14.5 C
Tirana
E diel, 4 Maj, 2025
type here...

Parlamenti ka rënë, tani luftë me mafian

Ish kryeministri Berisha denoncoi dje në Parlament se si ndahen tenderat dhe paratë publike mes deputetëve socialistë e njerëzve pranë pushtetit. Berisha përmendi vetëm tre raste, deputetët socialistë Sadri Abazi e Pjerin Ndreu si dhe kandidatin socialist për Bashkinë e Kamzës, në zgjedhjet e 2015, Safet Gjicin.
Berisha paraqiti dokumenta që dëshmojnë vjedhjet më flagrante dhe më të paimagjinueshme me firmat dhe vulat e tyre. “Këta hidhen përpjetë dhe mendojnë se me gjuhë rrugeçërish, me gjuhë ordinerësh do mund të mbulojnë vjedhjet e tyre. Siç e dëgjuat unë solla dokumenta zyrtare, të cilat faktojnë se Safet Gjici nga 6 tendera që fitoi në vitin 2013 ka arritur të fitojë vitin e kaluar 58 tendera. Solla dokumenta të pakundërshtueshme, në të cilat Sadri Abazi nga asnjë tender në 2013 fiton 16 tendera në vitin 2015. Solla dokumenta të pakundërshtueshme, zyrtare, të cilat faktojnë se Pjerin Ndreu nga 4 tendera në 2013 fiton 16 tendera në 2015. Solla dokumenta origjinale, në të cilat Kokoneshi, kryetari i Bashkisë Divjakë, shpallë fitues, dhe të dhënat janë se bashkë me deputetin ka ndarë 1 milionë dollarë, kompaninë me një tender 337 milionë lekë fond limit, përjashton kompanitë që japin 220 mln për tenderin dhe tenderin e fiton kompanina me 317 mln lekë, pra rreth 1 mln e ca dollarë më shumë, pasi thuhet gjerësisht se Kokoneshi bashkë me kokoneshin tjetër këtu në parlament, i cili përdor një gjuhë ordineri, kanë futur në xhepa 1 mln dollarë. Solla dhe shëmbuj të tjerë që e kanë dhënë edhe mediat, kur një rrugë e Edi Ramës, prej 930 metra, në fshatin Lin, shpenzohen për ndërtimin e saj 9.9 mln dollarë në një kohë kur e gjithë rruga nga Lini në Pogradec është prokuruar me 21 mln dollarë. Pra, solla fakte të tjera. Kur drejtori socialist i ujësjellësit të Pogradecit, i cakton vetes rrogën 2.5 milionë lekë, në kundërshtim të të gjitha ligjeve, përdorim telefoni pa limit dhe një klauzolë që nëse ikën nga puna ka të drejtë të shpërblehet me 50 mln lekë. Pra siç e shifni kusaria shtetërore e kësaj mazhorance është e pakufishme por vendosmëria jonë për të luftuar, është absolute” bëri të ditur Berisha.
Ndaj dhe ai theksoi se dekusarizimi i Parlamentit nënkupton zbatimin e ligjeve të vendit, plotësimin e ligjeve të tyre, ndaj dhe unë dhe një herë kërkoj mbështetjen tuaj, të miratojmë ligjin “antiOlsi”. “Ligji “antiOlsi” është ligji që do të ndalojë kusarët që të vjedhin pasuritë publike siç po ndodh” tha Berisha.
Nga ana tjetër, Berisha denoncoi lidhjet e Ramës me krimin.
“Të kërkosh për të ndërprerë lidhjet e krimit të Edi Ramës është njëlloj si të kërkosh eskimezë në shkretëtirë, është njëlloj si të kërkosh rrethin katror dhe këto nuk ekzistojnë. Lidhjet e krimit Edi Rama i ka të salduara në të gjithë psikikën e tij.
Çfarë ndodh të dashur qytetarë dhe qytetare? Pse ky Parlament, si asnjëherë më parë në historinë e tij ndahet në dy kampe: në kampin anti krim dhe në kampin pro krim. Do të thotë kjo që këto deputetë që janë këtu janë të lidhur me krimin?! Jo absolutisht.
Jo zotëri! Nuk do të thotë kjo. Po do të thotë që Edi Rama ju mban juve si skllevër të lidhur me krimin. Do të thotë që Edi Rama, ju shet dhe blen juve një mijë herë për lidhjet e tij me krimin. Po pse Edi Rama dhe jo ju të tjerët këtu? Se edhe ju keni qenë ministra e kryeministra. Pse kjo? Sepse Edi Rama ndan psikologjinë e krimit të dobishëm. Dhe në qoftë se je i mbërthyer nga psikologjia e krimit të dobishëm, nuk del dot kurrë nga spiralja e tij. Kurrë. Nuk ka lidhje më të tmerrshme të njeriut sesa lidhjet e krimit. Edi Rama është mëkuar me lidhjet e krimit të dobishëm. Në diktaturë, xhelatët ishin njerëzit më të mbrojtur, ishin njerëzit më të pacenuar, ishin njerëzit që kishin të gjitha dyert e hapura, njerëz për të cilët nuk flitej. Shkalla e respektit për ta ishte maksimale. Pse? Sepse ata vrisnin, torturonin, burgosnin për hir të pushtetit, që etërit të mbanin pushtetin. Edi Ramës do t’i thoshte një laçian, – nuk ke turp more që bazohesh tek Armando Prenga ti? “Po vetëm me të e marr Laçin”, iu përgjigj ai. Kjo është përgjigjja që i dha” u shpreh Berisha ndërsa denoncoi me të tjera fakte rreth kësaj çështje.
“A e dini ju këtu që i ka çuar Saje qorrin pardje në lokal? Absolutisht po. Ka bërë dy takime. Ka qenë edhe drejtori i policisë në takim. Doni edhe emrin e lokalit? Jua jap edhe emrin po të doni. Por nuk dua të bëj simbol të së keqes atë lokal. Kjo është arsyeja. E vërteta është kjo. A e dini ju se tani ka udhëtimin në Shtetet e Bashkuara. A e dini ju se para tij shkon Shullazi atje. Shkon Shullazi me të gjitha veprat. Ai nuk shkon fizikisht, por shkojnë të gjitha krimet e tij në dosje. A e dini ju se ai bllokon Reformën për Drejtësi, se nuk e do. Pse nuk e do reformën? Çfarë i tha Viktor Ponta, miku i tij: “nëse e bën reformën le kokën pastaj, e pëson si unë”. Takimi është i çertifikuar” u shpreh Berisha.

Si u favorizua Sadri Abazi me tendera në dy vite

Sadri Abazi është një nga të favorizuarit e Ramës në dhënien e tenderave. “Tani shohim pak Sadri Abazin, ka një emër tjetër ky aty, Sadriu është “qelibar”, sakën se fut një qindarkë para publike në xhep, edhe po t’i ngjitet i heq rrugës. Në periudhën shtator 2013-dhjetor 2013 nuk ka fituar ndonjë kontratë, në periudhën janar 2014-dhjetor 2014 ka fituar 11 kontrata. Në periudhën janar 2015-dhjetor 2015 ka fituar 16 kontrata. Çfarë doni më? A doni ta heqim atë ligjin për konfliktin e interesit se jemi bërë njerëzit më qesharakë jo të Shqipërisë, por të planetit. Para syve tanë ndodhin të gjitha këto. Para syve tanë dhjetëfishohen e njëzetfishohen kontratat e këtyre hajdutëve. Ose të plotësojmë ligjin, ose të heqim ligjin e konfliktit të interesit. Unë them ta plotësojmë. Njeriu duhet të udhëhiqet nga besimi tek e mira dhe duhet të përpiqet që çfarë është e mundur dhe duke parë këtë batërdi, këtë njeri që nga 6 kontrata kalon në 58 kontrata, këtë supermafioz që vepron si lubi i papërmbajtur. Të vazhdojmë prapë kështu? Nuk ka gjë më të turpshme. Vetëm Parlament nuk meriton të jetë ky. Ky është një çerdhe kusarësh që përdor mandatin për të vjedhur njerëzit më të varfër të Europës” tha Berisha

Kontratat në rritje të deputetit, Pjerin Ndreu

Pjerin Ndreu, në shtator-dhjetor 2013 ka 4 kontrata. Janar 2014-dhjetor 2014 ka 11 kontrata. Janar 2014-dhjetor 2016 ka 16 kontrata.

Safet Gjici, kampioni i zhvatjes së tenderave

Në krye të listës së tenderave të fituar qendron Safet Gjici. “Do ju jap disa të dhëna për tenderat e kompanisë të famozit Gjici: periudha shtator 2013-dhjetor 2013 Gjici ka fituar 4 kontrata. Periudha janar 2014-dhjetor 2014 Gjici fluturon, ka fituar 40 kontrata. Nuk do të thotë të jesh socialist që të jesh hajdut, por kjo është faqja e zezë e socialistëve. Vjen periudha janar 2015-dhjetor 2015, Gjici ka firmosur 58 kontrata. Si i ka firmosur? Duke jua hequr të gjithë të tjerëve. Ky mafioz, nën rojet e të cilit vidhet banka ditën për diell, fiton nga ju, nga 6 kontrata më 2013, kur për hir të së vërtetës ishte pranë nesh sepse bënte fushatë për ne, ky tani kalon nga 6 kontrata në 58 kontrata. Po pse? Sepse paguan Edi Ramën. A ka neveri më të madhe sesa kjo?” bëri të ditur Berisha.

