Lufta partiake mbi emërimin e anëtarit të Gjykatës së Lartë amerikane do të përfshijë Kongresin, pas rikthimit të ligjvënësve sot nga një pushim dy javor. Korrespondenti i “Zërit të Amerikës”, Michael Bowman njofton se kjo betejë do të ndikojë në përbërjen ideologjike të Gjykatës së Lartë, pas vdekjes së gjykatësit konservator, Antonin Scalia:
Kongresi ishte në pushim javën e kaluar, por tre senatorë erdhën në Uashington për t’u takuar me kandidatin e emëruar nga Presidenti Obama për postin e anëtarit të Gjykatës së Lartë. Njëri prej tyre ishte senatori Mark Kirk, i pari republikan që takohet me gjykatësin federal Merrick Garland. Sen. Mark Kirk, republikan:
“Ndërkohë që presidenti emëroi gjyqtarin Garland, ne duhet t’i japim atij këshilla dhe pëlqimin. Ne duhet të kemi një shqyrtim racional, të pjekur, dhe me mendje të hapur të këtij procesi kushtetues”.
Ndërsa dhjetëra republikanë të tjerë thonë se, ata janë të gatshëm të takohen me gjykatësin Garland, vetëm dy prej tyre po bëjnë thirrje që Senati të marrë në shqyrtim emërimin e tij. Senatori i tretë, Jerry Moran, bëri thirrje për zhvillimin e një seance dëgjimore, por dy ditë më vonë, ndryshoi qëndrimin e tij.
Demokratët, ndërkohë, mbështesin zotin Garland. Sen. Kirsten Gillibrand, Demokrate:
“Ai është i kualifikuar dhe unë mendoj se është detyrim i Senatit që jo vetëm të zhvillojë një seancë, por edhe të votojë për emërimin e tij”. Sen, AL Franken, demokrat:
“Ne jemi duke konfirmuar, ose po vendosim nëse do të konfirmojmë një anëtar të Gjykatës së Lartë. Gjykata e Lartë nuk duhet të jetë politike”.
Por republikanët kontrollojnë Senatin. Nëse ata vendosin të mos e shqyrtojnë këtë, kandidatura e zotit Garland mund të mbetet në harresë.
Sen. Mitch McConnell, republikane:
“Duhet të lejojmë popullin amerikan të vendosë. Senati do ta rishqyrtojë çështjen në mënyrë të duhur, kur të marrë në konsideratë kualifikimet e kandidatit të emëruar nga presidenti i ardhshëm, kushdo që mund të jetë”.
Përbërja ideologjike e Gjykatës së Lartë është bërë pjesë e debatit në garën presidenciale.
Ted Cruz, kandidat presidencial:
“Nëse Hillary (Clinton) zgjidhet presidente, Gjykata e Lartë do të jetë e humbur për një brez, dhe Billi i të Drejtave do të jetë i humbur”.
Sondazhet tregojnë se, shumica e amerikanëve mbështesin shqyrtimin e plotë nga Senati të gjykatësit Garland. Demokratët besojnë se republikanët do të respektojnë vullnetin e publikut ose do të vuajnë pasojat në zgjedhjet e nëntorit. Megjithatë, shumica e senatorëve republikanë vazhdojnë të mbajnë një qëndrim të fortë në lidhje me këtë çështje.
Beteja për Gjykatën e Lartë në SHBA
Trump fiton mbështetje edhe në Moskën e Putinit
“Russia Direct”
Deri më sot nuk ka patur asnjë fushatë presidenciale amerikane që të ketë përmendur kaq shumë emrin e një lideri rus. Trump ka komentuar vazhdimisht lidhur me fjalët lavdëruese të Putinit. Gjatë një mitingu fushate në Iowa, ai tha se republikanët e tjerë janë “xhelozë” për faktin që Putini e lavdëron kaq shumë, megjithatë ka vendosur të mos t’i përmendë emrat e tyre. Trump deklaroi edhe një herë se është i gatshëm të bashkëpunojë me Putinin. “Të them të drejtën, kam mendim të mirë për të. Mendoj se mund të bashkëpunojnë shumë mirë me Rusinë dhe ta përdorim në avantazhin tonë… në avantazhin e të dyja palëve”, tha Trump.
