Qeveria ka reaguar për një lajm të publikuar në disa media për mobilimin e zyrës së Ministrit të Brendshëm, Saimir Tahiri. Sipas këtij lajmi, Ministria ka çelur një tender me vlerë 128 milionë lekë të reja (1.28 miliardë të vjetra) për të mobiluar zyrën e Tahirit. Por qeveria, me anë të portalit transparenca.al thotë se ky fond nuk do të përdoret vetëm për zyrën e Ministrit. Sipas saj, paratë do të shkojnë për mobilje për 11 institucione, përfshirë edhe Ministrinë e Brendshme.
Reagimi i qeverisë me anë të transparenca.al:
“Pretendimi i disa portaleve se Ministria e Brendshme ka çelur një tender prej 128 milionë lekë, vetëm për mobilimin e zyrës së ministrit, është një lajm spekulativ. Tenderi i mobilimit me pajisje, i cili është shpallur para pak ditësh dhe hapet në datën 19 prill 2016, përfshin në këtë procedurë 11 institucione që do të prokurojnë sipas nevojave të tyre, mobilie dhe pajisje. Fondi total i kësaj procedure është 128.113.807 lekë (pa TVSH) dhe përfshin jo vetëm mobilimin e godinës në rikonstruksion të MPB-së, por edhe blerjen e pajisjeve dhe mobilieve për 10 autoritete të tjera”.
Skandali/ Rama pranon: 128 milionë lekë shpenzime për mobilim zyrash
Tahiri, 1.2 miliardë lekë për zyra luksoze
Një tender prej 1.2 miliardë lekësh është shpallur këto ditë nga Ministria e Brendshme me qëllim blerjen e orendive dhe mobilimin luksoz të zyrave. Tenderi është publikuar në Agjencinë e Prokurimeve Publike, ndërsa specifikimi është ai i blerjeve të pajisjeve të zyrave. Në llojet e mallrave që do të blihen bien në sy: banakë, kasaforta, krevate tek, rafte druri e metalike, tavolina të ndryshme, 36 frigoriferë, 29 televizorë plazma 50 inç, 8 televizorë të përmasave të tjera, etj., etj. Ajo çka bie në sy është shuma marramendëse e këtij tenderi prej 1.2 miliardë lekësh.
Ndërkohë që Tahiri shpenzoi nga paratë e buxhetit të shtetit rreth 2 milionë dollarë për rikonstruksionin e godinës së Ministrisë së Brendshme, tashmë kësaj fature të kripur i shtohet edhe një tjetër shifër marramendëse që do të “përdoret” për mobilimin e zyrave dhe orendive.
Në lidhje me këtë tender abuziv ka reaguar ashpër dje ish-Kryeministri Berisha, i cili përmes një komenti në Facebook dënon vjedhjet e parave publike nga pushteti.
“Hajdutët e shtetit lajnë menderen me paratë që u vjedhin shqiptarëve! Për orendi dhe mobilim të zyrës së Saje qorrit shpallet tenderi me 1 miliard e 228 milionë lekë!!! Dje u botua dokumenti i Ministrisë së Punëve të Brendshme, Drejtoria e Prokurimeve të Përqendruara, me të cilin shpallet tenderi për ‘blerje orendish dhe pajisje për mobilim zyrash’, me një fond limit 128 113 807 lekë shifër kjo stratosferike e padëgjuar deri më sot në shpenzimet e kolltukofagëve. Me këtë shumë mund të ndërtohen së paku 3 shkolla 9-vjeçare apo 4 qendra moderne shëndetësore.
Një shumë e tillë nuk është shpenzuar për pajisje dhe mobilim zyrash në 8 vite të qeverisë së PD të marra së bashku. Kësaj i thonë se, hajdutët e shtetit lajnë menderen me paratë që u vjedhin taksapaguesve shqiptarë, përfshi atyre që nuk kanë tri vakte ushqim, por që për çdo kafshatë paguajnë TVSH njëlloj sa Kryeministri, ministrat dhe Koçot e tij. Ju bëj thirrje qytetarëve shqiptarë që të ngrihemi dhe t’i shkulim sa më parë nga kolltuqet e krimit Edi Ramën dhe hajdutët e tij të shtetit!”, shprehet Berisha në reagimin e tij.
Tenderi në fjalë i shtohet listës së abuzimeve të ministrit të Brendshëm, Saimir Tahiri me fondet publike. Pas skandalit me tenderin për uniformat e Policisë së Shtetit, rezulton se Tahiri ka abuzuar edhe me një tjetër, atë të blerjes së motorave po për Policinë e Shtetit. Sipas tenderit të shpallur nga Ministria e Brendshme, në garë ftoheshin kompanitë që ofronin motorat e tipit “Aprila” me një fond limit prej 1 miliard e 39 milionë lekësh, i cili është fituar nga një kompani e paracaktuar dhe pa asnjë garë, pra duke eliminuar mundësinë e ofertuesve të tjerë. Krahas kësaj, skandali thellohet edhe më tej, kur ministria ka përcaktuar blerjen e një motori disa miliona lekë më shumë, e verifikuar kjo lehtësisht edhe në faqen e kompanisë së motorave “Aprila”.
Hahn-Ramës: Të zbatohet sa më shpejt dekriminalizimi
Komisioneri për Zgjerimin, Johanes Hahn i kërkoi dje Ramës zbatimin e menjëhershëm të ligjit për dekriminalizimin. Në konferencën e përbashkët për shtyp me Ramën, komisioneri Hahn e cilësoi procesin e dekriminalizimit si një element thelbësor në lidhje me konsolidimin e legjitimitetit dhe integritetit të të gjitha institucioneve.
