lirinë e votës.
5. Media dhe fushata. Korniza ligjore duhet rishikuar me qëllim garantimin e parimit “par condicio” ose kushteve të barabarta, si dhe të shmanget çdo formë censure e drejtpërdrejtë apo e tërthortë nga shteti apo media të veçanta. Korniza ligjore duhet të sigurojë mbulim të plotë të nivelit të zhvillimit të medias së shkruar, elektronike dhe në internet.
Në periudhën e fushatës zgjedhore liria e shprehjes e kandidatëve dhe liria e zgjedhësve për të përzgjedhur midis platformave konkurruese duhet të prevalojë mbi çdo aspekt tjetër, përfshirë lirinë e medias. Liria e medias nuk duhet të përthyejë apo deformojë mesazhin që japin kandidatët, i cili duhet të transmetohet tek zgjedhësi në mënyrën më të drejtpërdrejtë të mundshme. Zgjedhësi duhet të bëjë zgjedhje të informuar dhe të lirë nga çdo ndikim. Kostot e mbulimit mediatik duhet të ulen dhe kontrollohen në përputhje me standardet dhe praktikat e mira ndërkombëtare. Mekanizmat e monitorimit duhet të forcohen në aspektin e kompetencave, kapaciteteve dhe profesionalizmit apo pavarësisë nga shteti. Duhet të zhvillohen dhe miratohen dokumente që përcaktojnë standarde sasiore dhe etike sipas fushave të mbulimit mediatik, me qëllim garantimin e njëtrajtshmërisë dhe efikasitetit të mbulimit dhe të monitorimit. KQZ duhet të aplikojë pa mëdyshje sanksionet ligjore.
6. Listat e zgjedhësve dhe sistemi i adresave. Duhet rishikuar kuadri ligjor dhe administrativ për hartimin e listave të zgjedhësve, si dhe të garantohet integriteti i dokumenteve të identitetit. Kuadri ligjor duhet të garantojë që zgjedhësit të votojnë sipas vendbanimit faktik të regjistruar.
Për këtë qëllim, duhen forcuar kriteret dhe procedurat ligjore dhe nënligjore të regjistrimit dhe verifikimit të vendbanimit faktik nga zyrat e gjendjes civile (ZGJC) dhe pushtetit vendor. Procedura e verifikimit duhet të kryhet nga zyrtarë të përcaktuar të bashkisë (Policia Bashkiake) brenda një afati të shkurtër dhe duhet të garantojë që vendbanimi i deklaruar i shtetasit është faktik. Ligji duhet të lidhë shërbime të ofruara nga shteti me regjistrimin e vendbanimit faktik të saktë. Saktësia e vendbanimit lidhet me saktësinë e të dhënave për dokumente identifikimi si letërnjoftim, pasaportë apo patentë dhe të dhëna të rreme mund të ndikojnë organet ligjzbatuese apo gjykatat në përmbushjen e funksioneve.
Duhet të parashikohen rregulla të qarta e strikte për deklarimin dhe/ose ndryshimin e vendbanimit nga një njësi në një tjetër dhe brenda të njëjtës njësi, si dhe mekanizma ligjorë kontrolli e verifikimi që janë të thjeshtë e të besueshëm.
Deklarimi i rremë e vendbanimit duhet të jetë i dënueshëm. Deklarimi i të dhënave të rreme passjell falsifikim të të dhënave të regjistrit të gjendjes civile dhe ligji duhet të penalizojë deri edhe penalisht deklaruesit e të dhënave të rreme dhe zyrtarët që nuk kryejnë verifikimin sipas ligjit. Ligji duhet të lejojë çregjistrimin kryesisht të vendbanimeve fiktive.
