25.5 C
Tirana
E enjte, 10 Korrik, 2025
type here...

Reagon Bashkia Kamëz: Veliaj dordolec bastard, hoqi nga ndihma ekonomike 6 mijë familje

Bashkia Kamëz ka reaguar sot ndaj kreut të Bashksië së Tiranës, Erion Veliaj për racizmin ndaj banorëve të Kamzës. Në një njoftim për shtyp të Bashkisë Kamëz thuhet se, Veliaj vijon gjuhën e tij raciste dhe diskriminuese ndaj qytetarëve dhe Bashkisë së Kamzës.

“Kjo gjuhë bastarde që përdor kryetari i Bashkisë së Tiranës ka në nëntekst largimin e vëmendjes nga punët e mëdha që ka qyteti i tij. Ky dordolec duhet të mbajë gojën e të mos i fyejë banorët e Kamzës dhe Paskuqanit, këta banorë punëtorë dhe të zgjuar, pasi me djersën e tyre këto 25 vite ndërtuan një jetë nga fillimi duke e nisur nga zero, duke punuar e fituar paranë me djersën e ballit dhe jo si ti dhe Mjaft-istët dhe G99-shat që me zero ditë pune na u bënë ministra, kryetar bashkie, uzurpuan administratën, u bënë milionerë dhe menjëherë iu sulën të ardhurave duke u hequr edhe ndihmën ekonomike, vetëm në Kamëz 6 mijë familjeve, pra duke u hequr bukën e gojës. Këtë gjë nuk ta falin banorët e Kamzës”, thuhet në njoftimin për shtyp.

Sipas Bashkisë Kamëz, Veliaj nuk po bën gjë tjetër, por po ecën nën gjurmët e padronit të tij Edi Rama dhe po nxitin një konflikt që asnjë në këto 25 vite nuk e ka bërë, pra që të dy janë antiveriorë. “E kanë shprehur këtë gjuhë urrejtjeje dhe më parë siç Rama shefi i Veliajt, duke i ironizuar në një takim elektoral veriorët, kur tha që na vijnë nga Alpet; i quajti shpellarë, Veliaj vandalë se nuk na ditkan ku është liqeni etj.

Erioni le të merret me investimet në territorin e Bashkisë së Tiranës në kufi me Kamzën siç është lumi i Tiranës, që e ka kthyer në një geto të vërtetë. E vetmja gjë që ka në vizionin e tij është rritja e taksave, që ky kryebashkiak i Tiranës përdor çdo ditë ndaj qytetarëve dhe bizneseve të Tiranës. Ndërsa kërkon të merret edhe me administrimin e Kamzës, pyesim se çfarë bëre mirë deri tani ti Erion, që të ta lëmë edhe Kamzën që ta bësh “dritë”?! Nuk duam të përmendim mynxyrën, duke lënë në harresë të gjitha njësitë administrative që janë pjesë e kryeqytetit, si rezultat i reformës administrative-territoriale.

Je i vetmi pushtetar që ngrihesh dhe u bën presione institucioneve gjyqësore dhe ndërsa ne mendojmë që ti duhet t’i drejtohesh drejtësisë për shkelje të rënda të Kushtetutës, vjen e bën dordolecin duke futur hundët në punët e njësive të tjera administrative. Edhe si ministër Erion vetëm për një gjë u bëre mediatik, për dasmën mbi kala! Qytetarët e Kamzës kanë ditur dhe dinë të orientohen drejt në zgjedhjet e tyre”, thuhet në njoftimin për shtyp të Bashkisë Kamëz.