Pavarësisht ndryshimeve të mëdha që ekzistojnë ndërmjet sistemit politik në Amerikë dhe Rusi, nëse Trump do të ishte politikan rus, ai do të kishte fituar një popullaritet të madh ndër publikun rus. Shkencëtari politik ukrainas, Ivan Siyak, ka mbajtur një sondazh interesant, në të cilin krahasoi platformën e Trumpit dhe rezultatet e opinioneve ruse në sondazhe.
Kandidati republikan shfaqet tepër i ashpër për çështjen e emigracionit, madje ka propozuar që t’i mohohet hyrja në Shtetet e Bashkuara të gjithë myslimanëve. Sipas sondazhit të Qendrës Levada të kryer në gusht të vitit 2015, 68 për qind e rusëve besonin gjithashtu se, qeveria duhet të frenojë drastikisht prurjen e emigrantëve. Trump gjithashtu mbështet dënimin me vdekje. Sipas një sondazhi të vitit 2015 të Fondacionit të Opinionit Publik, 60 për qind e rusëve janë dakort me të.
Trump bën thirrje edhe për ndërhyrje të kufizuar ushtarake jashtë kufijve të Shteteve të Bashkuara. Ai i referohet “çështjes së Krimesë” si një problem tërësisht europian, dyshon se përgjegjësit e rrëzimit të avionit të “Malaysian Airlines” në Donbas do të zbulohen ndonjëherë dhe sygjeron se Amerika duhet të tërhiqet nga Siria. Sondazhet e Qendrës Levada tregojnë se, shumica e popullsisë ruse (71 për qind) mendojnë se Shtetet e Bashkuara kanë patur një impakt negativ në problemet e botës.
Kandidati amerikan për president flet në favor të ndalimit të abortit, përveç rasteve kur shtatëzania është rezultat i një përdhunimi ose incesti, apo kur shëndeti i nënës është në rrezik. Sipas sondazhit, gjatë 17 viteve të fundit shumica e rusëve që mendonin se aborti duhet të jetë i ligjshëm dhe të kryhet sipas dëshirës së gruas është ulur nga 65 në 51 për qind. Për këto arsye, Trump do të ishte një kandidat ideal për presidencën e Rusisë.
Duket se mbështetja e Moskës për Trumpin është pjesë e një strategjie të unifikuar të krijimit të aleancës me këdo që kërkon të bashkëpunojë me Rusinë, bie në kundërshtim me politikën aktuale të izolimit dhe flet për kundërshtimin e sanksioneve ekonomike. Paradoksalisht, miqtë e Rusisë janë politikanë dhe parti të opozitës së polarizuar, siç është Fronti Kombëtar i Francës drejtuar nga Marinë Le Pen, e majta Syriza në Greqi dhe e majta Podemos, që arriti një fitore të madhe në zgjedhjet e fundit dhe u bë forca e tretë e madhe politike në Spanjë.
Çfarë kanë të përbashkët të gjithë këto grupe politike? Lideri i Podemos, Pablo Iglesias, është kundër sanksioneve të imponuara mbi Rusinë dhe mendon se Moska duhet të rianëtarësohet në G8 dhe në Këshillin Rusi-NATO. “Është mirë që europianët të ruajnë një marrëdhënie paqësore me Rusinë. Nuk është e nevojshme që të përfshihemi në përballje ushtarake me Rusinë, gjë që po ndodh në Ukrainë”, ka thënë Iglesias për “Die Zelt”.
“Rusia është pjesë integrale e hapësirës europiane që nga Atlantiku deri në malet Urale”, thekson Alexis Tsipras, lider i Syrizës. Ai thekson se, sanksionet kundër Rusisë janë kundërproduktive. “Europa është në telashe. Ne jemi kundër çdo ndërhyrje ushtarake dhe duam të lehtësojnë dialogun ndërkombëtar në mënyrë që të gjejmë një zgjidhje diplomatike”.
Putini si politikan nuk bën pjesë në asnjë ideologji të veçantë dhe është i gatshëm të përpunojë marrëdhëniet e Rusisë me këdo forcë politike që shfaqet si miqësore. Kështu, Kremlini duket i gatshëm të dobësojë Bashkimin Europian, duke mbështetur fuqimisht partitë rebele të Europës. Po kështu, duke mbështetur Donald Trumpin, përpiqet të aplikojë të njëjtën qasje edhe në Shtetet e Bashkuara.