Qeveria duhet të plotësojë regjistrin e adresave me urgjencë dhe saktësi e transparencë për publikun dhe opozitën. Regjistri i adresave të shtetasve dhe saktësia e tij është themelore për saktësinë e listave të zgjedhësve dhe parandalimin e manipulimit të tyre. Nëpërmjet popullimit të sistemit të adresave duhet të hiqen rekordet “999” dhe listat duhet të pastrohen nga dublimet. Popullimi i regjistrit të adresave duhet të përfundojë para fillimit të procesit të listave të zgjedhësve për vitin 2017. Opozitës duhet t’i krijohen mekanizma aksesi dhe monitorimi të plotë në këtë proces.
7. Votimi i emigrantëve. Ndryshimet ligjore për regjistrimin e emigrantëve përbëjnë rrezik për të drejtën e votës së emigrantëve, pasi regjistrimi në regjistrin e emigrantëve passjell heqjen automatike të tyre nga QV në territorin e Republikës së Shqipërisë. Legjislacioni zgjedhor dhe i gjendjes civile duhet të mbrojnë këtë të drejtë duke harmonizuar dispozitat e ligjit të gjendjes civile me Kodin Zgjedhor.
Duhet të krijohen mekanizma ligjorë auditimi nëpërmjet auditësh zyrtarë si në rastin e listave të zgjedhësve, për të dhënat e sistemit TIMS në lidhje me hyrje-daljet e emigrantëve në periudhë zgjedhore dhe ditën e votimit, me qëllim verifikimin e mashtrimeve zgjedhore nëpërmjet votimit të paligjshëm në emër të emigrantëve.
Prokuroria duhet të ndjekë me rreptësi pretendimet për shkelje të kësaj natyre që mund të përfshijnë jo vetëm votimin fiktiv, por edhe falsifikimin nga zyrtarë të të dhënave të TIMS. Verifikimi duhet të përfshijë verifikimin dhe ballafaqimin e hyrje-daljeve të kufi me të dhënat e votuesve në ditën e zgjedhjeve.
8. Rishpërndarja e mandateve. Duhet siguruar informacion periodik mujor për ndryshimet e popullsisë në gjendjen civile me qëllim sigurimin e shpërndarjes së drejtë të mandateve sipas qarqeve. Auditët e KQZ të përcaktuar me ligj duhet të kenë të drejtë të verifikojnë ndryshimet e kryera në regjistrin kombëtar të gjendjes civile dhe t’ia raportojnë zyrtarisht KQZ-së.
9. Roli i policisë në zgjedhje. Duhet rishikuar korniza ligjore që rregullon Policinë e Shtetit dhe rolin e saj në procesin zgjedhor. Policia e Shtetit duhet të garantojë që persona me rekorde kriminale apo të lidhur me struktura kriminale të mos jenë të pranishëm pranë qendrave të votimit apo të dëmtojnë fushatën e subjekteve zgjedhore.
Policia e shtetit duhet të hetojë menjëherë dhe në mënyrë të besueshme dhe transparente çdo rast dhune të denoncuar nga subjektet zgjedhore. Rastet e hetuara duhet të referohen në Prokurori.
Ligji duhet të rregullojë qartë identifikimin e efektivave të përfshirë me detyra në procesin zgjedhor, rolin dhe detyrat e ngarkuara dhe rregullat për veprim të Policisë së Shtetit në fushatë, ditën e votimit dhe gjatë numërimit të votave.
10. Forcimi i politikës penale. Rishikimi dhe sipas rastit, ashpërsimi i politikës penale në lidhje me krimet zgjedhore. Është i nevojshëm rishikimi i të gjitha dispozitave penale në lidhje me veprat penale zgjedhore. Ligji i dekriminalizimit ka vendosur ndalim 20-vjeçar për ushtrim funksioni pas kryerjes së dënimit me burg për personat që kryejnë vepra penale në fushën e zgjedhjeve. Ky ndalim tregon vullnetin e legjislatorit për ta konsideruar krimin zgjedhor me një rrezikshmëri të madhe sociale, të njëjtë me korrupsionin.
