Mesi-Suarez-Neymar, a është ky tredhëmbëshi më i frikshëm i historisë së futbollit? Për të dytin sezon rresht treshja e famshme MSN arrin të diktojë ligjin në La Liga, duke lënë pas treshen e Realit, BBC ku Ronaldo i vetëm nuk arrin të mbajë në lartësinë e duhur sulmin “Los Blancos”. Tre sulmuesit e skuadrës katalanase e kanë transformuar këtë skuadër në një makinë të vërtetë golash, pasi mesatarisht në çdo ndeshje ata sigurojnë 2-3 gola. Sezonin e shkuar regjistruan në total 122 gola, prej të cilëve 81 në La Liga, por një vit më pas e rritën edhe më shumë gazin, duke arritur në kuotën 130 me 90 gola në kampionat.
Një fakt tjetër që e bën këtë treshe vrasëse për çdo kundërshtar është edhe numri i asisteve, plot 63 të dhuruar nga të tre, 50% më shumë se BBC në kampin kundërshtar. Barcelona fitoi titullin e dytë rresht dhe të tretin në 4 vitet e fundit, ndërsa MSN regjistroi rekordin e 80% të golave në të gjithë sezonin. 20 gola në 5 ndeshjet e fundit, ku 14 i ka shënuar vetëm Suarez. Gjithsesi, pesha e secilit është e veçantë, pasi ishte Neymar që e nisi sezonin me 14 gola në 13 ndeshjet e para, madje ai dhe Suarez nuk u ndalën as kur Mesi u detyrua të ngrinte flamurin e bardhë për disa javë. Uruguajani regjistroi 40 gola në kampionat, i ndjekur nga Mesi me 26 dhe Neymar me 24.
Një treshe e dashuruar me spektaklin që shënon në çdo mënyrë të mundshme, që të tre të pamëshirshëm ndaj rivalëve. Në këtë pikë, lind pyetja nëse janë ata treshja më efektive e historisë së futbollit. Në Barcelonë, konkurrentë të tyre janë Stoichkov-Romario-Laudrup, ndërsa Mesi shfaqet edhe në tredhëmbëshin tjetër Sanchez-Messi-Pedro me 97 gola në fund të sezonit. Me shumë mundësi, treshja që mund të bëjë më shumë konkurrencë MSN-së është Mesi-Eto’o-Henry në sezonin 2008-2009 me 100 gola në total dhe tre tituj në fund të sezonit. Ai ishte sezoni kur Mesi arriti t’i rrëmbente vendin e titullarit Ronaldinhos. Gjithsesi, tre sulmues të tillë në të njëjtën skuadër, ndoshta nuk kanë pasur fatin të luajnë asnjëherë dhe ndoshta nuk do të luajnë as në të ardhmen.
Sulmuesi i Barcelonës, Neymar ka bërë një përmbledhje të sezonit të tij futbollistik. Gjatë një konference për shtyp pas fitores së titullit, ai foli për suksesin La Liga, eliminimin nga Champions League si dhe marrëdhënien e tij me Luis Suarez. “Nuk di të them, nëse ky është sezoni im më i mirë. Më pëlqen të thyej çdo rekord, dua që çdo ditë të përmirësohem akoma dhe më shumë si lojtar. Jam shumë i lumtur për fitimin e titullit kampion. Dua të përgëzoj të gjithë shokët e skuadrës. Ishte një rrugë e gjatë dhe e mundimshme, por në fund ia dolëm. Përsa i përkët marrëdhënies time me Suarez, mund të them që jemi miq shumë të mirë. Jam shumë i lumtur që fitoi çmimin “Këpuca e Artë”. Champions League? Më vjen keq që nuk jemi në finale por, dua të përgëzoj dy skuadrat finaliste. Është një moment që duhet lënë pas krahëve dhe të mendojmë për të ardhmen”.