Duke dalë në krah të forcave politike margjinale që papritur kanë fituar popullaritet, Kremlini po përpiqet të thyejë politikën e tij të izolimit dhe të kapërcejë një pjesë të komplekseve të Putinit, veçanërisht për faktin se, gjatë viteve të fundit, Presidenti rus ka humbur shumë miq të rëndësishëm europianë dhe simpatizantë që bëjnë pjesë në politikanët kryesorë të botës.
Megjithatë, shkencëtarët politikë rusë besojnë se, Putini dhe Trumpi do të përplaseshin për shkak të disa problemeve serioze psikologjike në rast se ky i fundit do të bëhej president i Shteteve të Bashkuara. Sipas një studimi të drejtuar nga Ekaterina Egorova, presidente e Agjensisë së Komunikacionit Strategjik, Niccolo M dhe nga Elizaveta Egorova, drejtuese e përgjithshme e “Politcal Prifiler”, “Putini i “lexon” lehtësisht partnerët e tij, duke vëzhguar mënyrën se si komunikojnë. Gjithçka që i është dashur të bëjë ka qenë të shikojë mënyrën se si kandidati republikan shfaqet në publik për të kuptuar se sa i dobët dhe i cenueshëm është Donald Trump. Më tej, sapo Putini të perceptojë dobësinë e tij, ka për ta lënë Trumpin mënjanë dhe ta përdorë në avantazhin e tij. Ky është thjesht një refleks politik i Putinit, asgjë personale”.
Studiueset besojnë se problemi më i madh i Trump është mungesa e tij e theksuar e eksperiencës në politikën e jashtme dhe më shumë akoma në politikën e mbrojtjes. Putini i sofistikuar, i cili ka mësuar gjithçka mundej nga kundërshtarët e tij politikë, nuk ka gjasa të lërë të ikë një pre kaq të lehtë. Ai ka për të kapitalizuar dhe shfrytëzuar maksimalisht çdo hap të gabuar dhe amator të Trumpit. Përsa i përket këtij të fundit, Trumpi duket se po i pëlqen të sillet si “fëmija i keq” i kësaj gare presidenciale. Ky është një qendrim që Putinit do t’i pëlqejë shumë, veçanërisht pjesa “fëminore”.
Pjesa më e madhe e dijetarëve amerikanë të politikës mendojnë se, Trump nuk ka asnjë shans të fitojë garën presidenciale dhe se mbështetja e tij do të ulet ndjeshëm. Egorova mendon se Jeb Bush, një tjetër kandidat i mundshëm republikan, do të ishte opsioni më i përshtatshëm në perspektivën ruse.
Sipas studimit të saj, Jeb është më i ngjashëm me të jatin se sa me vëllanë e tij. Ai mund të ishte një lider i vlefshëm dhe një partner i mirë ndërkombëtar për të gjithë krerët e shtetit, përfshirë këtu edhe Putinin. Megjithatë, mendohet se Jeb Bush, edhe pse i matur, i mirëshkolluar dhe një politikan i qetë, nuk ka për të qenë kandidati republikan.
Në ditët e sotme, Europa e Vjetër dhe Bota e Re preferojnë kandidatë republikanë, të cilët nuk janë pjesë e sistemit. Ata favorizojnë kandidatët që ofrojnë zgjidhje radikale për të gjitha problemet. Tani që bota është përfshirë në kaos, këto trende të reja mund të kthehen në dividente të mira për Kremlinin, i cili zakonisht “bezdiset” nga liderët e vjetër konservatorë dhe nga institucionalizimi i politikës globale.
Shansi i fundit për Sinisa Mihajloviç
Përballja me Juventusin në “San Siro” në kuadër të javës së 31-të të Serisë A, mund të jetë e fundit për trajnerin e Milanit, Sinisa Mihajloviç, i cili ka qenë disa herë “në fije të perit” gjatë këtij sezoni futbollistik. Presidentit Silvio Berlusconi duket se i ka sosur durimi dhe nuk do të presë finalen e Kupës së Italisë për ta shkarkuar serbin në rast se humbet ndaj bardhezinjve në fundjavë.
