“Procesi i dekriminalizimit është një proces jetësor për Shqipërinë. Do të jetë e pafalshme në qoftë se nuk kryhet”, kështu është shprehur shkrimtari Ismail Kadare nga qyteti i Gjirokastrës, ku pati një takim me qytetarë. Sipas Kadaresë, “është koha e tretë e Shqipërisë, e cila është vendosur në anën më përparimtare të botës, që quhet qytetërimi perëndimor” . “Populli shqiptar do tregojë cilësitë e tij më të mira po do detyrojë klasën politike ta kryejë këtë proces dhe do tregojë cenet e tij nëse nuk e detyron dot. Populli ka merita, populli ka cene, do ta shikojmë, është një provë, por është e detyrueshme të kryhet. Shqipëria në këtë stad që ndodhet, po ta shikojmë në vizionin historik, le ta marrim 5000-6000 vjet, është në stadin më kulmor të saj. S`ka qenë ndonjëherë në pozitë më të favorshme”, deklaroi Kadare. “Por, vijoi më tej ai, për fat të keq pozitat e favorshme krijojnë edhe tensione të pafavorshëme”. “Shqipëria ndodhet në një gjendje tipike ku shansi i madh ka edhe një ngatërresë të madhe midis nesh, shqiptarëve vetë. Unë mendoj se kjo gjë nuk është fatale, nuk është për të vënë duart në kokë, nuk është për të vënë ulërimën, nuk është për të filluar vaji, o bo bo sa keq .. Janë gjendje që popujt i kapërcejnë, i kalojnë”, tha shkrimtari i madh shqiptar. “Kryesorja, është se kjo është hera e parë në historinë e kombit tonë që vendi ynë, populli shqiptar ka braktisur një pozicion, një skajim të keq, jashtë Evropës siç ka qenë dëbuar nga Europa; ka qenë dëbuar dy herë nga Europa nga omanët dhe nga komunistët. Eshtë vështirë të thuash kush ka qenë më tepër armik i Europës perandoria osmane apo regjimi komunist shqiptar u shpreh Kadare. Sipas tij, tani është koha e tretë e Shqipërisë. Koha e tretë, që Shqipëria është vendosur në anën më përparimtare të botës, që quhet qytetërimi perëndimor”, vijoi më tej ai. I pyetur për largimet e shqiptarëve jashtë vendit Kadare tha se, kjo ethe e largimit është një ethe e përkohshme dhe e kthyer pakëz në modë. “Popujt të tjerë kanë historinë e tyre të largimit, kthimit dhe pastaj të stabilizimit”, është e natyrshme që pas një periudhe jashtëzakonisht të egër të izolimit të vinte ky pasion, shpesh me arsye, pasi nuk është pa arsye sigurisht, por edhe pakëz e kthyer në modë . “Unë kam besim, se do gjendet drejtpeshimi i një populli që qëndron, largohet dhe kthehet dhe në fund të fundit do të qëndrojë në vendin e vet”, u shpreh shkrimtari.
Kadare: E pafalshme nëse nuk kryhet dekriminalizimi
Baroni i drogës, numër celulari grek për t’i shpëtuar përgjimit
Klemend Balili, i cilësuar nga mediat greke si “Escobari i Sarandës” është ende në arrati. Nga institucionet shqiptare askush nuk di të thotë ku është ish-drejtori i Transportit në Sarandë dhe si mundi ai t’i shpëtonte policisë. Kjo e fundit një ditë më parë shkoi në banesën e Balilit në fshatin Stjar të Delvinës, por 46-vjeçari nuk ishte aty. Bashkëshortja dhe dy fëmijët thanë se nuk kanë dijeni për vendndodhjen e kryefamiljarit. Dyshohet se “Escobari i Ballkanit” mund të jetë larguar nga Shqipëria, por jo në rrugë zyrtare pasi në sistemin Tims nuk rezulton që ai të ketë dalë jashtë vendit. Celulari i Balilit ka dalë i fikur, ndërsa një prej vëllezërve të tij ka thënë se Balili kishte shkuar në Tiranë.
Pak ditë pas shkarkimit të tij si kreu i Transporteve në Sarandë, Prokuroria e Krimeve të Rënda, ka nisur një letërporosi në Greqi, për të marrë më shumë informacion mbi Klemend Balilin. Burimet pranë organit të akuzës, bënë të ditur se ish-kreu i Transporteve gjatë gjithë kohës ka përdorur një numër celulari grek. Për këtë, autoritetet e Prokurorisë shqiptare nuk kanë kompetencë përgjimi, ndaj kanë dërguar letërporosi shtetit fqinj, për t’i vënë në dispozicion dosjen e hetimeve ndaj grupit ku përfshihet dhe Klemend Balili i njohur me pseudonimin “Keli”. Për këtë procedurë, 45-vjeçari, nuk është shoqëruar, por mbajtur në vëzhgim deri në mbërritjen e dosjes dhe letërporosisë së autoriteteve greke, të cilat mund të përfshijnë atë në linjën e narkotrafikut. Por edhe pse duhej të mbahej nën vëzhgim, mesa duket Klemend Balili ka arritur të gjejë një mënyrë për t’u ikur forcave të rendit.
Autoritetet greke e kanë shpallur në kërkim ndërkombëtar, edhe pse në faqen në internet të Interpolit nuk figuron emri i tij. Prokuroria shqiptare ka thënë se nuk mund ta arrestonte Klemend Balilin, pasi nuk kishte prova të mjaftueshme për të lëshuar urdhër arrestin. Burime jo zyrtare thonë se, ai mund të jetë larguar drejt Amerikës Latine, sikundër nuk përjashtohet mundësia e fshehjes brenda territorit shqiptar.
Ndërkohë, Policia e Sarandës bëri të ditur se, ka kryer një kontroll në banesën e Klemend Balilit dhe nuk e ka gjetur aty. Ish-drejtori i Transporteve të Sarandës, dyshohet se është larguar për t’iu fshehur hetimeve të nisura. Ky është sqarimi i Policisë së Shtetit, në lidhje me mosgjetjen e biznesmenit Balili në banesën e tij, të deklaruar në Sarandë. Por me çfarë urdhëri u krye kontrolli!?
Zyrtarë të Policisë së Shtetit i thanë ABC News se kontrolli i kryer në banesën e tij kishte si qëllim shoqërimin e tij për të kërkuar nga ai që mos të largohet nga banesa, pasi Prokuroria i kishte dërguar palës greke një letër-porosi, duke kërkuar të sjellin provat që implikon atë në trafik droge. Por pavarësisht këtij arsyetimi, ligjërisht është Prokuroria e Krimeve të Rënda, ajo që duhet të japë urdhër ndalimi apo kontrolli për personin në fjalë, pasi dosja ndodhet në hetim nga ata. Sipas Prokurorisë, Policia duhet ta mbante në vëzhgim policor pas publikimit të fakteve se ai dyshohet si kreu i trafikut të drogës. Por mosmbajtja e tij në vëzhgim, nga Policia është arsyetuar se nuk është kërkuar një veprim i tillë hetimor nga Prokuroria. Këta të fundit, justifikohen se nuk mund të lëshonin urdhër ndalimi, pasi nuk ka urdhër-ndërkombëtar dhe prova që implikon atë në trafik droge.