Përgatiti:
Edmond DURAKU

Përgjimet, fundi i Ramës, ka kaluar vijën e kuqe

Të gjitha detajet në lidhje me pajisjen e përgjimit, të cilat kanë nisur të bëhen publike hedhin dritë mbi skandal dhe krim shtetëror, i cili vendos përpara përgjegjësisë direkte kreun e qeverisë dhe ministrin e tij të Brendshëm. Tahiri e ka përgënjeshtruar fillimisht ekzistencën e një pajisje të tillë. Më pas, ai ndryshoi qëndrim dhe e pranoi ekzistencën e saj, por deklaroi se përdoret për trajnim.
Në një skandal të mirëfilltë shtetëror, policia refuzoi urdhërin e Prokurorisë, e cila kërkoi sekuestrimin e kësaj pajisje përgjimi me pretekstin se ajo i përket Interforcës italiane, e cila nga ana e saj deri tani ka heshtur përpara një shkrese zyrtare të dorëzuar nga Prokuroria. Po ashtu doganat kanë mohuar zyrtarisht deri tani që të tregojnë dokumentat se si kjo pajisje ka hyrë në Shqipëri, duke e bërë të qartë se ajo nuk është regjistruar zyrtarisht sikurse e kërkon ligji.
Është thënë nga goja e ministrit se kjo pajisje është përdorur për trajnime, ndërsa ligji e saktëson se edhe këto trajnime nuk mund të bëhen nga policia pa lejen e Prokurorisë, madje është ky institucion, ai i cili duhet të bëjë trajnime të tilla.
Gazetari Fevziu, duke iu referuar burimeve të shërbimeve sekrete ka paraqitur mënyrën klandestine të hyrjes në Shqipëri të kësaj pajisje. Sipas tij, pajisja ka hyrë më 12 mars në Shqipëri dhe ajo ka qenë në bagazhin e një makine model BMW X3 me targa italiane. Ky informacion le të kuptosh se futja e pajisjes është evidentuar nga institucionet jashtë kontrollit të qeverisë që ditën e parë të futjes së saj.
Informacioni tjetër është se pajisja është kapur, duke përgjuar përmes metodave të specializuara të shërbimeve inteligjente. Frekuencat e këtyre përgjimeve janë një tjetër provë e rëndë me të cilën do të duhet të përballet Tahiri dhe Rama. Ish-Kryeministri Berisha deklaroi tre ditë më parë se me këtë pajisje nuk janë përgjuar gjatë këtyre dy muajve jo vetëm krerët e shtetit shqiptar, duke nisur nga Kreu i Shtetit tek, Kryetari i Parlamentit dhe Kryetari i opozitës, por janë përgjuar edhe ambasadorë të vendeve mike.
Kjo deklaratë e ish-Kryeministrit Berisha nuk është përgënjeshtruar. Vendi është në prag të një megaskandali politik, i cili prej tre ditësh i ka kaluar kufijtë e territorit të këtij vendi. Mediat italiane kanë mundur që të evidentojnë edhe mënyrën e futjes në Shqipëri në mënyrë klandestine të kësaj pajisje përgjimi. Ata sqarojnë se kemi të bëjmë me një plan privat mes krerëve të qeverisë në Shqipëri dhe familjarëve të kreut të Interforcës italiane. Burimet saktësojnë gjithashtu se në këtë biznes janë të përfshirë emra të njohur të përfshirë në struktura të hetimit të krimit, por që janë të evidentuar për lidhjet me trafikantë dhe kriminelë.
Burimet saktësojnë se pajisja është marrë në mënyrë private, sepse ajo disponohej në një nga banesat e këtyre zyrtarëve me lidhje të dyshimta me krimin në vendet fqinje dhe që mbahej po ashtu në mënyrë klandestine dhe të paautorizuar. Të njëjtat burime saktësojnë se personi që mendohet se ka futur këtë pajisje në mënyrë klandestine në Shqipëri ka në banesat e tij edhe dy pajisje të tjera të të njëjtës markë.

Pajisja është përdorur

Gazetari i afërt me ministrin e Brendshëm, Tahiri deklaroi mbrëmë se pajisja nuk është përdorur vetëm për trajnime, por edhe për të hetuar dhe arrestuar eksponentë të krimit. Ai solli rastin e një pengmarrjeje të pak javëve më parë, që sipas tij ishte bërë e mundur që të kapej autori pikërisht, sepse ishte vënë në punë kjo pajisje. Në këtë rast, gazetari i afërt që shpalos në debate qëndrimin e Tahirit nuk dëshmoi nëse për një përgjim të tillë a kishte marrë policia leje për përgjim nga Prokuroria? Nëse është përdorur në një rast pengmarrje dhe pa vënë në dijeni Prokurorinë, atëherë kjo pajisje përgjimi provohet se po përdoret gjërësisht nga policia në kundërshtim me ligjin.
Rama edhe Tahiri dhe mercenarët e tyre në media nuk mund të bindin askënd se qëllimi i këtyre përgjimeve është lufta ndaj krimit, sepse është e vështirë sot që të gjendet qoftë që ta besojë këtë. Kjo është një qeveri me lidhje kriminale të forta dhe ajo vetëm krimin nuk mund të luftojë. Arsyeja se përse kjo pajisje ka mbërritur në Shqipëri është e mirëfilltë për qëllime politike. Përfshirja në hetim edhe e ambasadorëve dhe evidentimi i këtyre përgjimeve nga autoritete të specializuara është një fakt që tregon se Rama e ka kaluar vijën e kuqe. Këto përgjime janë fundi politik i Ramës. Se cila do të jetë kostoja e këtij fundi, kjo mbetet për t’u parë gjatë ditëve të ardhshme, por askush sot në Shqipëri nuk mund të pranojë që të jetë i përgjuar për interesat politike dhe mafioze të Ramës dhe Tahirit dhe aq më pak mund ta pranojnë këtë përfaqësues ndërkombëtarë të vendeve mike.

Arben SHAHINI

Basha-Majko, takim për Asamblenë e NATO-s

Kryetari i Partisë Demokratike Lulzim Basha zhvilloi dje një takim me deputetin e Partisë Socialiste Pandeli Majko, një takim që ngjalli së tepërmi interesin e gazetarëve dhe të opinionit publik. Takimi mes tyre u zhvillua në ‘Rogner’ dhe zgjati rreth 40 minuta. Për këtë takim mes Bashës dhe Majkos nuk pati njoftim zyrtar, ndërsa sapo gazetarët mësuan rreth kësaj çështje nxituan të merrnin informacion pikërisht në vendin ku po zhvillohej ky takim surprizë. Në përfundim të bisedës mes kryedemokratit dhe deputetit socialist, Basha dha edhe një shpjegim për mediat se për çfarë foli në takimin 40 minuta me Majkon, që ngjalli interes. Sipas kreut të demokratëve, në takim u diskutua për Asamblenë e NATO-s që do të zhvillohet në Tiranë, duke qenë se Majko është kryetari i delegacionit shqiptar në NATO. “Respektoj z.Majko për kontributin e tij ndër vite dhe shpresoj që komunikimi politik normal mos të përbëjë lajm në Shqipëri. Tema kryesore e diskutimit ishte Asamblea e NATO”, tha kryedemokrati Basha pas takimit. Në fund të muajit maj në Tiranë zhvillohet për herë të parë Asamblea e NATO-s, ku do të marrin pjesë zyrtarë të lartë së aleancës ushtarake.

