Objektivi Europa League kalon nga ndeshja me Romën për Milanin e Christian Brocchit. Kuqezinjtë duhet të mposhtin në sfidën e “San Siros”, skuadrën e Spalettit dhe të shpresojnë që Interi të ndalë Sassuolon për të kapur vendin e 6-të në kampionat. Dueli ndaj Romës mund t’u shërbejë kuqezinjëve edhe si parapërgatitje për finalen e Kupës së Italisë ndaj Juventusit, që do të zhvillohet javën e ardhshme, e di shumë mirë diçka të tillë Christian Brocchi.
”Ndeshja kundër Romës është shumë e rëndësishme për ne, sepse mbi të gjitha do të vlerësoj edhe lojtarët që do të më japin më shumë garanci për finalen. Kush do të luajë duhet të tregojë sesa vlen dhe sa dëshirë ka për të dhënë maksimumin në fushë për Milanin dhe për të qenë në 100% të formës për finalen ndaj Juves”, u shpreh Broko.
Më pas, Brochi bëri një koment edhe për të ardhmen, pasi sëfundmi në mediat italiane po flitet se sezonin e ardhshëm drejtimin e Milanit do ta marrë tekniku aktual i Empolit Marco Giampaolo.
“Nëse qëndroj, do t’i shikoni rezultatet, por edhe nëse largohem do t’i jem gjithmonë mirënjohës presidentit Berlusconi që më dha një mundësi të tillë. Sachi ka sponsorizuar Giampaolon si trajnerin e ri të Milanit? Do të më pëlqente nëse Arrigo do të njihte punën time dhe idetë që kam mbi futbollin, gjithsesi nëse mbështetet Giampaolon ai ka arsyet e tij”, tha ai.
Portieri i Milanit, Kristian Abiati përballë Romës në “San Siro” do të luajë ndeshjen e fundit për ngjyrat kuq e zi. Ka qenë vetë lojtari, i cili ju ka bërë të ditur drejtuesve të klubit se në fund të këtij sezoni do të varë këpucët në gozhdë. Edhe pse dëshira e drejtuesve të klubit ishin që të rinovonin edhe për 1 vit me portierin, ky i fundit ka vendosur që të japë lamtumirën nga futbolli i luajtur.
Abiati u bashkua me Milanin në vitin 1998, ku zëvendësoi në portë Aldo Rosin dhe luajti për kuq e zinjtë deri në vitin 2005-së. Për 1 vit, Abiati u huazua tek Juventusi, pastaj tek Torino, më pas tek Atletiko Madrit derisa u rikthye sërish në Milano në vitin 2008-të.
Ndërkohë, milanistët shpresojnë tek afrimi i Zlatam Ibrahimoviç, pasi ai nuk do të jetë pjesë e PSG-së sezonin e ardhshëm. Lajmin e ka bërë të ditur vetë sulmuesi suedez përmes një postimi në rrjetin social “Facebook”. “Nesër ndeshja e fundit në Parc des Princes. Erdha si mbret dhe po largohem si legjendë”, shkruan Ibra.