“Cavalieri” duket se e ka vendosur: një tjetër rezultat negativ, që me shumë mundësi do ta zbriste “Djallin” në vendin e 7-të do të thoshte shkarkim i menjëhershëm i trajnerit. Tekniku i ri pret te dera. Cristian Brocchi, i promovuar me skuadrën e të rinjve të Milanit, do të merrte menjëherë frenat e skuadrës. Ndeshjet e mbetura do t’i shërbenin për të krijuar një ide sa më të qartë për organikën kuqezi për sezonit e ri.
Është ai zgjedhja e Berluskonit për të ardhmen. Pas ndeshjes së radhës me Juventusin apo në fund të sezonit, largimi i Mihajloviç është vendosur. Milani edhe në rast se do të bëjë mrekullinë në Kupën e Italisë, duke siguruar pjesëmarrjen në Europa League, do të ketë një emër të ri në pankinë.
Silvio Berluskoni duket se e ka humbur durimin me skuadrën e tij. Presidenti i Milanit nuk e priti aspak mirë humbjen me Atalantën dhe tashmë paralajmëron trajnerin Sinisha Mihajloviç, për të cilin sfida me Juventusin bëhet jetikë. Sipas asaj që publikohet në median italiane, Berluskoni tashmë e ka marrë vendimin e tij, në rast se Milani humbet, atëherë Mihajloviç do të largohet nga pankina për t’u zëvendësuar nga Kristian Broki, për të cilin kjo fazë e sezonit mund të jetë një përgatitje për atë që do të vijë më pas, pasi është pikërisht ai emri i parë në listën e Berluskonit për të drejtuar “kuqezinjtë”.
Megjithatë te Milani që jo të gjithë mendojnë si Berluskoni. Adriano Galiani në të vërtetë thekson se zgjidhja më e mirë për skuadrën është vazhdimësia dhe se përgjegjësia më e madhe për rezultatet e ndeshjeve të fundit është pikërisht e lojtarëve. Por problemi qëndron se, Galiani këtë mbështetje ndaj Mihajloviç e shpreh vetëm me fjalë dhe jo me fakte.
Conte drejt Chelsea, por rrezikon 6 muaj pezullim
Edhe në ditën e zyrtarizimit të Chelsea, e kaluara e errët e ndoqi Antonio Conten. Trajneri i Italisë vazhdon të vuajë fantazmat e trukimeve në futbollin italian. Pasi shleu dënimin e Drejtësisë Sportive për moskallëzim të trukimeve disa vjet më parë, tashmë pritet vendimi i Gjykatës së Cremonas për të njëjtën çështje. Gjykimi i shkurtuar i kërkuar nga Conte hyri në fazën më të nxehtë, kur prokurori i çështjes, Roberto Di Martino kërkoi dënimin me 6 muaj pezullim me kusht për trajnerin, me akuzën e mashtrimit sportiv në ndeshjen Albinoleffe-Siena të vitit 2011.
Sentenca pritet të jepet në fund të muajit maj. Edhe në rast se dënohet nga drejtësia italiane, Antonio Conte nuk rrezikon për aventurën e tij të re te Chelsea. Kjo për faktin se klubi londinez e kishte studiuar me kujdes çështjen, përpara se palët të firmosnin kontratën. Natyrisht, që në radhët e bluve të gjithë urojnë të gjendet një zgjidhje e përshtatshme, ashtu si edhe vetë trajneri. Ndërkohë, tifozët në “Stamford Bridge” janë entuziazmuar nga emërimi i Conte-s. Ata i kanë uruar mirë se ardhjen, ndërsa e kanë etiketuar si një teknik me dorë të hekurt, madje edhe më të ashpër se Mourinho-n.
Mbështetësit e Chelsea-s kanë kujtuar gjithashtu se kujtimet e tyre më të bukura lidhen me trajnerët italianë, nga Vialli e Ranieri për të vazhduar me Ancelotti-n e Di Matteo-n, me këtë të fundit që fitoi edhe trofeun e Champions në vitin 2012.
Bartomeu shuan zërat për shitjen e Neymar tek PSG
Ditët e fundit mediat franceze, ndër të cilat edhe prestigjiozja “L’Equipe”, kanë shkruar shumë për një interes të Paris Saint Germmain për Neymar, madje është raportuar se drejtuesit e kampionëve të Francës janë gati të paguajnë klazolën e largimit 193 milionë euro për të siguruar me çdo kusht shërbimet e brazilianit.