Skandali me aferën e rrugën Lin-Pogradec

Një skandal i akuzuar së fundmi nga PD, u dneoncuar dje nga ish kryeministri Berisha në lidhje me vjedhjen përmes tenderit të rrugës që lidh Pogradecin me fshatin Lin.
“A keni dëgjuar ju të nderuar deputetë, po ju pyes këtu, se 930 metra rrugë në fshatin Lin të Pogradecit, pasi 3 vjet më parë rruga nga cepi i Linit deri në Buqezë u asfaltua dhe po vazhdonte drejt Pogradecit. Kjo rrugë e tenderuar në mos gaboj ishte 21 milionë dollarë, rindërtim. Sa kushtojnë 900 metrat e Edi Ramës?
Kushtojnë gati 9.9 milionë dollarë. Po ka imagjinatë njerëzore, a ka njeri që mund të veprojë në këtë mënyrë në pasurinë e qytetarëve, a ka banditizëm shtetëror më të madh se ky? Të derdhësh në një fshat të respektuar sa më nuk bëhet, 9.9 milionë dollarë për 900 metra rrugë.  Po pse të mos e bëjë ky person drejtori i Ujësjellësit, kur kryetari i partisë së tij kontrakton 930 metra rrugë për mbi 9.5 milionë dollarë? Kush ka qenë në Lin e di që ky është një krim i shëmtuar. Standardi që ju po vendosni janë standardet e fundosjes së këtij vendi. Disa të dhëna të agjencisë suaj të prokurimeve.
E dini ku keni arritur ju tani? A e dini sa e kanë fondin limit ata hajdutët tuaj me fondet e prokurimit? 98% e kanë. Fondi i prokurimit është 98% i fondit limit, e paimagjinueshme”

Arben Shahini

Katër shtyllat e programit ekonomik të PD

Kjo qeveri e ka zhytur ekonominë në depresion

Lulzim BASHA

“Nëse ekonomia po jep shpirt arrestoje, nëse ende nuk ka dhënë shpirt qëlloje dhe nëse ka vdekur brohorit me zë të lartë, po bëjmë shtet dhe varrose!”.
Prej mëse dy vitesh ky është realiteti jo laboratorik, por që unë dhe bashkëpunëtorët e mi prekim në takimet me njerëzit, me qytetarët aty ku jetojnë, jo në sallë si kjo që jemi mbledhur sot, por me biznesmenë, me fermerë, me blegtorë, me sipërmarrës, me të rinj, me të punësuar, me të papunë, me të shpunësuar dhe dëgjojmë prej tyre, prekim bashkë me ta realitetin, prekim bashkë me ta ekonominë reale dhe efektet që kanë patur mbi ekonominë reale politikat ekonomike dhe fiskale të ndërmarra nga qeverisja Rama në këto vite.
Ajo që shohim, ajo që prekim dhe jetojmë çdo ditë nuk na pëlqen. Është fakt që ekonomia shqiptare prej kohësh është në stanjacion dhe ka marrë rrugën e recesionit.
Është fakt se ajo nuk prodhon punësimin, se papunësia sipas INSTAT-it është 17.7% në fakt shumë më e lartë. Ndërsa tek të rinjtë 33%, në fakt afër 40%.
Është fakt që borxhi publik është sot mbi 73% të Prodhimit të Brendshëm Bruto, një rrezik i madh për ekonominë shqiptare që nuk lëviz.
Produktet shqiptare vuajnë mungesën e standardeve dhe nuk arrijnë të konkurrojnë as me çmimet e tyre.
Është fakt që eksportet kanë dy vjet që tkurren, ndërsa bilanci tregtar vetëm përkeqësohet. Dilentantizmi i qeverisë me politikat publike është një acarim i përhershëm me ekonominë dhe është e dukshme që ekspertiza e vetme e qeverisë në këto dy vite e gjysmë ka qenë kapja e shtetit.
Është fakt se nuk realizohen të ardhurat dhe as investimet publike, aq të nevojshme për rritjen ekonomike.
Është fakt që infrastruktura në vend që të përmirësohet dhe ta ndihmojë biznesin po përkeqësohet dhe e pengon atë.
Është fakt që ka evazion qeveritar dhe shpërdorim të fondeve publike ku vetëm në vitin 2015 mungojnë mbi 1.2 miliard euro, 400 milionë në pikën e mbledhjes, 777 milionë në pikën e shpenzimit.
Arbitrariteti mbizotëron tek politikat dhe aksionet e qeverisë nga ekspeditat ndëshkimore ndaj biznesit deri tek trillimi i fundit oligarkik i partneritetit familjar publik-privat.
Është fakt që qeveria nuk e dëgjon zërin e biznesit, zërin e ekonomisë dhe se asnjë fiskale apo e natyrës ekonomike nuk është dakordësuar me biznesin.
Është fakt që janë rritur me ligje dhe vendime qeverie kostot e jetesës dhe biznesit që nga fatura e energjisë, tek dyfishimi i taksave qendrore dhe shumëfishimi i taksave lokale. Ndërsa kemi çmimin më të lartë të karburantit në rajon dhe ndër më të lartët në Europë.
Nuk garantohet konkurrenca e lirë dhe e ndershme, por suksesi i biznesit varet nga afërsia familjare apo xhepistë me qeveritarët.
Është fakt që nuk ka besim në treg, se ka rënie të konsumit.
Është fakt që ka largim të kapitalit nga vendi. Prej dy vitesh ka mungesë të kreditimit dhe rënie të kreditimit.
Është fakt që hapësira për politika monetare është ngushtuar e po ngushtohet frikshëm.
Është fakt që pozicioni i Shqipërisë në raport me vendet e rajonit është përkeqësuar. Vetëm këtë vit Shqipëria ka humbur 35 vende në raportin e “Doing Bussines”, renditet e 97-ta në botë dhe e fundit në rajon. Në indeksin e lirisë ekonomike ka humbur 5 vende. Në indeksin e konkurrueshmërisë ekonomike të matur nga “World Economic Forum” ka humbur 8 vende.

Politikat e Ramës kanë pasuruar një grusht njerëzish

Modeli i zhvillimit i bazuar tek konsumi duket afër ezaurimit dhe nuk jep më shtysa për zhvillim.
Është fakt që shqiptarët janë sot më të varfër, kurrsesi më të pasur se dje.
Të gjithë këto janë të vërteta të padiskutueshme, të konfirmuara nga të dhëna zyrtare kombëtare dhe ndërkombëtare. Dhe vulën e thatë mbi këto fakte e vendosin qindra mijë shqiptarë që largohen nga vendi drejt Europës dhe qindra mijë të tjerë që kanë hedhur hapa aktivë për largimin drejt Shteteve të Bashkuara të Amerikës.
Kjo qeveri e ka zhytur ekonominë shqiptare në depresion me veprën e vet, me aksionin e vet arbitrar, ka errësuar vizionin për të ardhmen për çdo familje shqiptare pa përjashtim.
Kjo padyshim nuk është Shqipëria që shqiptarët duan. Kjo nuk është Shqipëria që do të arrijë Bashkimin Europian. Nuk është Shqipëria ku qytetarët, mes tyre edhe unë si prind duam të rrisim fëmijët tanë.
Për mua, për Partinë Demokratike është e qartë se mënyra dhe qëllimi i ndërtimit të politikave institucionale dhe ekonomike është ajo që sjell ndryshimin mes shpresës dhe dëshpërimit, mes bollëkut dhe varfërisë.
Dhe po kështu është e qartë se politikat e deritanishme të qeverisë Rama kanë pasuruar një grusht njerëzish, kanë varfëruar një popull të tërë.
Thatcher thoshte që vjen një moment që socialistëve iu mbarojnë paratë e të tjerëve. Ky moment ka ardhur, është e qartë që Shqipëria nuk ka rilindur, por është një vend ku shqiptarët pavarësisht propagandës 24-orëshe nuk duan të jetojnë.
Ne nuk mund të rrimë duarkryq, na takon të punojmë për të ndërtuar një të tashme dhe një të ardhme të sigurtë, një ekonomi të fortë për të gjithë shqiptarët.
Kemi një alternativë zhvillimi që sjell qëndrueshmëri, besim dhe zhvillim ekonomik. Kryefjala e të cilës është mbështetja, është shërbimi ndaj qytetarit, ndaj fermerit, sipërmarrësit pa dallim. Sa më shumë hapësirë për ta, sa më shumë mundësi për ta kudo ku janë sepse ata janë ekonomia dhe pasuria e vërtetë e vendit.

Punësimin dhe mirëqenie për të gjithë shqiptarët

Partia Demokratike ka sot një alternativë zhvillimi, ky është një projekt me objektiv rritjen ekonomike që garanton punësimin dhe mirëqenien për të gjithë shqiptarët. Ky projekt vendos në qendër të tij qytetarin dhe sipërmarrjen, iniciativën e tyre të lirë dhe prandaj ka në fokus modelin e zhvillimit që rrit prodhimin e kapitalit fizik dhe njerëzor dhe jo modelin e rritjes së konsumit të ezauruar tashmë. Ky projekt garanton ristrukturim dhe transformim cilësor ekonomik. Ky program ekonomik garanton rritjen e të ardhurave për qytetarët dhe në veçanti për pensionistët.
Garanton zvogëlimin e qeverisjes arbitrare dhe rritjen e hapësirës ekonomike dhe mundësive për çdo shqiptar. Ka në qendër të vet realizimin e plotë të lirisë ekonomike, të individit dhe sipërmarrjes, ishte kryefjala e komisionerit Hahn dhe ministrit të Jashtëm, Kutz për sa i përket të ardhmes së ekonomive të vendeve që duan të integrohen në Bashkimin Europian. Çliron ekonominë nga pengesat e deritanishme, garanton rritjen e konkurrueshmërisë së ekonomisë shqiptare.
Padyshim rritja ekonomike, zhvillimi ekonomik, krijimi i shanseve për punësim, për më shumë vende pune dhe paga më të mira nuk është thjesht dhe vetëm politikë ekonomike, por është një përqasje tërësore. Shkurtimisht dua të prek tre nga katër kolonat e kësaj përqasje tërësore para se të përqendrohem tek ajo më kryesorja që ka të bëjë me vizionin tonë ekonomik. Së pari, që ekonomia të rritet të zhvillohet, që kapitali të lëvizë, që kreditimi të rritet dhe po kështu investimet e huaja lipset një mirëqeverisje dhe sundim i ligjit. Pra, institucione të forta të ekonomisë së tregut për të gjithë që mbrojnë pronën private përpara gjithçkaje. Në fushën e mirëqeverisjes dhe zbatimit të ligjit ku garantohen dhe konsolidohen institucionet e ekonomisë së tregut dhe barazia në shërbim të qytetarit dhe sipërmarrjes duke filluar me titujt pronësisë, këtë plagë 25-vjeçare, këtë gjyle të rëndë në këmbët e ekonomisë tonë. Luftën kundër korrupsionit, këtë kancer shoqëror dhe sëmundje permanente të ekonomisë tonë. Forcimin e zbatimit të kontratave si tiparin më dallues i shkallës së zhvillimit dhe zhdërvjelltësisë së një ekonomie kombëtare.
Rritjen e performancës buxhetore dhe qëndrueshmërinë e politikave fiskale për të rritur parashikueshmërinë dhe përmirësuar besueshmërinë e institucioneve publike dhe mjedisin e të bërit biznes në Shqipëri. Për të ulur koston e transaksioneve, pra për të rritur, lehtësuar dhe zgjeruar kreditimin dhe ndërmjetësimin financiar.