“Më lejoni t’ju them që përtej këtyre objektivave të 5 prioriteteve kyçe, ka edhe sfida të tjera, reforma të tjera, të cilat duhen trajtuar dhe dëshiroj që të përmend dy procese ne veçanti; nga njëra anë zbatimin e ligjit të dekriminalizimit dhe ana tjetër reformën zgjedhore. Për sa i përket dekriminalizmit, duhet të jemi shumë të qartë, legjislacioni do të zbatohet shpejt dhe në të gjitha nivelet e nevojshme dhe në rast se bëhet në mënyrën e duhur, ky proces mund të fuqizojë, të përforcojë besimin e qytetarëve tek shteti. Dekriminalizimi është kyç për sa i përket konsolidimit të legjitimitetit, integritetit, efikasitetit të të gjithë institucioneve publike” u shpreh komisioneri Hahn gjatë konferencës për shtyp me Ramën.
Hahn i kërkoi qeverisë shqiptare forcimin e masave në luftën antikorrupsion, realizimin me urgjencë të Reformës në Drejtësi dhe të kritereve të tjera kyçe të vendosura si kushte nga Bashkimi Europian. “Të vazhdohet përpara me rekomandimet që kemi dhënë që të arrihet gjithçka kemi kërkuar. Institucionet evropiane po bashkëpunojnë ngushtë me ato shqiptare sidomos në disa fusha kyçe. Ne jemi mjaft të interesuar edhe për Komisionin e Venecias, të vazhdojë puna, të ecë përpara. E rëndësishme të luftohet korrupsioni, të arrihet transparenca. Duhet një sistem gjyqësor transparent. E rëndësishme edhe ekonomia. Të përmirësohen investimet. Zbatimi i këtyre reformave është mjaft i rëndësishëm. Theksohet zbatimi i 5 prioriteteve që janë shumë të lidhura me njëra-tjetrën. Shoh një vendosmëri nga ana e Shqipërisë për të ecur para. Çelja e negociatave, pjesë e procesit, por e rëndësishme se çfarë do të bëhet pas hapjes së negociatave”, deklaroi Hahn, i cili kërkoi bashkëpunim për zbatimin e ligjit të dekriminalizimit. Komisioneri Hahn në fund të fjalës së tij deklaroi se procesi i integrimit të Shqipërisë në BE mund të zgjasë, por në fund sipas tij të gjithë do të jenë të kënaqur.
“Në fund të këtij procesi që mund të zgjasë, në fund fitoni më shumë ndryshe nga disa vende të unionit që edhe sot përballen me raporte… me kontrolle, ne kemi mësuar leksionin tonë, duam t’ju përgatisim që të gjithë të jenë të lumtur. Mund të jetë më sfiduese, më e gjatë, por në fund do të jetë në interesin tuaj, të qytetarëve shqiptarë”. Në lidhje me çështjen e pronave, Hahn tha se: “Nuk jam shumë familjar me çështjen e pronës, por mund të them se është një situatë e njëjtë në shumë vende evropiane. Duhet gjetur një zgjidhje e drejtë që adreson të drejtat e së kaluarës, por edhe situatës aktuale. Ju rekomandoj që të gjeni zgjidhje, kam kuptuar që kjo çështje është në gjykatë dhe ajo duhet ta trajtojë në kohën e duhur pa humbur afatet”.
Për sa i përket Kodit Zgjedhor, Hahn rekomandoi që Shqipëria të ndjekë rekomandimet e ODIHR.
“Ata kanë shumë eksperiencë për vëzhgimin e zgjedhjeve, përdorini ato”. “Ka qenë e rëndësishme që ne pamë se cilat ishin çështjet më urgjente, pra 5 prioritetet kyçe dhe më lejoni të them që elementi kyç i kësaj pjese është Reforma e Drejtësisë. Këtu shumë shpejt na duhen vendime dhe në fakt është e vërtetë që kjo reformë po të krahasohet me atë se çfarë ndodh me vendet e tjera fqinje është e një shkalle të paprecedent dhe me një ndikim afatgjatë dhe shpresojmë të ketë një ndikim pozitiv afatgjatë në situatën e vendit dhe në mënyrë që të ketë një udhërrëfim përsa i përket edhe çeljes së negociatave. Është shumë e rëndësishme të ketë një vendim përpara se të fillojë zbatimi i kësaj Reforme në Drejtësi, në mënyrë që ne të bëjmë të mundur vlerësimin e parë dhe që të shihen edhe zbatimi nëse po ecet në drejtimin e duhur. Pra, na duhen tani shumë shpejt vendime për të vazhduar punën me udhërrëfyesin që kemi në mendje, por kjo gjë është vendimtare. Një gjyqësor funksional është tejet i rëndësishëm. Ky është prioriteti i parë. Prioritetet e tjera kyçe janë reforma në administratën publike. Ligji i dekriminalizimit dhe reforma zgjedhore. Legjislacioni të zbatohet shpejt dhe në të gjitha nivelet e nevojshme. Nëse bëhet në nivelin e duhur forcon besimin tek shqiptarët. Është kyç për legjitimitetin e integritetin e institucioneve publike. Për reformën zgjedhore mirëpritëm punën teknike”, tha Hahn.
