Në buletinin e APP dt. 29.02.2016 është publikuar kontrata e lidhur rishtaz ndërmjet Fondit Shqiptar të Zhvillimit dhe bashkimit të operatorëve ku pjesëmarrës është dhe Alcons (Besnik Leskaj, djali i Valentinës). Vlera e kontratës 2.511.540 lekë
Janë miliona euro të përfituara nga kompanitë e bizneset e djemve të Valentina Leskajt, para këto të marra nga fondet publike
Familja e deputetes socialiste, njëkohësisht nënkryetare e Kuvendit, Valentina Leskaj vijon të zhvasë paratë publike përmes kompanive të djemve të saj. Një tjetër denoncim për marrjen e një tenderi nga djali i nënkryetares së Kuvendit, Valentina Leskaj është bërë publik. “Vazhdon gara e shfrenuar e vjedhjeve nga familjet e pushtetit! ‘Madame Lokomotiva’ nuk ka të ndalur”, shkruan ish-Kryeministri Sali Berisha në profilin e tij në Facebook. “Qytetari dixhital denoncon: Dhënien e tenderit me 2.511.540 lekë, pa shpallje, një grupi operatorësh ku në mes është edhe Besnik Leskaj, fiks djali i ‘Madame Lokomotivës’! Për qeveritarët, hajdutët e shtetit, familjarët e tyre ligji i konfliktit të interesit nuk ekziston! Lexojeni vetë mesazhin e qytetarit dixhital”, vazhdon shënimin e tij ish-Kryeministri Berisha. “Përshëndetje z. Berisha. Desha t’ju njoftoj se në buletinin e APP dt. 29.02.2016 është publikuar kontrata e lidhur rishtaz ndërmjet Fondit Shqiptar të Zhvillimit dhe bashkimit të operatorëve ku pjesëmarrës është dhe Alcons (Besnik Leskaj, djali i Valentinës). Vlera e kontratës 2.511.540 lekë. Edhe lloji i procedurës negocim pa shpallje i përdorur në rastin konkret është totalisht në kundërshtim me ligjin për prokurim publik sepse pengon konkurrencën e lirë, transparencën e zhvillimit të procedurës. Nëse ju duhet më shumë informacion më kontaktoni. Ju përshëndes”, thuhet në denoncimin e ish-Kryeministrit Berisha. Janë miliona euro të përfituara nga kompanitë e bizneset e djemve të Valentina Leskajt, para këto të marra nga fondet publike. Sipas fakteve të parashtruara nga Grupi parlamentar i PD, nga verifikimi i procedurave të koncesionit për segmentin hekurudhor Fier-Ballsh dhe Fier-Vlorë, rezulton se është shpallur fitues dhe i është dhënë me koncesion 25 vjet bashkimit të përkohshëm të operatorëve “Alb-Star” sh.p.k. dhe “Matrix Konstruksion” sh.p.k. Nga të dhënat e QKR rezulton se, shoqëria “Matrix Konstruksion” shp.k. është në pronësi të djalit të deputetes së Kuvendit të Shqipërisë, znj. Valentina Leskaj. Gjithashtu, më datë 11 qershor 2015, shoqëria “ABKONS” sh.p.k. në pronësi të djalit tjetër të deputetes Valentina Leskaj, ka lidhur kontratë me Ministrinë e Bujqësisë, Zhvillimit Rural dhe Administrimit të Ujërave, me vlerë 1,292,400 (1 milion e dyqind e nëntëdhjetë e dy mijë e katërqind) euro, për përgatitjen e planeve të menaxhimit të baseneve lumore për Drin-Buna dhe Seman. Ndërkohë, po me të njëjtën ministri, më datë 24.11.2014, kjo shoqëri ka lidhur një tjetër kontratë, me vlerë 45,989,589 lekë. Përfitimi i këtyre pasurive publike dhe fondeve publike është bërë në kundërshtim flagrant me Kushtetutën dhe ligjin, dhe passjell mbarim të mandatit të deputetes Valentina Leskaj, për shkak se është i papajtueshëm me Kushtetutën dhe ligjin.  Nga deklarata e pasurisë së Valentina Leskajt rezulton se të ardhurat e saj, bashkëshortit, 2 djemve dhe nuses së djalit, pra gjithsej 5 anëtarëve të familjes janë rreth 550 mijë euro për vitin 2014 ose 760 milionë lekë të vjetra për vitin 2014. Kjo familje arrin të fitojë për çdo muaj afërsisht 45 mijë euro ose 64 milionë lekë të vjetra në muaj. Ose 1500 euro në ditë ose mbi 2 milionë lekë në ditë. Kjo familje ka 9 objekte që jep me qira dhe 13 llogari bankare me vlerë rreth 50 mijë euro. Djali i saj, Besnik Leskaj, çuditërisht merr 6 paga, madje paguhet edhe në Bashkinë e Elbasanit. Gjithashtu në vitin 2014, kanë përfunduar edhe një vilë që kushton rreth 200 mijë dollarë dhe kanë mbyllur së paguari edhe një kredi me mbi 1 milion euro.