Përgjimet kryheshin në Drejtorinë e Policisë

Partia Demokratike deklaroi dje se Rama është nën akuzë për krim shtetëror. Përmes një deklarate për mediat, sekretari i Përgjithshëm i PD, Arben Ristani bëri të ditur se pajisja e përgjimit gjendet prej disa kohësh në duart e Saimir Tahirit dhe përgjimi është kryer. “Saimir Tahiri ka arritur një nivel edhe më të lartë kriminal, duke kryer përgjim të paligjshëm të Presidentit, opozitës, krerëve të institucioneve, mediave dhe ambasadorëve të huaj të akredituar në Tiranë. Vetë Tahiri e pranoi mbrëmë se pajisja ekziston, ndërkohë që ishte shprehur më parë se pajisja nuk ekziston. Tahiri pranoi po ashtu se pajisja është e paligjshme, pasi nuk është e regjistruar”, tha Ristani. Ai reagoi edhe ndaj deklaratave të Tahirit bërë në emisionin “Top Story”, ku dënoi faktin se Tahiri nuk bëri transparencë, por iu shmang pyetjeve. “Tre herë u pyet në ‘Top Story’, nëse është regjistruar pajisja, kur ka hyrë në Shqipëri dhe në të tre rastet, ai u shmang, iu fsheh këtij fakti, duke sulmuar opozitën. Ky është një moment kritik për vendin. Ky krim shtetëror e kapërcen masën e mundësive të Tahirit dhe është drejtpërdrejt përgjegjësi e Edi Ramës. Ai hesht prej ditësh për këtë ngjarje, duke i vënë vulën sundimit mafioz në vend dhe veprimit të qeverisë si bandë kriminale, mbi ligjin dhe Kushtetutën. Edi Rama është i thirrur të japë llogari e të mbajë përgjegjësi publikisht për krimin shtetëror të përgjimit të paligjshëm. Edi Rama është nën akuzë për këtë krim shtetëror dhe sa më shumë hesht, aq më shumë e rëndon pozicionin e tij në këtë shkelje brutale të ligjit, të Kushtetutës dhe të çdo norme demokratike”, u shpreh Ristani.

Tahiri para drejtësisë, i pastroi kartelën baronit të drogës

Klement Balili, i kërkuar për trafik ndërkombëtar droge nga gjysma e Europës dhe nga DEA amerikane, i emëruar drejtor i Transportit Rajonal të Sarandës nga Edi Rama, jo vetëm kishte mbështetjen e nevojshme politike e qeveritare për biznesin e tij kriminal, por shërbimet dhe favoret e Saimir Tahirit ndaj tij kanë arritur kulmin me pastrimin e të kaluarës së tij kriminale.
Kreu i Departamentit për Sigurinë dhe Rendin në PD, Enkelejd Alibeaj deklaroi dje se Saimir Tahiri ka pastruar kartelën e Klement Balilit duke fshirë gjithë precedentët penalë të tij.
“Është zbuluar se janë hequr në kartelën e Balilit krimet e precedentët e mëparshëm. I shpalluri në kërkim ndërkombëtar, i konsideruar nga ‘CNN’ si Eskobari i Ballkanit, rezulton me një të shkuar të pastër, edhe pse në vitin 2006 u kap me 750 kilogramë drogë, edhe pse Bashkia Sarandë e ka kallëzuar për ndërtim pa leje, edhe pse ka pasur probleme të tjera dhe konflikte për të cilat është denoncuar.
Saimir Tahiri ka futur duart në kartelën e Balilit, duke ia fshirë të gjithë precedentët. Është kjo arsyeja pse policitë e vendeve fqinje dhe DEA amerikane nuk kishin besim tek autoritetet shqiptare dhe i përjashtuan nga aksioni ndërkombëtar, pasi e dinin se Balili kishte lidhje të forta me qeverinë. Saimir Tahiri ka dalë kështu zbuluar në lidhje të gjithanshme me krimin me trafikun e drogës. Duke ofruar jo vetëm imunitet, paprekshmëri, vënie në dispozicion të pikave kyçe të Policisë të Kufirit e duke ndihmuar në arratisjen e Balilit, por duke e nxjerrë Eskobarin e Ballkanit edhe të pastër, pa asnjë krim të mëparshëm”, u shpreh Alibeaj.
Ai theksoi se ky inkriminim i ministrit të Brendshëm është një rekord i zi në shkallë botërore dhe Tahiri është sot në sytë e shqiptarëve dhe ndërkombëtarëve i provuar me lidhje të thella e të çdo lloji me krimin e trafikun e drogës. Nuk mjafton më largimi i tij një orë e më parë nga detyra. Ai duhet të hetohet e të shkojë para drejtësisë për të gjitha rastet e shërbimit që ka kryer ndaj bandave, ndaj Balilit, Habilajve, Shullazit.