Si Rama gënjeu Hahn për deputetët kusarë
Edi Rama gënjeu dje Europën dhe përfaqësuesin e saj të lartë sy për sy, kur tha se do të kërkojë interpretim në Gjykatën Kushtetuese, në lidhje me mandatet e deputetëve të tij, të kapur në shkelje të ligjit themelor.
Deputeti demokrat, Eduard Halimi në një reagim për mediat e cilësoi të turpshëm mashtrimin publik të Ramës në një kohë kur ai ka bllokuar mandatet e deputetëve që kanë përfituar para publike në kundërshtim me ligjin e nuk lejon dërgimin e tyre në gjaktën Kushtetuese.
“Ky është një mashtrim i turpshëm sepse vetë vendimi i Gjykatës Kushtetuese që ai refuzon ta zbatojë është interpretimi i qartë dhe detyrues i Kushtetutës. Të kërkosh interpretimin e vendimit të Gjykatës Kushtetuese është përqeshje, tallje dhe dhunim i hapur i detyrimit kushtetues për ta zbatuar atë”, tha Halimi.
Më pas, Halimi citoi konkretisht se si është shprehur Gjykata Kushtetuese në rastin e mandatit të deputetit Koço Kokëdhima. Ja çfarë thotë Gjykata Kushtetuese në vendimin e saj që Rama refuzon ta zbatojë: “30. Gjykata vlerëson se në të tilla raste Kuvendi nuk mund të vërë në diskutim mocionin e paraqitur dhe nuk mund t`ia nënshtrojë atë debatit parlamentar… Kuvendi në këto raste nuk mund t`i hyjë themelit të çështjes, pra vlerësimit nëse veprimet konkrete të pretenduara të kryera nga deputeti janë të papajtueshme me mandatin e tij, sepse në të kundërt do të ndërhynte në kompetencat që kushtetutëbërësi ia ka njohur vetëm Gjykatës Kushtetuese… Vlerësimi i meritës së çështjes, pra nëse me veprimet e tij deputeti ka shkelur ndalimin kushtetues të pikës 3, të nenit 70 të Kushtetutës, me pasojë konstatimin e papajtueshmërisë në ushtrimin e mandatit, është një çështje që i përket ekskluzivisht Gjykatës Kushtetuese.
31. …Nëse do të pranohej një pushtet i tillë i Kuvendit, (pra KM të refuzonte dorëzimin e deputetëve të vet para drejtësisë), atëherë parashikimi i Kushtetutës do të zhvishej nga qëllimi i tij, çka do të përbënte abuzim me pushtetin e shumicës dhe do të ishte në kundërshtim me parimin e ndarjes dhe balancimit të pushteteve.
32. Për sa më sipër, gjykata arrin në përfundimin se për çdo shkelje të pikës 3, të nenit 70 të Kushtetutës, kur kërkohet konstatimi i papajtueshmërisë me mandatin e deputetit, Kuvendi është i detyruar ta dërgojë çështjen në Gjykatën Kushtetuese, e cila është organi i vetëm që ka kompetencën ta shqyrtojë në themel çështjen”.
“Dispozitivi: Në rast se Kuvendi i Shqipërisë vihet në lëvizje me mocion të kryetarit të Kuvendit ose një të dhjetës së anëtarëve të tij, në kuptim të pikës 3, të nenit 70 të Kushtetutës, ai duhet të vendosë dërgimin e çështjes në Gjykatën Kushtetuese, e cila është organi i vetëm që ka kompetencën të shqyrtojë në themel çështjen dhe të vendosë mbi papajtueshmërinë e mandatit të deputetit”.
“Gjykata Kushtetuese ka vendosur qartë. Me vendimin e saj, ajo thotë se vetëm Gjykata Kushtetuese mund të vendosë dhe jo Parlamenti.
Ky vendim detyron Parlamentin që t’i dërgojë rastet e oligarkëve-deputetë të Ramës, të kapur në shkelje të Kushtetutës, duke përfituar fonde publike e koncesione, në Gjykatën Kushtetuese dhe vetëm ajo vendos më pas për mandatet e tyre.
Por Edi Rama zgjodhi edhe sot të mbrojë oligarkët e tij, të mbrojë abuzimin, vjedhjen e parave të shqiptarëve dhe të dhunojë Kushtetutën, gjykatën, shtetin ligjor.
Me mashtrimin para Europës e përfaqësuesit të lartë të Bashkimit Europian, Edi Rama thelloi paligjshmërinë e tij, duke pohuar publikisht se ai qëndron mbi ligjin, mbi Kushtetutën, mbi gjykatat. Ai thelloi edhe më tej hendekun mes një populli të tërë në varfëri, papunësi, arrati dhe një grushti plaçkitësish të babëzitur që po pasurohen duke dhunuar Kushtetutën dhe ligjin.
Partia Demokratike është e vendosur në betejën e saj për zbatimin e Kushtetutës dhe vendimit të Gjykatës Kushtetuese si themele të stabilitetit dhe shtetit ligjor në Shqipëri”.
Reforma në drejtësi, të garantohen zgjedhje të lira e të ndershme
Kryetarja e Këshillit Kombëtar të Integrimit, Majlinda Bregu u shpreh se, “duhet të jemi sa të mirëkuptueshëm me njëri-tjetrin mes nesh po e po, por edhe me qeverinë pasi ky proces transparencën e gjithpërfshirjen i ka elementët garantues të suksesit”.