Pavarësisht këtyre përplasjeve deklarative, ka qenë vetë drejtori i përgjithshëm Haki Çako që pak orë pas publikimit të lajmit nga mediat greke për implikimin e biznesmenëve shqiptarë të përfshirë në trafik droge, që tha se operacioni është ndërkombëtar bashkë me Policinë shqiptare. Por edhe pse Policia pretendon se ishte pjesë e këtij operacioni ndërkombëtar, rezulton që Klemend Balili është zhdukur nga sytë e efektivëve të Policisë.
Mediat greke, pretenduan se Balili ka mbrojtje nga politika shqiptare, çka u përgënjeshtrua nga ambasada jonë në Athinë. Klemend Balili nuk u gjet në banesën e tij dhe sipas sistemit TIMS, ai rezulton se nuk ka dalë nga territori shqiptar, por në drejtim të paditur për Policinë e Shtetit. Nga ana tjetër, Prokuroria thotë se presin provat nga drejtësia greke që të urdhërohet arrestimi i tij.
Më datën 9 maj Drejtoria e Policisë së Athinës i ka kërkuar Prokurorisë ndalimin për 15 të arrestuarit, anëtarë të një prej rrjeteve më të mëdha të trafikantëve të lëndëve narkotike nga Shqipëria në Greqi e më pas në vendet e Europës, i drejtuar dhe financuar nga i ashtuquajturi “baroni i Ballkanit”, Klemend Balili. Sipas dokumentit, 15 personat, prej të cilëve 3 shtetasit shqiptarë Petro Dalanaj, Kleanthi Palaj, të dy peshkatarë në Sarandë; dhe Stefan Zoto, shofer nga Himara, akuzohen për trafikim të lëndëve narkotike dhe pjesëmarrje në organizatë kriminale. Me të njëjtën akuzë në të njëjtin urdhër shoqërimi akuzohen edhe katër të tjerë, dy prej tyre të ashtuquajturat shtyllat e këtij rrjeti, Dhimitër Poti, me banim në Bruksel dhe Klemend Balili, banor në Sarandë, emri i të cilit përmendet si organizator, por edhe si financier i grupit.
Policia greke zbardhi skemën e trafikut, sipas të cilit Balili ishte i ngarkuar me rolin e financuesit dhe transportin e drogës nga Shqipëria në Greqi, me bashkëpunëtor Jorgo Alifanti, që merrte në dorëzim ngarkesën dhe gjente shoferë për ngarkesat në Europë, si dhe specialistë për të krijuar në kamionët që përdornin xhepa të posaçëm për të fshehur lëndët narkotike. Dhimitër Poti dhe Aleksakis Thomas organizonin rrjetin në Europë, ose për të depozituar përkohësisht sasitë e drogës ose për t’i shitur atje. Rrjetin e furnizonte me kamionë kreu i grupit për Greqinë, Ksenofon Anagnostopoulos, nëpërmjet kompanisë Monoprosopi EPE në Kapandriti. Ai gjente ngarkesa të ligjshme për të mbuluar trafikimin e drogës.
Mediat greke: Kur u kujtua Policia shqiptare, sigurisht që Balili nuk u gjet në shtëpi
Media greke shkruajnë sot se Klemend Balilit iu la koha e mundshme nga Policia shqiptare, që të arratisej. Pas lajmit se i quajturi “Escobari i Ballkanit” u zhduk pa lënë gjurmë dhe Policia dështoi në tentativën e saj për ta gjetur në banesë, EpirusPost.gr shkrun se, pak ditë pas paralajmërimeve të Policisë greke për të çmontuar rrjetin më të madh të trafikimit në Evropë, një nga organizatorët arriti që të zhdukej!
Në shkrim thuhet më tej se flitet pikërisht për kreun e Transporteve në Sarandë, ndaj të cilit policia greke ka lëshuar një urdhër-arresti ndërkombëtar. Media citon se në presionin e krijuar, ai bëri një deklaratë publike, duke pretenduar se nuk ka lidhje me rrjetin e trafikimit të sasive të mëdha të drogës. “Disa orë më vonë u largua nga detyra dhe tani vendndodhja e tij ka humbur! Policia shqiptare, me vonesë të madhe bëri kërkime në shtëpi vetëm të premten. Dhe sigurisht që zbuloi se 44-vjeçari nuk ishte! Telefoni i tij është i fikur dhe kishte të gjithë kohën për të lëvizur lirisht dhe për t’i shpëtuar arrestimit”, thuhet në shkrim.
Shkrimi mbyllet me reagimin e kreut të PD-së, Basha që në një reagim për ngjarjen ka shkruar se: “Me bekimin e ministrit të Brendshëm Tahiri dhe mbrojtjen e Policisë u zhduk dhe nuk mund të gjendet”.
Ndërkohë, Dhimitër Poti i konsideruar si baroni i drogës apo “Escobari” Ballkanit nga mediat greke, është arrestuar 48 orë më parë në Belgjikë, bashkë me vëllain e tij Xhevahir Poti.
Dy vëllezërit Poti janë nën hetim dhe nga Policia e Prokuroria shqiptare prej 2015 ku në nëntor drejtësia greke kërkoi informacion për firmën CHIM PORD në pronësi të Dhimitër Potit. 4 transferta të dyshimta drejt Greqisë në afro 1 milion euro habitën Policinë greke, e cila kërkoi informacion për firmën, administratorin e saj dhe gjendjen gjyqësorë.
Në Belgjikë vëllezërit Poti janë prangosur në kushtet e flagrancës me 100 kg cannabis dhe afro 20 mijë euro bëjnë me dije burime. Por kjo nuk është akuza e vetme ndaj tyre, pasi dyshohet se nën kryesimin e Dhimitër Potit që shihni në këtë foto grupi i tyre kish krijuar kompani fiktive transporti me qendër në Bullgari dhe filial në Greqi e Belgjikë.
Këta dy shtetas janë të dyshuar si pjesë e një rrjeti narkotrafiku ku është hetuar dhe Kelmend Balili ish-drejtor i Transportit Sarandë që prej të premtes rezulton i shpallur në kërkim nga Policia shqiptare.