Finalizim investimeve publike që janë bllokuar nga Rama

Shtylla e dytë ka të bëjë me konsolidimin dhe finalizimin e infrastrukturës përmes investimeve publike që sot, tash dy vjet janë bërë një fenomen ekzotik në Shqipëri, i cili nuk gjendet në formën e tij të pastër, por vetëm në formën e tij rilindëse, janë fasada të investuara me tre-katër herë kosto e investimit dhe me zero impakt në përmirësimin e jetës së qytetarëve. Pra, projekte zbukurimi palmash, betoni në qendrat e disa qyteteve, me tenderat 3 dhe 4-fish preventivin e tyre dhe që nuk sjellin asnjë përmirësim, por shpeshherë përkeqësim në indikatorët ekonomikë që duhet të ndihmojë zhvillimin në infrastrukturë siç janë lëvizshmëria, kostoja e transportit, etj.
Konsolidimi, finalizimi i infrastrukturës përmes investimeve publike për Partinë Demokratike dhe mua personalisht do të thotë një portofol robust të punëve publike.
Përfundimin e veprave të mëdha që edhe sot e kësaj dite mbeten të papërfunduar, siç është pjesa e rëndësishme e Korritorit 8, rrugës Tiranë–Elbasan, Rruga e Arbërit përfshi këtu edhe tunelin e komunikimit, përfundimi i akseve të jugut. Dhënia e Shqipërisë të një porti plotësisht të lartë me rëndësi strategjike dhe kapacitet furnizimi logjistik të të gjithë rajonit të Ballkanit dhe më gjerë dhe pjesët e tjera lidhëse të infrastrukturës energjetike, dixhitale, telekomunikacionit dhe natyrave të tjera.
Shtylla e tretë, fuqizimi i kapitalit njerëzor përmes mbështetjes së arsimit dhe rritjes përmes fleksibilitetit të tregut dhe shtimit të vendeve të punës.
Në fushën e kapitalit njerëzor, krijimi i vendeve të punës ku rritet cilësia e forcave të punës, sigurohet përputhshmëria për tregun kombëtar dhe më gjerë.
E domosdoshme është thjeshtimi maksimal i rregullave për qytetarët dhe ne do të kujdesemi për trajnim të vazhdueshëm të administratës tatimore dhe të biznesit, veçanërisht në kushtet kur Shqipëria vlerësohet ndër vendet e fundit me njohuri financiare sipas publikimeve të “Standard & Poors”. Biznesit do t’i ofrohet çdo mundësi për të qenë në gjendje të konkurrojë pas viteve mbytëse që ka përjetuar. Ne e dimë se jo gjithmonë shkeljet ndaj biznesit janë të qëllimshme dhe jo çdo penalitet nga ana jonë do të kryhet në mënyrë automatike, por në bazë të analizës së riskut dhe në mbështetje të performancës fiskale historike të çdo subjekti. Në këtë mënyrë do të konsolidojmë dhe eliminojmë taksat e fshehta ose të dubluara apo tarifat administrative paralele siç janë taksat mbi karburantet apo mbi ambientin, apo si këtu në Bashkinë e Tiranës për shkollat, apo taksa e prezantuara para dy apo tre ditësh 30 mijë lekëshi për patentën, taksat që sa vijnë e shtohen të një qeverie që i kanë shteruar jo vetëm paratë, por edhe idetë. Kjo ishte përsa i përket klimës së biznesit.

Taksë e sheshtë 9% për të ardhurat personale e kontributet

Përsa i përket lehtësimit fiskal, platforma jonë është bërë tashmë e ditur madje në këtë sallë, por më lejoni të risjell në vëmendje prezantimin e taksës së sheshtë në nivelin 9% për të ardhurat personale dhe për kontributet, si një objektiv madhor i domosdoshëm për t’u bërë konkurrues me fqinjët tanë në rajon dhe për ta bërë ekonominë të aftë të thithë investime të brendshme dhe të huaja që aktualisht sipas studimeve dhe raporteve e shohin Shqipërinë si zgjedhjen e fundit në Ballkan. Tatime e norma minimale e fikse mbi biznesin e vogël dhe mbi të gjitha për të nxitur konsumin dhe në këtë kuadër propozojmë uljen e normës së Tatimit mbi Vlerën e Shtuar në nivelin 15%. Taksa të thjeshta që nënkuptojnë çlirimin e sipërmarjes shqiptare nga zgjedha e taksave dhe tarifave vendore që imponohen shpeshherë më të larta se detyrimet ndaj qeverisjes qendrore. Biznesi po kështu do të çlirohet nga kërkesat e ringjallura të burokracisë për leje, licenca, autorizime, miratime, aprovime, etj., ku një qebaptore në Tiranë i kërkohet leje mjedisore për 3 mijë euro, ndërsa në mes të parkut ndërtohet pa leje mjedisore.
Financat publike. Rritja ekonomike do të mbështetet nga një mirëmenaxhim i borxhit publik duke rikthyer rregullin fiskal që borxhi publik të mos e kalojë nivelin prej 60% të Prodhimit të Brendshëm Bruto duke vendosur një rregull të ri fiskal që niveli i deficitit buxhetor të jetë nën nivelin e 3% të Prodhimit të Brendshëm Bruto dhe tavani i shpenzimeve buxhetore, 31% i Prodhimit të Brendshëm Bruto duke e konsideruar këtë si një rregull fiskal të paluajtshëm. Asnjë qindarkë, cent, euro, apo dollar nuk do të merret borxh për shpenzime publike jashtë investimeve publike. Përparësinë do ta kenë investimet publike që nxisin zhvillimin ekonomik dhe krijimin e vendeve të reja të punës.
Përsa i përket politikave sociale dhe pensioneve, sot pagat e qytetarëve janë të ngrira që nga viti 2013. 21 mijë persona janë hequr nga skema e ndihmës ekonomike. Përfitimet nga rritja ekonomike do të çojnë në rritjen e të ardhurave për shumicën e popullsisë, por e dimë që të ardhurat shtesë në buxhetin e shtetit duhet të përdoren edhe për drejtësi sociale ndaj angazhimi ynë është rritja e pagës minimale, angazhimi ynë është rritja e pensioneve duke integruar edhe skemën private në një skemë të liberalizuar, duke prezantuar kolonat e dyta dhe të treta për ata që dëshirojnë të ardhura pensionale dinjitoze sipas parimit kontribuo që të kesh.

Subvencionim të faturës së energjisë për familjet në ndihmë ekonomike

Në fushën sociale, Partia Demokratike është angazhuar që tani në opozitë përmes amendamentit që kemi depozituar në Kuvend, i cili aktualisht është rrëzuar në komisionin përkatës, por do të kemi një shans të luftojmë në seancën plenare për subvencionim të plotë të faturës së energjisë deri në masën 200 kilovat për të gjitha familjet në ndihmë ekonomike dhe të njëjtin propozim përsa i përket faturës së ujit.
Të dhënat tregojnë për sektorin e energjisë, një tjetër prioritet i zhvillimin ekonomik në platformën tonë, se një në pesë procedime penale kanë qenë për vjedhje të energjisë, 65% e personave të proceduar kanë qenë pa punë. Prioritare është siç e thashë jo vetëm për subvencionimin e plotë për familjet në ndihmë ekonomike, por edhe krijimi i një fashe mbrojtëse për shtesat në nevojë. Ndërkohë ekonomia shqiptare, edhe në këto kushte, ka nisur të përfitojë nga politikat tona të mëparshme në energji nga produktiviteti i investimeve private, të cilat prodhuan 24.5% ose një të katërtën e energjisë së përgjithshme në vitin 2015 pas një investimi në gjysmë miliardi euro në periudhën 2005-2013. Ndaj ne synojmë ta nxisim më tej investimin në këtë fushë, ndërkohë që do të inkurajojmë liberalizimin e tregut duke mbrojtur më tej investitorët dhe konsumatorin familjar.
Sektor prioritar i zhvillimit për nxjerrjen e ekonomisë nga kriza në vizionin tonë është bujqësia shqiptare. Politikat tona për investimet në rrugët dytësore, subvencioni ndaj fermerëve për ujitje dhe kullim kanë qenë të suksesshme pasi çuan në rritjen e këtij sektori në gati 100 milionë euro në vit deri më 2013. E ardhmja e këtij sektori është e rëndësishme me anë të mbështetjes së fermerëve me një buxhet prej 1.5% të Prodhimit të Brendshëm Bruto, afro 200 milionë dollarë në vit, ne parashikojmë që gjithë sektori i bujqësisë të arrijë rritje ekonomike mbi 5% vitin e parë. Këtu kam parasysh dy kolona: investimet kapitale në ndihmë të bujqësisë, infrastrukturës bujqësore dhe subvencionin e drejtpërdrejtë për fermerin shqiptar. Pra, drejtpërdrejtë dhe jo përmes grumbulluesve, as importuesve, as tregtarëve të naftës apo të plehrave kimike.
Reformat e parashikuara në programin tonë ekonomik në të katër fushat e zhvillimit siç thashë përbëjnë një unitet. Nuk mund të zbatohen dhe nuk mund të kenë sukses nëse nuk ecin bashkërisht dhe paralel me njëra-tjetrën. Ne garantojmë ligje dhe rregulla të thjeshta dhe transparente së bashku me një infrastrukturë moderne me burime njerëzore të kualifikuara që janë parakushte për investimin privat.