Korniza ligjore penale duhet t’i përshtatet këtij vullneti politik dhe publik. Në mënyrë të posaçme, shitblerja e votës, korruptimi i funksionarëve zgjedhorë, marrja apo dhënia e premtimit të votës apo mbështetjes zgjedhore nëpërmjet ofrimit të të mirave materiale duhen klasifikuar si korrupsion zgjedhor. Legjislacioni penal i shteteve demokratike ka përcaktime që i kualifikojnë këto vepra si korrupsion zgjedhor. Për shembull, në Itali, këto veprime përbëjnë korrupsion dhe Gjykata e Kasacionit, në vitin 2014, ka vendosur që ndryshe nga veprat e zakonshme të korrupsionit ku kërkohen dy persona që vepra të jetë konsumuar, korrupsioni zgjedhor konsiderohet se është konsumuar si vepër penale edhe kur veprimet e kundërligjshme janë kryer nga një person i vetëm (premtuesi, ofruesi apo kryerja e një veprimi pa patur domosdoshmërisht pëlqimin e atij që përfiton).
Duke u konsideruar si korrupsion, kjo vepër duhet t’i nënshtrohet hetimit për veprat e korrupsionit nga Prokuroria e Krimeve të Rënda e në përputhje me Reformën në Drejtësi, nga Prokuroria e Posaçme Antikorrupsion dhe Byroja Kombëtare e Hetimit.
Ligji duhet të parashikojë shpërblime të larta për personat që denoncojnë raste të korrupsionit zgjedhor. Shpërblimi duhet që të jetë dukshëm më i lartë se pagesat korruptive që ofrohen në shkëmbim të votës, dokumenteve të identifikimit apo veprave të tjera të dënueshme. Ndërkohë që dënohet pranimi i pagesës apo të mire materiale, përfitimi, privilegji, shërbimi, vendi pune, etj., nga votuesi, komisioneri apo çdo person tjetër që parashikon ligji, denoncimi mund të passjellë përjashtim nga ndjekja penale.
Duhet të hetohen dhe dënohen rastet e denoncimit të përdorimit të dokumenteve të identifikimit të falsifikuara dhe të votimit të shumëfishtë.
Prokurori i Përgjithshëm duhet të ndërmarrë masa të dukshme dhe të besueshme në forcimin e zbatimit të politikës penale ndaj krimit zgjedhor. Prokuroria duhet të ngrejë një task forcë me resurse të mjaftueshme për ndjekjen, hetimin dhe procedimin penal të krimeve zgjedhore.
11. Referendumet. Duhet rishikuar korniza ligjore që rregullon referendumet me qëllim garantimin efikas e të papenguar nga ligji apo vullnetet politike apo ekstraligjore e të drejtës për demokraci të drejtpërdrejtë. Duhen rishikuar afatet, procedurat dhe kërkesat e panevojshme dhe penguese ligjore që janë vërtetuar se bëjnë de facto nul iniciativat për referendum.
12. Sistemi zgjedhor. Reforma duhet të marrë në shqyrtim edhe optimizimin e sistemit zgjedhor dhe eliminimin e hapësirave për abuzim me të. Ndërkohë që sistemi duhet të garantojë përfaqësim politik, ai duhet të sigurojë efikasitet në qeverisje.
Duhet garantuar e drejta e çdo subjekti politik real dhe kandidati të pavarur për të garuar të lirë, por duhet eliminuar që sigla partiake të “blihen” dhe të përdoren në zgjedhje për të kontrolluar votën nëpërmjet skemash mafioze të kontrollit të votës. Ndërkohë që duhet ruajtur e drejta e shtetasve për të krijuar parti politike pa pengesë, partitë politike duhet të regjistrohen në zgjedhje mbi bazën e një minimumi mbështetjeje që provon ekzistencën reale të tyre. Siglat e partive të regjistruara formalisht mund të përdoren për të kontrolluar votat e blera apo votuesit e intimiduar duke orientuar këta votues që ta hedhin votën në sigla të caktuar. Më pas, në numërim verifikohet nëse zgjedhësit përkatës i kanë hedhur votat siç janë instruktuar. Nëpërmjet skemash të përcaktuara mafioze, kur në garë konkurrojnë një numër i lartë partish të regjistruara fiktivisht, mund të kontrollohet një numër i madh votuesish për qendër votimi apo në nivel zone zgjedhore.