E ardhmja e tij te Interi është në dyshim. Megjithatë Roberto Mançini në konferencën e fundit për të shtyp gjatë këtij sezoni, foli qartë madje më qartë se kurrë më parë, duke vendosur pikat mbi I, nëse do të qëndrojë apo jo te skuadra zikaltër edhe sezonin e ardhshëm. “Fakti që kam vetëm një vit kontratë me Interin nuk përbën asnjë lloj problemi për mua. Nuk synoj rinovimin por dua vetëm të kem sigurinë sa i përket programeve që ka klubi dhe sa mund të ndikojnë ato në objektivat e skuadrës. Do të flas me presidentin Thohir dhe nëse Interi ka nevojë për mua do të qëndroj me shumë dëshirë në të kundërt jami i gatshëm të prish kontratën”,u shpreh Mançini.
Këtë të shtunë, Interi do të sfidojë Sassuolon në një takim që ka pak rëndësi për zikaltërit, por që vlen shumë për skuadrën emiliane. Edhe pse fillimisht u përfol shumë për një rotacion masiv të Mançinit në këtë duel, duke parë edhe mungesat e shumta që kanë zikaltërit, trajneri mesa duket ka ndërruar mendje, edhe pse kur u pyet mbi këtë temë la të kuptohet se do të ketë minuta edhe për futbollistë si sulmuesi shqiptar Rey Manaj apo mesfushori nga Bregu i Fildishtë, Asane Gnoukouri.
Inter e mbyll sezonin në vendin e katërt, që i jep mundësinë të marrë pjesë në Europa League. Tashmë te klubi zikaltër po mendohet për të ardhmen dhe priten ndryshime të mëdha në skuadër. Sipas asaj që publikohet te Tuttosport, disa prej futbollistëve të interit janë drejt largimit. Një prej atyre që mendohet të lënë skuadrën milaneze është Handanovic. Pavarësisht rinovimit të kontratës, drejtuesit e Interit nuk e konsiderojnë të pashitshëm portierin slloven, për zëvendësimin e të cilit janë shfaqur emrat e Ederson e Perin.
Brozoviç është një tjetër lojtar që po përgatitet të bëjë gati valixhet, me mesfushorin që është vënë në shënjestërn e Arsenalit, që mund të paguajë për kartonin e tij një shiofër prej 20-25 milionë euro. Interi do të blejë përfundimisht kartonin e Jovetiç nga Manchester City, por më pas do ta shesë futbollistin sië bëri edhe në rastin e Xherdan Shaqirit. Dhe në fund Adam Ljajiç do të kthehet te Roma, pasi zikaltrit nuk kanë ndërmend ta blejnë. Do të jenë verdhekuqtë ata që so të vendosin më pas për të ardhmen e Ljajiç.
Në një event të organizuar në ambientet e Universitetit të Milanos, “Luigi Boçoni”, Havier Zaneti u është përgjigjur pyetjeve të gazetarëve, duke zbuluar të ardhmen e disa prej lojtarëve që aktualisht janë pjesë e skuadrës së Interit.
Zëvendëspresidenti, në eventin e organizuar me rastin e finales së Ligës së Kampioneve, u shpreh i sigurt mbi qëndrimin e trajnerit. Ndërkohë që me fjalë “të buta” u tregoi derën disa prej futbollistëve që nuk janë pajtuar me kushtet e klubit.

Në festën e titullit të Paris Saint Germain, do të jenë edhe Lorik Cana e Ermir Lenjani. Dy futbollistët e kombëtares shqiptare janë grumbulluar nga trajneri Michel Der Zakarian për duelin që Nantes do të zhvillojë ndaj kampionëve të Francës në Parc Des Princes këtë të Shtunë. Për Canën kjo mund të jetë ndeshja e fundit me fanellën e kanarinave, pasi gjatë muajve të kaluar është folur shumë, për një largim të mundshëm të kapitenit të përfaqësues kuqezi nga Nantes në përfundim të këtij sezoni, edhe pse 32-vjeçari ka një kontratë deri në 30 qershor të 2017-ës me klubin nga La Beaujoire.
Në 4 takimet e fundit të Nantes në kampionatin francez Cana nuk është aktivizuar për asnjë sekondë, por sipas asaj që raportojnë mediat, në sfidën ndaj Paris Saint Germain do të ketë minuta edhe për lojtarin shqiptar. Për Canën, sfida ndaj Parisit konsiderohet edhe si përballje me të shkuarën, pasi kapiteni i Shqipërisë e ka nisur karrierën pikërisht në radhët e klubit nga Parc Des Princes. Shanse për të luajtur në sfidën ndaj kampionëve në fuqi edhe Emrir Lenjani që nuk aktivizohet prej 3 takimesh nga trajneri Michel Der Zakarian.

Pas përfundimit të aventurës me Lacion, Miroslav Klose mund të kthehet në Gjermani.
Ish-sulmuesi i Kombëtares së Gjermanisë, përflitet për një transferim në Amerikë, por mediat italiane shkruajnë se lojtari është duke menduar rikthimin në Gjermani. Klubi gjerman, Eintracht Frankfurt është i interesuar për shërbimet e Klose, madje, thuhet se ish-futbollisti i Bayern Munchen preferon rikthimin në Bundesligën gjermane.

Reali i Madridit nuk ka ndërmend të nxjerrë në merkao James Rodriguezin. Sipas asaj që publikohet te e përditshmja spanjolle “AS”, presidenti i klubit “merengues”, Florentino Perez ka vendosur të mbajë në Madrid talentin kolumbian, duke e cilësuar si të pashitshëm. Në kryeqytetin spanjoll të gjithë kujtojnë paraqitjet e mira dhe potencialin e Rodriguez në sezonin e tij të parë me fanelën e “Los Blancos”, kur ai shënoi 17 gola dhe dha 18 asist për futbollistët e tjerë të skuadrës, statistika ndaj të cilave as vetë Perez nuk ka ndenjur indiferent. Kjo do të thotë se te Reali i Madridit nuk do të merret në konsideratë asnjë ofertë që mund të vijë në drejtim të kolumbianit, për të cilin vetë Reali përpara 2 vitesh i pagoi Monacos plot 80 milionë euro.