Ky program garanton mbarimin e tranzicionit shqiptar

Rritja e investimeve, si private të brendshme ashtu edhe atyre të huaja apo edhe investimeve publike, janë çelësi për të krijuar punësim. Puna vjen përmes investimeve në ekonomi. Rritja e mundësive për punësimin është mënyra e vetme për eliminimin e varfërisë, është mënyra e vetme për krijimin e mirëqenies. Pra, zhvillimi i sektorit privat, rritja e pjesëmarrjes në një treg më të zhvilluar sjell më shumë të ardhura në buxhetin e shtetit, të ardhura që do të shkojnë për investime publike dhe për uljen e borxhit. Programi ynë ekonomik nxjerr përfundimisht ekonominë shqiptare nga kriza dhe apatia e sotme. Ai do të çlirojë burime njerëzore dhe financiare që sot keqpërdoren, vidhen, shpërdorohen apo marrin rrugën për parajsa fiskale tropikale. Ai çliron mbi 1 miliard euro burime financiare në ekonomi çdo vit, 1 miliard euro që i mungojnë shqiptarëve në vitin 2015 e tash 3 vite e që ndoshta gjendet në kontinente të tjera në kontot e qeveritarëve të korruptuar.
Ky është programi ekonomik me taksat më të ulëta në historinë 25-vjeçare të demokracisë që vendos gjithçka në mbështetje të sipërmarrjes. Ky është programi që synon të nxisë në mënyrë të drejtpërdrejtë inovacioni dhe rinovimin teknologjik, rritjen e sipërmarrjes dhe fermave dhe vetëm përmes këtyre politikave të guximshme, inovative, por në të njëjtën kohë prudente ne do të rrisim vlerën dhe konkurrueshmërinë e çdo pike djerse të shqiptarit, të çdo produkti dhe shërbimi që krijohet në Shqipëri.
Programi ynë pra garanton një ekonomi që prodhon, që punëson dhe që i pasuron shqiptarët. Një ekonomi ku konkurrohet lirshëm, ku nuk ka nevojë të njohësh qeveritarin për të patur sukses. Një ekonomi ku ndërtohet e ardhmja dhe përparimi i çdo shqiptari, ku secili gëzon djersën e vet dhe është i motivuar të punojë më shumë, të fitojë më shumë. Ku dominon iniciativa e lirë, prona private dhe shkëmbimi vullnetar.
Ky program garanton mbarimin e tranzicionit shqiptar. Ky program mundëson ardhjen e ekonomisë shqiptare në shekullin e 21-të është një program ekonomik që i drejtohet në veçanti rinisë, të tashmes dhe të ardhmes së saj që të mos jenë kontingjent emigracioni, por të kenë më shumë mundësi, më shumë hapësirë që të punojnë, të jetojnë e të përparojnë në vendin e tyre.
Përmes kësaj oferte ne duam të nxisim, mbështesim dhe fuqizojmë idetë e tyre për biznesin, për pasurim dhe për sukses dhe për një Shqipëri konkurruese dhe të pasur. Për një Shqipëri ku duam të jetojmë e jo të ikim. Për një Shqipëri ku duam të rrisim dhe trashëgojmë fëmijët tanë.

Taksë e sheshtë 9%

Punësim përmes ulje taksash, investime publike, liri për sipërmarrjen dhe barazi para ligjit. Këto janë shtyllat kryesore të programit të PD për daljen e vendit nga kriza. Në një prezantim të posaçëm të Fondacionit për Liri Ekonomike, kryetari i Partisë Demokratike, Lulzim Basha ka prezantuar platformën ekonomike të Partisë Demokratike, me objektiv rritjen ekonomike që garanton punësim dhe mirëqenie për të gjithë shqiptarët. Në konferencë ishin të pranishëm Barbara Kolm, drejtore e Qendrës Ekonomike të Austrisë, Michael Williams, ALTIUS Financial Inc, Mark Crawford, president i Dhomës amerikane të Tregtisë, María Blanco, president i Institutit Liberal të Spanjës. Kryetari i Partisë Demokratike, Lulzim Basha e ka cilësuar programin ekonomik me taksat më të ulëta në historinë 25-vjeçare të demokracisë që vendos gjithçka në mbështetje të sipërmarrjes. “Që ekonomia të rritet, të zhvillohet, që kapitali të lëvizë, që kreditimi të rritet dhe po kështu investimet e huaja e punësimi kërkohet një mirëqeverisje dhe sundim i ligjit. Punësimi dhe vendet e reja të punës vijnë përmes investimeve në ekonomi. Rritja e mundësive për punësimin është mënyra e vetme për eliminimin e varfërisë, është mënyra e vetme për krijimin e mirëqenies”, theksoi lideri i opozitës, duke prezantuar programin e Partisë Demokratike.
Sistemi fiskal: Taksë e sheshtë në nivelin 9%, Tatimin mbi Vlerën e Shtuar në nivelin 15%. Asnjë qindarkë, cent, euro apo dollar nuk do të merret borxh për shpenzime luksi, por vetëm për investimeve publike. Përparësinë do ta kenë investimet publike që nxisin zhvillimin ekonomik dhe krijimin e vendeve të reja të punës. Do të konsolidojmë dhe eliminojmë taksat e fshehta ose të dubluara, tarifat administrative paralele siç janë taksat mbi karburantet apo mbi ambientin apo si këtu në Bashkinë e Tiranës për shkollat apo taksa e prezantuara para dy apo tre ditësh 30 mijë lekëshi për patentën, taksat që sa vijnë e shtohen të një qeverie që i kanë shteruar jo vetëm paratë, por edhe idetë. Fuqizimi i kapitalit njerëzor përmes mbështetjes së arsimit dhe rritjes përmes fleksibilitetit të tregut dhe shtimit të vendeve të punës. Biznesit do t’i ofrohet çdo mundësi për të qenë në gjendje të konkurrojë pas viteve mbytëse që ka përjetuar.
Bujqësia: Buxhet prej 1.5% të Prodhimit të Brendshëm Bruto, afro 200 milionë dollarë në vit. Parashikojmë që gjithë sektori i bujqësisë të arrijë rritje ekonomike mbi 5% vitin e parë. Këtu kam parasysh dy kolona: investimet kapitale në ndihmë të bujqësisë, infrastrukturës bujqësore dhe subvencionin e drejtpërdrejtë për fermerin shqiptar. Pra, drejtpërdrejt dhe jo përmes grumbulluesve, as importuesve, as tregtarëve të naftës apo të plehrave kimike.
Infrastruktura: Përfundimin e veprave të mëdha që mbeten të papërfunduar, siç është pjesa e rëndësishme e Korridorit 8, rrugës Tiranë-Elbasan, Rruga e Arbërit përfshi këtu edhe tunelin e komunikimit, përfundimi i akseve të jugut. Dhënia e Shqipërisë të një porti plotësisht të lartë me rëndësi strategjike dhe kapacitet furnizimi logjistik të të gjithë rajonit të Ballkanit dhe më gjerë dhe pjesët e tjera lidhëse të infrastrukturës energjetike, dixhitale, telekomunikacionit etj.
Politika sociale: Rritje e pagesës për ndihmën ekonomike, subvencionim të plotë të faturës së energjisë deri në masën 200 kilovat për të gjitha familjet në ndihmë ekonomike dhe të njëjtën për faturën e ujit, si dhe krijimin e një fashe mbrojtëse për shtresat në nevojë.

Çfarë ndodhi me kontratën e firmosur me kompaninë në fushën e markimit?

Ish Kryeministri sqaroi dje në Parlament çështjen e artikulimit të kompanisë së markimit që operon në Shqipëri dhe çështjes së Panama Papers. “Këto ditë ka shpërthyer një debat i madh. Debati i markimit. Që ta dini mirë. Çfarë ka ndodhur? Ne firmosëm një kontratë me një kompani kanadeze me reputacion botëror në fushën e markimit, e shënjimit dhe shënjues të vet origjinalë, patentë të saj.
Ne firmosëm, në mënyrë të veçantë që të markohej e gjithë nafta që hynte dhe prodhohej në Shqipëri. 4 milionë litra naftë pusi u hodhën në benzinatat e vendit, i kapët ju. Fillimisht i thatë jo kompanisë. Mafia e naftës e çoi në Gjykatë Kushtetuese. Gjykata Kushtetuese e gjeti në të gjitha aspektet kushtetuese dhe ligjore kontratën. A e dini se në shtator 2015 ai zotëria që do të pleqërojë me Koçon ka miratuar kalimin e aksioneve nga kompania markuese profesioniste “Global Fluid Internacional” tek kompania tjetër të 99,5% të aksioneve? Çakejtë e qeverisë që bërtasin poshtë e përpjetë, se si ka ikur ajo dhe ku u dhanë aksionet, ju i dhatë aksionet. Më thonë se kjo është shkelje kontrate. Se nuk mund të ikte. Pse iku? Sepse jua ngrohu xhepin juve ai.
Pra, a i keni parë mediat tuaja se si bërtasin nga mëngjesi deri në darkë? A e dini ju që pranuat largimin e kompanisë “Global Fluid International”, markuesin dhe prodhuesin e shënjuesit të naftës? Ju mendoni që me media do t’i kapërceni këto? Edhe një herë ju them, se ky operacion është kryer pasi Gjykata Kushtetuese ka vendosur dhe në Gjykatën Kushtetuese vendimi është marrë kur GFI është 75% aksioner, ndërsa kompania tjetër është 25%, po ja që kreu juaj i çmendur për para e ndryshoi situatën, u ble dhe lejoi operacionin. Pastaj merr përdor këllira e stërkëllira për të shpifur, të cilët nuk e mbrojnë dot aspak.
Si përfundim, dekusarizimi i këtij Parlamenti është jetik dhe vendimtar për të ardhmen e Shqipërisë” u shpreh Berisha.

Pse gënjen Mimi për misionin e helikopterit me dy të vrarë?