Arben Shahini

Ky grusht shteti në Triadë

Frrok ÇUPI

Kush nuk shikon, nuk shikon! Madje nuk është aq i qartë për t’u parë. Ky që po ndodh tani është një grusht shteti i atij tipi që nuk shihet me “sy të lirë”, sipas fjalorit ushtarak. Presidenti i Republikës dëshmoi publikisht elementët e një “Grushti”, por nuk e emërtoi kështu. Ndoshta pse ka nevojë për më shumë qartësime.
Ka dy arsye pse “Grushti” nuk shihet qartë e me sy të lirë: E para, pse “grushti” ndodhi në kohën më të shkurtër të mundshme, veç 40 orë u deshën për t’u kryer (nga ora 10:00 e datës 11 maj deri në ora 10:00 të datës 13 maj). E dyta, se ky “coup d’etat”, është i atij tipi që quhet grusht shteti “me veto”, jo grusht shteti me rrethim ose me armë të dukshme.  Qeveria ka vënë veton mbi shtetin; dhe kjo është tërë arkitektura e këtij grushti shteti. Kaq e thjeshtë…
Ka edhe një arsye më shumë pse “grushti” nuk u ndje vertikalsiht, siç ndodh me tërmetet. Tërmetet vertikale vijnë, bëjnë kërdinë e ikin sa hap e mbyll sytë. Thjesht ka ndodhur që pllakat tektonike të tokës kanë lëvizur vertikalisht.
Ja edhe ky grusht, që akoma nuk është kapur me “sy të lirë”, kështu erdhi e iku. Qeveria goditi shtetin njëherësh në tri pika.

E para,
Qeveria rrethoi Gjykatën.
Në fakt, më datën 11 maj, qeveria rrethoi Gjykatën Administrative të Apelit. Dikush mund të thotë se, “ja ndodhi me një gjykatë, veç me një një, e rrethuan dhe kaq”. Ky është momenti kur shfaqet fenomeni që “grushti” nuk shihet me sy të lirë. Rrethimi i Gjykatës nga qeveria është fenomen Grushti, pavarësisht sa është numri i gjykatave. Nuk mund të jenë disa gjykata në rrethim, madje as është e nevojshme për të kuptuar se shteti është nën Grusht.
Me aktin e rrethimit shtetëror të Gjykatës Administrative të Apelit, u kryen tri goditje mbi shtetin juridik. E para, që qeveria përdori fuqinë e makinës shtetërore për të tmerruar gjykatën dhe gjykatësit dhe për të dëshmuar se gjykata është nën sundimin e qeverisë. Në këtë rast, grushti mbi shtetin u shfaq i drejtpërdrejtë; qeveria theu një nga nenet e Kushtetutës së Shtetit që mbron pavarësinë e Gjykatës nga qeveria…

E dyta,
se kjo është Gjykata Administrative. Grupimi politik i Rilindjes, që qeveris; gjatë gjithë jetës ka qenë kundër krijimit të kësaj Gjykate. Kur u pranua në Kuvendin e dominuar nga të djathtët, edhe kjo u arrit me zor të madh, me ndërhyrjen e vetë Shteteve të Bashkuara. Por sot akoma më keq, këta janë kundër Administratives. Sepse kjo është Gjykata e të drejtave të biznesit. Biznesin këta e kanë kapur në fyt dhe po e mbysin. Kjo është pjesa e dukshme e grushtit. Këta, biznesin po e marrin për vete, po e mbysin dhe ky është mbytje e shtetit, dmth., Grushti.

E treta,
sepse në rrethimin e Gjykatës morën pjesë ushtarë misteriozë. Lloji i parë i ushtarëve ishin punëtorët që paguhen nga taksat publike dhe që mund të përdoren si kamikazë kundër lirisë së kujtdo. Të dytët ishin deputetë të inkriminuar, të pasuruar dhe me biznese kriminale. Kjo miksturë  mes llojeve, është bombë kundër shtetit dhe të të Drejtës.

Pika e dytë e Triadës së Grushtit:
Instalimi i mjeteve të përgjimit nga Policia është goditja më e rëndë që i bëhet shtetit. Presidenti i Republikës vuri alarmin. Ata që akoma flenë pas alarmit, duhet të dinë se ndodhen pranë një tsunami: O shteti po bie, o shteti po i shtyp njerëzit e vet! Në të dyja rastet po rrënohet njeriu. Edhe sikur shteti të bjerë, përsëri mbi njerëzit që flenë bie dhe këta rrënon.
Ja kaq e rëndë është “këmba” e dytë e Triadës së Grushit. Policia, duke përgjuar në mënyrë të fshehtë, pa ligj e pa të drejtë, e ka dhunuar shtetin. Organet e autorizuara për përgjim, të kontrolluara nga ligji dhe delegatët e popullit, hidhen në lumë, dmth., spostohen e nëpërkëmben. Këto që ka zgjedhur populli dhe i ka miratuar në ligj, nuk ekzistojnë më. Mbi shtetin vihet veto e dy a tre personave që përgjojnë e dhunojnë. Dhunojnë të drejtën e individit, pozitën e kundërshtarit në demokraci, sistemin pluralist, diplomacinë e aleatëve.
Shteti ka dalë prej boshtit. Siguria ka rënë. Edhe e drejta shuhet. Ky është Grushti, ose “coup d’edat”.

E treta e Triadës:
Lejimi për arratisje i njeriut të kërkuar botërisht për krimin mbi njeriun. Ky është quajtur “Escobari shqiptar”, sipas emrit të Paolo Emilio Escobar, lordi kolumbian i drogës, ose i quajtur “Mbret i kokainës”, më i pasuri mes gjithë kriminelëve të botës, me 30 miliardë dollarë pasuri në vitin 1990.
“Escobari shqiptar” nuk u perceptua nga qeveria shqiptare, por nga qeveritë botërore. Qeveria shqiptare, përkundrazi, e kishte angazhuar brenda makinës shtetërore të vendit, si funksionar i lartë shteti. Ky është grushti i parë mbi shtetin. Në Kolumbi, mafia nuk është legalisht pjesë e shtetit.
Qeveria këtu akuzohet se është bërë pjesë e mafies së kokainës. Këtu mbillet drogë dhe dërgohet drogë në Europë me avionë, me anije, me makinë, me kafshë dhe më këmbë… Kryeministri dhe ministri i Brendshëm janë akuzuar direkt…
Këta i dhanë hapësira zotit “Escobar”.
Kur u perceptua trafikanti shqiptar, u la i lirë, aq kohë i lirë sa të mund të arratisej nga vendi. Shteti ra para mafies. Pra, ra me dashjen e qeverisë, si në një grusht shteti.
Me këtë rast, shteti ra edhe në sy të të gjithë botës.