Bregu tha se, “Evropa siç e dimë të gjithë është e përfshirë sot nga kriza më të mëdha se sa mungesa e mirëkuptimit tonë të vazhdueshëm politik dhe sigurisht që zgjerimi nuk është halli më i madh i evropianëve”, por ajo shprehu bindjen se, “anëtarësimi në Bashkimin Evropian edhe pse nuk është një garanci për një botë perfekte, do të nënkuptonte garanci më të mëdha për nivelin tonë të demokracisë, duke filluar nga zgjedhjet e lira e të ndershme, sundimi i ligjit dhe deri tek standardet e përgjithshme, të cilat sot janë të kërcënuara fatkeqësisht edhe nga terrorizmi në Evropë”. “Nuk është çështja se sa të suksesshëm kemi qenë ne gjatë këtij viti për mbikëqyrjen e procesit të integrimit, shtoi Bregu, por besoj se për të gjithë ne, me rëndësi është që ky Këshill të konsolidojë të kuptuarit njësoj të detyrimeve të procesit”. “Dhe që puna jonë të jetë më rezultative duhet sigurisht që të gjithë dokumentet e rëndësishme që qeveria harton edhe për procesin e integrimit të konsultohen bashkë me ne në fazën e tyre fillestare”, tha ajo. Bregu kërkoi nisjen në mënyrë urgjente të përgatitjes së kuadrit strategjik për çeljen e negociatave, pavarësisht se kur do të ndodhë ajo. Kjo është mbledhja e 5 e Këshillit Kombëtar të Integrimit, i cili është ngritur vetëm një vit më parë me 44 anëtarë, të cilët janë përfaqësues jo vetëm nga Parlamenti, por edhe nga shoqëria civile, institucione të pavarura, bota akademike dhe media.
Basha-Hahn: Stabiliteti i vendit i rrezikuar
Kryetari i PD, Lulzim Basha njohur dje komisionerin për Zgjerim, Johannes Hahn me situatën daramatike që po kalon vendi
si dhe me kërkesat e opozitës dhe qendrimin e saj për nxjerrjen e vendin nga kriza e thellë.
“Javët e ardhshme do të jenë vendimtare për të parë nëse ky ligj do të zbatohet në germë, ndërkohë që për zbatimin e “shpirtit” të ligjit nuk ka asnjë shans sepse Edi Rama i ka marrë këta kriminelë dhe i ka transferuar si koordinatorë në Partinë Socialiste. Po i përdor aktualisht për të fituar referendumin e tij brenda partisë dhe ka ndërmend t’i përdorë sigurisht edhe në zgjedhjet e ardhshme parlamentare. Po kështu kërkojmë që ligji për dekriminalizimin të veprojë edhe në ato raste të paparashikuara më parë ku deputetët si Armando Prenga përgjakin me armë të paligjshme qytetarët në dyert e komisariateve dhe pastaj vijnë në Parlament serbes-serbes sikur nuk ka ndodhur asgjë” tha Basha në një prononcim për mediat pas takimit me komisionerin Hahn.
“Për çështjen e zbatimit të vendimeve të Gjykatës Kushtetuese e shikoni që është një recidivist sepse ka një vendim të Gjykatës Kushtetuese që e detyron Parlamentin që të zbatojë Kushtetutën dhe të dërgojë për gjykim të gjitha rastet kur deputetë të mazhorancës supozohen se kanë shkelur Kushtetutën duke marrë e përfituar fonde apo pasuri publike, siç është rasti Kokëdhima që u desh një vit për ta çuar, apo siç janë rastet e Sulit dhe Valentina Leskajt ku mazhoranca refuzon zbatimin e vendimin e Gjykatës Kushtetuese, pra përsëri e ka sjellë shtetin ligjor në “vdekje klinike”. Ky nuk është rast i vetëm, pasi kemi rastin e parkut të Tiranës njësoj si rasti i bunkerit apo rasti i strehës që ka vënë tek Kryeministria, secili me efekte të ndryshme sigurisht. Ky i parkut është më i dhunshmi sepse në mënyrë arbitrare privon qytetarët nga mijëra metra katrorë gjelbërim” u shpreh kreu i PD.
Ai tha se të tria këto raste nxjerrin në pah natyrën tiranike të një regjimi banditesk, i cili nga njëra anë merr dhe rras në burg njerëzit sepse lyejnë shtëpinë pa leje apo vendosin tjegulla në çatinë që po u bie dhe nga ana tjetër pa leje dhe kundër ligjit ndërton mes parkut pa leje mjedisore, me leje të falsifikuar të Këshillit Kombëtar të Territorit. Pa leje dhe kundër ligjit ndërton bunker në mes të Tiranës.
“Së treti, vijoi Basha, çështja e komisioneve hetimore ku ndonëse u detyruan pas marrëveshjes të pranojnë dy komisionet tona hetimore, kanë bërë gjithçka për t’i sabotuar ato, për të shkurajuar hetimin parlamentar si një instrument të transparencës para qytetarëve shqiptarë: se si vjedh kjo qeveri, se si dhunon kjo qeveri ligjet dhe Kushtetutën, se kush merr paratë e taksapaguesve shqiptarë dhe pse nuk vë para përgjegjësisë hajdutët në pushtet – duke e tërhequr mazhorancën nga kuorumi nga çdo komisioni hetimor sa herë që ka dëshmi që inkriminojnë Kryeministrin apo ministrat e kësaj qeverie. Dhe duke dhunuar edhe një kusht tjetër të marrëveshjes së 24 dhjetorit 2014, që është aprovimi i rregullave për funksionimin eficient të komisioneve hetimore dhe këtë po kërkojmë ne”.