Reforma duhet të përmbyllet në kohë të mjaftueshme për të garantuar që procesi përgatitor të jetë i plotë dhe i besueshëm. Kjo kërkon vullnet të qartë kryesisht nga mazhoranca, jo vetëm për të përmbyllur reformën ligjore, por edhe për të marrë masat për alokimin e fondeve të mjaftueshme, marrjen e masave që ndalojnë përdorimin e aseteve shtetërore dhe të administratës, si dhe veprimet e tjera që lidhen me veprime kyçe përgatitore si listat e zgjedhësve, adresat, etj.
Kjo kërkon edhe monitorim parlamentar me qëllim garantimin në kohë të zbatimit të kornizës ligjore.
Pajisja e përgjimit 800 mijë euro, mbahet në Akademinë e Rendit
Nënkryetari i Komisionit të Sigurisë, Flamur Noka ka zbuluar disa detaje nga e ashtuquajtura pajisje e përgjimit, që sipas opozitës përdoret nga Policia e Shtetit. Në mbledhjen e djeshme të komisionit, Noka tha se pajisja kushton 800 mijë euro dhe mbahet në Akademinë e Rendit. “Pajisja ekziston e ka hyrë në mënyrë të paligjshme. Duam të dimë si ka funksionuar. Pajisja ka specifikë se përpos se përgjon ka një element tjetër, të përgjon edhe me telefon të fikur. Përdor telefonin si mikrofon”, deklaroi Noka. Sipas Nokës, ministri e pranoi që pajisja ekziston dhe kjo çështje përbën një skandal kombëtar. “Dje mbledhja u la përgjysmë se të majtët u larguan. Gjykuam që çështja është madhore e përbën skandal kombëtar. Kemi fakte se Presidenti pranoi ekzistencën e pajisjes. Patëm mundësi të shohim ministrin e Brendshëm që e pranoi se pajisja ekziston, por dha disa versione”, deklaroi Noka. Komisioni i Sigurisë ka votuar që të thirren në seancë dëgjimore të gjithë personat që kanë dijeni për të ashtuquajturën pajisje përgjimi. Me të gjitha votat pro, komisioni vendosi që gjatë mbledhjes së sotme të vijnë për të dëshmuar personat që kanë informacion për përgjimet, ministri i Brendshëm, Saimir Tahiri, drejtori i policisë, Haki Çako, kreu i SHISH, Visho Ajazi Lika dhe kryeprokurori Adriatik Llalla. Gjatë debateve, deputeti i LSI, Luan Rama ka shprehur shqetësimin mbi përplasjen e deklaratave të ministrit të Brendshëm dhe Presidentit të Republikës, ndërsa ka theksuar rëndësinë e një hetimi të pavarur nga ana e Prokurorisë së Përgjithshme. “Ministria e Brendshme e policia duhet të respektojnë kuadrin ligjor. Ka mospërputhje mes deklaratave të ministrit dhe Presidentit. Deri kur të ketë qëndrim të Prokurorisë prezumohet pafajësia. Këtë e ndan hetimi i pavarur i Prokurorisë. Jam shprehur dakord për seancën dëgjimore. Më parë të vijë kreu i shërbimit sekret”, është shprehur Luan Rama. Nga ana e tij, Noka ka theksuar se Tahiri lëviz me makinë të blinduar dhe se Prokurori nuk mund të informojë komisionin për këtë çështje. Ndërkohë, Luan Rama theksoi se implikimi i Interforcës është një shkelje ligjore e rëndë nëse ka ndodhur. “Nuk besoj se ka ndodhur kjo gjë. Të shkojmë deri në fund të vërtetës”, tha Luan Rama. Menjëherë pas tij, reagoi