Më tej, braziliani foli për finalen e “Kupës së Mbretit”, ku përballë do të këtë skuadrën e Sevillias, por ai u ndal edhe te pjesëmarrja në Lojërat Olimpike “Rio 2016”. “Përsa i përket finales së Kupës së Mbretit, mund të thëm se, skuadra është shumë e motivuar. Jam i sigurt se pas titullit në La Liga, ky do të jetë trofeu ynë i dytë sezonal. Jam shumë i lumtur që do të marr pjesë në “Rio 2016”. Sigurisht që dëshira ime ishte të isha pjesë edhe e “Copa America” por, të gjithë palët ramë dakort që të aktivizohem vetëm në një prej këtyre dy evenimenteve sportive”, tha ai.
MSN dikton “ligjin”
Presidenti i “PAOK”-ut kërkon largimin e Kaçes
“Klimë e keqe rreth Ergys Kaçes”. Ky është titulli i një shkrimi të publikuar në faqen prestigjoze greke “Sportdog.gr” ku theksohet se me shumë mundësi ky është sezoni i fundit i mesfushorit shqiptar në radhët e PAOK-ut të Selanikut. Sipas informacioneve mediatike, Kaçe ka bërë gati valixhet për të gjetur një destinacion të ri. Shkak është bërë sjellja e shqiptarit që sipas mediave greke ka ngjallur reagimin e presidentit, Ivan Savvides, i cili kjërkon që t’i japë fund telenovelës së bisedimeve për rinoviomin, duke firmosur largimin e tij nga Selaniku. Gjithsesi, “Sportdog.gr” thekson se PAOK synon të përfitojë sa më shumë nga largimi i Kaçes, kontrata e të cilit skadon në verën e vitit 2017.
Nëse zërat për ftohjen e marrëdhënieve mes futbollistit dhe presidencës konfirmohen, atëherë largimi i mesfushorit gjatë muajve të verës mund të jetë thjesht çështje kohe, pasi në të kundërt, Kaçe mund të lirohet në muajin janar me parametra zero, çka do të thotë se PAOK mund të humbasë shumë, duke mos arkëtuar asnjë qindarkë. Zërat e merkatos për shqiptarin kulmuan gjatë muajve të verës, por edhe në merkaton e dimrit të këtij viti por PAOK tentoi deri në fund për ta bindur të firmoste një kontratë të re, por palët nuk kanë rënë dakort për detajet, duke vendosur të ndjekin rrugë të ndryshme në të ardhmen.
Mavraj pret me padurim përgatitjet e “Euro 2016”
Me mbylljen e Bundesligës, lojtarët kanë filluar të mendojnë për kampionatin Europian. Kur duhen edhe 26 ditë nga fillimi i kompeticionit “ethet” sa vijnë e shtohen. Këtë gjë e shfaq më së miri edhe mbrojtësi i Kombëtares Shqiptare, Mërgim Mavraj, që përmes një postimi në rrjetin social “Facebook” kërkon të ndajë ndjesitë e tij.
“Edhe një javë dhe fillojnë përgatitjet. Po i pres me padurim”, ka shkruar 29-vjeçari në profilin e tij. Mavraj konsiderohet një lojtar i rëndësishëm si në Kombëtaren Kuqezi ashtu edhe te klubi i tij, Koln edhe pse ka qëndruar për disa muaj jashtë fushave të lojës për shkak të një dëmtimi.
De Biasi: Mendoj vetëm për Euro 2016
Trajneri i Shqipërisë Gianni De Biasi, konfirmoi edhe një herë se dëshiron ta respektojë kontratën me Federatën Shqiptare të Futbollit dhe se për momentin është i fokusuar vetëm te finalet e Europianit. I ftuar në emisionin sportiv “Domenica Sportiva”, ku në rolin e opinionistit ishte edhe zëvendëstrajneri i kuqezinjve, Paolo Tramezzani, De Biasi i la të hapura zhvillmet e reja vetëm pas përfundimit të eventit madhor të futbollit europian që do të zhvillohet në Francë.