Thellohet skandali i misionit të helikopterit EC 145 i Forcave të Armatosura që u rrëzua në liqenin e Shkodrës ku si pasojë gjetën vdekjen dy pilotë dhe u plagos një ushtarak. Bëhet e ditur se helikopteri i ushtrisë ka patur për mision ardhjen në ndihmë të helikopterit privat “Shega Trans”, që sipas burimeve, kishte rënë në Malësinë e Madhe, në një kohë që është e ndaluar me ligj që helikopterët e ushtrisë të kryejnë misione që nuk i përkasin Forcat e Armatosura.
Helikopteri i kompanisë private “Shega Trans” pësoi një defekt gjatë fluturimit për të cilin lajmëroi operatorin e kullës në Rinas. Kjo e detyroi që të ulet rreth orës 10:00 në zonën ku është parë në liqenin e Shkodrës. Për t’u shkuar në ndihmë është nisur nga Farka, Helikopteri EC 145, me numër 637, me 3 persona ekuipazh në bord. Janë këto burime jo zyrtare për abc news që sjellin një variant të ndryshëm të aksidentit që ndodhi ditën e mërkurë. Ministrja e Mbrojtjes, Mimi Kodheli deklaroi dje se, helikopteri ishte ngritur në fluturim për një stërvitje rutinë, por në fakt ai gënjeu për të fshehur skandalin që rëndon mbi të.
Ndërkohë, Prokurori i Përgjithshëm, Adriatik Llalla ka ngritur një grup hetimor për zbardhjen e shkaqeve të rrëzimit të helikopterit të ushtrisë ku humbën jetën dy pilotë dhe u plagos një ushtarak. Burime nga institucioni i akuzës bëjnë të ditur se, kryeprokurori Llalla ka zhvilluar gjatë paradites së djeshme një takim me Presidentin Bujar Nishani, ku është diskutuar pikërisht për ngjarjen e rëndë. Hetimi do të bëhet edhe për rrëzimin e helikopterit të kompanisë private “Shega trans” ku do të merren të gjitha provat dhe videot edhe ato që janë bërë publike në rrjetet sociale dhe në mediat e ndryshme.
Ndërkohë, “Eurocopter”, kompania që ka prodhuar helikopterin e rrëzuar të mërkurën në Shqipëri, do të ofrojë asistencë dhe ndihmë në hetimin e ngjarjes, nëse kjo do t’i kërkohet nga Ministria e Mbrojtjes së Shqipërisë. Deklarata është bërë nga shefi i zyrës së shtypit të “Airbus Helicopter”, Guillaume Steuer.
“Airbus Helicopter” është në dijeni të aksidentit tragjik të një helikopteri H145. ‘Airbus Helicopter’ është i pikëlluar thellë nga ky aksident dhe zyrtarët e kompanisë shprehin ngushëllimet e tyre më të thella për familjet, miqtë dhe kolegët e atyre që humbën jetën. Kompania është e gatshme për të mbështetur plotësisht autoritetet në hetimin e shkakut të aksidentit”, ka deklaruar Seuer.
Në vendin e aksidentit qëndrojnë forcat e policisë, të cilat e kanë rrethuar atë, si dhe një mjet lundrues po i Policisë së Shtetit. Ende nuk është bërë e ditur se kur do nxirret nga uji helikopteri i dëmtuar rëndë nga rrëzimi.
Gjatë paradites së djeshme u fol për një ulje të mundshme të këtij helikopteri në Doganën e Hanit të Hotit, dhe transportimit të një sasie mermeri. Por helikopteri i ulur ndryshon nga helikopteri i rrëzuar, i pari është me rrota dhe i dyti me slita.
Xhevair Ajazaj, peshkatari që mori me varkë ushtarakun Gerald Baramuça, tregoi se, në momentin e mbërritjes pranë helikopterit kishte parë dy pilotët pa jetë të lidhur në vendet e para, jelekë shpëtimi të shpërndarë dhe shumë shkumë mbi ujë, ndërsa i mbijetuari ishte 15 metra larg, duke u munduar të notonte me një dorë. Ai tha se ushtaraku i kishte kërkuar ndihmë për ta çuar në spital.
Kur kanë kaluar 24 orë nga aksidenti me dy viktima dhe një të plagosur, mbetjet e helikopterit EC 145 të Forcave të Armatosura vazhdojnë të qëndrojnë në ujërat e Liqenit të Shkodrës. Një motoskaf i Forcave të Policisë Kufitare dhe dy policë ruajnë zonën. Askush nuk lejohet t’i afrohet bregut të liqenit, në zonën ku ra helikopteri dhe ku humbën jetën pilotët Florian Deliaj dhe Donald Hoxha.
Bëhet e ditur se, Prokuroria e Shkodrës ka nisur një hetim mbi ngjarjen. Për të zbuluar shkaqet e përplasjes është e nevojshme që të analizohet kutia e zezë e mjetit, që duhet nxjerrë nga një thellësi më shumë se 6 metrash. Burime të Prokurorisë thanë se, organi i hetimit po përgatit një kërkesë për Ministrinë e Mbrojtjes për t’i vënë në dispozicion një vinç të përmasave të mëdha. Një tjetër kërkesë do të bëhet edhe për të marrë zyrtarisht planin stërvitor që duhet të zbatonte mjeti, itinerarin e lëvizjes si dhe të dhënat mbi kushtet teknike.

Gënjeshtra që kompromenton Mrikën në rrëzimin e helikopterit

Zbulohen fakte dhe foto të reja për rrëzimin e helikopterit në Liqenin e Shkodrës. Ish-Kryeministri Berisha ka publikuar disa foto dhe mesazhin e një qytetari, i cili e informon se helikopteri i ushtrisë ka fluturuar mbi Shkodër në orën 8:26 të mëngjesit. “Qytetari dixhital përgënjeshtron njoftimin e gjeneral Trafikut! Helikopteri ka fluturuar mbi Shkodër në orën 8:26 të mëngjesit, ka dërguar ngarkesën në Vermosh dhe është kthyer në doganën e Hanit të Hotit dhe aty ka marrë një thes (mundet me miell për gjeneral Trafikun). Shih fotot! Sb”, shkruan Berisha në një postim në Facebook, duke publikuar të plotë mesazhin e qytetarit nga Shkodra.

“Mirmjes Doktor, uroj të jeni mirë. Në mendimin dhe gjykimin, sipas rrjedhës së ngjarjeve dhe fakteve për helikopterin ngjarja ka ndodhur kështu:

1) Një helikopter ka kaluar mbi qytet në Shkodër në orën 8:26 minuta dhe ska patur helikopter tjetër që të jetë dëgjuar më vonë deri në atë të shpëtimit të dërguar në drekë, pas rrëzimit të helikopterit transportues.

Helikopteri nuk është nisur nga Farka në orën 12:10 siç pohoi Ministria dhe Ushtria dje.

2) Helikopteri është ndalur në Vermosh, ka shkarkuar mermer pavarësisht zërave që flasin se si helikopteri po transportonte në zonën e Kelmendit një arkivol.

3) Helikopteri është kthyer në zonën e Malësisë së Madhe rreth orës 10 e pak minuta.

Ka ngarkuar (!!!!!!) nga një furgon i bardhë për t’u kthyer më pas për Tiranë.

Fotot bashkëngjitur që janë të orës 10:05 tregojnë një furgon të bardhë afër helikopterit të ulur në Grizhë afër liqenit dhe dy persona. Njëri ka një thes në dorë dhe është afër helikopterit.

Çfarë kërkonte helikopteri i ulur në afërsi të doganës?! Në Shkodër!?

Menjëherë sapo helikopteri ka rënë, forcat e policisë janë afruar dhe furgoni ka qenë gjithë kohës në fushë pa lëvizur. Askush akoma nuk është marrë me këtë fakt!!!

Mendoj që duhet të shqyrtohet me kujdes, pasi mendoj se është më rëndë se sa duket”, shkruan qytetari në mesazhin dërguar ish-Kryeministrit Berisha.

Berisha: Qeveria po bën gjithçka për të fshehur shkakun e rrëzimit të helikopterit

Ish-Kryeministri Berisha ngre dyshime se helikopteri që u rrëzua në Liqenin e Shkodrës po transportonte mermer për rezidencën e ministres së Mbrojtjes, Mimi Kodheli në Vermosh. Në një status në Facebook, Berisha shkruan se, “Shkodra zien dhe gumëzhin për rrëzimin e helikopterit, qeveria përpiqet të fshehë shkaqet dhe rrethanat?!?! “Në rast se kjo është e vërtetë, vazhdon më tej Berisha, kemi të bëjmë me një krim të shëmtuar shtetëror”.

“Të dashur miq, helikopteri që u rrezua dhe ra në Liqenin e Shkodrës, në të cilin humbën jetën dy pilotët, duket se transportonte meremer për në rezidencen malore në Vermosh të Mimi Kodhelit! Në rast se kjo është e vërtetë kemi të bëjmë me një krim të shëmtuar shtetëror. Qeveria po bën gjithçka për të fshehur shkakun e vërtetë dhe rrethanat e rrëzimit të helikopterit, pra për t’i mbuluar me heshtje dhe për t’i lënë ato në fund të liqenit”, shkruan Berisha.

Ish-Kryeministri Berisha shkruan më tej se, gazetari Elvis Nabolli që jep këtë lajm në FB e tij, kërcënohet me jetë dhe detyrohet të heqë statusin nga FB. “Neo-bllokmeni Ilir Beqja kërcënon fizikisht gazetarin e “Zërit të Amerikës” në spital tek i plagosuri. Ndërkohë, portali “Syri.net” jep një video që tregon se helikopteri është ndalur në një lëndinë pranë doganës së Hanit të Hotit (mundet për të marrë ngarkesë?) dhe prej aty është nisur për udhëtimin fatal.

Ndaj peshkatarëve që arritën të parët në vendngjarje dhe banorëve të zonës po ushtrohet dhunë që të mbyllin gojën. Për të fshehur të vërtetën, janë konfiskuar edhe celularët e peshkatarëve dhe banorëve, sepse mund të kenë regjistruar pamje kompromentuese”, shprehet më tej Berisha.

Berisha i ka kërkuar Parlamentit që të ngrejë urgjentisht komisionin e verifikimit me çdo kusht të këtyre të dhënave tejet tronditëse. “I bëj thirrje Presidentit të Republikës të shfrytëzojë të gjithë kompetencat e tij për të verifikuar rrethanat dhe shkakun e kësaj tragjedie! Sb”, përfundon Berisha.

Dy pilotët përcillen në banesën e fundit

Trupat e pajetë të dy pilotëve të Forcave të Armatosura u përcollën për në banesën e fundit në Varrezat e Dëshmorëve, pas homazheve të zhvilluara në hollin e Pallateve të Kongreseve. Në lamtumirën e fundit të dy pilotëve ishin të afërm, kolegë, politikanë, ambasadorë, përfaqësues të Forcave Ushtarake, policore dhe qytetarë. “U prehshi në paqe, Kapiten Florian Deliaj dhe Toger Donald Hoxha”, shkruante kryetari i PD, Lulzim Basha në Facebook pas kryerjes së homazheve në nder të dy pilotëve. Toger Donald Hoxha dhe kapiten Florian Deliaj u shpallën “Dëshmorë të Atdheut” pas vdekjes.

Dy pilotët e Forcave të Armatosura humbën jetën në mesditën e së mërkurës. Helikopteri me të cilin po fluturonin u rrëzua në Liqenin e Shkodrës në Grizhë të Malësisë së Madhe. Dy pilotët gjetën vdekjen e menjëherëshme. I treti në bordin e helikopterit EuroCopter 145, ushtari profesionist Gerald Baramuça, mbeti i plagosur. Ai ndodhet nën kujdesin e mjekëve në Spitalin e Traumës në Tiranë.

Toger Donald Hoxha

Toger Donald Hoxha u lind më 17.06.1988 në Berat. Kreu Akademinë e Aviacionit të Pozzuoli-t në Napoli, Itali, ku e përfundoi me sukses në vitin 2011 dhe u çertifikua si pilot. Pas shkollimit, u emërua si pilot në Forcën Ajrore dhe më pas në Bazën Ajrore të Farkës, ku dhe shërbeu nga viti 2012 me profesionalizëm e devotshmëri. Detyra e fundit e toger Hoxhës ishte “pilot (SAR)” në Grupin e Helikopterëve në Bazën Ajrore të Farkës. Kreu kurse të ndryshme kualifikimi, brenda dhe jashtë vendit, për pilotimin e helikopterëve të tipit “EC 145” (SAR).

Kapiten Florian Deliaj

Kapiten Florian Deliaj lindi në 01.10.1973 në Dibër. Kreu studimet në Akademinë Ushtarake “Skënderbej”, nga ku u diplomua në vitin 1996 në specialitetin “Oficer Aviacioni”. Nga viti 2004 e në vazhdim ka kryer detyra të ndryshme në Repartin e Farkës, si pilot ekuipazhi i parë në BO105 dhe komandant ekuipazhi SAR. Kapiten Deliaj ka kryer kurse kualifikimi brenda dhe jashtë vendit. Ai ishte i martuar, me 3 fëmijë.