Prokuroria: Pajisja e përgjimit e policisë pa leje edhe në Itali
Prokuroria e Tiranës, është vënë në kërkim të pajisjes së përgjimit, që dyshohet se e disponon pa leje Policia e Shtetit. Burimet thonë se me nisjen e hetimeve për këtë fakt, Prokuroria me ndihmën e shërbimit sekret ka zbuluar se kjo pajisje ka ardhur në Shqipëri rreth 6 muaj më parë, ku një kompani italiane, ka kërkuar të demonstrojë pajisjen e shpikur prej tyre. Mësohet se demonstrimi është bërë në prani të zyrtarëve të lartë të policisë, ku më pas mendohet se Policia e Shtetit e ka blerë, me argumentimin se do të përdoret për trajnimin e oficerëve. Por, zyrtarisht nga policia thonë se, pajisja është e interforcës italiane në Shqipëri dhe shfrytëzohet për trajnime. Ndërkohë sipas Prokurorisë, kjo pajisje dhe programet e saj të shpikur nga kompania italiane, nuk janë ligjëruar në shtetit fqinj. Edhe pse janë siguruar këto të dhëna, Prokuroria thotë se ende nuk është sekuestruar kjo pajisje që mendohet se ndodhet në ambientet e Akademisë së Rendit.
Pas nisjes së hetimit për pajisjen përgjuese që është instaluar në ambientet e Drejtorisë së Përgjithshme të Policsë së Shtetit. Oficerët e Policisë Gjyqësore pranë Prokurorisë së Përgjithshme kanë marrë përgjigje negative nga ana e titullarëve të Policisë, të cilët kanë pranuar ekzistencën e një aparature të tillë. Por, zyrtarët e Policisë së Shtetit kanë pohuar se një aparaturë e tillë administrohet nga misioni italian “Interforce”, e cila përdoret për trajnimin e Policisë shqiptare.
Nën këtë pretekst, drejtuesit e Policisë së Shtetit kanë refuzuar bashkëpunimin me Prokurorinë për këtë hetim, duke mos lejuar oficerët e Policisë Gjyqësore, të njihen me këtë aparaturë, për pasojë edhe të bëjnë detyrën e tyre.
Prokuroria e Përgjithshme ka tentuar të sekuestrojë aparaturën përgjuese te Policia e Shtetit, por nuk është lejuar. Hetimi i Prokurorisë së Përgjithshme për praninë e një pajisjeje “ilegale” përgjimi në Policinë e Shtetit nisi pas informacioneve të siguruara nga strukturat inteligjente të sigurisë.
Sipas këtyre informacioneve, gjatë muajit të fundit Policia e Shtetit ka kryer disa interceptime telefonike përmes një mënyre të panjohur nga Prokuroria e Përgjithshme dhe Shërbimi Informativ Shtetëror.
Hetimi i Prokurorisë ka nisur pas publikimit të një shkrimi në media ku ndër të tjera shkruhej se, një pajisje përgjuese tepër e sofistikuar është instaluar prej më shumë se një muaji në zyrat e Drejtorisë së Përgjithshme të Policisë, duke vënë në alarm institucionet e sigurisë. Pajisja nuk rezulton e regjistruar në asnjë regjistër zyrtar apo dokument tjetër të institucioneve të Sigurisë.
Skandali i pajisjes përgjuese nga Policia e Shtetit pa autorizim nga Prokuroria u publikua para tre ditësh nga gazeta “Mapo”, me titull: Pajisja misterioze e paautorizuar nga Prokuroria: Kë po përgjon Tahiri”?
Ja kush është pajisja përgjuese e Tahirit në polici
“IMCI Catcher” është pajisja që po përdoret për trajnimin e oficerëve të Policisë së Shtetit, por që Prokuroria dyshon se mund të përdoret për përgjime të paligjshme.
Prej ditësh, në media po flitet se shërbimet inteligjente kanë ngritur alarmin se në Drejtorinë e Përgjithshme të Policisë është një pajisje përgjuese, për të cilën nuk ka asnjë autorizim ligjor dhe nuk dihet se si ka hyrë në territorin e Republikës së Shqipërisë. Këto informacione mediatike u konfirmuan në mesin e javës, kur Prokuroria e Tiranës ka regjistruar informacionin e shërbimeve inteligjente në formën e kallëzimit dhe ka nisur verifikimet e saj.
Të premten, dy oficerë të Policisë Gjyqësore të Prokurorisë së Tiranës u paraqitën në Drejtorinë e Përgjithshme të Policisë, me një vendim për të sekuestruar pajisjen e dyshimtë. Por të dërguarit e Prokurorisë u kthyen “duarbosh”, pasi, drejtuesit më të lartë të Policisë së Shtetit u thanë që kjo pajisje nuk gjendet në administrimin e tyre. Sipas zyrtarëve blu, pajisja që po kërkon Prokuroria shërben vetëm për qëllime trajnimi dhe administrohet nga misioni “Interforze” i qeverisë italiane, e cila asiston autoritetet shqiptare.
Në vijim të kësaj përgjigjeje, Prokuroria e Tiranës i është drejtuar zyrtarisht “Interforze”-s, për të krijuar një ide më të qartë se për çfarë qëllimi është përdorur pajisja. Ndërkohë, “Boldnews.al”, e cila ka mësuar emërtimin e pajisjes “IMCI Catcher”, ka bërë një kërkim të thjeshtë në internet mbi këtë aparaturë.
Rezultatet e kërkimit në internet konfirmojnë dyshimet se ajo pajisje mund të përdoret lehtësisht për përgjime dhe, nëse është përdorur nga Policia për këtë qëllim, atëherë interceptimet janë të paligjshme dhe ky rast mund të shënojë një skandal shumë të rëndë në institucionet e sigurisë në Shqipëri.
“Boldnews.al” i referohet faqes ndërkombëtare të internetit ‘Wikipedia”, në të cilën, për pajisjen “Imci Catcher” jepet një shpjegim i tillë: “Imci Catcher” është një pajisje që përdoret për përgjimin e trafikut të telefonisë celulare (mobile), si edhe për të ndjekur vendndodhjen e personave që përdorin telefonë celularë. Teknikisht, kjo pajisje shërben për të realizuar krijimin e një antene të rreme ndërmjet telefonit celular dhe antenës reale. “IMCI” përdoret në vende të ndryshme nga agjencitë ligjzbatuese dhe shërbimet e inteligjencës. Megjithatë, përdorimi i tyre ka ngritur shqetësime të mëdha sa i përket sigurimit të lirive civile dhe personale. Përdorimi i kësaj pajisjeje është rregulluar me ligje strikte në vendet ku ajo përdoret”.