Ka qenë i menjëhershëm reagimi i presidentit të Barcelonës, Josep Maria Bartomeu, i cili e ka bërë të qartë se e ardhmje e 24-vjeçarit do të jetë me ngjyrat blaugrana.
“Nëse ndonjë klub do të vijë për të negociuar për Neymar, ne nuk do ta lejojmë. Ju siguroj se Neymar do të qëndrojë për shumë kohë te Barcelona. Gjithmonë jam shprehur se vetë Neymar nuk ka të bëjë me ato që thuhen për të. Ai ka thënë se dëshiron të luajë te Barcelona. Kjo ishte dëshira e tij. Jam i sgurtë se këto zëra do të vijnë duke u sfumuar, derisa të zhduken plotësisht”, u shpreh Bartomeu.
Më pas, Bartomeu shfrytëzoi rastin për t’i dhënë një mesazh Santosit, ish-ekipit të Neymar, që ndihet i mashtruar nga Barcelona përsa i përket shumës së klubit spanjoll pagoi për futbollistin.
“Santosi në fakt duhet të jetë shumë i lumtur, sepse trajneri ynë na kërkoi që të merrnim një vit më vonë lojtarin pa shpenzuar para. Nëse do të kishte ndodhur kështu, Neymar do të transferohej te ne pas Botërorit, ndërsa Santosi dhe shoqëria që zotëronte një pjesë të kartonit të tij nuk do të përfitonin asnjë kacidhe”, tha trajneri i Barcelonës.
Zanetti beson tek Roberto Mançini
Javier Zanetti mbështet Roberto Mançinin. Zëvendës/presidenti i Interit ka dalë në mbështetje të teknikut të zikaltërve Roberto Mançini, pavarësisht rezultateve jo të mira që ka arritur skuadra në fazën e dytë të kampionatit. Gjithçka nisi mirë për zikaltërit, duke arritur një sërë rezultatesh pozitive gjatë fazës së parë, por tanimë Interi e sheh veten 18 pikë pas Juventusit kryesues dhe misioni për një biletë për në Champions League, duket se është një kapitull i mbyllur. Humbja ndaj Torinos e ka thelluar akoma dhe më shumë diferencën mes Interit dhe Romës të vendit të tretë. Sidoqoftë ish-kapiteni i zikaltërve, Javier Zanneti del në mbështetje të Roberto Mançinit dhe shprehet se nuk duhen humbur shpresat për një biletë në Champions League:
“Ne kemi besim të plotë tek Mançini. Është vërtetë që në fazën e parë të kampionatit skuadra ishte më solide, por gjithashtu ne e dinim se rrugës do të hasnim shumë vështirësi. Të gjithë janë shumë të zemëruar me ne pas humbjes kundër Torinos, por unë besoj se arritja e vendit të tretë është ende e mundur edhe pse misioni është bërë shumë më i komplikuar. Do të duhet të japin maksimumin në çdo takim që na ka mbetur”, u shpreh Zaneti.
Ndërkohë, Inter dhe Seedorf janë përfshirë në skandalin e Panama Papers. Mesi di si të driblojë por nuk di se çfarë firmos. Prej ca kohësh organet fiskale po e markojnë si Sergio Ramos në El Clasico, edhe pse argjentinasi driblimin më të vështirë e tentoi, kur u shpreh në lidhje me skandalin e Panama Papers, që ka zbuluar emrat e atyre që përfitojnë nga parajsat fiskale për të fshehur të ardhurat, duke deklaruar “Unë nuk shikoj se çfarë firmos, firmos atë që më thotë im atë”. Më pas, familja Mesi reagoi me një komunikatë ku i etiketon si të gënjeshtërta akuzat, por nuk është vetëm Lionel Mesi mes njerëzve të sportit që kanë të bëjnë me skandalin e Panama Papers.
Lista e atyre që akuzohen se kanë tentuar të fshehin të ardhurat në Parajsën Fiskale është zgjeruar pas Mesit dhe Michel Platini, dy emrave të parë që dolën në dritë nga bota e sportit edhe me të tjerë të njohur si Clarence Seedorf dhe Jarno Trulli e deri te kontrata e Nico Rosberg me Mercedes. Në Panama kanë arkëtuar të ardhurat e tyre dhe ish-futbollistë të tjerë, si Ivan Zamorana dhe Gabriel Heinze, si dhe Leonardo Ulloa që tani po magjeps me Leicester. Nuk mungojnë në listën e dokumenteve të dala së fundmi në dritë dhe emra klubesh të rëndësishëm. mbi të gjithë Interi, por dhe Boca Juniors në Argjentinë edhe pse në klubin zikaltër në reagimet e para kanë deklaruar se janë të qetë dhe se nuk rrezikojnë asgjë.