R.POLISI

Mos bëni viktimën

Eduart HALIMI

Çështja e mandateve të deputetëve, të cilët akuzohen nga opozita se kanë abuzuar me fondet publike nuk është e re. Ne e kemi diskutuar kërkesën tonë në Komisionin e Mandateve dhe në këtë komision mazhoranca në mënyrë unanime rrëzoi kërkesën e opozitës për ta çuar mandatin në Gjykatën Kushtetuese. Erdhi në Parlament u mblodhëm, mazhoranca e gjitha refuzoi dhe rrëzoi kërkesën e PD. Doli vendimi i Gjykatës Kushtetuese për rastin e deputetit Kokëdhima, të cilin po ashtu  ju e kishit refuzuar kohë më parë dhe po në atë vendim, Gjykata Kushtetuese shtronte pyetjen çfarë ndodh, jo vetëm për rastin Kokëdhima, por çfarë ndodh në rastet, kur deputeti akuzohet që ka fituar fonde publike dhe mazhoranca e kryeministri ia fsheh. Si përgjigje të kësaj pyetje, Gjykata Kushtetuese thotë: Në të gjitha rastet, për të gjithë deputetët, majtas-djathtas kudo qofshin, për të gjithë deputetët ka vetëm një gjykatë, ka vetëm një organ të drejtën ekskluzive për ta shqyrtuar, dhe kjo është Gjykata Kushtetuese. Tani, ju keni marrë dy vendime në thyerje të rëndë të Kushtetutës dhe nuk ua kemi thënë ne këtë. Ua ka thënë Gjykata Kushtetuese. Kishit marrë tre, për Koço Kokëdhimën për Valentina Leskaj dhe për Rakip Sulin. Keni marrë tre vendime antikushtetuese. Për njërin e korigjuat, ndryshuat vendimin dhe e çuat kërkesën në Gjykatën Kushtetuese. Të njëjtën procedurë duhej të kishte ndjekur Parlamenti edhe për dy rastet e tjera. A e kemi ngritur ne kur shqyrtuam rastin  Kokëdhima në Komisionin e Mandateve që prit se kemi dhe mandatet e tjera dhe ju nuk e bëtë, e rrëzuat? Eshtë kështu apo jo? E pra, keni shkelur Kushtetutën. Keni shkelur Kushtetutën dhe mos vini këtu tani të bëni viktimën. Pse bëni viktimën, pse e bëni zotërinj deputetë. Viktima nuk jeni ju më falni, por viktimë këtu janë qytetarët se qytetarët pretendojnë se u është grabitur prona. Paratë e qytetarëve janë ato. Pse bëni viktimën tani këtu sikur po bëhet ndonjë ndëshkim. Jo. jo, nuk po ndëshkohet njeri. Ne pretendojme se ju keni shkelur Kushtetutën, duke përfituar një koncesion apo duke marrë para publike të qytetarëve, jo tonat, por të qytetarëve.  Dhe këtu, viktimat janë qytetarët dhe jo deputetët. Dhe këtu ka vetëm një rrugë, ju zgjateni sa të doni, zvarriteni, por ka një gjë që nuk e shpëtoni dot.  Çështja e ekzekutimit një më një, gërmë për gërmë, të vendimit të Gjykatës Kushtetuese dhe të Kushtetutës. Dhe nuk ka absolutisht asnjë arsye as për ta çuar nesër as pasnesër, as të hënën dhe as të mërkurën, sepse kjo çështje është shumë e qartë, është shumë e qartë për 140 deputetë këtu, është shumë e qartë për të gjithë qytetarët se çdo deputet që dyshohet se ka përfituar fonde publike gjatë kohës që ka veshur kostumin e deputetit në emër të tij apo familjarëve, ai duhet të shkojë për gjykim në Gjykatën Kushtetuese. Ne nuk jemi gjykatë, ne nuk e ndajmë dot nëse e kanë shkelur apo nuk e kanë shkelur ligjin, nëse e kanë bërë në përputhje apo jo këtë gjë. I vetmi organ që e ka të drejtën ekskluzive është Gjykata Kushtetuese. Keni marrë tre vendime antikushtetuese, njërin e korrigjuat, korrigjoni edhe dy vendimet e tjera në mënyrë që të ecim dhe me proceset e tjera përfshirë edhe Komisionin për Reformën në Drejtësi,  për të cilin kemi kaq kohë që presim të ekzekutoni vendimin e Gjykatës Kushtetuese.

Të votohet ndryshimi për komisionet hetimore, i vlen parlamentarizmit dhe shoqërisë

Genc POLLO

Komisionet hetimore janë shumë të rëndësishme për funksionin e Parlamentit si kontrollues i ekzekutivit, të rëndësishme për opozitën që në kompozicionin kundrejt mazhorancës, i takon së pari të jetë iniciatore e kontrollit parlamentar në përputhje me rregullat në fuqi. Çfarë ndodhi më 2014?! Partia Demokratike me numrin e kërkuar të firmave të deputetëve propozon ngritjen e dy komisioneve hetimore, të cilat janë në tagrin e saj kushtetues dhe nuk janë objekt i miratimit apo të refuzimit nga mazhoranca.
Me pretekste si ky që diskutuam pak më parë për çështjen e mandateve në papajtueshmërinë e tyre, mazhoranca PS–LSI refuzon. Opozita nuk hedh gurë, nuk del për këtë çështje në rrugë, por ndjek rregullin institucional. Vendimin e shumicës PS-LSI e çon në Gjykatën Kushtetuese. Gjykata Kushtetuese bazuar dhe në raste të ngjashme europiane, kujtoj nga Italia dhe Gjermania, merr një vendim të qartë, absolutisht të qartë si rasti i mandateve që diskutuam pak më parë, ngritja e komisionit hetimor përsa kohë që këtë e kërkojnë 28 deputetë, pra numri i opozitës, duhet të ndodhë në mënyrë automatike, nuk është objekt i diskrecionit të mazhorancës. Vendimi i Gjykatës Kushtetuese pritej që të botohej në gazeta zyrtare dhe të hynte në fuqi dhe kërkuam përsëri në Konferencë të Kryetarëve që dhe mazhoranca PS-LSI të respektonte shtetin ligjor, Kushtetutën, vendimin e Gjykatës Kushtetuese. Përsëri refuzim. Pastaj ndodhi dhe dhuna. Pastaj ndodhën edhe elementët e ish-burgaxhinjve të PS. Bojkot, mospjesëmarrje nga opozita dhe në fund me peripecitë që ju i njihni, marrëveshja e 24 dhjetorit 2014, e cila në pikën e dytë të saj lexon kështu: Të gjitha partitë do të kontribuojnë për dialogun politik, i cili do të zhvillohet kryesisht në Kuvend, si dhe për respektimin e Kushtetutës dhe zbatimin e saj sistematik të vendimeve të Gjykatës Kushtetuese, shumica qeverisëse dhe opozita angazhohen për rishikim të rregullave, në drejtim të funksionit eficent të komisioneve hetimore parlamentare, bazuar në praktikat më të mira ndërkombëtare. Pra, kërkohet të rishikohet ligji i komisioneve hetimore.  U ngritën komisione të posaçme në vijim të kësaj marrëveshjeje. Por e vërteta është që për komisionet hetimore rregullat janë të qarta. Është çështja e vullnetit të mirë ajo që i ka penguar dhe meqë gjithë vëmendjen dhe energjinë politike dhe me të drejtë e mori çështja e dekriminalizimit dhe duke besuar që mazhoranca kishte zënë mend për pengimin antiligjor që i bëri hetimit parlamentar, ndoshta nuk do të ishte nevoja të ndryshoheshin rregullat, të amendohej ligji, sepse me vullnet të mirë mund të funksionojnë gjërat. Por kjo fatkeqësisht nuk ndodhi dhe nuk ndodhi në një komision hetimor, në atë të ngritur për problemin e abuzimit të ekzekutivit me serverin e tatimeve. Do të kisha dashur që të ishte përmendur në fjalimet përkatëse, se si po në mënyrë sistematike, në më shume se 7 mbledhje, mazhoranca nuk u paraqit në mbledhjen e kërkuar nga kryetari i komisionit, duke e bërë të pamundur mbledhjen, duke e bërë të pamundur marrjen e provave, duke bërë të pamundur dëgjimin e dëshmitarëve. Mungesë e vullnetit politik?! Dëshirë për të fshehur një zullum qeveritar?! Të gjitha mund t’i mendojmë, por shkeljen e ligjit nuk mund ta pranojmë dhe zbatimi i tij është një mënyrë për të gjetur të vërtetën. Çfarë ka ndodhur me qindra mijëra dokumente, skeda tatimore të të gjithë bizneseve në Shqipëri? Opozita nuk vjen, opozita thërret mbledhjen dhe mbledhja dështon, kur kjo bëhet çështje e madhe, kur kjo bëhet objekt që opozita të përdorë një masë jo të zakonshme, kufizimin e pjesëmarrjes së vet në Parlament, vetëm atëherë vijnë deputetët e Partisë Socialiste dhe pas tyre të LSI që të fillojë të funksionojë Parlamenti që mund të dëgjonte nga ish-ministri i asaj kohe i Financave se ata nuk ecin me rregulla të shkruara, por me fjalë goje shumë treguese për mentalitetin e qeverisë. Por është e vërtetë ajo që u tha që në komisionin tjetër që unë kam privilegjin të kryesoj, ky fenomen nuk ka ndodhur. Por aty ka ndodhur diçka tjetër, ka ndodhur ajo që megjithë kërkesën e hershme të komisionit hetimor të marrë me vendim me konsensusin që ligji nuk e detyron, qeveria nuk solli përgjigje. Që nga muaji janar e kemi konstatuar se kishte ardhur 30% e vëllimit, nga 100% që duhej të vinte.  Në qoftë se kjo ka qenë ngarkesë për administratën publike, ne s’na takon të bëhemi sherrxhinj për gjëra të vogla.
Afati dukej i mjaftueshëm, 5 muaj. Kohëzgjatja e komisionit hetimor mund të priste dhe dy javë, përtej asaj që kërkon rregulli, mjafton që informacioni të vinte. Dhe jemi mbledhur pasi unë e kam ngritur çështjen në Konferencën e Kryetarëve, ku i kam kërkuar ministres që mban marrëdhëniet me Parlamentin, por dhe kryetarit të grupit socialist: nuk i përgjigjet qeveria detyrimit ligjor, pasi pritëm dy javë, dy javë e dy javë.
PD ka filluar që nga nëntori i 2013 me emër, mbiemër dhe vend pune dhe skedë penale dhe denoncojë dhe janë disa duzina.
U përmend këtu një mësues, një drejtor shkolle në Ballaban i emëruar nga rilindistët që është i dënuar penalisht, modeli që i japin nxënësve, modeli që i japin të rinjve atyre që kanë përgjegjësinë e edukimit, është vënë një burgaxhi. Drejtor shkolle është një rast, por raste të tjera ka plot. Por një rast u fitua të paktën dhe do ky mjafton që një njeri që kishte ndërgjegje të paktën të thoshte çfarë po bëjmë t’i kërkonte llogari zonjës ministre të Arsimit, që nuk e kemi këtu sot.
Ka raste të tjera pa fund, por informacionin ne e duam 100% që të punojmë mbi këtë, pavarësisht që ne e kemi filluar mbi atë që na ka ardhur. Kemi rastin e z. Skuqi. Ai zbuloi që njëfarë Serezi, aktivist socialist i Kombinatit, i afërt me ministrin e Brendshëm, ishte emëruar në polici dhe ishte kapur nga Policia e Gjirokastrës me kamion me drogë. Shkruajti fillimisht në Facebook, pastaj në gazeta të ndryshme dhe u kërcënua menjëherë. Ne si komision deshëm ta thërrisnim për t’i dhënë njëfarë mbrojtje publike, ne s’kemi tagër për ta ruajtur me policë dhe për ta dëgjuar një rast një gazetar investigativ në Gjirokastër që zbulon një gjë të tillë, duhet përshëndetur.  E çfarë ndodhi?! Në bazë të rregullores gjashtë deputetë opozitarë në një komision kanë të drejtë të padiskutueshme dhe është automatike të thirren në dëgjesë. Por çfarë bëri mazhoranca?! Mazhoranca në mënyrë të paturpshme mungoi për të thënë që ju nuk keni kuorum. Ju nuk bëni dot mbledhje. Ne vazhduam ashtu siç ishim, zotëria i tha të gjitha dëshmitë e veta. Çfarë bëri mazhoranca?! I kërkoi sekretares së Përgjithshme ta fshinte regjistrimin dhe kryetarit të Kuvendit ta fshinte regjistrimin dhe ata e bënë se nuk donin të linin një provë. Një dëshmi që e obligonte njeriun e tyre të emëruar të kundraligjshëm në polici dhe të kapur me drogë.  Ky pra, është keqpërdorimi i mazhorancës dhe ky është problem qe ne duhet të rregullojmë. Prandaj duke parë që me vullnet të mirë gjërat nuk funksionojnë, atëherë proceduam me rregull konkret. Çuam amendimin e ligjt në mënyrë që mazhoranca sot, por dhe mazhoranca nesër, por dhe ajo pasnesër të mos ketë në rastin e keqdashjes mekanizmin për të penguar hetimin parlamentar, për të penguar mbledhjen e komisioneve hetimore. Prandaj zonja e zotërinj është për të ardhur keq që në komisionin përkatës ky amendament është rrëzuar nga mazhoranca PS-iste-LSI-iste,  sepse do të ishte në nderin e tyre të paktën për t’u larë nga ai zhul që është shfaqur publikisht që ta kishin botuar këtë sepse nuk ndryshonte një gjë të madhe. Jo përsëri nuk e votoi. Nuk jam i sigurt që do të ketë reflektim nga ajo mbledhje deri në votimin e sotëm, por gjithsesi është një mundësi. Unë ju bëj thirrje: votojeni zonja e zotërinj. Është një amendament jo specifik në favor të opozitës së ditës, PD-së, është një favor ndaj Kuvendit dhe rolit të tij kushtetues për të kontrolluar ekzekutivin dhe për të kufizuar zullumet e mundshme të tij.