R.POLISI
Bashkia e Mallakastrës asgjëson parcelat e policisë me kanabis
Kryebashkiaku i Mallakastrës, Agron Kapllanaj ka bërë publik në faqen e tij në “Facebook” një operacion të Policisë Bashkiake kundër kultivimit të bimëve narkotike, në zonën e quajtur “Lumara 2”. Sipas Kapllanajt, dy parcela prej rreth 6000 m2, pronë publike, ishin zaptuar për të kultivuar kanabis. Kryebashkiaku akuzon Policinë e Shtetit se nuk ka ndërhyrë qëllimisht në këtë zonë të Mallakastrës ku është kultivuar drogë. Sipas tij, jugu dhe gjithë vendi është kthyer në kartel droge.
“Të nderuar miq! Pas informacioneve, që sapo kanë filluar të më vijnë për zaptim të pronave publike në territorin e Bashkisë Mallakastër, dje, së bashku me Policinë Bashkiake organizova një operacion kontrolli dhe verifikimi. Nga kontrolli në zonën e quajtur “Lumara 2” konstatuam se ishin zaptuar dy parcela prej rreth 6000 m2. Ishin punuar në të gjithë sipërfaqen dhe ishin hapur gropa gati për t’u mbjellë!! Çfarë do mbillej thoni ju?? Do të mbillej bimë narkotike cannabis sativa! Do të pyesni ju se nga e kuptuat se do të mbillej pikërisht bimë narkotike??!! Sepse në njërën nga këto parcela ishte “kultivuar” fare pa teklif, një fidanishte me rreth 2500 kubikë. E po ashtu, ishte ngritur edhe një “kamping” i pajisur mirë me tre dyshekë për të fjetur, me mjetet e punës, me tubo plastike për ujitje, orendi shtëpiake për të gatuar, madje edhe ushqime.
Në pamje të parë dukej tamam një kamp veror. Kuptohej fare lehtë se këta “kultivues” kishin gjetur garanci, qetësi dhe mbrojtje, sepse fare të patrazuar kishin gjetur guximin për të ngritur haptazi dhe kultivuar plantacionin e tyre të drogës! Më informojnë se, në këtë zonë, parcela të tilla janë shumë, madje një situatë e tillë është pothuajse në të gjithë Mallakastrën. Një gjendje e pandodhur kurrë më parë. Dje, ishte dita ime e parë e kontrollit dhe e verifikimeve në terren dhe ky që sapo ju rrëfeva ishte rezultati i frikshëm. Ju garantoj që nuk do të rresht çdo ditë dhe do t’ju faktoj se Mallakastra, ashtu si gjithë jugu dhe gjithë vendi është kthyer në kartel droge, ku territori çdo ditë po i dorëzohet pa kushte krimit dhe drogës. Unë dhe ju nuk pajtohemi me këtë gjendje! Unë dhe ju besojmë tek puna, rendi dhe ligji. Ju bëj thirrje të gjithë qytetarëve të ndershëm të denoncojnë rast pas rasti. Jam i bindur se të gjithë ju miq të mi dhe të gjithë qytetarët mallakastriotë nuk e doni Shqipërinë si Kolumbi. E pra, të nderuar miq kjo është “Rilindja”! Ne jemi kundër dhe do luftojmë çdo ditë për kontrollin e territorit”, shkruan Kapllanaj në “Facebook”.
Mziu: Qeveria ka braktisur Kamzën, ja projektet për 2016
“Gjykata hodhi poshtë një akuzë politike duke më dhënë pafajësi”. Kjo ishte deklarata e kryebashkiakut të Kamzës dhe kryetarit të degës vendore të PD, i ftuar në emisionin “Debati në Channel One” të gazetarit Roland Qafoku përballë Avni Nezajt, kryeredaktor i lajmeve në TV “Channel One”, Brahim Shima, redaktor i lajmeve në TV “A1” si dhe Ilir Nikolla, kryeredaktor i gazetës “55. “Kjo është dalja e parë pas vendimit të Gjykatës, por edhe pas një viti, ku kam patur përpara dy sfida; ajo e fitimit të mandatit të tretë në Bashkinë e Kamzës, të cilën unë e kisha premtuar nga kjo studio si dhe po aq e rëndësishme është edhe sfida ndaj padrejtësisë politike që u bë ndaj meje dhe tashmë unë kam një vendim të formës së prerë, ku shpallem i pafajshëm. Sa i përket gjyqit, ajo çfarë mund të komentoj unë është që çështja për të cilën kishte të bënte me mua pati një kalvar të gjatë kohor prej rreth dy vite e gjysmë dhe që e imponoi mazhorancën politike dhe kryeministrin që ta përdorte në fjalorin e tij në çdo rast, edhe në Kuvend, edhe në mbledhje partie, edhe në fushatë elektorale.
Madje, nëse ju kujtohet, Kryeministri në çdo takim që bënte, jo vetëm në Kamëz, por në çdo qytet të Shqipërisë në fushatë elektorale, thoshte që kandidati i Partisë Demokratike e ka vendin në burg ose minimalisht në shtëpi. Dhe në fakt, as në burg nuk shkova dhe as në shtëpi nuk shkova, por vazhdoj të jem në bashki i votëbesuar për herë të tretë nga qytetarët e Kamzës dhe Paskuqanit. Pra, shkova në Bashki dhe besoj që drejtësia kishte të gjitha argumentet e nevojshme ligjore për të më shpallur të pafajshëm”, tha Mziu. Ndër të tjera z.Mziu shtoi se, “Me qëllimin për të më dënuar mua politikisht ka ndodhur një dënim për bashkinë, të cilën unë drejtoj, sepse, me keqardhje mund të them, në tri vite zero investime nga institucionet e pushtetit qendror ndaj Bashkisë së Kamzës”. Marrjen e pafajësisë z.Mziu e ka konsideruar vetëm një nga sfidat e jetës përballë makinerisë së pushtetit, duke i bërë presion drejtësisë, duke shtuar se: “Mund ta konsideroj një betejë, sepse do të thotë që ndërpritej karriera ime politike, por unë pak a shumë në këto beteja kam qenë i sprovuar, sepse kam shkuar në shkollë të lartë me vonesë, pavarësisht se isha me të gjitha notat 10 dhe e kam vuajtur. E mbaj mend që në atë periudhë kam shkuar me detyrim ushtar dhe vuaja nga ai regjim.
Në njëfarë mënyre kisha një imunitet ndaj kësaj përplasjeje politike. Por siç e theksova edhe më parë, duke mos pasur argumente, e konsideroja një betejë shumë të rëndësishme, sepse ishte një përballje e drejtpërdrejtë me Kryeministrin, por kisha besim tek drejtësia dhe u realizua”. Pyetjes nëse do të kërkonte dëmshpërblim z.Mziu iu shpreh se, “mua s’më intereson dëmshpërblimi, mua më intereson marrja e pafajësisë dhe ngritja e kauzës për të mos u vendosur përpara presionit politik as njerëz politikë, por as njerëz të drejtësisë. Unë jam në betejë të vazhdueshme për të realizuar atë se çfarë u kam premtuar qytetarëve të Kamzës. Besoj që dëmshpërblimi më i madh ndaj kësaj akuze politike ishte fitorja më datë 21 qershor të 2015-ës”.