Basha tha se PD po kërkon që komisionet hetimore të mos mund të bllokohen në mënyrë arbitrare nga mazhoranca.
“Kjo pra, është Shqipëria dy vite më vonë, nuk është asnjë hap përpara në raport me integrimin europian të vendit, është shumë hapa prapa, është në drejtim të një autokracie, një regjimi që shtyp dhe dhunon Kushtetutën, ligjin, të drejtat e qytetarëve.
Që shtyp dhe ushtron dhunë ndaj opozitës parlamentare në Parlament dhe jashtë Parlamentit dhe që përgatitet të prishë zgjedhjet e ardhshme parlamentare si e vetmja rrugë për të mbajtur pushtetin, me anë të të cilit po pasurohen pushtetarët e po varfërohen qytetarët.
Këto janë shqetësimet, të cilat kam patur rastin t’i diskutoj si në takimin kokë më kokë me komisionerin Hahn, por po kështu edhe në takimet me delegacionin dhe që do të ngrihen edhe në dy takimet nga përfaqësuesit tanë në Këshillin Kombëtar të Integrimit dhe në të ashtuquajturin dialog politik për pesë prioritetet.
Kam kërkuar mbështetjen e Shteteve të Bashkuara të Amerikës më parë dhe sot të Bashkimit Europian për të qëndruar fuqimisht për shtetin ligjor, për zbatimin e Kushtetutës, për implementimin pa asnjë ekuivok, pa asnjë negociatë të vendimeve të Gjykatës Kushtetuese si parakusht i rikthimit të çdo premise për dialog politik” tha kreu i PD.
Sa i përket Reformës në Drejtësi, Basha tha se ka garantuar se pala më e interesuar për Reformën në Drejtësi është dhe mbetet opozita dhe që ata që i tremben Reformës në Drejtësi janë ata që duhet të japin llogari për miliona, miliarda euro zhvatje të qytetarëve shqiptarë dhe për lidhjet e tyre me krimin që janë bërë sot për fat të keq skandale famëkeqe jo vetëm në Shqipëri, por anembanë Europës. “Dihet që pushtetarët e Tiranës e kanë të pamundur ta kalojnë ditën pa u shtruar në dreka, darka dhe përfitime me Shullazët, me bandat, me Xibrakët dhe me figura të tjera të krimit, të cilat i konsiderojnë dhe i trajtojnë dhe në fakt janë bashkëqeverisësit e Shqipërisë sot” vijoi Basha.
“Dy vite më parë Parlamenti Europian u investua për të përfunduar një krizë parlamentare që nisi si rezultat i
1. Inkriminimit të Parlamentit, i dhunës në Parlament kundër deputetëve të opozitës nga persona me rekorde kriminale që Edi Rama kishte sjellë aty;
2. Për shkak të moszbatimit të vendimeve të Gjykatës Kushtetuese që është shenja kulmore e degradimit dhe e “vdekjes klinike” të shtetit ligjor;
3. Për shkak të mohimit të së drejtës kushtetuese, e vetmja e drejtë e opozitës për të mbikëqyrur qeverisjen që është ajo e komisioneve hetimore parlamentare, dhe;
4. Për shkak të shkeljes së konsensusit mbi çështje politike siç ishte ligji për nëpunësin civil dhe mosofrimit të mundësisë për konsensus për asnjë çështje të interesit kombëtar nga mazhoranca Rama-Meta.
Sot, dy vite më vonë Shqipëria gjendet në të njëjtën situatë sepse nga njëra anë ligji për dekriminalizimin, i cili u miratua vetëm pas një presioni në minutat e fundit dhe nuk arriti të shmangë kandidimin dhe instalimin e kryetarëve të bashkive me rekorde kriminale si në rastet e Krujës, Kavajës, Kurbinit, Tepelenës apo Këlcyrës përsëri ka mbetur peng i vullnetit politik të Edi Ramës” tha Basha për mediat.
Mazhoranca ka shpallur një gjendje rënie të Republikës
– Z. Basha, cili është qëndrimi i Bashkimit Europian?
Qëndrimin e Bashkimit Europian flet Bashkimi Europian. Qëndrimi i opozitës shqiptare që është po kaq europian, është se pa dekriminalizimin e politikës shqiptare, pa zbatimin jo vetëm në germë, por në shpirt të ligjit të dekriminalizimit, demokracia shqiptare është seriozisht e rrezikuar e bashkë me të edhe stabiliteti i Shqipërisë.
– Z. Basha, a ka bisedime mes palëve lidhur me zbatimin e vendimeve të Gjykatës Kushtetuese, për rrjedhojë hyrjen tuaj në komisionet parlamentare?
Po, ne kemi qenë të hapur që në qoftë se ka ndonjë keqkuptim, se përse duhet zbatuar Kushtetuta dhe vendimet e Gjykatës Kushtetuese, që t’i sqarojmë, ndonëse normalisht keqkuptime të tilla nuk ka dhe nuk mund të ketë. Kushtetuta nuk negociohet, vendimet e Gjykatës Kushtetuese nuk negociohen, por zbatohen.