A.Shahini

Kryetari i Forumit Rinor të Partisë Demokratike, Belind Këlliçi mori pjesë në punimet e DEMYC (Democrat Youth Community of Europe), e cila është organizata politike më e vjetër në Europë e të rinjve të qendrës së djathtë, në Shkup të Maqedonisë.
Në fjalën e tij z. Këlliçi ndau me delegatët nga e gjithë Europa shqetësimin e tij dhe të rinjve demokratë shqiptarë për situatën e rëndë ekonomike, papunësinë e të rinjve, e cila kap shifrat zyrtare 33%, procesin e dekriminalizimit, i cili do të ndalë promovimin e njerëzve me të shkuar kriminale, si dhe eksodin masiv të shqiptarëve. Nga ana tjetër, z. Këlliçi informoi të rinjtë europianë mbi modelin tjetër, të cilin ofron Partia Demokratike dhe kryetari Basha, i cili që prej fillimit, i ka kushtuar një rëndësi të veçantë promovimit të të rinjve në parti. Së fundmi, mbështetja e z. Basha ndaj të rinjve u demonstrua muajin e kaluar ku deklaroi publikisht se do t’i propozojë Këshillit Kombëtar të PD që në zgjedhjet e ardhshme, 35% e kandidatëve për deputetë të PD, të vijnë nga radhët e FRPD.
Kryetari Këlliçi u takua edhe me mjaft të rinj shqiptarë në Maqedoni si me ministrin e sapoemëruar të Arsimit dhe Shkencës, z. Pishtar Lutfiu, z. Faton Pollozhani, zv.ministër i Transportit dhe ministrin e Ekonomisë, Driton Kuçi.
Kryetari i FRPD zhvilloi edhe një vizitë në Preshevë ku u prit nga kryetari i Komunës së Preshevës, z. Ragmi Mustafa dhe përfaqësues të Forumit Rinor të Partisë Demokratike Shqiptare atje. Në takim u diskutua mungesa e teksteve mësimore në gjuhën shqipe dhe diskriminimi nga ana e qeverisë qendrore serbe në ndarjen e fondeve për komunën dhe mungesën e ndihmës në përballimin e krizës së refugjatëve.
Me përfaqësues të Forumit Rinor të PD në Preshevë u nda shqetësimi i papunësisë të të rinjve dhe reduktimi i kuotave nga ana e Ministrisë shqiptare të Arsimit për studentët e Preshevës.
Vizita në trevat shqiptare u mbyll në Prishtinë me kryetarin e Forumit Rinor të Lidhjes Demokratike të Kosovës, z. Armend Ibrahimi. Thellimi i bashkëpunimit midis FRPD dhe FRLDK ishte tema kryesore për të cilën u bisedua.
Në përfundim të vizitave në trevat shqiptare me përfaqësues të Forumeve Rinore nga Maqedonia, Kosova dhe Presheva u ra dakord për fillimin e bashkëpunimit midis Forumeve Rinore, shkëmbimin e eksperiencave, trajnimin e përbashkët dhe për mundësinë e organizimit në muajt që vijnë të një takimi në Tiranë me të gjithë përfaqësuesit e Forumeve Rinore të trevave shqiptare.