Paloka: Dërgoni kërkesat për mandatet në Kushtetuese

Kryetari i Grupit parlamentar demokrat, Edi Paloka i kërkoi dje mazhorancës t’i drejtohet menjëherë Kushtetueses në lidhje mandatet e deputetëve socialistë Rakip Suli dhe Valentina Leskaj për papajtueshmëri me Kushtetutën, pasi kanë përfituar fonde publike gjatë ushtrimit të funksionit të tyre si deputetë. “Sipas informacioneve që kemi ne që ju i thatë sipas mënyrës suaj, më në fund  mazhoranca ka vendosur të tërhiqet nga shkelja e Kushtetutës dhe të zbatojë vendimet e Gjykatës Kushtetuese. Sigurisht, është ajo që ne kërkojmë prej kohësh dhe e mirëpresim një akt të tillë pavarësisht se ky Parlament edhe në këtë moment derisa të bëhet votimi i këtyre akteve, vazhdon të jetë në krim kushtetues. Për këtë arsye, unë ju kërkoj meqë kemi më në fund edhe mirëkuptimin e mazhorancës të mos e vazhdojmë këtë krim kushtetues, ta votojmë sot, të futet në rend të ditës, të futet në rend të ditës dhe të votohen sot të dy kërkesat dhe të dërgohen siç thatë ju në Gjykatën Kushtetuese, pra sot, përderisa më në fund mazhoranca vendosi të heqë dorë nga krimi kushtetues, kjo është kërkesa ime proceduriale”, tha kreu i Grupit parlamentar Demokrat.

Psikopati: Po u zgjodh Trumpi President do prishim marrëdhëniet me SHBA-në

Kryeministri Edi Rama ka deklaruar sonte në emisionin “Zona e debatit” të Baton Haxhiut në TV “Klan Kosova”, se nëse Donald Trump zgjidhet President i SHBA-ve, atëherë marrëdhëniet e Shqipërisë me të do të cenohen.
Rama tha se Trump është një fatkeqësi për SHBA-të dhe uroi që ai të mos zgjidhet kurrë President.
Këto deklarata, Rama i bëri nën cilësinë e Kryeministrit të Shqipërisë.

Pyetje – Përgjigjet
Gazetari: Çfarë mendimi keni për Donald Trump?
Rama: Unë e kam thënë hapur atë që mendoj për Donald Trumpin dhe nuk e kam fare problem ta përsëris as këtu as kudo që të jetë; as në shqip dhe as në anglisht, që Donald Trump është kërcënim për Amerikën dhe nuk diskutohet që është kërcënim edhe për marrëdhëniet shqiptaro-amerikane.
Gazetari: Që i bie?
Rama: Që i bie që mos e dhëntë Zoti që amerikanët ta zgjedhin President. Sepse do të ishte një President që do t’i bënte dëme të mëdha Amerikës dhe sigurisht do të ishte një kërcënim real për marrëdhëniet shqiptaro-amerikane.
Gazetari: Po flet si Kryeministër apo si intelektual?
Rama: Jo mo flas si Kryeministër…
Gazetari: Si Kryeministër?
Rama: Unë nuk e ndaj asnjëherë veten nga vetja. Sot jam edhe Kryeministër, por në radhë të parë jam Edi Rama.

Daja i tifozit që u vra: Nuk vdiq aksidentalisht, është shtyrë nga polici

Të afërmit e Mikel Selmanit, tifozi që humbi jetën pasditen e të mërkurës gjatë ndeshjes Flamurtari-Kukësi, japin detaje për ngjarjen. Daja i viktimës, Xhelil Xhelilaj deklaron se ndryshe nga sa u deklarua nga policia mbrëmjen e të mërkurës, vdekja e 42-vjeçarit nuk ishte aksidentale, por nga policia. “Mikeli nuk vdiq aksidentalisht, është shtyrë nga polici. Shkaktari të marrë dënimin e merituar”, u shpreh daja i viktimës. Ai shtoi më tej se, “kemi shkuar në Prokurori për hetimin e ngjarjes”.
Dëshmitarë të ngjarjes treguan mbrëmë se, rezultati i humbjes së ndeshjes ka shkaktuar pakënaqësi në radhët e tifozëve vlonjatë, ku disa prej tyre janë çuar duke u larguar nga stadiumi, ndërkohë që pikërisht në këtë moment ka ndodhur dhe incidenti. Një prej tifozëve, i identifikuar si 42-vjeçari Mikel Selmanaj, ka qenë duke dalë së bashku me të tjerë, dhe pikërisht në momentin që ka qenë në shkallë, ka rënë duke përplasur dhe kokën. Menjëherë 42-vjeçari është transportuar për në spital, por goditja ka bërë që të humbiste jetën në moment dhe gjithçka ka qenë e kotë.
Ermal Xhelilaj, një tjetër i afërm i Mikelit thotë se 42-vjeçarit nuk i është dhënë ndihma në kohë. Ai thotë se pavarësisht se në stadium ndodhej një ambulancë, Mikeli është transportuar nga policët, gjë që, sipas tij, mund të ketë sjellë edhe ndonjë frakturë. “Duhet punuar me rrjetet sociale, është një video që ndihma e shpejtë është dhënë pas 10 minutash dhe mënyra si është transportuar ka qenë në mënyrën më të keqe. Pavarësisht se në stadium është një ambulancë për çfarëdolloj emergjence dhe është transportuar nga policët me uniformë. Gjë e cila mund t’i ketë shkaktuar dhe ndonjë frakturë po ashtu dhe vdekjen. Këtë gjë e provojmë me dëshmitarë, ka dhe video. Ne i kemi si me emra dhe mbiemra dhe me prova dëshmitarët që e provojnë këtë që ka ndodhur”, ka thënë ai.
Ndërkohë, bëhet e ditur se Prokuroria e Vlorës ka nisur hetimet për vdekjen e tifozit. Njëra nga pistat e hetimit është ajo e dhunës së ushtruar nga një punonjës policie. Por, megjithatë ende nuk ka rezultate konkrete dhe pse janë marrë në pyetje shumë tifozë të tjerë. Policia e Vlorës njoftoi se, Mikel Selmani ka rënë aksidentalisht nga shkallët e stadiumit dhe për pasojë ka gjetur edhe vdekjen, por dëshmitarët ka deklaruar se viktima është shtyrë nga një polic dhe ka gjetur vdekjen pasi ka rënë në tokë dhe ka përplasur kokën. Nga Spitali i Vlorës u raportua që 42-vjeçari kishte mbërritur i vdekur dhe kishte plagë në kokë. Ndërkohë burime jo zyrtare tregojnë, se një punonjës policie është pezulluar nga puna për këtë ngjarje, por nuk jepet informacion për identitetin e tij.