“Duhet t’u besojmë mediave, sidomos në çështjet e merkatos. Gjithmonë u paraprijnë lëvizjeve të mundshme. Fakti që më afrojnë me kombëtaren italiane është një nder dhe kënaqësi e madhe për mua. Kam kontratë me Federatën Shqiptare të Futbollit dhe dua ta respektoj atë. Tani jam i fokusuar 150% te finalet e Europianit, më pas të shohim se çfarë do të ndodhë”, u shpreh De Biazi.
Një nga çështjet e diskutuara gjatë emisionit ishte edhe transferimi i mundshëm i boshnjkut Miralem Pjaniç te Juventusi, të cilin De Biasi e sheh edhe si zëvendësues të Pirlos.
Me kalimin e kohës, Pjaniç mund të bëhet si Pirlo, që e ka nisur si një trekuartist, por më pas e gjeti veten në mënyrë fantastike para mbrojtjes. Mendoj se Pjaniç mund të ketë të njëjtin evolucion.
“Në këtë diskutim, De Biasi u kundërshtua nga Giovanni Trapattoni, sipas të cilit Pjaniç nuk do të mund ta zëvendësojë Pirlon, që mbetet unik në stilin e tij”, përfundoi trajneri i Kombëtares tonë.
9 akse me pagesë, qytetarët, do paguajnë dy fatura për një rrugë
Qytetarët shqiptarë sërish vihen përballë faktit për të paguar dy fatura për një rrugë. Taksat e regjistrimit të automjeteve, taksa e karburantit, tarifa e qarkullimit janë ato që shkojnë për t’u investuar në infrastrukturë dhe që mesa duket janë ende të pamjaftueshme. Mirëmbajtja e rrugëve në të gjithë vendin i kushton buxhetit rreth 80 milionë dollarë në vit, ndërkohë që fondet e alokuara në këtë drejtim janë gjithnjë e më të ulta, gjë që ka sjellë edhe amortizimin e rrugëve. Së fundmi, qeveria ka përfunduar hartimin e strategjisë për tarifimin e rrugëve, ku janë të përcaktuara tarifat që do të paguhen nga automjetet. Sipas draftit, janë rekomanduar për t’u taksuar 9 kategori automjetesh. Sipas “Tv Scan”, në njërën anë, taksimi i rrugëve është edhe një rekomandim i imponuar për qeverinë nga BERZH, me qëllim shlyerjen e kredive të marra për ndërtimin e tyre. Konkretisht, në nënshkrimin e marrëveshjes së huasë me BERZH për ndërtimin e By Pass-¬it të Vlorës dhe Fierit, thuhet se qeveria duhet të shikojë alternativën e taksimit të këtyre akseve. Ndërsa tre akse të tjera kombëtare, si rruga e “Kombit”, rruga e “Arbrit” dhe ajo e “Elbasanit”, për shkak të terrenit dhe karakteristikave dhe për shkak se nuk kanë përfunduar ende, sjellin si domosdoshmëri tarifimin për t’u mbyllur si projekte dhe për t’u mirëmbajtur. Në draft sugjerohet që të tarifohen 9 rrugë, ku për zbatim të menjëhershëm rekomandohet Tiranë-Durrës, Milot-Morinë, Tiranë-Elbasan dhe rruga e Arbrit, që ende s’ka përfunduar.