Shqipëria digjet nga krimi dhe skandalet, Rama krihet
Krim, drogë dhe prostitucion janë prurjet e qeverisë së Kryeministrit Edi Rama. Skandalet e përditshme që prekin këtë mazhorancë, tregojnë se Mark Frroku, Armando Prenga, Arben Ndoka në Parlament nuk ishin aksidente, por pjesë e një organizate kriminale që ka marrë peng pushtetin në Shqipëri. Një kryetar bashkie që prostituon me një vajzë 20-vjeçare në këmbim të bukës së gojës, një drejtor rajonal transporti që trafikon qindra e qindra tonë drogë në Europë janë bërë lajme të zakonshme. Skandalet nuk kanë të sosur dhe pa marrë mirë jehonë njëri, shpërthen tjetri dhe lufta e vetme që dëgjon është mes PS-së dhe LSI-së se i kujt është pushti, i kujt është krimineli, pasi turpin e hanë së bashku.
Parlamenti, qeveria, administrata dhe çdo institucion që kontrollon kjo mazhorancë janë shndërruar në një njollë turpi për çdo shqiptar. Vrasës që arratisen me ndihmën e ministrit të Brendshëm, trafikantë droge që përdorin makinën e ministrit të Brendshëm, përdhunues që mbrohen nga ministri i Brendshëm, janë histori që mund të ndodhin vetëm në Shqipëri dhe në Shqipërinë e qeverisur nga Edi Rama. Fakte skandaloze të zbuluara nga media shqiptare dhe ajo ndërkombëtare tregojnë se ky pushtet është qelbur dhe qytetarët janë të shokuar se si mund të ndodhin këto gjëra në vendin e tyre. Edi Rama, ai që ka detyrimin për të folur, zgjedh të ndjekë ndeshje basketbolli dhe të përdridhet nëpër dasma, duke mos marrë përgjegjësi dhe si për ironi vesh edhe bluzën me mbishkrimin “WTF”.
I kërkuar nga gjithë policitë e Europës, Eskobari i Ballkanit trajtohet dhe shoqërohet si personalitet nga Kryeministri, ministri i Brendshëm dhe policia nuk guxon as ta ndalojë, as ta arrestojë. Kokëdhima thotë se Eskobari është ushtari i bandës së kryeparlamentarit, por policia dhe kufiri janë nën komandën e Ramës dhe Tahirit. Nuk duhej të shfaqej Balili për të mësuar se kriminelët kanë imunitet në këtë vend. Frroku, Prenga, Roshi, Bushi, Shullazi dhe qindra banditë të tjerë në këtë vend na kanë treguar se Edi Rama lë kokën për ta edhe kur vrasin policë, edhe kur vrasin qytetarët në komisariatin e policisë, edhe kur janë të dënuar për krime dhe ambasadori amerikan kërkon publikisht që të mos zgjidhen.
Këta janë një ndërmarrje kriminale që në krye të bizneseve kanë zgjedhur Edi Ramën dhe askush nuk guxon t’u afrohet. Nuk ka fatkeqësi më të madhe kur polici shqiptar i thotë policit grek se nuk mund të arrestojë kapobandën e një organizate kriminale që shpërndan drogë në Greqi, Itali, Belgjikë, Skandinavi, sepse nuk ia mban nga Kryeministri. Nuk ka fatkeqësi më të madhe kur polici detyrohet të lërë vendin e të kërkojë azil, pasi krimineli që kapi rezultoi se ishte ortaku-kushëri i ministrit të Brendshëm dhe Tahiri ia ka bërë benë. Nuk ka fatkeqësi më të madhe kur polici malazez kap vrasësin duke kaluar kufirin dhe drejtori i policisë i thotë lëreni të lirë se kam urdhër nga Kryeministri që të mos ta prekim. Nuk ka fatkeqësi më të madhe se sa kur polici holandez ndalon vrasësin, ministri i Brendshëm falsifikon dosjen e vrasësit për ta lënë të lirë. Nuk ka fatkeqësi më të madhe se sa kur kryepolici i Tiranës bëhet shoferi i kryemafiozit të kokainës dhe i ofron skafin e ministrit të Brendshëm për t’u arratisur. Nuk ka fatkeqësi më të madhe se sa kur shteti vihet nën kontrollin e bandave kriminale.
Janë shumë që kërkojnë të dinë se si mund të marrë fund kjo gjendje, se cila është rrugëdalja, se çfarë duhet të bëjnë shqiptarët, çfarë duhet të bëjnë ndërkombëtarët. Këta të fundit mund të bëjnë diçka, por kurrë nuk mund ta ndryshojnë. Askush nuk mund të thotë se krimi mundet me vota apo mjete demokratike. Po të ishte kështu nuk do të kishte polici. Rruga e vetme për të mundur krimin qeveritar është forca e qytetarëve të lirë deri në largimin e këtyre fundërrinave nga pushteti. Këta banditë forcën e shqiptarëve duhet ta shohin në rrugë, përballë zyrave të tyre që i kanë shndërruar në bordello, atje ku jepen tenderat, atje ku firmosen koncesionet, atje ku mbjellin drogën, atje ku lirohen kriminelët, atje ku bllokohen bizneset e pista të pushtetarëve. Kryebashkiaku i Mallakastrës shkatërroi dje një plantacion me drogë, nesër në Tiranë duhet ndaluar një koncesion, diku tjetër duhet bllokuar një tender. Forca e qytetarëve duhet për të mbrojtur një vajzë 20-vjeçare, për të mbrojtur paratë dhe pasuritë publike, për të mbrojtur të sotmen dhe të ardhmen e atyre që kanë zgjedhur të jetojnë në këtë vend. Bandë bëjnë qelbësirat dhe burracakët. T’ua tregojmë vendin një orë e më parë. Rama le të vazhdojë të krihet, por këtë vend të mos e lëmë të digjet!
Balili drejt Kubës, Rama e ndihmoi të arratisej pa e regjistruar në sistemin TIMS
Ish-¬Kryeministri, Sali Berisha akuzon qeverinë dhe Policinë e Shtetit se kanë lejuar Klement Balilin që të dalë nga Shqipëria pa lënë gjurmë në sistemin TIMS. Sipas Berishës, Balili është nisur drejt Kubës, por fillimisht ka ndaluar në Vietnam. Berisha citon burime të mirëinformuara të cilat bëjnë të ditur se me të njëjtin skenar, ashtu siç u lejuar arratisja e Arben Frrokut, është lejuar edhe arratisja e Klement Balilit.