deputeti Pirro Lutaj, i cili kërkoi edhe një herë modifikimin e kërkesës për thirrjen e autoriteteve përkatëse që do të referonin në komision. Në reagimin e tij, deputeti demokrat Asllan Dogjani theksoi se Policia e Shtetit dhe Ministria e Brendshme kanë shkelur Kushtetutën duke marrë një kompetencë që nuk i takon këtyre dy institucioneve, por Prokurorisë së Përgjithshme. Pajisja në fjalë përgjon të gjithë rrjetet sociale që ka smartphone. Ndryshe nga pajisjet e tjera të përgjimit, kjo ka antenë falso, e cila përforcon valët e telefonit. “Problemi është se nuk duhet të hyjmë kaq thellë, por kjo pajisje është kapur në punë. Janë përgjuar, sepse janë kapur frekuenca”. Deputeti demokrat, Flamur Noka, e ka cilësuar një skandal dhe krim të rëndë shtetëror, pajisjen e përgjimit, për të cilën është folur gjerësisht dy ditët e fundit. Në një prononcim mediatik, Noka tha se sipas ligjit për përgjimet, ky atribut i takon Prokurorisë së Përgjithshme dhe jo ndonjë institucioni tjetër. Sipas deputetit demokrat, me këtë pajisje përgjimesh, cenohet rëndë siguria kombëtare, si dhe cenohen të drejtat e liritë e qytetarëve. “Nisur nga informacionet mediatike apo jo mediatike, u shqetësuam dhe e përcollëm këtë në komision. Kërkuam seancë dëgjimore me ministrin, kreun e SHISH dhe kryeprokurorin. U pranua se ekziston një pajisje e tillë, por sipas ministrit Tahiri, përdoret për çështje trajnimesh. Është një rast i paprecedentë që të futet kështu në vend një pajisje e tillë e paligjshme. Nuk ka bërë vaki në gjithë vitet e pluralizmit kjo gjë. Në përpëlitje për të shpëtuar nga kjo histori, thonë se është pajisje për trajnim. Unë kam qenë ministër i Brendshëm, por edhe kushdo që e njeh ligjin për përgjimet, thotë se atributi i përgjimeve i takon Prokurorisë së Përgjithshme. Mund të iniciojnë institucionet e ndryshme, por duhet miratimi i prokurorit të Përgjithshëm. Por edhe ky i fundit duhet të marrë konfirmimin e gjykatës për hetime në kohë të gjatë. Çfarë trajnimi u bëka me një pajisje që nuk përdoret për përgjim? Ky është skandal, është një krim i rëndë shtetëror, një krim i paprecedentë. Në rast se deri sot kemi ecur mbi bazën e aludimeve, por sot flasim ndryshe, kur e pranon ministri, pasi cenohen të drejtat dhe liritë e njeriut. Kjo pajisje e instalua në një institucion të paligjshëm sa i takon përgjimit, përbën krim. Të gjithë ata që kanë konsumuar këtë vepër penale, këtë krim, do të përgjigjen para ligjit. Në SHBA ka ndodhur një skandal i ngjashëm me këtë që po flasim ne dhe ka dhënë dorëheqjen një President, pasi cenohet rëndë siguria kombëtare”.
Debatet në komision, pajisja përgjon edhe kur telefoni është fikur
Flamur Noka: Jemi të shqetësuar për cenimin e sigurisë kombëtare. Presidenti ngriti shqetësimin, kërkoi hetim. Pajisja ekziston në mënyrë të paligjshme, kushton 800 mijë euro. Të përgjon me telefon fikur.
Qefalia: A ka pasur më parë pajisje?