Tarifimi i rrugëve
Dokumenti rekomandon 9 akse si më të përshtatshme për t’u bërë me pagesë, përmes një procesi gradual me katër faza. Sipas tij, në fazën e parë, e cila do të jetë e menjëhershme, propozohet të bëhen me tarifë kalimi katër rrugët kryesore të vendit, autostrada Tiranë-Durrës, ajo Tiranë-Elbasan, rruga Durrës-Kukës dhe rruga e “Arbërit”, pasi të jetë përfunduar. Pas instalimit të pagesës në këto segmente, propozohet të vendosen në sistem tarifimi rruga Levan-Vlorë dhe ajo Durrës-Fier, edhe këto dy akse të ndërtuara rishtaz. Në fazën e tretë do të vendoset pagesa për rrugën Levan-Tepelenë dhe rrugët e fundit që do të përfshihen në skemën e tarifimit janë Elbasan-Kapshticë dhe Tiranë-Hani i Hotit. Sipas dokumentit, tarifa e propozuar që duhet të paguajnë qytetarët varion nga 0.5 deri në 3.5 cent të euros për çdo kilometër. Kjo do të thotë se në një rrugë me gjatësi 100 kilometër çdo automjet duhet të paguajë deri në 3.5 euro për të kaluar. Sipas strategjisë, këto para do të përdoren për mirëmbajtjen e rrugëve ekzistuese dhe ndërtimin e atyre të reja. Banka Botërore parashikon se Shqipërisë i duhen 400 milionë dollarë për mirëmbajtjen e fondit rrugor në katër vitet e ardhshme dhe një pjesë e kësaj kostoje mund t’u ngarkohet qytetarëve, duke e bërë kalimin me pagesë.
Taksa për infrastrukturën, rritet me 11 për qind çmimi i banesave
Banka e Shqipërisë konstaton një rritje mbi 11% të çmimit të banesave në tremujorit të parë të këtij viti. Sipas ndërtuesve, rritja nuk ka ardhur nga kërkesa, por nga taksat vendore. Ata deklarojnë se, fitimi do të ruhet dhe se çdo rritje e taksave do t’iu faturohet qytetarëve, në çmimin final të shitjes së banesave. Çmimet e shitjes së banesave kanë pësuar një rritje të ndjeshme në tremujorin e parë të këtij viti, të vlerësuar nga Banka e Shqipërisë në rreth 11.3%.
Institucioni mbikqyrës bankar vlerëson se, indeksi i çmimit të banesave pas rënies së shënuar në tremujorin e katërt, iu rikthye normave rritëse në muajt e parë të 2016-ës. Por sipas ndërtuesve, rritja e çmimeve nuk vjen nga kërkesa për banesa, por nga rritja e taksave vendore. “Është taksa për të gjithë apartamentet që janë stok, është vënë taksa për metër katrorë, është rritur taksa e pastrimit për çdo Nipt që kemi ne në QKR dhe është vënë dhe kjo taksa e shkollës. Ne ato apartamente me humbje nuk do t’i shesim, janë parashikuar dhe fitime. Kështu që sa herë do të rrisë taksat Bashkia, do të rrisim dhe ne çmimin e apartamenteve. U rritën menjëherë, me këtë taksë që vuri Bashkia u rritën me 20 euro për metër katrorë”, shprehet Hajredin Fratari.
Ndërtuesit paralajmërojnë një rritje të mëtejshme të çmimeve, për shkak të rritjes së taksës mbi infrastrukturën për ndërtimet e reja në 8% nga 4% që ishte më parë. Hajredin Fratari: Në të rejat do të futet dhe kjo taksa e infrastrukturës që është minimum 50 euro për metër katrorë, flasim për periferinë. Kurse këtu në qendër është edhe 100-150 euro. Është gjithmonë kërkesa dhe oferta, nëse ai që do të bëjë pallatin e ri me taksën e infastrukturës do ta ngrejë 50 euro, ai që ka pallatet që i ka të mbaruar, ai nuk do ta ngrejë 50, por 40 dhe do t’i shesë ato. Do të ketë dhe ai fitimin e vet, në ato 40 do të paguajë 15% tatim-fitimin dhe prapë i ngelet një 30 fitim. Gjatë vitit 2015, sektori i ndërtimit shënoi rritje, duke prekur nivelin 12.7% në tremujorin e fundit. Por sipas analizave të Bankës së Shqipërisë, kjo rritje është ndikuar kryesisht nga shtimi i punimeve inxhinierike, me kontribues kryesor sektorin publik dhe në një masë të vogël nga ndërtesat për qëllime banimi.