Pse e shkeli Rama Sigurinë Kombëtare?

Skandali i përgjimeve të paligjshme të Policisë së Shtetit për krerët më të lartë të shtetit, kundërshtarë të Edi Ramës, ka identifikuar publikisht ministrin e Brendshëm, Saimit Tahiri, si përgjegjësin kryesor. Qëkurse plasi skandali, në tre ditë, ministri i Brendshëm ka thënë tri gjëra të ndryshme, për të krijuar alibi në varësi të informacioneve që publikoheshin nga ish-Kryeministri Sali Berisha, Partia Demokratike apo media. Ditën e parë, kur ish-Kryeministri Berisha informoi shqiptarët se Edi Rama dhe banda e tij në Ministrinë e Brendshme po përgjojnë Presidentin, kryetarin e Parlamentit, kryetarin e PD-së dhe eksponentë të lartë të opozitës, drejtues të lartë të institucioneve shtetërore, ambasadorë dhe gazetarë e pronarë mediash, Tahiri tha se nuk ka pajisje. Ditën e dytë Tahiri pranoi se ka një pajisje, por pajisja nuk bën përgjime. Ditën e tretë, Tahiri tha se ka pajisje, janë bërë përgjime, por për këtë ka një marrëveshje të firmosur 9 vjet më parë nga ish-ministri i Brendshëm i asaj kohe, sot Presidenti i Republikës.
Nëse presim ditën e katërt dhe ditët e tjera, vegla e krimit të organizuar në Shqipëri do të na thotë rrenën e katërt dhe të pestë, por asnjëherë të vërtetën. Afërmendsh nuk mund të bëjë ndryshe. Së pari, Tahiri po mbron veten, pasi janë një sërë ligjesh të shkelura përmes përgjimeve të paligjshme, që i garantojnë atij burgun e sigurtë. Së dyti, mbron shefin e tij, Kryeministrin Edi Rama, që ka porositur dhe urdhëruar bandën e tij në Ministrinë e Brendshme që të ndërmarrë këtë operacion kriminal, me shumë pasoja për sigurinë kombëtare të vendit. Së treti, Tahiri duhet të mbrojë mafiozët shqiptarë dhe të huaj me uniformë dhe pa uniformë policie, që me vetëdije janë bërë pjesë e këtij skandali.
Mashtrimet publike të Tahirit janë të mjaftueshme për të bërë arrestimin e tij, pasi çdo orë në detyrë është një mundësi më shumë që i jepet atij për të fshehur të vërtetën, për të bërë presion mbi ata që po merren me hetimin, për të nxjerrë të palarë shefin e tij Kryerministër, por edhe shërbëtorët e tij në polici. Pavarësisht, se mënyra si po mbrohet është tërësisht e mjerë, idiote dhe vetëm sa rëndon veten dhe të tjerët të përfshirë në këtë skandal, në ditën e gjykimit.
Pretendimi më i fundit i ministrit të Brendshëm se pajisja është përdorur për të përgjuar Presidentin dhe të gjithë titullarët e tjerë të lartë të shtetit për arsye trajnimi, është njësoj si të thuash se trajnimi i policëve në përdorimin e armëve të bëhet duke qëlluar qytetarët në rrugë. Këto gjëra mund të kenë sens vetëm në një vend të kontrolluar nga krimi i organizuar dhe kam dyshime nëse do të gjenin zbatim edhe në Korenë e Veriut.
Ministri i Brendshëm duhet të japë dorëheqjen e menjëhershme dhe t’i dorëzohet drejtësisë. Skandali i përgjimeve ka shumë anë të errëta, që duhet të hetohen dhe të përcaktojnë përgjegjësitë e secilit që është i përfshirë. Duhet parë me detaje se kush ka porositur dhe paguar për aparaturën e përgjimit; kush e ka futur në Shqipëri duke thyer të gjitha ligjet; kush ka ofruar ambientet dhe lehtësitë për instalimin e pajisjes në Akademinë e Rendit (sikurse ka pohuar Tahiri); kush ka urdhëruar, rekrutuar dhe drejtuar skuadrën e përgjuesve; kush ka krijuar listën e subjekteve të përgjuar; kush është përgjuar; kush dhe për çfarë janë përdorur informacionet e nxjerra nga përgjimi; kush ka patur akses në ambientet ku ishte vendosur aparati i përgjimit. Janë këto dhe dhjetëra pyetje të tjera që kërkojnë përgjigje.
Por, më e rëndësishmja për shqiptarët është përgjigjja se për çfarë u fut Rama në këtë betejë ekstreme me ligjin dhe institucionet kushtetuese të vendit të tij. A është Kryeministri Rama i kapur dhe kush e kërcënon atë që të ndërmarrë veprime kaq thellësisht antiligjore dhe antikushtetuese? A është duke punuar për pushtetin e tij personal apo për interesa okulte dhe antishqiptare? Përfundimisht, institucionet përgjegjëse për sigurinë kombëtare me urgjencë duhet të marrin në shqyrtim këtë rast dhe të sigurojnë se sovraniteti, integriteti territorial, rendi publik dhe kushtetues janë të mbrojtur. Largimi i kësaj qeverie, një qeveri teknike për të përgatitur zgjedhjet e parakohshme do të ishte rrugëdalja e vetme nga kjo krizë e rëndë.
Një gjë është e sigurtë, gjithçka që mbart ky skandal përgjimesh nuk ka qenë në funksion të rolit të Shqipërisë si vend anëtar i NATO-s, nuk ka qenë në funksion të plotësimit të detyrimeve të Shqipërisë për anëtarësim në BE, nuk ka qenë pjesë e angazhimeve të Shqipërisë në koalicionet apo organizmat ndërkombëtarë në luftën kundër terrorizmit dhe luftën kundër krimit të organizuar. Hetimi do të na tregojë se sa janë dëmtuar shqiptarët dhe sa është dëmtuar Shqipëria në ambiciet e veta.

