Bavarezët kanë festuar këtë të shtunë marrjen e titullit, pasi siguruan fitoren në shtëpi në ndeshjen e fundit të sezonit. Fitorja 3-1 ndaj Hannover është pasuar nga festimet për titullin e radhës të Bundesligës, ku Pep Guardiola ka marrë pjesë si triumfant në prag të lamtumirës. Robert Lewandowski u dha kampionëve kryesimin në fillim të ndeshjes, duke u bërë lojtari i parë që arrin kuotën e 30 golave në një sezon në Bundesligë, rekord që mbahej nga Dieter Muller i Koln në sezonin 1976-‘77.
Mario Gotze, për të cilin përflitet gjithmonë e më shumë kalimi tek Liverpool, shënoi dy gola në secilën pjesë të ndeshjes. Guardiola pritet t’i japë fund zyrtarisht aventurës së tij gjermane fundjavën e ardhshme, pas takimit DFB-Pokal kundër Borussia Dotrmund.
Nuk ka shpëtim për Shtutgartin. Skuadra nga Baden Vyrtemberg është mundur nga Volfsburgu në javën e fundit të Bundesligës 1-3 dhe sezonin e ardhshëm do të luajë në Bundesligën 2. Një rënie e hidhur për Shtutgartin që pas shumë sezonesh do të luajë një kategori më poshtë pas një sezoni të dështuar tërësisht.
Një tjetër skuadër e rëndësishme në Bundesligë, Eintrahti i Frankfurtit do të jetë i detyruar të luajë në play-off me vendin e tretë në Bundesligën 2 për të siguruar qëndrimin në Bundesligë. Në ndeshjen direkte për të qëndruar në Bundesligë Verder Bremeni ka mundur Eintrahtin e Frankfurtit 1-0 me gol të shënuar nga Xhiloboxhi një minutë nga fundi i takimit që i ka siguruar mbijetesën në Bundesligë.
Evropa – Bundesliga ka përcaktuar dhe ekipet që sezonin tjetër do të luajë në Ligën e Evropës. Kështu Shalke 04 dhe Mainci do të futen në fazën në grupe në Ligën e Evropës, ndërsa Herta e Berlinit do të luajë në play off në Ligën e Evropës.

Sezoni i jashtëzakonshëm i Leicester pasurohet edhe me një unazë. Dhe nuk bëhet fjalë për një unazë të zakonshme, por një që përbëhet nga një diamant 5 karat i rrethuar nga një kurorë e artë si për të krijuar një lloj seti me Kupën e fituar të Premier League nga skuadra e Dhelprave. Është një unazë vlera e së cilës kap shifrën e 280 mijë eurove.
Ideja për krijimin e kësaj unaze u hodh nga argjendari Lumbers për të festuar në mënyrën më të mirë të mundshme triumfin e Ranierit dhe skuadrës së tij. Numri i unazave të prodhuara do të jetë i limituar në 80, 81 ose 83 ekzemplarë, në varësi të pikëve që do të ketë kjo skuadër në përfundim të kampionatit.
Efekti duket se ka qenë i menjëhershëm, pasi disa prej lojtarëve të Leicester me Jamie Vardy në krye kanë menduar të bëjnë prenotimet për blerjen e kësaj unaze, të cilën duan t’ia bëjnë dhuratë të fejuarave apo bashkëshorteve të tyre. Vetëm se këtë radhë, për ta paguar atë duhet të hapin portofolët e tyre, pasi padroni i klubit Srivadanapra nuk ka ndërmend të bëjë shpenzime në këtë aspekt.

Chelsea i ka ofruar rinovimin kapitenit të skuadrës, John Terry. Sipas zëdhënësit të klubit, Terry, kontrata e të cilit skadon këtë verë, ka në dorë një kontratë të re 1-vjeçare. “Marina Granovskaia dhe Bruce Buck janë takuar gjatë kësaj jave me John dhe agjentin e tij dhe i kanë ofruar një kontratë të re 1-vjeçare. Kjo ofertë vjen në fund të sezonit, prandaj John duhet të marrë një vendim të rëndësishëm. Ai dhe familja e tij janë duke e shqyrtuar”, u shpreh zëdhënësi.
Terry, 35 vjeç, ka bërë 703 ndeshje me fanellën e Chelseat, pasi debutimit në tetor të vitit 1998 dhe gjatë muajve të fundit e kishte bërë të qartë se dëshiron të qëndrojë në “Stamford Bridge” edhe për disa vite të tjera. Tifozët e Chelseat kishin nisur një fushatë javëve të fundit, duke i kërkuar klubit që t’i ofrojnë kontratë të re idhullit të tyre dhe duket se më në fund skuadra ka reaguar.