Konfindustria propozime qeverisë për paketën fiskale
Konfindustria do të paraqesë si një nga kërkesat kryesore për Paketën Fiskale 2017, ndryshimin e kategorizimit të bizneseve sipas qarkullimit vjetor – si veprim i domosdoshëm për formalizimin e ekonomisë. Kështu bëri të ditur Administratori i Përgjithshëm i saj, Gjergj Buxhuku. “Legjislacioni në fuqi kategorizon bizneset në të ashtuquajtur “të vegjël” me qarkullim vjetor deri ne 5 milionë dhe 8 milionë lekë, që përfitojnë përjashtim të plotë dhe ose pjesor nga tatimet, tha Buxhuku. Konfindustria, mbështetur në praktikat e vendeve themeluese më të zhvilluara të BE do të kërkojë, që zbatimi i përkrahjes fiskale për bizneset e ashtuquajtur të “vegjël” të mbështetet në fitimin dhe jo qarkullimin vjetor. Konfindustria vlerëson, se ndarja e sotme ka shtuar ndjeshëm rezistencën e bizneseve të “vegjël” për moslëshimin e faturave tatimore për biznesin e “madh”, duke shkaktuar drejtpërdrejt prodhim të evazionit fiskal në gjithë ekonominë vendore. Bizneset, në pamundësi për shkarkimin e faturave dhe përballë rrezikut të falimentit, detyrohen të fshehin shitjet, të hyjnë në spiralen e evazionit dhe si rrjedhim të jenë lehtësisht të goditshëm nga institucionet fiskale, duke krijuar kushte objektive edhe për korrupsion. Pasojat e dukurisë së mësipëme janë të rënda për ekonominë vendore, sepse ajo vë në pozitë të vështirë biznesin “e madh”, ul të ardhurat për buxhetin e shtetit, minon aksionin e ekzekutivit për luftën kundër informalitetit, rëndon mjedisin e biznesit dhe ul konkurencën e vendit për tërheqjen e investimeve. Shqipëria radhitet në vendet e fundit në rajon për investimet e huaja, shkalla e evazionit fiskal arrin deri në 50% të PBB dhe mosrealizimi i të ardhurave buxhetore në vitin 2015 ishin në nivelin historik më të lartë prej afër 400 milionë USD”, përfundoi Buxhuku.
Kosovë, nota jo pozitive për zhvillimin ekonomik
Në Kosovë, nëse rritja ekonomike do të matej me të thënat e krerëve të institucioneve, atëherë do të ishte një realitet ndryshe, dhe vetë udhëheqësit nuk do të kishin se pse të flisnin për një kohë të improvizuar në këtë të tanishmen. Këtë mendim ndajnë opozita dhe njohës të çështjeve ekonomike, sidomos kur i referohen deklaratave të Presidentit Hashim Thaçi, nga një intervistë që javën e shkuar pati në FOL. Thaçi u deklarua se sa i përket zhvillimit ekonomik, Kosova është më mirë se vendet e rajonit. Kosova nuk duhet të marrë shembull asnjë vend të rajonit, sepse është më mirë se këto vende dhe duhet të punojë më shumë se sa rajoni, pati thënë presidenti i vendit. Ndërkohë, Berat Thaçi nga Instituti GAP, tha se të gjithë indikatorët ekonomik, Kosovën e vendosin në fund të gjashtë vendeve të rajonit. Kosova, siç tha ai, ka numrin më të lartë të papunësisë, të hyrat buxhetore janë më të ulëtat në rajon, po ashtu edhe investimet e huaja janë më të ulëtat në rajon. “Nëse i shikojmë shifrat në bazë të çfarë do indikatori pohimi se Kosova qëndron më mirë se vendet e rajonit sa i përket ekonomisë nuk është i saktë. Për arsye se nëse e marrim shembull indikatorin e të hyrave nga Bruto Produkti Vendor për kokë banori, Kosova