Lojërat e Edi Ramës me Kushtetutën nuk janë të reja. Dy vite më parë ata u detyruan nën presionin e Parlamentit Europian t’i jepnin fund lojës së moszbatimit të vendimeve të Gjykatës Kushtetuese për komisionet hetimore parlamentare. Tani një orë e më parë duhet t’i japin fund edhe kësaj loje. Por jo vetëm kaq, duhet që sistematikisht të parandalojmë çdo aspiranti për tiran që të luajë me Kushtetutën dhe vendimet e Gjykatës Kushtetuese në të ardhmen. Qoftë ky Kryeministri aktual, sado t’i ketë ditët në atë karrige dhe çdokush që do të jetë në të ardhmen.
Pra, në mënyrë absolute duhet të zbatohet vendimi i Gjykatës Kushtetuese për dërgimin në Gjykatë Kushtetuese të dy deputetëve, të cilët kanë përfituar njëri 150 milionë lekë të KESH-it, tjetra 1/3 e hekurudhës shqiptare nga Ballshi deri në Vlorë. Po kështu, t’i pritet rruga njëherë e përgjithmonë çdo tentative të mazhorancës për t’i shkuar në mendje moszbatimi i vendimeve të Gjykatës Kushtetuese.
– Në gjykimin tuaj 45 minutat që i kaluat kokë me kokë me komisionerin Hahn besoni që do t’u shërbejnë për rifillimin e dialogut për Reformën në Drejtësi?
Dialogun për Reformën në Drejtësi e ka ndaluar mazhoranca. Mazhoranca ka shpallur një gjendje rënie të Republikës, asgjësimit të shtetit ligjor. Pra, nuk është çështje dialogu, nuk është as çështje negociate as me Ëashingtonin, as me Brukselin. Kjo është një çështje “vdekje klinike” e shtetit ligjor në Shqipëri, është një dramë, e cila shpaloset ditë për ditë në çdo fshat e çdo qytet të Shqipërisë, ku nga njëra anë polici, inspektori, krimineli i bërë deputet apo drejtor, vetë Kryeministri i vendit apo ministrat shkelin dhe dhunojnë ligjin duke dhunuar qytetarët. Dhe nga ana tjetër po këta njerëz përfitojnë në kundërshtim me ligjin dhe Kushtetutën pasuri marramendëse, koncesione, tendera, emërime të paligjshme në dogana, në polici. Pra, kjo është një çështje e një aparteidi ku nga njëra anë qëndrojnë jo thjesht vetëm demokratët, por të gjithë qytetarët shqiptarë dhe nga ana tjetër një grusht njerëzish. Pra, është një oligarki “de facto” dhe kjo nuk mundet me asnjë negociatë, as me 45 minuta kokë më kokë as me komisionerin Hahn dhe as me këdo autoritet tjetër.
Por sot mendoj se komisioneri Hahn ka marrë një pasqyrë të plotë dhe të qartë të gjendjes. Sigurisht ai ka përgjegjësitë e tij para Unionit, para Bashkimit Europian, ka vizionin e tij për të ndihmuar Shqipërinë dhe shqiptarët, për të cilën unë i jam jashtëzakonisht mirënjohës si kryetar i opozitës, si kryetar i alternativës që e do Shqipërinë në Europë.
Ndërsa roli im është që të përcaktoj qartë piketat ku PD kërkon të ecë në mënyrë që Shqipëria t’i afrohet dhe jo t’i largohet anëtarësimit në Europë. Dhe këto piketa janë zbatimi i ligjit, zbatimi i Kushtetutës, zgjedhje të lira dhe të ndershme dhe padyshim një Reformë në Drejtësi që krijon mekanizmat për të vënë para përgjegjësisë korrupsionin dhe të korruptuarit në nivele të larta.
– Pra, nuk bëhet fjalë për një dialog të ri, rikthim të dialogut për Reformën në Drejtësi. Pra, nuk keni asnjë lloj sinjali që mund të negociohet?
Kjo nuk është çështje sinjali dhe sinjalistike. Nuk ka gjë më elementare për një vend se Kushtetuta dhe vendimet e Gjykatës Kushtetuese. Nga ato fillon ligji, nga këto buron gjithçka tjetër. Ndaj zbatimi i vendimeve të Gjykatës Kushtetuese është i panegociueshëm dhe pa këto e vetmja gjë që zbulohet, del haptazi para çdokujt dhe para atyre që janë shumë të zënë me krizën në Ukrainë, në Siri apo për problemet e brendshme të Bashkimit Europian është fakti se në Tiranë është instaluar një regjim, i cili është gati të përdorë gjithçka për t’i ikur një llogaridhënie para një drejtësie të pavarur, është gati t’i vërë edhe shkelmin e fundit shtetit ligjor duke moszbatuar vendimet e Gjykatës Kushtetuese.
– Z. Basha, kjo do të thotë që ditën e nesërme opozitën do ta shikojmë përsëri të protestojë sërish në Kuvend?
Vendimet e grupit parlamentar janë akoma në fuqi sepse asgjë nuk ka ndryshuar në raport me dhunimet flagrante të demokracisë dhe shtetit ligjor që janë burimi i çdo të keqe në Shqipëri, janë burimi i krizës ekonomike, janë burimi i eksodit të shqiptarëve, janë burimi i papunësisë dhe varfërisë.
E gjitha kjo vjen sepse Edi Rama i ka vënë tritolin shtetit ligjor, demokracisë, zgjedhjeve të lira dhe të ndershme, drejtësisë së pavarur. Ne qëndrojmë pikërisht për këto vlera, Kushtetutën, zgjedhje të lira dhe të ndershme, drejtësi e pavarur dhe e pakapur për t’i vënë para përgjegjësisë politikanët dhe pushtetarët e korruptuar në Shqipëri.