Miralem Pjaniç do të jetë përforcimi i parë i rëndësishëm për Juventusin gjatë merkatos së verës. Sipas “Sport Mediasset”, bardhezinjtë kanë rënë dakord me drejtuesit e Romës për të paguar klauzolën e largimit në kontratën e mesfushorit boshnjak, më saktë plot 38 milionë euro, duke u paraprirë lëvizjeve të Barcelonës, Realit të Madridit apo të Paris Saint Germmain. Ky çmim konsiderohet i pranueshëm për kampionët në fuqi të Italisë, që do të bëjnë të tyrin një nga mesfushorët më të vlerësuar të momentit. Pjaniç është prej 5 sezonesh pjesë e Romës, periudhë gjatë së cilës e ka veshur 183 herë në total fanellën verdhekuqe, duke shënuar 30 gola, 27 vetëm në Serinë A.
26-vjeçari që i pëlqen shumë Alegrit, ka qenë truri i lojës së Romës, ndërkohë që Juventusit i ka munguar një lojtar me të tilla karakteristika që pas largimit të Andrea Pirlos. Futbollisti boshnjak konsiderohet përforcimi i duhur për mesfushën bardhezi, që edhe në këto momente është shumë e fortë. Claudio Marchisio pritet të rikthehet në fund të tetorit për shkak të dëmtimit të rëndë që pësoi në gju, por me zbarkimin të Vinovo të Pjaniç, do të ketë kohën e mjaftueshme në dispozicon për të rifituar formën e mëparshme.
Juventusi kërkon të bëjë gjëra të mëdha në të ardhmen e afërt dhe këtë e tha qartë edhe presidenti Andrea Anjeli, në konferencën e së mërkurës, me rastin e rinovimeve të Bufonit dhe Barzaljit. Por për të synuar fronin europian kërkohen edhe investime të mëdha dhe lojtarë cilësorë, prandaj, për të festuar më së miri titullin e pestë radhazi, padroni bardhezi ka vendosur që të mos kursehet, por kërkon t’i shtojë një emër të madh në mesfushë Juventusit, një organizator, lojtarin e shumëkërkuar nga trajneri Masimiliano Alegri prej dy vitesh. Pistat që po ndiqen tashmë njihen nga të gjithë, por risia është se në klubin torinez kanë vendosur që të hapin thesin dhe të paguajnë shifra stratosferike.
Prej më shumë se një jave, Juventusi po shqyrton edhe organizatorin e Realit të Madridit, Hames Rodriguez. Kolumbiani, i cili nuk po shkëlqen në radhët e “galaktikëve” është shndërruar në një objektiv serioz, aq sa pas mediave italiane, tashmë edhe ato spanjolle konfirmojnë kontaktet dhe lejen që ka marrë “Zonja e Vjetër” për të ngritur në këmbë një tratativë serioze. Në këto bisedime përfshihet pagesa e 50 milionë eurove, plus rikthimin gratis të Alvaro Moratës në “Santiago Bernabeu”, për një total prej 80 milionësh, e njëjta shifër që Reali pagoi dy vite më parë, për të siguruar amerikanojugorin.
Por nga Spanja lëshojnë edhe një tjetër bombë të vërtetë. Juventusit i pëlqen aq shumë mesfushori 22-vjeçar portugez i Valencias, Andre Gomes, aq sa për të është gati të bëjë një ofertë të frikshme. Pas refuzimit të ofertës prej 30 milionë eurosh, të bërë tri javë më parë dhe të refuzuar nga iberikasit, drejtori i përgjithshëm bardhezi është rikthyer në sulm me një tjetër ofertë: 30 milionë euro kesh, plus 20 milionë euro të tjera në formë bonusesh për tri vitet e ardhshme, për një total prej 50 milionësh. Dhe, në të tilla shifra, Valencia tundohet jo pak, ndonëse kjo tratativë është vetëm në hapat e saj të parë dhe bisedimet pritet që të bëhen më serioze, pas datës 21 janar, kur Juventusi të mbyllë zyrtarisht këtë sezon, me finalen e Kupës së Italisë kundër Milanit.