Ndarja e re territoriale e pushtetit vendor ka filluar të funksionojë nga korriku i kaluar dhe në këto 9 muaj qendra. Open Data Albania ka bërë transparencën e të gjithë prokurimeve publike, rreth 1300 akte; nga blerjet më të vogla dhe deri tek ankandet shumë-milionëshe dhe koncensionet e mëdha. Në studim janë renditur një seri tenderash dhe prokurimesh me risk të lartë korrupsioni, nepotizmi, përqëndrimit të fondeve në disa zona dhe mungesës së konkurrencës. Studimi mbi prokurimet transparente ka zbuluar numrin e konkurrentëve në tendera, fondet limit që janë parashikuar dhe shumat që kanë ofruar fituesit e tenderave. Po ashtu, për herë të parë është hedhur dritë mbi problemet e qeradhënies së bashkive të objekte me rëndësi tek palë të tjera. Drejtuesja e qendrës Open Data Albania dhe Institutit të Shkencës, Aranita Brahja, thotë se fondet më të mëdha po i përdorin disa bashki të majta, por ka edhe bashki të vogla që nuk kanë bërë asnjë prokurim në 9 muaj, pra ekziston një zhbalancim i ndjeshëm midis bashkive. Studiuesit vërejnë se ndërkohë që është bërë një ndarje e re administrative, ende mungojnë akte nënligjore, që lidhen me buxhetet vendore, taksat vendore, koncensionet vendore, kreditë dhe përdorimin e parave publike në pushtetin vendor. Ka bashki që kryejnë transferta të pakushtëzuara, bashki që shtojnë financat e tyre me tarifa dhe taksa vendore. Disa bashki të tjera mund të japin koncensione për shërbime publike dhe të shfrytëzojnë me qeradhënie pasuri të ndryshme, madje bashkitë kanë të drejtë të marrin edhe kredi bankare për të realizuar investimet publike. Qendra Open Data Albania vlerëson se në këtë larmi ligjesh dhe procedurash të reja financiare është e nevojshme të rritet transparenca dhe kontrolli i publikut dhe enteve publike për të shmangur korrupsionin dhe abuzimin me paratë e taksapaguesve shqiptarë.

Konferenca e Kryetarëve e drejtuar nga kreu i Kuvendit, njëkohësisht edhe kreu i LSI, Ilir Meta ka shtyrë kërkesën e Partisë Demokratike për ngritje të komisionit hetimor për privatizimin e kompanisë CEZ. Kërkesa e PD-së për ngritjen e komisionit hetimor për “aferën” e qeverisë Rama me CEZ-in nuk është pranuar nga mazhoranca dje në Konferencën e Kryetarëve që të futet në kalendarin e punimeve të Kuvendit. Kërkesa ishte dorëzuar zyrtarisht më 6 prill 2016. Mazhoranca kërkoi kohë deri të enjten, por për opozitën ky është vazhdim i praktikave të vjetra, për t’i mohuar asaj një të drejtë legjitime. “Sapo përfundoi Konferenca e Kryetarëve ku u mor në shqyrtim kërkesa e Partisë Demokratike për ngritjen e një komisioni hetimor parlamentar për marrëveshjen me mirëkuptim mes qeverisë shqiptare me CEZ. Për fat të keq, nga diskutimet që u bënë në Konferencën e Kryetarëve, mazhoranca vazhdon me praktikat e vjetra të kundërshtimit të iniciativave të opozitës për të ngritur komisione hetimore parlamentare, me argumente që tashmë janë adresuar mirë nga Gjykata Kushtetuese, si argumenti që paralelisht po heton edhe Prokuroria për këtë çështje. Gjykata Kushtetuese është shprehur në vitin 2014, me rastin e kërkesës për ngritjen e komisionit hetimor parlamentar për serverin e tatimeve, se fakti që heton Prokuroria nuk e përjashton Kuvendin të ngrejë komisione hetimore parlamentare dhe të hetojë të njëjtën çështje nga pikëpamja administrative. Madje është shprehur fare qartë që të dy organet nuk zëvendësojnë dot njëri-tjetrin dhe kanë fusha të përcaktuara dhe për rrjedhojë mund të hetojnë në mënyrë të pavarur nga njëri-tjetri” u shpreh Spaho.  Po kështu mazhoranca përdor truke, vijoi ai, duke propozuar që komisionit hetimor parlamentar i propozuar nga ne, t’i zgjerohet fusha e objektit, duke hetuar dhe marrëveshjen për privatizimin e CEZ dhe zbatimin e kësaj marrëveshjeje, gjatë viteve që funksionoi privatizimi. “Dua të them që ne nuk jemi kundër asnjë lloj iniciative për të hetuar çdo periudhë të privatizimit dhe funksionimit të CEZ në sektorin energjetik shqiptar, gjë që e kemi shprehur dhe në debatin që është zhvilluar para disa muajsh rreth kësaj çështjeje. Është e drejta e mazhorancës ta kërkojë këtë komision. Ne do t’i japim edhe votat e opozitës, në mënyrë që të ngrihet dhe mazhoranca të hetojë çdo gjë që mendon se ka vend për të hetuar. Ka pasur kohë në periudhën kur ka qenë opozitë që të mund ta ngrinte këtë komision, por nuk e ka ngritur. Ka rastin ta ngrejë edhe tani që është në mazhorancë, madje ka edhe më shumë mjete e mundësi të hetojë të gjithë periudhën që nga privatizimi dhe funksionimi i CEZ në Shqipëri. Por me këto truke, me këto marifete nuk mund të pengojë punën dhe objektivin e opozitës për të hetuar zgjidhjen me mirëkuptim të marrëveshjes ndërmjet qeverisë shqiptare dhe CEZ, një aferë ku të paktën 500 milionë euro iu morën shqiptarëve. Sigurisht nuk pati mirëkuptim nga mazhoranca për të respektuar vendimet e Gjykatës Kushtetuese dhe u la që të arrihet ndoshta deri të enjten, që të mund të konsultohet më mirë, me vendimet e Gjykatës Kushtetuese dhe të vihet ndoshta me ndonjë vendim të ri, ditën e enjte. Por në thelb ajo që desha të theksoj është se po vazhdohet me taktikat e mosrespektimit të vendimeve  të Gjykatës Kushtetuese, për të cilët kemi pasur një dakordësim, një marrëveshje në dhjetor të 2014, ku pati dhe ndërmjetësim të ndërkombëtarëve”, tha Spaho. Qëndrimi që u mbajt në Konferencën e Kryetarëve ka të bëjë, tha Spaho, me shkeljen e vendimeve të Gjykatës Kushtetuese, të cilët janë e zezë mbi të bardhë të qartë që është e drejta e pakicës të kërkojë ngritjen e komisioneve hetimore parlamentare për një çështje dhe është detyrim i mazhorancës, i Kuvendit ta ngrejë këtë komision dhe ta miratojë pa ekuivoke.