“Edvin Shullazi përcjell Edeskobar-in me nderime shtetërore drejt Hanoit me destinacion Kubën! Edvin Shullazi, pas zbulimit nga autoritetet greke dhe amerikane të Edeskobarit, mikut të ngushtë të Edi Ramës dhe sivëlla Kokëdhimës, njoftoi shqiptarët nëpërmjet Saje Qorrit se prej kohësh policia shqiptare po bënte hetime rreth grupit në fjalë. Me këtë dezinformim të Saje Qorrit, me të cilin Rama kërkonte të mashtronte opinionin publik brenda dhe jashtë vendit për lidhjet e tij dhe sivëlla Kokëdhimës direkte me Edeskobar-in, pardje, Rama përcolli me “nderime” shtetërore, pa e regjistruar në sistemin TIMS, Edeskobar-in drejt Kubës, drejtim në të cilin nisën edhe Arben Frrokun, por që ky nuk zbatoi porosinë dhe u kthye në Holandë, në vendin e krimit ku dhe e arrestuan. Edeskobar, thanë burime të informuara mirë, është nisur për në Hanoi nga do të kalojë direkt për në Kubë. Në ishullin e Karaibeve ai do të jetë nën mbrojtjen dhe kujdesin e Genti Xhixhës.
Vetëm 24 orë pas largimit me nderime shtetërore të Edeskobar-it nga Shqipëria dhe 72 orë pas denoncimit nga unë të lidhjeve të tij me Ramën dhe sivëlla Kokëdhimën ky i fundit reagoi ndaj akuzave të mia duke ja faturuar Edeskobar-in Metës, që është në Washington. Madje në reagimin e tyre të trashë, sivëllezërit shkuan aq larg saqë deklaruan se unë gjoja paskërkam bërë fjalë për një hotel që ai paskërka me Ilir Metën. Lidhur me sa më sipër deklaroj sa vijon:
– Edeskobari ka patur lidhje shumë të ngushta me Ramën dhe sivëlla Kokëdhimën dhe për këto ka fakte të pakundërshtueshme!
– Edeskobari mund të jetë edhe vëlla me Ilir Metën, por se ai ishte prej kohësh në hetim nga policia shqiptare nuk e tha Edmond Panariti, por e tha Saje Qorri.
– Edeskobari mund të jetë njeri i afërt me Ilir Metën, por me nderime shtetërore e përcolli për në Kubë Edi Rama nëpërmjet Saje Qorrit dhe jo Ylli Manjanit apo Petrit Vasilit.
Së fundi, reagimi i vonuar ndaj akuzave të mia, vetëm pas largimit të Edeskobarit nga Shqipëria, të sivëlla Kokëdhimës dëshmon se ata nuk guxuan ta shesin atë tek Meta sa kohë ai ishte në Shqipëri” shkruan Berisha në reagimin e tij.
Të enjten familjarët pohuan “zhdukjen” e Balilit
Që prej ditës së enjte, pas shkarkimit nga posti i kreut të Transporteve në Sarandë, Klemend Balili u zhduk pa lënë gjurmë. Sipas gazetës Panorama e cila kishte kontaktuar me familjarët e ish-drejtorit, citoi se kishin thënë se nuk kishin mundur ta kontaktonin që prej ditës së enjte.
Të enjten në mëngjes, mësohet se Balili kishte shkuar në punë ku kishte paraqitur kërkesën për dorëheqje, kërkesë e cila nuk ishte pranuar dhe më pas kishte ardhur shkresa për shkarkimin e tij nga detyra.
Familjarë të Balilit, kanë treguar se ditën e enjte ai ishte nisur për në Tiranë, por që prej atij momenti, ata nuk kanë mundur të kontaktojnë me të.
Shtypi grek ka shkruar për Balilin duke e cilësuar si ‘Escobari i Ballkanit’, që drejton organizatën kriminale të trafikut ndërkombëtar të drogës në vendet e Europës Qëndrore dhe në shtete nordike.
Sakaq, Greqia ka lëshuar urdhër-arresti ndërkombëtar për të, ndërsa në Shqipëri, Policia nuk nisi asnjë operacion për kapjen e tij.
CNN rikonfirmon: Policia shqiptare tha “nuk e arrestojmë Balilin se ka lidhje politike”
Rrjeti televiziv i përgjigjet letrës së ambasadës shqiptare në Athinë, duke ju referuar një takimi sekret në Shqipëri, mes policisë shqiptare dhe asaj greke. “Përfaqësuesi i palës shqiptare tha se Balili nuk mund të preket se ka lidhje të forta politike”. Në Greqi, portali informativ CNN.Gr dhe Ambasada shqiptare në Athinë janë përfshirë në replika mbi dyshimet se shqiptari Klement Balili që cilësohet “si truri” i trafikimit në Greqi të 700 kg marijuanë mbrohet nga politikanë të lartë në Tiranë. Pas një shkrimi të CNN në gjuhën greke ku thuhej se oficerë të policisë shqiptare u kishin deklaruar partnerëve greke gjatë një takimi sekret në Shqipëri se “baronin shqiptar” nuk mund ta arrestonin për shkak se ai kishte mbrojtje politike ne Tiranë, reagoi zyrtarisht Ambasada shqiptare në Athinë. Përmes një letre të nënshkruar nga drejtuesi i zyrës së ndërlidhjes të policisë shqiptare në Ambasadën shqiptare në Athinë, Andi Likaj, vihej në dukje se asnjë pjesëtar i policisë shqiptare nuk ka deklaruar që baroni i drogës ka mbrojtje politike në Tiranë. Sipas letrës së Ambasadës shqiptare drejtuar CNN GR , Policia shqiptare, ashtu si çdo pjesëtar i saj që ka hetuar çështjen në fjalë, nuk ka bërë një deklaratë të tillë, ndërsa ka bërë çdo përpjekje për hetimin dhe asgjësimin e organizatës”. Portali informativ CNN GR e ka publikuar reagimin e Ambasadës shqiptare shoqëruar me faksimilen e letrës . Por menjëherë ka publikuar edhe një reagim ku ripërsëritet se CNN GR i është referuar sipas burimeve të tij një takimi tejet sekret në Shqipëri, mes policisë greke dhe asaj shqiptare. Në këtë takim sipas CNN GR një pjesëtar i palës shqiptare ka thënë se “në Shqipëri nuk mund të preket ky njeri , veçse po të ketë fakte të pakundërshtueshme, sepse ai ka lidhje politike dhe kontake me parti e politikanë të nivelit të lartë”. Sipas dosjes, ka ripërsëritur CNN GR, personi rezultonte të ishte financier i kartelit dhe organizator per transportimin e 700 kg marijuane në Greqi që anëtarët e organizatës kriminale e fshehën në ishullin Zakynthos. “Hetimi narkotikëve ishte nën fshehtësisë ekstreme dhe vizita nga policia greke në Shqipëri ishte absolutisht sekret i papërshkueshëm, sidomos pas asaj që ata dëgjuan nga të dhënat për organizatorin e kartelit”, nënvizon portali CNN Gr në reagimin e tij pas letrës së ambasadës Shqiptare në Athinë. Për lidhje të Balilit me politikën shqiptare ka folur edhe opozita shqiptare. Pas njoftimeve se Balili është zhdukur pa lënë gjurmë, kryetari i opozitës Lulzim Basha deklaroi mbrëmë se “me bekimin e ministrit të Brendshëm dhe nën mbrojtjen e policisë Klement Balilaj prej dy ditësh është arratisur dhe nuk gjendet. Loja me ka kërkesë, s’ka kërkesë, ka dosje, ska dosje, është nën hetim, nuk është nën hetim, është i PS, është i LSI-së, nuk është gjë tjetër veçse dhënie kohe Klement Balilajt për të kryer pikërisht këtë akt, arratisjen. Balili konsiderohet si ndër krerët e një grupi trafiku me një rrjet të shtrirë në disa vende të Bashkimit europian. Sipas Europolit, organizata europiane e zbatimit të ligjit, 17 persona, pjesë e një rrjeti ndërkombëtar që merrej me trafikimin e lëndëve narkotike u arrestuan më 9 maj, në një operacion të bashkërenduar të drejtuar nga Greqia dhe me mbështetjen e Belgjikës dhe Europolit. Mes të arrestuarve janë 11 grekë dhe 6 shqiptarë. Sipas Europolit, rrjeti i trafikantëve me bazë në Greqi, mendohet të ketë fituar miliona Euro nga trafkimi i drogës në shtetet evropiane.