Higuain pezullohet 4 javë
Ambiciet e Napolit drejt titullit kampion në Itali marrin një goditje të fortë. Sikur të mos mjaftonin 6 pikët distancë nga Juventusi kryesues, tashmë erdhi edhe vendimi i Disiplinorit, që pezulloi për 4 ndeshje Gonzalo Higuain. Golashënuesi më i mirë i Serisë A dhe njeriu që po udhëhiqte skuadrën e Sarrit drejt ëndrrës, u dënua për episodet në ndeshjen ku të kaltërit u mposhtën 3-1 nga Udinese. Pasi realizoi golin e barazimit të përkohëshëm, i 30-ti sezonal për të, në minutën e 75-të, Higuain u ndëshkua me karton të kuq. Sulmuesi reagoi ashpër ndaj gjyqtarit Irrati dhe kundërshtarëve në fushë.
Ishte pikërisht sjellja e keqe sportive, ajo që ndikoi të rriste pezullimin e lojtarit, që prej kartonit të kuq do të humbasë sfidën ndaj Veronas në San Paolo. Ndërkohë, prej sjelljes anti-sportive, Gonzalo Higuain nuk do të jetë në gjendje ta ndihmojë Napolin në ndeshjet vendimtare në garën për titull kundër Bolognas, Interit e Romës.
Një ndëshkim me përmasa Biblike për Napolin. Kjo edhe për faktin, se në sfidën e kësaj fundjave ndaj Veronas, për të kaltërit i pezulluar është edhe trajneri Maurizio Sarri, që u largua nga fusha gjatë ndeshjes me Udinesen. Të tjera mungesa ndaj verdhebluve do të jenë edhe Koulibaly e Mertens që kanë plotësuar numrin e kartonëve të verdhë.
Simeone kërkon Hysajn te Atletiko
“Tani po e kuptojnë të gjithë sesa i fortë është Hysaj”. Me këtë fjali e nis shkrimin dedikuar mbrojtësit shqiptar e përditshmja italiane, “Corriere Dello Sport”, e cila i dërgon një mesazh të veçantë trajnerit të Atletico Madrid, Diego Simeone, i cili ka shfaqur interes për lojtarin. Në vijim të shkrimit, “Corriere” thekson se, gjatë merkatos së verës askush nuk besoi te aftësitë e mbrojtësit, por ishte Maurizio Sarri, ai që këmbënguli për t’i dhënë mundësinë e hapit të madh të karrierës pas kalimit të të gjitha fazave te të rinjtë e Empolit dhe më pas te ekipi i parë.
“Me pak fjalë një blerje largpamëse për rreth 5 milionë euro. Fillimisht u mendua si një emër më shumë për Napolin, por më pas ai shpërtheu, duke u transformuar në një lojtar jetik dhe asnjëherë në dyshim për vendin e titullarit. Fillimisht në të majtë dhe më pas vetëm në të djathtë. Autoritar dhe paraqitje gjithmonë në rritje të vazhdueshme”, nënvizon “Corriere Dello Sport”, që përqendrohet më pas te sirenat e merkatos që vijnë nga Franca dhe mbi të gjitha nga Spanja. Është Diego Simeone ai që e kërkon mbrojtësi kuqezi në Madrid, por sipas të përditshmes italiane është vetëm Napoli që do të marrë vendimin përfundimtar. “Klubi i kaltër mund të arkëtojë shumë të ardhura, por vetëm nëse dëshiron ta largojë”, theksohet në fund të mesazhit që “Corriere Dello Sport” i dërgon virtualisht trajnerit të skuadrës spanjolle.
Kontrabanda, Crown Agents: Si zbuluam 1 mln euro evazion nga importi i grurit
Gruri është një nga artikujt më të importuar në vend, ndaj dhe kontrabanda në këtë produkt duket se është e pranishme.
Nga kontrollet dokumentare, gjatë krahasimit të importeve dhe eksporteve të grurit të kryera në një kompani shqiptare, e cila importonte kryesisht nga Rusia, Crown Agent kompania e Konsulencës në Dogana, të cilës iu ndërpre kontrata nga qeveria shqiptare për vitin e tretë, konstatoi mospërputhje të madhe të stokut të grurit.