Rritet kostoja e komunikimit në celular për konsumatorët
Ditët e fundit, tre nga katër kompanitë celulare në vend, Vodafone, Telekom Albania dhe Albtelecom kanë shkurtuar afatin e vlefshmërisë për pjesën më të madhe të paketave mujore për klientët e tyre, duke i bërë ato 28 ditë, nga mujore (30 ditë) që ishin më parë. Burime nga kompanitë pohuan se këto ndryshime janë bërë pasi ofertat janë përshtatur në bazë javore, pra 4 javë (28 ditë) dhe ata i kanë njoftuar klientët për këtë veprim. Siç është edhe praktikë në këto raste, njoftimi bëhet pa bujën e reklamave ekstravagante, të cilat promovojnë produktet e këtyre kompanive dhe në hapësira publicitare minimale, por që përmbushin detyrimin ligjor të njoftimit të klientelës.
Ajo që ndodh tashmë është se në momentin që aktivizon ofertën, klienti njoftohet që oferta zgjat 28 ditë. Ndërsa, në faqet e internetit përkatëse të kompanive, ku gjenden dhe ofertat e reja, është e vështirë të gjesh se për çfarë periudhe është e vlefshme oferta. Në rrjetet sociale, konsumatorët kanë shprehur pakënaqësi lidhur me këtë ndryshim të ofertave nga 30 në 28 ditë, që sipas tyre nënkupton shtrenjtim të çmimit, pasi hiqen dy ditë nga oferta.
Për shembull, për paketën standarde prej 1000 lekësh, vetëm nga shkurtimi i saj me dy ditë, çmimi është shtrenjtuar me 7% (35.7 lekë në ditë nga 33.3 lekë në ditë që ishte më parë). Për paketën 1500 lekë, nga 50 lekë në ditë, shkon në 53.6 lekë. Në vit, një klient që blen rregullisht karta 1,000 lekëshe, duhet të shpenzojë rreth 900 lekë më shumë për të njëjtën kohë bisede (19,554 lekë për 365 ditë), apo pothuajse një kartë tjetër, duke e çuar numrin e kartave nga 12 në vit në gati 13 në vit.
Motra e Taulant Ballës reagon për dhunën te Liqeni: Më vjen turp që votova këta njerëz
Alba Balla, motra e deputetit socialist dhe një prej drejtuesve më të rëndësishëm të PS-së, ka reaguar ashpër në rrjetet sociale në lidhje me ndalimin e një prej aktivistëve të opozitës.
Bashkëshortja e Grigels Muçollarit, i cili u arrestua nga policia gjatë protestës së opozitës kundër betonizimit të Parkut të Liqenit, ka postuar në faqen e saj në Facebook shkrimin e citynews “Protestuesi në pranga, banditi në Parlament”.
Komentuesi i parë në postimin e Erinda Alija (bashkëshortja e Grigels Muçollarit) është motra e deputetit socialist Taulant Balla, Alba, e cila shkruan se i vjen turp për këta njerëz që ka votuar.
Motra e Taulant Ballës, shkruan nga profili me emrin Paris Alba, i cili është përdorimi i dy emrave, vajzës së saj të vogël Paris dhe emri i saj Alba.
Në komentin e saj, drejtuar bashkëshortes së Grigels Muçollarit, motra e deputetit socialist Taulant Balla, i cili është edhe kryetari i grupit parlamentar të kësaj partie, thekson se i vjen turp për ata që ka votuar. Alba është tepër e sinqertë dhe duket tepër e prekur nga akti kriminal i arrestimit të Grigels Muçollarit, duke e dënuar veprimin e policisë.
Komentin e saj Alba e fillon duke shkruar se ndoshta ishte personi i fundit që i takonte të komentonte tek bashkëshortja e Grigelsit, i cili në fakt është kundërshtar politik i Taulant Ballës. Ndryshe nga shumë politikanë apo aktivistë politikë, Grigels Muçollari është një qytetar shembullor dhe ndalimi i tij gjatë protestës së opozitës duket të jetë më shumë se një akt kriminal dhe hakmarrje banditeske e klientëve apo ushtarëve të qeverisë që në fakt ka fyer edhe motrën e deputetit socialist.
Alba duket në këtë rast se është sjellë si një nënë, si një zonjë, si një qytetare, duke u ndjerë e turpëruar për qeverinë e vëllait të saj, e cila ka prangosur padrejtësisht një prind dhe qytetar si Grigels Muçollari.
Alba komenton se i vjen turp nga këta që ka votuar dhe ajo është mjaft e sinqertë dhe e vërtetë në atë që shkruan.
Turp ndoshta iu vjen të gjithë shqiptarëve për Edi Ramën dhe qeverinë e tij, për qeverinë që ka zhgënjyer edhe Albën, e cila në një koment të saj të shkurtër na tregoi se, politika mund t’i ndajë njerëzit shumë, por hakmarrja politike, dhuna, prangat dhe burgosja nuk mund të ndalin solidaritetin qytetar dhe të vërtetën.
Komenti i Albës flet shumë, por shpresojmë që të njëjtën gjë ta kuptojnë edhe shokët dhe qeveritarët e vëllait të saj, të cilët janë edhe shkaktarët kryesorë të një situate të dhimbshme në familjen e Grigels Muçollarit.