Pak ditë më parë Radio Televizioni Shqiptar shpalli një tender surprizë. Ky institucion kërkon të pajtojë një studio juridike për ta këshilluar mbi një kontratë delikate që është lidhur që në mars 2015 nga Ministria e Inovacionit e drejtuar nga Milena Harito. Kjo ministri ishte autorizuar me vendim të qeverisë si autoriteti që do të lidhte kontratën për ndërtimin e dy rrjeteve dixhitale të RTSH-së. Në mars 2015, Harito e lidhi kontratën me kompaninë “Rohde & Schwarz” për ndërtimin e rrjeteve dhe totali i kësaj kontrate shkonte në 21.5 milionë euro.
Por disa muaj më pas, drejtuesi i RTSH-së, Martin Leka ka kërkuar një shtesë kontrate, për të shtuar dhe një vlerë prej 8.8 milionë euro për mirëmbajtjen e 11 pikave transmetuese, që sipas drejtuesve të RTSH-së, nuk përfshiheshin në kontratën e nënshkruar nga Harito. Z. Leka kërkon që RTSH-ja të marrë 8.8 milionë euro kredi për të garantuar shtesën e kontratës për mirëmbajtjen.
“HashtagAL”, disponon një MEMO të Martin Lekës, e cila i është dërguar Haritos në dhjetor 2015, nga përmbajtja e kësaj MEMO-je kuptohet qartë se Harito e ka cilësuar të paligjshme këtë kërkesë të drejtorit të RTSH-së dhe është shprehur kundër kësaj procedure.
Ministrja Harito është autoriteti i autorizuar nga ligji për të vendosur mbi këtë kontratë dhe anekset e kontratës, ajo ka dalë kundër nismës së drejtorit Leka në shkresa, por… në realitet drejtori i TVSH-së, duket se e ka kapërcyer autoritetin e Haritos dhe po përdor një ekstraprocedurë. Pak ditë më parë, ai ka shpallur një tender dhe kërkon që të pajtojë një zyrë juridike (ndonëse institucioni i tij ka 5 juristë), ndërsa do e autorizojë këtë zyrë juridike për të vendosur nëse duhet apo jo ta kryejë shtesën e kontratës prej 8.8 milionë eurosh me kompaninë “Rohde & Schwarz”.
Kjo lëvizje e z. Leka është një ekstraprocedurë që ka tejkaluar autoritetin e Haritos, sepse është Harito e cila ka tagrin ekskluziv për të vendosur mbi këtë kontratë.
Por ndonëse Harito gjatë letërkëmbimit me RTSH-në ka kundërshtuar shtesën e kontratës, duket se përtej shkresave “një dorë e padukshme” ka dhënë dritën jeshile që ngërçi të zgjidhet me artificën e një zyre juridike që do të vendosë se si duhet zhvilluar kontrata për të cilën përgjegjëse është direkt Harito.
Thirrja e RTSH-së për kompaninë juridike është shpallur në prill 2016, ndërsa Harito duket se e ka pranuar në heshtje të gjithë këtë ekstraprocedurë. Gjithçka po konsumohet në heshtje, ndërsa ministrja “nuk po ndihet”, ndonëse është ajo autoriteti vendimmarrës që mban përgjegjësi për kontratën.

“HashtagAL”