“Duke qenë se gruri ishte importuar për t’u përpunuar dhe për t’u ri-eksportuar, ishte i përjashtuar nga detyrimet doganore. Kontrolli pas zhdoganimit mbi këtë kompani, i kryer bashkërisht prej ekipeve të Crown Agents dhe specialistëve të Drejtorisë së Kontrollit Pas zhdoganimit, identifikoi rreth 20,000 ton grurë të padeklaruar që mungonte në magazinën e kompanisë e që përbënte evazion të dyshuar të detyrimeve doganore në vlerën e 1 milion euro” bën të ditur, Crown Agents në një raport zyrtar ku ka përmbledhur aktivitetet e punës në Shqipëri.
Crown Agents, pohon se, kontrolli me bazë risku është një element mjaft efikas për zbardhjen e evazionit fiskal.
Për të testuar vlefshmërinë e kësaj analize, Njësitë Operacionale të Crown Agents shkuan për të kryer kontrolle të ngarkesave, të cilat ishin profilizuar për kontroll fizik bazuar në një numër të përzgjedhur profilesh risku për ngarkesa ekzistuese.
Bazuar tek këto kontrolle, shkalla goditëse e zbulimit të parregullsive dhe shkeljeve u rrit nga përafërsisht 1% në 13.6% në njërin prej profileve të riskut, ku u arrit kapja e një sasie të madhe materiali lëkure dhe ngjitës të padeklaruar.
Në një ushtrim të dytë, skuadrat e Crown Agents kryen 18 kontrolle fizike ku u arritën katër rezultate pozitive që do të thotë 22% shkallë goditëse. Ky kontroll përfshiu 2 raste të keqklasifikimit tarifor dhe keqpërshkrimit të mallit dhe 2 raste që kërkonin rivlerësim doganor në mënyrë që të barazonin vlerën e referencës mbi këto lloje mallrash. Një tjetër rezultat i këtij rishikimi ishte modifikimi i kritereve për 14 profile risku, fshirja e 10 të tjerave e krijimi i 10 profileve të reja.
Kontrabanda me naftën e importit
Ekspertët e Crown Agents vitin që shkoi kryen një kontroll mbi veprimtarinë e flotës së anijeve shqiptare të peshkimit nga ku rezultoi se këto anije përdoreshin për importimin e sasive të mëdha të karburantit ‘duty free’ të ardhur nga portet e Italisë, Malit të Zi dhe Greqisë. Të dhënat e marra nga Porti i Durrësit, Vlorës, Shëngjinit dhe Sarandës treguan që në periudhën 1 janar–12 mars 2015, kishin hyrë rreth 2 milionë litra karburant ‘duty free’, ku çmimi i blerjes së karburantit ishte shumë herë më i ulët se sa ai i marrë prej burimeve të ligjshme shqiptare. Indikatorë të qartë risku sugjeronin se këto importe karburantesh bëheshin për të shmangur taksat, duke e shitur karburantin në mënyrë të paligjshme brenda vendit. Provat e mbledhura iu raportuan Doganës së bashku me rekomandimet për të forcuar kontrollin e importit të karburantit. Në muajin korrik u prezantua një udhëzim i ri, i cili i detyronte pronarët e këtyre anijeve të peshkimit të regjistroheshin si taksapagues, të depozitonin një deklaratë doganore dhe të paguanin TVSH-në për çdo lloj karburanti të huaj ‘duty free’. Gjithashtu rregullat e reja kërkojnë, që karburanti i importuar për anijet e peshkimit të jetë i shënjuar e i ngjyrosur për të lehtësuar identifikimin e statusit ‘duty free’ të këtij karburanti. Si përfundim, pati një rënie drastike të fenomenit të furnizimit të anijeve shqiptare të peshkimit me karburant nga vende të tjera, për ta shitur më pas në Shqipëri.