Arkitekti i Ramës: Kulla 17 katëshe edhe në Qytetin “Studenti”
Exit.al
Peter Wilson, arkitekti i “oborrit” të Kryeministrit Rama nuk e fsheh moton e tij “më interesojnë jo planet, por projektet konkrete me klientë që paguajnë”. Këtë moto e ka bërë të qartë edhe në diskutimet për planet rregullatore të qyteteve, në të cilën ai është i përfshirë . Kjo thënie e zotit Wilson shpjegon qasjen novative mashtruese, me arkitektë të huaj, të përdorur nga Edi Rama e të tjerë nga viti 2000 e këtej për t’i shitur si zhvillim modern projektet e tyre klienteliste dhe shkatërruese të qyteteve tona. Arkitekti “i jashtëm” Wilson projektoi në mes të sheshit qendror të Korçës-ndoshta qytetit të vetëm që i kishte shpëtuar betonit të tranzicionit-një kullë betoni që i ngjan aq shumë kullave të vrojtimit të burgjeve apo atyre përgjatë ish-murit të Berlinit. Ai projektoi në mes të Parkut të Liqenit të Tiranës një park lojërash me platforma e mure betoni që nuk do guxonte ta imagjinonte në asnjë vend tjetër të botës. Madje në Parkun e Liqenit, ai kishte planifikuar edhe një kafene disa katëshe edhe një kullë vrojtimi si ajo e Korçës, të cilat u hoqën nga frika e reagimit të publikut. Arkitekti “i jashtëm” Wilson ka propozuar edhe një urë-dashtë zoti jo prej betoni-në mes të Liqenit të Tiranës, për të krijuar lehtësi lëvizjeje midis anës veriore të parkut dhe anës jugore të tij, mbase për VIP-at apo holandezët që jetojnë tek vilat në park. Zotëria “i jashtëm” ka propozuar edhe që Qyteti “Studenti” të mbushet me kulla 10-17 kate-në disa kate të të cilave do të jetojnë studentë, ndërsa në pjesën tjetër do të lulëzojë partneri publik-privat e do ketë apartamente private për shitje, si në çdo pjesë tjetër të Tiranës. Mbase ai do të projektojë e ndërtojë-përgjatë Liqenit të Pogradecit, hartimin e planit rregullues të të cilit e “fitoi” para pak kohësh-struktura të lehta betoni, të cilat do t’i japin jetë liqenit: shtëpiza betoni e, mbase, varka betoni apo ndonjë pulëbardhë betoni. Në fund të fundit, aftësitë krijuese prej betoni të arkitektit të “jashtëm” Wilson duket se nuk shterojnë!
Pazaret e Wilson me Ramën
Arkitekti Peter Wilson, i firmës Bolles+Wilson, i cili ka projektuar këndin e lojrave të Parkut të Liqenit, praktikisht “jeton” me projektet e qeverisë shqiptare. Ardhja në pushtet e Kryeministrit Rama duket se i ka siguruar kontrata të shumta firmës së tij. Të dhënat publike të vetë firmës, dëshmojnë se, gjatë dy viteve të fundit, pothuajse të gjitha projektet e saj kanë qenë projekte të qeverisë shqiptare. Vetëm në vitin 2015, firma ka përfituar kontrata me vlerë rreth gjysëm milionë dollarë nga qeveria shqiptare. Në shumicën e rasteve, Bolles+Wilson është kontraktuar në konsorcium me firmën Atelier 4—firmë e njohur për lidhjet e ngushta me Kryeministrin Rama që nga koha kur ai ishte Kryetar i Bashkisë së Tiranës.
Lista e projekteve kryesore të firmës gjatë vitit 2014-2015 përfshin:
• Stadiumin Loro Boriçi në Shkodër
• Kullën në qendër të qytetit të Korçës
• Planni rregullues të qytetit të Korçës
• Katër sheshe publike në qytetin e Korcës
• Mastër planin e Parkut Rinia, Korçë
• Qëndër sportive stërvitore kombëtare, Korçë
• Planin rregullues të qytetit të Pogradecit
• Mastër planin e Parkut të Liqenit, Tiranë
• Pesë projekte pilote në Parkun e Liqenit, Tiranë
Bolles+Wilson është, gjithashtu, firma projektuese e godinës 13 katëshe, që ka filluar të ndërtohet në hyrje të parkut të liqenit, përballë Fakultetit Ekonomik, në Tiranë. Leja shumë e debatuar për këtë ndërtim u dha nga zotërinjtë Rama dhe Veliaj, në shtator 2015, menjëherë pas zgjedhjes së Zotit Veliaj në krye të Bashkisë Tiranë. Zoti Veliaj kishte premtuar në fushatë se nuk do të kishte ndërtime në atë zonë. Është interesant fakti që në këtë projekt arkitekti Wilson nuk ka respektuar asnjë kriter urbanistik, duke zaptuar me ndërtim 100 për qind hapësirën në hyrjen e parkut, pa lënë asnjë cm katror hapësirë të gjelbër anash ndërtimit. Lidhja e Bolles+Wilson me Zotin Rama duket se është e hershme. Bolles+Wilson ka kontribuar në dizenjimin e lyerjes së fasadave të pallateve në kohën kur Rama ishte kryebashkiak. Kjo firmë ka krijuar, në vitin 2004, dizenjimin e motivit të lyerjes së pallatit me kuadrate vishnje e të bardha në kryqëzimin kryesor të bllokut, godina ish-Manhatanit
Kryesore
Continue to the category