Luan Rama: Ministria e Brendshme e policia duhet të respektojnë kuadrin ligjor. Ka mospërputhje mes deklaratave të ministrit dhe Presidentit. Deri kur të ketë qëndrim të Prokurorisë prezumohet pafajësia. Këtë e ndan hetimi i pavarur i Prokurorisë. Jam shprehur dakord për seancën dëgjimore. Më parë të vijë kreu i shërbimit sekret.
Noka: Ministri lëviz me makinë të blinduar. Prokurori nuk mund të vijë për të informuar për këtë çështje.
Luan Rama: Implikimi i Interforcës është një shkelje ligjore e rëndë nëse ka ndodhur. Nuk besoj se ka ndodhur kjo gjë. Të shkojmë deri në fund të vërtetës.
Pirro Lutaj: Ne nuk kemi ikur nga komisioni, por donim të modifikohej kërkesa për thirrjen e personave këtu. Thirrja e prokurorit e kufizuar.
Asllan Dogjani: E drejtë e përgjimit vetëm e Prokurorisë. Ështe shkelur Kushtetuta.
Arben Çuko-Nokës: Je bërë agronom, inxhinier elektronik, specialist i midhjes dhe i peshkut.
Arben Shahini
Tahiri mashtroi për marrëveshjen me italianët
Gjatë ditës së djeshme u publikua në media një dokument i firmosur nga ish-ministri i Drejtësisë, President i Republikës, Bujar Nishani. Kjo marrëveshje është përmendur edhe një ditë më parë nga ministri i Brendshëm, Saimir Tahiri. Në bazë të një marrëveshjeje të vitit 2007, që është firmosur nga Bujar Nishani, Policia e Shtetit me atë italiane e firmosin atë për të dhënë ndihmë për policinë tonë, tha Tahiri në “Top Story”. Më pas ministri i Brendshëm shtoi: Në bazë të kësaj marrëveshjeje, hyn në punim edhe përdorimi i një pajisjeje, që tregon se cilat janë numrat e telefonave që funksionojnë në një zonë të caktuar. Pajisja është si të marrësh numëratorin e telefonave fiksë”. Por nga marrëveshja nuk del në asnjë pjesë që të bëhet fjalë për pajisje të përdorura nga pala italiane për trajnimin e policisë shqiptare. Aty flitet për shkëmbime specialistësh dhe organizime seminaresh trajnimi, por jo për pajisjet që do të përdoren në këto seminare. Kjo po zbatohet aktualisht me pajisjen teknike, në trajnimin që po kryen policia shqiptare, thotë Tahiri, i cili e merr të mirëqenë faktin se një marrëveshje trajnimi presupozon edhe instalimin e pajisjeve përkatëse nga trajnuesit. Sipas praktikës së marrëveshjeve ndërkombëtare, të tilla detaje duhet të përcaktohen ose në anekse të të njëjtës marrëveshjeje ose në një marrëveshje të posaçme. Por këtu nuk bëhet fjalë për lapsa e fletore, por për pajisje, përdorimi i të cilave është rregulluar me ligj të posaçëm. Në bazë të po asaj marrëveshjeje që ka publikuar Tahiri, pala italiane angazhohet të kryejë aktivitetin e trajnimit në përputhje me ligjin shqiptar. Ligji shqiptar është i qartë në rastin e përdorimit të pajisjeve të tilla dhe kërkon autorizimin e Prokurorisë ose gjykatës, gjë që në rastin e kësaj pajisjeje nuk rezulton se një autorizim i tillë është dhënë. Sipas interpretimit që Tahiri i bën kësaj marrëveshjeje, nëse Mimi Kodheli do të nënshkruante një marrëveshje për stërvitjen e tankistëve apo pilotëve në Shqipëri, të huajt duhet të sillnin edhe tanke apo avionë lufte për të mësuar “nxënësit” shqiptarë.
HashtagAL
Kryesore
Continue to the category