Kontrabanda me naftën e vendit
Crown Agents në një sqarim zyrtar shpjegon se, prodhimi vendas i naftës është një sektor jetik për sa i përket të ardhurave që mblidhen për buxhetin e shtetit. Për këtë qëllim Crown solli ekspertë afat-shkurtër shtesë për të kryer një rishikim të kontrollit doganor në kompanitë kryesore prodhuese. Raporti i ekspertit përfshiu ndër të tjera disa rekomandime që synojnë uljen e riskut të rrjedhjes së të ardhurave dhe përmirësimin e sistemeve audituese dhe kontrolluese. Një prej rekomandimeve të implementuara nga Dogana ishte një program i përbashkët kontrolli për karburantet. Kjo përfshinte kontrolle në rrugë, pra ndalimin e autoboteve dhe kontrollin e karburantit në to dhe gjithashtu kontrollin e depozitave të paregjistruara të karburantit. Nën drejtimin e grupeve operacionale të Crown Agents u kryen një sërë kontrollesh në periudhën mes muajit korrik-dhjetor 2015. Këto kontrolle u kryen në bashkëpunim me personelin e akcizës në administratë dhe me kompaninë përgjegjëse për markimin e karburanteve. Crown bën me dije se, ky bashkëpunim rezultoi në zbulimin e më tepër se 120 rasteve të karburantit të tregtuar jo në përputhje me ligjin, në një total prej më tepër se 48,000 litra.
Paga reale në sektorin publik, për herë të parë me rënie
Për herë të parë që nga viti 1999, rritja e pagave në sektorin publik në terma realë rezultoi negative për vitin 2015, bëhet e ditur nga INSTAT, ku të punësuarit në shtet morën pagë efektivisht më të ulët se sa më 2014. Pagat e sektorit publik në Shqipëri gjatë vitit 2015 pësuan një rritje reale negative për herë të parë në mbi 15 vjet, si pjesë e programit të qeverisë për të mos pagat e sektorit publik me synimin për të mbajtur të ulëta shpenzimet dhe borxhin publik. Sipas të dhënave të INSTAT, paga mesatare bruto e sektorit publik qe në masën 54 mijë lekë, me një rritje prej 1.8 për qind në krahasim me vitin 2014, kur paga mesatare bruto qe pak më shumë se 53 mijë lekë. Në të njëjtën kohë, Indeksi i Çmimeve të Konsumit u rrit me 1.9 për qind, gjë që bën që paga reale, e cila llogaritet si pagë minimale minus inflacionin, të zbresë në minus 0.1 për qind. Kjo është hera e parë në pesëmbëdhjetë vjet që paga në sektorin publik pëson rënie në terma realë. Në fakt, pagat në sektorin publik kanë që nga viti 2012 që janë në stanjacion ose rritje minimale. Rritja reale për vitin 2014 qe 0.1 për qind ndërsa më 2013 qe 2 për qind. Instituti i Statistikave e raporton pagën mesatare të sektorit publik bazuar në të dhëna administrative. Duke qenë se këto të dhëna raportohen bruto, ato nuk reflektojnë të ardhurat neto të të punësuarve pasi fshehin në vetvete ndryshimet në politikën fiskale të qeverisë. Janë dy ndryshime të mëdha që duhet të kihen parasysh: ndryshimi në sistemin e tatimit mbi të ardhurat personale në vitin 2007 dhe në vitin 2014. Në vitin 2007, qeveria miratoi kalimin nga taksimi progresiv në tatimin e sheshtë. Duke qenë se pagat e ulëta u vendos të tatoheshin në masën 10 për qind nga zero që qe më parë, qeveria vendosi të rrisë pagat e ulëta në masën 10 për qind dhe automatikisht ta taksojë këtë të ardhur shtesë. Shifra e paraqitur nga INSTAT për rritje nominale të pagës mesatare në masën 17 për qind për vitin 2007 për rrjedhojë mbart edhe ndryshimin fiskal. E kundërta, në vitin 2014, qeveria vendosi sërish tatimin progresiv të të ardhurave nga paga, gjë që u konvertua në ulje të barrës fiskale për pjesën më të madhe të të punësuarve në shtet. Për rrjedhojë, rritja bruto prej 1.7 për qind në vitin 2014, e fsheh rritjen reale në të ardhura të përfituara nga ulja e tatimit mbi të ardhurat personale. Në vitin 2015, për shkak se nuk ka pasur ndryshime në politikën fiskale, rënia në të ardhurat reale në masën 0.1 për qind është ashtu siç shihet, rënia e parë e pagave reale të sektorit publik në mbi 15 vjet.
Kryesore
Continue to the category