Faqja e parë

Europol: Përjashtuam Tahirin nga hetimi i Balilit

Prej më shumë se 1 viti, policia greke në bashkëpunim me DEA-n amerikane kanë kryer hetime për organizatën ndërkombëtare të drogës të drejtuar nga baroni shqiptar, Klement Balili nga Saranda. Një efektiv i policisë greke tha për gazetën helene “Newsit.gr” se të gjithë e dinin për rrjetin e drogës të drejtuar nga 44-vjeçari shqiptar, por nuk kishin prova për t’i arrestuar. “Në Evropë të gjithë e dinin për disa prej tyre (anëtarët e bandës) dhe aktivitetet që ata kryenin, por nuk kishin prova për t’i arrestuar. Këto informacione ju dhanë nga policia greke, pas hetimeve që bëri për çmontimin e rrjetit të drogës”, i tha gazetës efektivi i policisë greke.
Gazeta shkruan gjithashtu se, drejtuesi grek i hetimeve për këtë bandë të drejtuar nga 44-vjeçari shqiptar, do të shkojë gjatë fundjavës në Hagë, ku ndodhet selia e Europol, për t’i dorëzuar kolegëve europianë dokumentet e hetimit dhe që, sipas tyre, ata hasën në “dyer të mbyllura” për çmontimin e organizatës së baronit shqiptar.
Rasti i Klement Balilit ka tërhequr vëmendjen edhe të mediave italiane, të cilat shkruajnë se ngarkesa e fundit prej 768 kg kanabis e kapur në brigjet e Greqisë kishte si destinacion zonën e Salentos, në Itali. Prej këtej, shkruan “Corriere”, ngarkesa do të përfundonte në qytetin e Milanos, që është dhe zona e preferuar e trafikantëve për shkak të çmimit.
Sipas gazetës, që citon burime pranë njësisë së antikrimit të organizuar pranë Guardia di Finanza, marijuana në qytetin verior të vendit fqinj arrin në 700-800 euro për kg. “Në krye të organizatës së kësaj ngarkese dhe dhjetëra të tjerave është një person i pagëzuar si “Eskobari i Ballkanit” dhe i kërkuar nga gjysma e vendeve të Europës”, shkruan “Corriere di Milano”.
Menaxheri i shtetit dhe njeriu i besuar i qeverisë shqiptare, siç e quajnë mediat që citojnë burime investigative, është parë disa herë në Milano, si për takime zyrtare për shkak të detyrës, ashtu edhe për bisedime “informale” me bashkëkombas që lëvizin në këtë qytet dhe rrethinat e tij.
“Grupet shqiptare të drogës që lëvizin në Milano dhe provincë janë shumë aktivë në zonën Abbiategrasso. Nuk ushtrojnë një kontroll të fortë të territorit, por kanë zënë vend, e njohin ambientin dhe kanë një rrjet efikas”, deklaron një zyrtar i lartë i karabinierëve. Sipas “Corriere”, gjatë qëndrimit në Milano, Balili preferonte të vizitonte pikat kryesore të qytetit, si Galeria pranë Sheshit “Duomo”, dyqanet e shtrenjta dhe zona si Porta Venezia, apo Sheshi “Repubblica”.
Ato shkruajnë se, “Eskobari”, i cili mund të fshihet në Greqi, përdorte rolin e tij prej zyrtari për të transportuar drogën dhe për të marrë vesh në kohë reale lëvizjet e prokurorëve dhe policisë. “Që në drejtësinë shqiptare diçka nuk funksionon, kjo dihet”, shkruan më tej “Corriere”, e cila vijon, “kriminelë në prag të arrestimit nga hetues të huaj marrin befas lajmin dhe zhduken”.
Klement Balili, i akuzuar si “Baroni i Ballkanit”, vijon të jetë në arrati dhe nuk ka asnjë gjurmë prej tij. Dilema qëndron në faktin se si mundi të arratisej, kur akuzat nga mediat greke drejtoheshin direkt ndaj tij gjatë javës së kaluar. Balili u arratis dy ditë, pasi u mësua se emri i tij figuronte në dosjen hetimore të Policisë së Atikës dhe zyrës së DEA-s amerikane në Athinë. Zyrtari shqiptar fillimisht i mohoi akuzat, duke i quajtur sulme politike të opozitës, por më pas humbi gjurmët, duke i shpëtuar vëzhgimit të policisë. Gjatë kontrolleve që policia ushtroi në banesën e tij, familjarët thanë se nuk kishin dijeni për vendndodhjen e Balilit, ndërsa nga këqyrja e sistemit TIM, ai rezulton të mos ketë dalë jashtë vendit, por nuk përjashtohet mundësia që ai ta ketë kaluar kufirin në mënyrë ilegale.
Klement Balili akuzohet si kreu i kartelit më të madh të narkotrafikut në Europë, ku kishte rolin e financuesit dhe furnizuesit me kanabis nga Shqipëria drejt vendeve të Europës. Sipas policisë greke, zyrtari shqiptar kishte organizuar edhe trafikimin me gomone të rreth 700 kilogramëve kanabis nga Saranda drejt ishullit të Zakinthos.
Në këtë operacion ranë në pranga 15 persona, mes të cilëve edhe disa shqiptarë, dy prej të cilëve vëllezërit Xhevahir e Dhimitër Poti, që u arrestuan në Belgjikë. Hetimet e policisë greke dhe DEA-s amerikane kanë faktuar se Balili mundësonte transportin e sasive të mëdha të drogës në rrugë detare, por edhe përmes shoqërive të transportit, duke ndërhyrë në dogana, që kamionët të mos kontrolloheshin. Ndaj Balilit do të ketë edhe një hetim për pasurinë e tij, pasi dyshohet se ka llogari bankare në 10 vende të Evropës dhe pasuri të paluajtshme në Greqi dhe Itali.