del që është shteti me të hyrat më të ulëta në rajon. Nuk jemi as afër me qëndruar në këtë pozitë që të jemi më së miri. Në fakt jemi më së keqi në rajon. Edhe indikatorët e tjerë tregojnë se nuk jemi mirë. Nëse i shikojmë shifrat e papunësisë prapë jemi më së keqi në rajon e mos të flasim në aspektet të tjera, të cilat janë cilësia e edukimit, kualiteti i ambientit të të bërit biznes. Nga asnjëri nga këta indikatorë, Kosova nuk qëndron më së miri në rajon. Përkundrazi ne qëndrojmë më së keqi sa i përket standardit të jetës”, tha Thaçi. Sipas tij, këtë trend të rritjes ekonomike të Kosovës, duhen rreth 30 vjet për të arritur Evropën. Jakup Krasniqi, kryetar i Këshillit Kombëtar të Nismës, tha se Kosova ka ambientin më të pafavorshëm për investitorët e huaj dhe ata vendorë. Ligjet, sipas Krasniqit, dhe ndërhyrjet politike e kanë pamundësuar zhvillimin e ekonomik të vendit. “Të gjithë biznesmenët edhe vendorë, e mos të flasim për ata të jashtëm thonë se, procedurat e investimeve në Kosovë janë më të pa favorshmet se cili do vend tjetër i rajonit. Në këtë rrafsh, Republika e Kosovë ka ligjet e këqija, pastaj ndërhyrjet politike e kanë pamundësuar zhvillimin ekonomik të Kosovës”, tha Krasniqi. Edhe Frashër Krasniqi, nga Lëvizja “Vetëvendosje”, thotë se në të gjitha raportet ndërkombëtare Kosova renditet e fundit në listën që mat zhvillimin ekonomik të vendeve.
Bien sërish të ardhurat në prill, vjedhje drastike në tatime e dogana
Të ardhurat buxhetore në muajin prill për të dytin muaj kanë shënuar rënie në raport me të njëjtën periudhë të një viti më parë (prilli ishte më pak edhe se plani), ndërsa si katërmujor, rritja është ngadalësuar ndjeshëm.
Sipas të dhënave nga Ministria e Financave, të ardhurat në muajin prill ishin 8 për qind më të ulëta se plani dhe 0.9% më ulët se fakti i 2015. Nga 36.8 miliardë lekë që ishin planifikuar për t’u arkëtuar janë vjelur vetëm 34 miliardë lekë.
Edhe në raport me faktin 2015, të ardhurat në prill ishin rreth 1% më të ulëta (një vit më parë ishin mbledhur 34.4 miliardë lekë). Në mars, të ardhurat ranë me 3.5% në raport me faktin 2015.
Ndërsa për periudhën katërmujore të ardhurat kanë rezultuar rreth 7.3 për qind më të larta se e njëjta periudhë e vitit 2015. Por ritmet e rritjes janë ngadalësuar, duke marrë në konsideratë faktin se në janar-mars në krahasim me faktin e vitit të kaluar ishte 10% dhe dy mujori ishte rreth 16% rritje.
Ngadalësimi i rritjes së të ardhurave ishte i pritshëm, për shkak se rritja dy shifrore e dy mujorit i dedikohej dhe nivelit të ulët të të ardhurave në janar-shkurt 2015, për shkak të problemeve që u hasën me sistemin e ri online dhe uljes së importeve të mallrave të akcizës, teksa ato u importuan ndjeshëm më shumë në dhjetor 2014, në pritje të rritjes së taksave.
Financat duket se do ta kenë të vështirë të ruajnë ritmin e lartë të rritjes së të ardhurave të konstatuara në dy muajt e parë të vitit. Niveli ulët i të ardhurave në dy muajt e parë të vitit të kaluar dhe rritja e fortë e mallrave të akcizës, dy faktorët që ndikuan në rendimentin e mirë të janar-shkurtit, nuk pritet të “ndihmojnë” më në muajt në vijim.