Arben Shahini
Gjykata pezullon nga detyra kreun e Tatimeve Tiranë
Me kërkesë të Prokurorisë së Tiranës, Gjykata ka vendosur masën e sigurimit “Pezullim nga detyra” për drejtorin e Drejtorisë Rajonale të Tatimeve Tiranë, Androkli Kokthi, i dyshuar se ka ulur ndjeshëm detyrimin financiar, që duhej të paguante në favor të shtetit kompania e naftës “Fullpet”.
Ndaj kompanisë “Fullpet”, Prokuroria e Tiranës është duke zhvilluar hetim lidhur me përfshirjen në një skemë mashtruese financiare. Gjatë veprimeve hetimore, Njësia Task-Force e Prokurorisë së Tiranës ka konstatuar, ndër të tjera, se në vitin 2014, Administrata Tatimore, e konkretisht nën drejtimin e të dyshuarit Kokthi, i ka bërë një përllogaritje të gabuar detyrimeve që “Fullpet” kishte ndaj shtetit.
Prokuroria e Tiranës ka kryer verifikimet e saj, në kuadër të procedimit penal, nga të cilat ka krijuar dyshime të arsyeshme se kjo shmangie financiare është realizuar nën ndikimin e drejtorit të Drejtorisë Rajonale Tiranë, Kokthi.
Ky i fundit vijon të jetë person nën hetim nga ana e Prokurorisë së Tiranës edhe për një rast tjetër, ku janë krijuar dyshime se ka favorizuar një firmë pjesësh këmbimi për t’iu shmangur detyrimeve tatimore. Për këtë rast, fillimisht ndaj tij u vendos masa e sigurimit “Arrest në burg”, e cila u zbut në Gjykatën e Apelit në “arrest në shtëpi. Më tej, Gjykata e Lartë e ndryshoi masën e sigurimit, duke vendosur ndaj tij “detyrim për paraqitje”.
Çfarë di Saimir Tahiri për Edi Ramën që nuk e shkarkon dot?
Partia Demokratike ka kërkuar dje largimin e menjëhershëm të ministrit të Brendshëm Saimir Tahiri, të cilin e cilëson si turpi i shqiptarëve dhe shfytyrimi më kriminal i ndonjë ministri të Brendshëm në 25 vite. Sipas kreut të Departamentit të Rendit dhe Sigurisë në PD, Enkelejd Alibeaj, kryeministri Rama është peng i lidhjeve kriminale të ministrit dhe prandaj nuk e shkarkon atë.
“Vetëm një kryeministër i kapur do të sfidonte qytetarët e tij, partnerët europianë dhe amerikanë, duke mbajtur në krye të rendit një njeri të implikuar e të inkriminuar deri në fyt si Saimir Tahiri. Një seri ngjarjesh kanë dëshmuar se Shqipëria ka pasur në krye të rendit që prej shtatorit të vitit 2013 një ministër të inkriminuar, ndërlidhësin e trafiqeve të drogës e shumë krimeve të tjera. Banditët më në zë të vendit nuk kanë pasur thjesht një pikë kyçe në polici, një lidhje politike diku, por kanë pasur drejtpërdrejt në dispozicion ministrin e Brendshëm”, tha Alibeaj.
Alibeaj përmendi me radhë disa nga rastet që faktojnë lidhjet e forta të Saimir Tahirit me bandat e inkriminuara. Ai deklaroi se Tahiri e nisi me “një fushatë selektive e klienteliste për lojërat e fatit, ku lulëzuan miqtë e tij e u fundosën të tjerët, një krekosje korruptive e Tahirit që la pas dhe një viktimë, një mikun e tij të afërt për të cilin ai ka përgjegjësi siç ia kanë bërë të ditur dhe familjarët”.
“Projekti i madh i Tahirit ishte krijimi i një hambari të madh droge të pahasur më parë në vend, dhe ai organizoi gjithë infrastrukturën për këtë. Nën drejtimin e tij mbarë territori u mboll me kanabis. Pas çdo kodre me drogë është një pakt 30 përqindësh i bandave me Tahirin. Tahiri ka një grusht njerëzish koordinatorë të mbjelljes, rritjes dhe shitjes së drogës, mes tyre spikasin Habilajt, banda e Shullazit, dhe siç u evidentua Balili i Sarandës”, tha kreu i Departamentit të Sigurisë në PD.
Ai solli në vëmendje se kur Partia Demokratike e denoncoi në vitin 2014 emërimin e trafikantit të njohur në krye të Transporteve në rajonin e Sarandës, qeveria e mbrojti dhe Tahiri u kujdes t’i jepte dhe më shumë pushtet e paprekshmëri.