Rama dhe Tahiri padrinot e vërtetë të Klement Balilit

Europol njoftoi dje opinionin se, në hetimin e grupit të Klement Balilit kanë bashkëpunuar vetëm policia greke, DEA amerikane dhe policia italiane. Pas këtij njoftimi ka reaguar ish-Kryeministri Berisha, i cili në një postim në Facebook shkruan se Europol u çorri maskën Edi Ramës, Saje qorrit dhe Haki Çakos, duke faktuar se ata janë padrinot e vërtetë të Klement Balilit dhe vëllezërve Poti.
“Europol me komunikatën e tij hodhi poshtë dhe përgënjeshtroi deklaratat e Edvin Shullazit, Saje qorrit dhe Haki Çakos, që në garë me njëri-tjetrin mashtruan shqiptarët, duke deklaruar se policia shqiptare prej kohësh po hetonte së bashku me policinë greke dhe DEA-n amerikane grupin trafikant të Edeskobarit të Ballkanit. Europol sot njoftoi opinionin se në hetimin e këtij grupi kanë bashkëpunuar vetëm policia greke, DEA amerikane dhe policia italiane, pra jo policia shqiptare”, shkruan Berisha.
Ish-Kryeministri Berisha shkruan më tej se, pas deklaratës së Europol faktohet katërcipërisht se krerët, padrinot e grupit trafikant janë vetë Edvin Shullazi dhe Saje qorri. “Me këtë mashtrim të turpshëm e të paskrupullt të Ramës, Sajes dhe Hakiut dhe arratisjen me urdhër të Ramës dhe Sajes të Balilit nga Shqipëria, faktohet katërcipërisht se krerët, padrinot e grupit trafikant janë vetë Edvin Shullazi dhe Saje qorri! Sb”, përfundon Berisha.

“Escobari i Ballkanit”, 250 kg drogë për çdo rrugë në vendet e BE

Mediat greke shkruajnë se “Escobari i Ballkanit” dërgonte 250 kg drogë për çdo rrugë në vendet e BE. Xhevahir Poti, i arrestuar pak ditë më parë në Belgjikë, bashkë me të vëllain Dhimitrin, si pjesë e trafikut ndërkombëtar të lëndëve narkotike, në muajin prill dyshohet se ka negociuar trafikimin e një sasie prej rreth 250 kilogramë kanabis në drejtim të Gjermanisë.
46-vjeçari ka mbërritur në Shqipëri në fund të muajit mars, ku ka negociuar për gjetjen e sasisë së drogës. Policia greke ka raportuar se kjo sasi drogë iu është dorëzuar me datën 8 prill disa bashkëpunëtorëve ende të panjohur në Gjermani, në zonën e quajtur Konstandinopoja e vogël në kryeqytetin Berlin. Kjo sasi droge nuk është arritur të kapet nga autoritetet gjermane.
Xhevahir Poti rezulton të ketë dalë nga Shqipëria më datën 10 prill, pasi ngarkesa ka mbërritur në destinacion. Ndërsa Dhimitër Poti, pothuajse të gjitha hyrje-daljet drejt vendit tonë i ka nëpërmjet Athinës dhe Kakavijës, pavarësisht se ka një vendqëndrim të përhershëm në Belgjikë. Poti rezulton të ketë qenë në Shqipëri në mes të dhjetorit të vitit 2015, ku ka qëndruar dy ditë dhe më pas është larguar.
Dyshohet se ka zhvilluar takime me Balilin dhe pjesëtarë të tjerë të organizatës, emrat e të cilëve nuk bëhen me dije. Vëllezërit Poti dhe Klement Balili, sipas mediave greke, janë krerët e një prej grupeve më të mëdha të narkotrafikut.