Të ardhurat tatimore kanë arritur të jenë në linjë me planin, ku ecurinë më të mirë e ka shënuar tatimi mbi fitimin, që është 32% më i lartë se plani. Këtu financave u ka ardhur në ndihmë Bankers Petroleum, që pas një mosmarrëveshje me tatimet në dhjetor të vitit të kaluar ka rënë dakord të paguajë me këste një shumë prej 57 milionë dollarë, të cilin qeveria pretendon se është shmangur nga kompania. Si rrjedhojë Bankers po paguan rreth 4.2 milionë dollarë në muaj. Sipas të dhënave të publikuara nga tatimet, rezulton se diferenca fakt-plan në prill është rreth 4 milionë dollarë. Ky efekt do të shuhet në qershor, kur dhe Bankers të përfundojë pagesën e kësteve.
TVSh ka arritur planin, ndërsa akcizat ishin 7% më shumë. Tatimi mbi të ardhurat personale nuk e ka kapur planin me 4%.
Kanë qenë zëra të tjerë jo tatimorë që kanë pasur ecuri negative.
Deficitin në raport me planin në muajin prill e shënuan të ardhurat nga ndihmat me 693 milionë lekë. Të ardhurat nga tatimi mbi të ardhurat personale nuk e kapën planin me 114 milionë lekë, duke pësuar një rënie me 4%. Taksa mbi pasurinë gjithashtu pësoi rënie me 22% në raport me planin e prillit.
Rënie shënuan edhe të ardhurat nga sigurimet shoqërore me 3 për qind nga plani i muajit. Ministria e Financave kishte planifikuar të vilte të ardhura jo tatimore ne 4.6 miliardë lekë teksa janë arkëtuar vetëm 1.2 miliardë lekë, duke shënuar një mosrealizim 46% më pak se plani i muajit.
Inflacioni nën 3% deri në 2018
Banka e Shqipërisë e ka rishikuar me shtyrje objektivin për kthimin në ekuilibra të inflacionit.
Në fund të vitit 2015, Banka parashikonte se arritja e objektit të saj themelor, inflacionit në nivelin 3%, do të ndodhte në fillim të vitit 2018.
Por teksa parashikimet kanë dalë nga binarët në tremujorin e parë, ku treguesi ka qenë shumë afër zeros, Banka e shtyu pritjen e kthimin e tregut në objektiv në fund të vitit 2018. Në fakt zhvillimet reale në ekonomi dy vitet kanë qenë poshtë pritshmërie të institucioneve financiare.
Kthimi më i ngadaltë i ekonomisë në ekuilibër dhe prania e presioneve më të forta dezinflacioniste në tregjet botërore, do të sjellin një kthim më të ngadaltë të inflacionit në objektiv, llogarit Banka e Shqipërisë. Inflacioni parashikohet të rritet gradualisht dhe të kthehet në objektivin e Bankës së Shqipërisë në tremujorin e katërt të vitit 2018.
Ndërkohë, Banka e Shqipërisë ka lajmëruar një ulje tjetër të normës bazë të interesit për të nxitur konsumin. Mirëpo edhe ky mjet duket se është afër ezaurimit, pasi mekanizimi i politikës monetare po afrohet drejt dyshemesë.
Inflacioni vjetor në tremujorin e parë të vitit 2016 shënoi nivelin mesatar prej 0.7%, i ndikuar kryesisht nga vlerat e ulëta të inflacionit në muajt shkurt (0.2%) dhe mars (0.3%).
Analizat dhe vlerësimet tona tregojnë se, reduktimi i inflacionit në këto muaj i atribuohet kryesisht goditjeve të ofertës, të shprehura në rënien e inflacionit të çmimeve të ushqimeve të papërpunuara, të naftës dhe të shërbimeve të lidhura me të. Gjithashtu, rënia e inflacionit u ndikua edhe nga një efekt bazë, i lidhur me nivelet relativisht të larta të çmimeve të ushqimeve në të njëjtën periudhë të vitit të kaluar. Ky efekt pritet të jetë i pranishëm edhe gjatë muajve në vazhdim parashikon banka.
Kryesore
Continue to the category