“Kur doli se makinën private të ministrit të Brendshëm e përdornin Habilajt dhe s’kish polic t’i ndalonte, Tahiri u zgjeroi atyre territorin. Sa më shumë denoncohej lidhja e tij me Shullazin, aq më shumë ky i fundit rëndonte krimet, vrasjet, gjobvëniet, aq më i paprekshëm bëhej. Shullazi u kap me policin e Tahirit në shërbim të tij, u kap duke kaluar makinën e blinduar në doganë pa kontroll, u kap në përplasje me armë, dhe në të gjitha rastet doli i pastër. Praktikisht, kupola e ministrisë dhe e policisë ishte zhvendosur në rrugën e “Kavajës”, në rezidencën e Shullazit”, tha Alibeaj, ndërsa citoi se kur u ndalua pas kërcënimit që i bëri kandidatit për rektor, Tahiri foli vetë me Shullazin përmes nëndrejtorit të Policisë së Tiranës dhe e garantoi se do jetë thjesht një shëtitje, pa e ditur se Prokuroria kishte punuar prej muajsh për gjetjen e provave për dhjetëra krime.
“Tahiri është shërbëtor i zellshëm dhe i qëndron paktit me krimin. Kur goditën linja të trafikut nga shërbimet partnere ai shfajësohet se nuk ka dijeni, nuk e kanë prej tij. Ai i vuri shkrepsen provave të drogës në laborator për të fshirë gjurmët e bashkëpunëtorëve. Me Tahirin në krye, u ngrit impianti më i madh i kokainës në Ballkan, në Xibrakë të Elbasanit, impiant që dhe sot do të ishte në punë nëse nuk do të zbulohej nga policia gjermane”, tha kreu i Departamentit të Sigurisë në PD.
Alibeaj theksoi ndër të tjera se krerët e Policisë me të cilët ai drejton, janë të gjithë një hartë interesash kriminale, të promovuar në postet kyçe nga Shullazi, prej besnikërisë që kanë treguar ndaj tij. Partia Demokratike i ka denoncuar me emra dhe me fakte dhe do të vazhdojë ta denoncojë në ditët në vijim kupolën e narkotrafikut në Policinë e Shtetit.
“Janë këta më të besuarit e Tahirit, të cilët prishin provat në vendngjarje, zhdukin armë e telefona që janë dëshmi e lidhjeve me krimin dhe dëshmi e krimeve të mëparshme.
Saimir Tahiri e pranoi vetë se kishte bërë biseda private në zyrë e në plazh me Bamin e akuzuar si vrasës me pagesë. Pra, ministri i Brendshëm ishte ulur me të si përfaqësues i njerës prej bandave. Janë disa vrasje pa autorë sot, sepse autorët i njeh dhe i di Saimir Tahiri, kanë mbrojtjen e tij.
Sa kohë të jetë ministër i Brendshëm i vendit Saimir Tahiri, bandat janë në pushtet, droga lëviz ngado, krimet kanë licensë. Tahiri duhet të largohet menjëherë, ai është turpi i shqiptarëve, dhe shfytyrimi më kriminal i ndonjë ministri të Brendshëm në 25 vite”, tha Alibeaj.
Integrimi, eurodeputetët kërkojnë zbatimin e kritereve të Kopenhagës
Integrimi europian i vendeve të Ballkanit ka qenë tema e konferencës së Parlamentit Europian, ku protagonistë ishin Shqipëria, Serbia dhe Mali i zi. E vërteta mbi integrimin europian të vendeve të Ballkanit del ndonjëherë në diell në konferenca jotipike të Parlamentit Europian. E tillë ka qenë ajo me titull “Shqipëria, Serbia, Mali i Zi, nxënës të mirë në integrimit europian, e vërtetë apo e rreme? Eurodeputetët nuk iu referuan renditjes klasike të garës së integrimit europian në Ballkan, ku Mali i Zi është më i avancuar, i ndjekur më pas nga Serbia dhe Shqipëria, por problemeve të vërteta që hasin vendet. Madje për raportuesin për Shqipërinë, Knut Fleckenstein është e vështirë të thuhet, se cili është nxënësi më i mirë, por fare e lehtë të përcaktohet më i keqi.
Knut Fleckenstein, Eurodeputet: «Nuk e di se kush është nxënësi më i mirë në integrimin europian, por di kush është më i keqi. Nxënësi më i keq është Maqedonia dhe këtë nuk e luan topi. Mënyra se si sillet qeveria maqedonase është 360 gradë larg qasjes dhe vlerave të Bashkimit Europian”. Një tjetër shpërthim erdhi nga eurodeputeti Eduard Kukan, i cili iu referua një shqetësimi të hapur të Shoqërisë Civile në Mal të Zi për një korrupsion sistemik në vend, shqetësim me të cilën përballen eurodeputetët sa herë që vizitojnë vendin:
Eduard Kukan, Eurodeputet: «Nëse korrupsioni në Mal të Zi është sistematik, atëherë si ka mundësi që Komisioni Europian dhe të gjithë të tjerët e tolerojnë? Shtroj pyetjen? Nëse është kështu? Serbia dhe Shqipëria kanë gjithashtu sfidat e tyre në luftën kundër korrupsionit, krimit të organizuar dhe probleme ekonomike dhe sociale. Lidhur me lirinë e shtypit, Mali i Zi dhe Serbia regjistrojnë probleme të konsiderueshme, ndërkohë që Shqipëria ka regjistruar hapa mbrapa. Besar Likmeta i rrjetit investigativ BIRN ka ekspozuar problematikën e gazetarisë ballkanike me presionin e politikës në media, problemeve ekonomike dhe vetëcensurimin. Për raportuesin Knut Fleckenstein, në Shqipëri duhet forcuar enti rregullues i mediave audiovizuale, strukturat drejtuese të medias publike, si dhe të forcohet profesioni i gazetarisë. Por shqetësimi kryesor për eurodeputetët aktualisht është se zgjerimi është jashtë fokusit të Bashkimit Europian dhe çfokusimin mund ta zhbëjë vetëm progresi në reformat e integrimit në Ballkan.
Knut Fleckenstein, Eurodeputet: «Zgjedhësit europianë pyesin, a nuk do ishte më mirë që të zgjidhim problemet tona njëherë dhe pastaj të pranojmë vende të tjera të Ballkanit? Dhe përgjigja jonë është: Nuk është ose njëra, ose tjetra, por mund të ecin të dyja paralelisht. Ne i themi, që do t’i gjykojmë vendet e Ballkanit mbi bazën e kritereve të Kopenhagës. Dhe votuesit e mi në Hamburg qeshin me mua, duke më thënë: Ah po, do gjykoni siç e bëtë me Rumaninë dhe Bullgarinë? Pra, në një farë mënyre Ballkani është viktimë në këtë kuptim, por zgjedhësit e mi në Hamburg nuk do më falin më, nëse e bëj sërish këtë në të ardhmen”. Konferenca mbi Malin e Zi, Serbinë dhe Shqipërinë u organizua me inisiativën e 3 eurodeputetëve në Parlamentin Europian, Knut Fleckenstein, zv/kryetarin e grupit socialist dhe demokrat, Jozo Rados, të grupimit liberal dhe Igor Soltes të grupimit të gjelbër në Parlamentin Europian.
Kryesore
Continue to the category