Finalja e Europa League po tërheq vëmendjen e tifozëve nga mbarë bota. Në 18 maj, në St.Jacob Park të Bazelit, Sevilla dhe Liverpool do të vihen përballë njëra-tjetrës për të diskutuar këtë trofe shumë të rëndësishëm europian. Sevilla është aktualisht skuadra kampione në fuqi e këtij turneu dhe ka rekordin me 4 trofe të fituar. Nëse spanjollët do të mposhtin Liverpoolin, atëherë ata do ta fitojnë Europa League për të tretin vit radhazi.
Në krahun tjetër, Liverpool ka fituar 3 herë këtë turne, e fundit ishte në vitin 2001. Nëse në mesjavën e ardhshme “të kuqtë” e drejtuar nga Jurgen Klopp do të triumfojnë, atëherë do të barazojë rekordin e Sevillas me 4 tituj.
Fakti që një skuadër angleze është në finalen e një turneu europian ka sjellë një rritje të shitjeve të biletave të finales, e dhënë kjo që konfirmohet nga portali ticketbis.net. duke bërë analizën e shifrave të publikuara për shitjet e biletave që nga viti 2012, rezulton se tifozë nga të paktën 32 shtete kanë arritur të sigurojnë një të tillë për finalen e këtij sezoni dhe shumica e tyre janë blerë nga tifozë britanikë, gjermanë e amerikanë.
Por jo vetëm kaq, sipas kësaj platforme për finalen e këtij viti është rritur edhe çmimi i biletave me 158 për qind në krahasim me mesataren e 4 viteve të fundit, gjë që tregon rritjen e popullaritetit të Europa League. Për finalen e këtij viti, tifozët kanë paguar mesatarisht 550 paund për biletë.

E ardhmja e Migjen Bashës mund të jetë sërish në Serinë B të futbollit italian. 29-vjeçari kuqezi në përfundimin të këtij sezoni pritet të largohet nga Como, pasi kjo skuadër nuk arriti të mbijetonte, dhe më shumë gjasa do të kërkojë një destinacion të ri po në Serinë B. Mediat përtej Adriatikut raportojnë se, për mesfushorin shqiptar interesohet Avellino, e cila ka ambicie për t’u ngjitur në elitën e futbollit italian sezonin e ardhshëm.
Basha, i cili verën e kaluar u largua nga Torino për t’iu bashkuar Lucernës, në muajin janar u dha në formën e huazimit te Como, por pa mundur të bëjë asgjë për t’i siguruar mbijetesën ekipit italian.
Basha është aktivizuar në total 12 ndeshje me Comon, duke shënuar vetëm një gol, pikërisht më barazimin 1-1 me Avellinon një javë më parë. Ndikim në të ardhmen e lojtarit pritet të ketë edhe pjesëmarrja e tij e mundshme me Shqipërinë në Euro 2016. De Biasi ende nuk e ka shpallur listën përfundimtare për Europianin, por të paktën në atë paraprake Basha pritet të jetë i përfshirë.

Armando Sadiku shpërthen ndaj Zyrihut, skuadrës që zotëron kartonin e tij. Sulmuesi i kombëtares shqiptare, që aktualisht luan te Vaduzi në formë huazimi, shënjestron drejtuesit Zyrihut për situatën e rëndë që po kalon klubi, duke rrezikuar rënien një kategori më poshtë.
“Janë bërë shumë gabime te Zyrihu, deklaroi fillimisht Sadiku. Janë larguar disa lojtarë, të cilët nuk janë zëvendësuar me elementët e duhur. Nuk më takon mua të them nëse do t’i duhesha skuadrës së Zyrihut, vetë klubi më kërkoi të largohesha. Tani të kjo skuadër gjërat po shkojnë keq, kush ka faj le ta paguajë”, u shpreh Sadiku.
Sadiku, autor i një dygolëshi në fitoren e fundit me Sionin, është i bindur se nuk iu dha mundësia për të treguar sesa vlen te Zyrihu. “Në Zurih nuk jam ndier në asnjë moment i rëndësishëm dhe kurrë nuk më dhanë besim, vijon më tej sulmuesi shqiptar. Nëse gaboja në një ndeshje, në tjetrën isha jashtë. Kanë bërë shumë gabime, por ky është realiteti. Atje janë të bindur se ma kanë dhënë mundësinë për të treguar sesa vlej, por unë besoj se kjo nuk ka ndodhur”, tha ai.
Në ndeshjen e fundit të kampionatit, Zyrihu do të luajë në transfertë pikërisht ndaj Vaduzit të Sadikut. Sulmuesi shqiptar nuk ka asnjë dilemë, do të bëjmë gjithçka për të mundur skuadrën që zotëron kartonin e tij. Unë jap gjithçka aty ku ushqehem. Nuk ka asnjë dyshim, do të bëj më të mirën për Vaduzin dhe nëse do të më jepet mundësia për të shënuar, do ta bëj. Shpresoj që ta kemi siguruar mbijetesën më parë, që të mos udhëtoj fare drejt Zyrihut”, tha Sadiku.
Nuk mund të mungonte një dhumbim i 25-vjeçarit edhe për trajnerin Sami Hypia. “Ai nuk e njeh futbollin zviceran. Problemi më i madh nuk ishte ky, por niveli i komunikimit. Hypia nuk më lejonte që të flisja italisht me Chiumiento dhe Nef. Mos vallë duhet ta harronim këtë gjuhë”, përfundoi Sadiku.