Policia vret tifozin në Vlorë pas ndeshjes Flamurtari-Kukësi

Një ngjarje tragjike ka ndodhur në stadiumin e Vlorës të mërkurën pas përfundimit të ndeshjes mes Flamurtarit dhe Kukësit. Një tifoz u vra, pasi u shty nga një punonjës policie dhe ra nga shkallët e stadiumit të Vlorës, duke përplasur kokën pas betonit. Dëshmitarët në vendngjarje thanë se, kanë qenë policët që i shtynë tifozët në dalje të stadiumit, pasi ata kanë qenë duke sharë. Sipas dëshmitarëve, 42-vjeçari Mikel Selmanaj, banues në Rradhimë të Vlorës, u rrëzua, pasi u shty nga një punonjës policie pas përfundimit të ndeshjes së futbollit Flamurtari-Kukësi. Një tifoz deklaroi pas ngjarjes së rëndë se e kishte parë vetë policin që kishte shtyrë 42-vjeçarin Mikel Selmanaj.
“E kam parë me sytë e mi, nëse s’besoni hapni kamerat e pallatit se ka shumë kamera që të kontrollojë vendin ku personi ndërroi jetë. E ka hedhur një polic. E ka kapur nga krahu i majtë dhe e ka hedhur që na shkallët”, deklaroi të mërkurën në mbrëmje një nga tifozët në stadium. Në një video të shpërndarë në rrjetet sociale duken pamjet, kur tifozi sapo ka ndërruar jetë dhe njerëzit përreth viktimës janë të shokuar nga ajo që ndodhi. Sipas burimeve nga Spitali Rajonal i Vlorës, personi në fjalë ka mbërritur i pajetë në spital.
Ndërkohë pas publikimit të videos në internet ka patur reagime të ashpra të qytetarëve. “Çfarë policash janë këta, si i hedhin nga shkallët. Ja ai me xhup të zi, shefi i komisariatit. Jemi duke shikuar një polic që hodhi një qytetar nga shkallët pse shau policët. Shohim një njeri të shtrirë në tokë, nuk e kap asnjë njeri me dorë. Gjaku është sheshit. Policët në këto momente po e ngrenë. Nuk dihet çfarë po ndodh, e nxorën, shikojeni gjakun në shesh. Po e fusin në makinën e policisë, duke e dërguar në Spitalin e Vlorës. Shefat janë duke drejtuar makinën. Ata po bërtasin me njëri-tjetrin. Njeriun e rrëzoi një polic që nga shkallët lart, gjaku është sheshit. Jemi pranë stadiumit të Flamurtarit në katin e pestë”, shprehet qytetari që ka filmuar skenën e llahtarshme dhe e ka publikuar videon në internet.
Ndërkohë, bëhet e ditur se efektivi që dyshohet se ka kryer këtë akt është pezulluar ditën e djeshme, por identiteti i tij nuk bëhet me dije. Prokuroria e Vlorës ka nisur një hetim për ngjarjen, ndërsa janë marrë në pyetje edhe disa efektivë të policisë për të hedhur dritë mbi rrethanat e episodit tragjik. Grupi hetimor po merr në pyetje edhe punonjësit e tjerë të policisë që ishin në vendngjarje në momentin që tifozi përfundoi në tokë për të zbardhur më tej këtë rast të rëndë. Deri tani nuk ka ende një reagim zyrtar nga policia që të sqarojë se çfarë ndodhi saktësisht gjatë ndeshjes Flamurtari-Kukësi dhe sesi përfundoi i vdekur në shkallët e stadiumit Mikel Selmanaj.
Për këtë ngjarje të rëndë ka patur edhe një reagim nga klubi i “Flamurtarit”. “Detyrimisht vëmendja jonë largohet nga futbolli në këto momente. Sipas mediave, Mikel Selmanaj, tifoz i Flamurtarit, ka humbur jetën gjatë ndeshjes Flamurtari-Kukësi. Jemi të shokuar dhe njëkohësisht të pikëlluar nga kjo ngjarje, që ndodh pikërisht aty ku shumë prej nesh kalojmë fundjavat e ndeshjeve. I shprehim ngushëllimet tona të sinqerta familjes Selmanaj dhe të afërmëve të Mikelit, që humbi jetën në një mënyrë tragjike, duke ndjekur ekipin e zemrës. I përjetshëm qoftë kujtimi i tij!”, thuhet në deklaratën për shtyp të klubit “Flamurtari”.

Berisha: Vrasje e shëmtuar shtetërore nga çunat e krimit në stadiumin e Vlorës!

Ish-Kryeministri Berisha ka reaguar për vrasjen e një sportdashësi pasditen e të mërkurës në stadiumin e Vlorës. Në një postim në Facebook, Berisha shkruan se, Mikel Selmani, që kishte shkuar për të ndjekur ndeshjen e Flamurtarit me Kukësin, përplaset për vdekje në beton në shkallët e stadiumit të Vlorës nga kriminelë me uniformë. “Me gjithë videon e qartë të skenës së krimit, policia vrasëse po përpiqet ta paraqesë si zakonisht si një ‘vetëvrasje’, por kësaj here, pa dashje, deri tani nuk ka asnjë të arrestuar apo të ndaluar, por vetëm një polic të pezulluar që duket qartë në video që përplas qytetarin për t’i marrë jetën në betonin e shkallëve dhe e lë aty pa ndihmë sikur të ishte jo njeri, por kafshë e ngordhur”, shprehet Berisha.
Në përfundim Berisha shkruan se dënon me ashpërsi të madhe këtë krim të shëmtuar. “Duke dënuar me ashpërsinë më të madhe këtë krim të shëmtuar shtetëror, denoncoj qëndrimin çnjerëzor dhe kriminal të autoriteteve të zbatimit të ligjit, Saje qorrit dhe drejtuesve të policisë ndaj këtij krimi të shëmtuar! Sb”, përfundon reagimin e tij Berisha.
Ndërkohë edhe Partia Demokratike Dega Vlorë ka dënuar këtë veprim dhe i ka kërkuar Prokurorisë zbardhjen e ngjarjes. Nëpërmjet një deklarate për shtyp, Dega e PD Vlorë i ka shprehur ngushëllimet më të sinqerta familjes dhe të afërmve të sportdashësit të ndjerë Mikel Selmanaj. “Lidhur me humbjen e beftë të jetës së të ndjerit dëshmitarë të ndodhur pranë ngjarjes tragjike kanë deklaruar se tifozi është shtyrë nga një polic në shkallët e stadiumit. Njëra prej dëshmive të tyre shprehet se i ndjeri është shtyrë prej një punonjësi të policisë vendore në detyrë dhe pohon se kjo është arsyeja që policia përpiqet ta fshehë ngjarjen.
Dega e Partisë Demokratike të Vlorës i ka vlerësuar dëshmitë e dëshmitarëve okularë dhe i ka kërkuar Prokurorisë së Rrethit të nisë menjëherë hetimet dhe të zbardhë ngjarjen. Por njëherësh Dega e PD Vlorë ka dënuar neglizhencën e Spitalit Rajonal për mungesën e qenies prezent të një autoambulance në stadium”.

R.POLISI

Falimentime masive të bizneseve, mbyllin dyqanet se nuk ka xhiro

Një kombinim i konkurrencës së shtuar nga qendrat tregtare, rënies së fuqisë blerëse, taksave të rritura bashkiake, por edhe ndryshimit të preferencave të konsumatorëve, po çon në krizën dhe fillimin e falimentit të dyqaneve të veshjeve në kryeqytet…
Dyqanet e shitjeve me pakicë në kryeqytet kanë raportuar rënie të shitjeve të tyre në muajt e parë të këtij viti. Disa prej tyre janë detyruar të shpallin në dy faza “dështimin e tregtisë”, fillimisht nëpërmjet uljeve të mëdha në artikujt e pranishëm në dyqane dhe më pas, në braktisjen e dyqanit. Një përfaqësuese e shitjes së një dyqani në rrugën “21 dhjetori” në Tiranë ka treguar për “Monitor” se në 2 vite që merret me shitjet e dyqanit me artikuj këpucësh, ky vit ka pësuar rënien më të ndjeshme të shitjeve.
E pyetur për shkaqet, ajo tregon se shqiptarët kanë nisur të tregojnë gjithnjë e më shumë tendenca të kërkimit të artikujve më të lirë dhe të shumë skontove për një artikull, gjë që shpesh është e pamundur, duke qenë se secili nga artikujt e pranishëm në dyqan ka një kosto të caktuar për të mbuluar. Nga ana tjetër, ajo tregon, duke mos lënë pa përmendur edhe ekzistencën e tregjeve në kryeqytet, se janë shtuar shumë dyqanet e shitjeve me pakicë, tendencë e 2-4 viteve të fundit, ndaj konkurrenca është bërë më e ashpër duke qenë se çdo lagje ka një mori dyqanesh. “Edhe kur tentuam që të krijonim diferencën me cilësinë, u gjendëm përpara faktit që shqiptarët duan të blejnë lirë dhe mirë, kështu që jemi bërë të gjithë rrugët kryesore që tregtojmë me të njëjtin mall”, vijon të tregojë ajo.
Shitësja nga ana tjetër, pohon se me vendimin për të mbyllur aktivitetin nga pronari, e me uljet që kanë nisur të bëjnë që të heqin mallin, gjysmës së tyre nuk u nxirret dot as kosto fillestare. Të tjerë fqinj tregtarë në të njëjtën rrugë konfirmojnë rënien ‘ekstreme’ të shitjeve sipas tyre, teksa tregojnë se përpiqen që herë pas here, të bëjnë “ulje reale’ që të tërheqin blerës.
Edhe tregtarët e tregut të njohur me emrin e Çamëve raportojnë se kanë pasur një rënie të shitjeve në muajt e parë të këtij viti, si mungesë e fuqisë blerëse sipas tyre. Konkurrenca nga qendrat tregtare, ndërkohë është shtuar ndjeshëm, teksa më të mëdhatë synojnë gjithashtu klientin e mesëm dhe të ulët dhe tërheqin blerësit me zbritje të mëdha, por dhe forma të tjera argëtimi.
Një pjesë e klientëve, ata më kërkues për cilësinë dhe markat, që gjithsesi mbetet më e vogël në numër (ka vetëm 81 mijë përdorues të kartave të kreditit në 2.8 milionë banorë), po orientohen drejt blerjeve të leverdisshme online. Sipas të dhënave të Shoqatës së Bankave, volumi i transaksioneve online ishte 34.6 miliardë lekë në dhjetor 2015, nga 21.7 miliardë lekë në dhjetor 2014.

1...8 2448 2458 246...8 278Faqja 8 245 nga 8 278

Kryesore

Continue to the category
Më shumë
© 2024 Rilindja Demokratike Euroatlantike