Urdhër arresti ndërkombëtar për “Eskobarin e Ballkanit”

Autoritetet greke kanë lëshuar një urdhër arresti për “Eskobarin e Ballkanit” i identifikuar si Klement Balili. Sipas mediave, hetimet kanë rezultuar se bëhet fjalë për kreun e rrjetit më të madh të trafikut të drogës, në nivel europian. Brenda 48 orëve të ardhshme, prokurori i çështjes pritet ta shndërrojë atë në urdhër arresti ndërkombëtar dhe t’u dërgohet gjithë policive europiane. Ndërkaq, një dosje e çështjes do t’u dërgohet autoriteteve kompetente shqiptare. Sapo dosja të mbërrijë në vendin fqinj, autoritetet atje duhet ta gjejnë të dyshuarin dhe ta arrestojnë. Gjithmonë sipas mediave greke, ai nuk do të ekstradohet në Greqi, por do të qëndrojë që të japë shpjegime para autoriteteve gjyqësore në Shqipëri. Krahas shpalljes së urdhër arrestit, mësohet se po hetohet për llogaritë bankare të të dyshuarit në më shumë se 10 vende të Europës.
Rrjeti i drogës në të cilin dyshohet se ka qenë përfshirë edhe Klement Balili, kishte planifikuar të fuste në Francë 60 kg kokainë. Kjo ishte planifikuar të realizohej më 18 nëntor 2015. Droga ishte magazinuar në një vend të panjohur në Belgjikë dhe që andej do të dërgohej në Itali e më pas në Francë. Mirëpo, masat e larta të sigurisë, pas sulmeve terroriste në Paris, që ishin kryer pesë ditë më parë, i detyruan krerët e organizatës që ta anulonin operacionin. Kështu bën të ditur portali grek, “The Toc”, që pretendon se ka në dorë gjithë dosjen penale të çështjes. Sipas “The Toc”, operacioni financohej nga kreu shqiptar, me moshë 44 vjeç (që sipas gjithë mediave greke në fakt, është Balili).
Një tjetër operacion ka dështuar sërish, në shkurt 2016. Një sasi droge do të transportohej nga Spanja për në Itali, me një kamion të transportit ndërkombëtar. Përgjegjës për sigurimin e drogës ishte një pjesëtar i rrjetit, shtetas shqiptar, me moshë 43 vjeç. Për transportin ishin destinuar 100.000 euro, nga të cilat, 20.000 do t’u jepeshin drejtuesve të mjetit dhe 80.000 do t’u shpërndaheshin pjesëtarëve të tjerë, me rol mbështetës. Kamioni u nis më 20 shkurt nga Vjena e Austrisë, hyri në Itali dhe përmes Portit Civitavecchia mbërriti me traget në Portin e Barcelonës, për të marrë ngarkesën e drogës. Mirëpo, edhe ky aksion u anulua, për shkak të kontrollit  të kamionit nga autoritetet spanjolle, gjë që krijoi dyshime tek drejtuesit e rrjetit.
Por edhe më herët, në prill 2015, kishte dështuar një tentativë për të transportuar drogë nga Belgjika për në kryeqytetin e Norvegjisë, Oslo, siç citon dosjen penale portali grek, “The Toc”. Kamioni ishte nisur me një ngarkesë të ligjshme nga Greqia, me stacion tranzit Mynihun, ku do të shkarkohej e do të merrte një ngarkesë tjetër, gjithashtu të ligjshme, për në Oslo. Kamioni ishte planifikuar të kalonte nga Belgjika, ku në vendet e posaçme do të fshihej sasia e drogës. Por edhe ky aksion u anulua, pasi skadoi afati i marrjes në dorëzim të ngarkesës së ligjshme. Por edhe për një arsye tjetër: Karroceria e kamionit kishte lartësi më të madhe nga sa lejohej që të qarkullonte në rrugët e Norvegjisë…
Në dosjen penale, gjithmonë sipas citimeve të portalit grek “The Toc”, ka edhe një detaj interesant sa i përket qëndrimit të policisë shqiptare, kur homologët grekë u folën mbi veprimtarinë e “Kelit”, siç përmendet Balili. Përfaqësuesit e autoriteteve shqiptare, “kur dëgjuan emrin, u thanë se nevojiteshin prova të pakundërshtueshme, me qëllim që ata ta gjenin e ta arrestonin”. Dhe kjo, shpjegon “The Toc”, për arsye se “Keli” sillej të kishte lidhje të fuqishme me aparatin shtetëror të vendit fqinj”.

R.POLISI

Përgjimet, Prokuria thërret Zv.drejtorn e policisë së shtetit

Për thuajse dy orë, Ardian Çipa, Zv.drejtor i policisë së shtetit, u mor në pyetje në prokurorinë e Tiranës në lidhje me pajisjen e përgjimit që disponon policia shqiptare raporton Lapsi.al. Çipa u mor në pyetje nga prokurorja Anisa Qilimi. Çipa mësohet se ka dhënë sqarime për rrethanat në të cilat është marrë pajisja e përgjimit dhe përdorimin e saj nga policia. Në ditët në vazhdim pritet që edhe Drejtori i Përgjithshëm i Policisë Haki Çako të japë shpjegime në prokurori. Organi i akuzës ka kërkuar nga policia pajisjen e përgjimit, por sipas uniformave blu ajo i përket Interforcës italiane. Një ditë më parë, Ministri i Brendshëm tha se bëhet fjalë për një pajisje që vetëm lokalizon numrat e telefonit dhe nuk përgjon bisedat apo mesazhet në celular.

1...8 2178 2188 219...8 382Faqja 8 218 nga 8 382

Kryesore

Continue to the category
Më shumë
© 2024 Rilindja Demokratike Euroatlantike