Gjykata e Tiranës ka lënë të lirë të gjithë protestuesit e arrestuar nga policia pas protestës tek parku i liqenit. Gjykata ka hedhur poshtë vendimin e policisë së Tahirit duke dhënë masën e detyrim paraqitjes për protestuesit që u mbajtën për 48 orë në qelitë e Drejtorisë së Policisë. Ky vendim i Gjykatës provon se kemi të bëjmë me një vendim politik të policisë për arrestimin e protetsuesve. Rrëzimi I veprës penale duhet të imponojë edhe dorëheqjen e Tahirit si ministër i Brendshëm.
Takimi me Hahn, Nishani: Më shumë vëmendje nga Komisioni Europian për ligjin e pronave
Presidenti i Republikës, Bujar Nishani priti sot në një takim të veçantë Komisionerin për Politikën e Fqinjësisë Evropiane dhe Negociatat e Zgjerimit, Johannes Hahn.
Presidenti Nishani i përcolli Komisionerit Han simpatinë dhe solidaritetin e qytetarëve shqiptarë me qytetarët evropianë dhe ata belgë mbi sulmet terroriste që ndodhën në Bruksel. Kreu i Shtetit e siguroi Komisionerin se populli shqiptar u qëndron përkrah në këto momente të vështira, por edhe mbetet i palëkundur në besimin ndaj lidershipit evropian. Ky besim, theksoi Kreu i Shtetit, buron nga vokacioni i thellë evropian i popullit shqiptar, i cili e ka vendosur integrimin në Bashkimin Evropian si të vetmen alternativë të perspektivës së vet.
Presidenti Nishani vuri në dukje se zbatimi i reformave sipas udhërrëfyesit të përcaktuar nga Komisioni Evropian duhet të jetë prioritet i prioriteteve, përfshirë reformën në drejtësi, por edhe të katër prioriteteve të tjera që përfshijnë luftën kundër krimit të organizuar dhe korrupsionit, administratën publike, të drejtat e njeriut si dhe çështjen e pronës.
Duke u ndalur tek reforma në drejtësi, Presidenti Nishani evidentoi se mbetet i palëkundur në bindjen dhe mbështetjen e tij për një reformë që zhvillohet në suazën e rekomandimeve të Komisionit të Venecias dhe standardit evropian, si dhe se kjo reformë që kapërcen kufijtë e mekanizmave të sistemit të drejtësisë dhe përbën një reformë kushtetuese duhet të sigurojë medoemos jetëgjatësi. “Vullneti i palëve për të ecur në këtë trajektore mbetet kyç në këtë fazë të procesit,” tha Presidenti.
Kreu i Shtetit u ndal edhe tek çështja e pronës, si një e drejtë themelore, e cila është e lidhur pazgjidhshmërisht me fusha të rëndësishme të zhvillimit të vendit. Në këtë kontekst ai kërkoi një vëmendje më të madhe të Komisionit Evropian lidhur me këtë prioritet kyç, dhe veçanërisht ndaj ligjit të miratuar rishtazi në Parlamentin shqiptar, i cili shkon përkundër standardit të vendosur nga Gjykata Evropiane e të Drejtave të Njeriut.
Presidenti Nishani dhe Komisioneri Han diskutuan edhe mbi politikën rajonale të Shqipërisë, ku bashkëndanë vlerësimin e një kursi konstruktiv dhe kontribues për paqen, stabilitetin dhe bashkëjetesën harmonike në rajon. Kreu i Shtetit theksoi se ofrimi i një perspektive shpresëdhënëse për brezin e ri është një nga sfidat më madhore të vendeve tona, dhe se forumet rajonale qoftë në kuadër të Procesit të Berlinit, qoftë në kuadër të Procesit të Brdo-Brijunit dhe nismave të tjera rajonale kanë krijuar mundësinë e diskutimit serioz mbi këtë çështje prioritare për vendet e rajonit tonë.
Përgjigjja e të riut ndaj Ramës pas shantazhit të studentëve për anëtarësime në parti
Studentë të ekselencës e maturantë në të gjithë vendin, ditët e fundit janë befasuar teksa në email-et e tyre personale, u ka vajtur një ftesë e pazakontë e Kryeministrit Rama për tu anëtarësuar sa më shpejt me Partinë Socialiste. Përmes këtij email-i, Rama shantazhon e u bën presion të rinjve që të anëtarësohen me detyrim në Partinë Socialiste.
Por një i ri, me emrin Mateo nuk i ka kursyer aspak një përgjigje ironike Ramës duke i shkruajtur një email si përgjigje e ftesës së bërë për tu anëtarësuar në PS dhe për tu bërë pjesë e reformave të “gjeneratës tjetër”. Në përgjigjen e tij, Mateo ironizon situatën e sotme dhe mënyrën skandaloze se si po qeverisen sot shqiptarët ndërsa thotë se që të bëhesh pjesë e ekipit ku bëhen “reformat” e vendit duhet të jesh i lidhur me trafikun e drogës, krimin, vjedhjet, korrupsionin e paratë e pista. Këndvështrimi i të riut vijon më tej ndërsa thotë se, notat dhe rezultatet e tij në mësime, nuk përmbushin kushtet e kriteret e qeverisë Rama dhe administratës së tij për tu bërë pjesë por sipas tij duhet të jesh pjesë e botës së krimit e mafies që të mund ti bashkohesh ekipit të Ramës për “reformat e gjeneratës së vjetër”.
Teksti i email-it të Ramës
I dashur Mateo,
Uroj që ky mesazh të të gjejë mirë dhe çdo gjë të shkojë mirë edhe në familjen tënde. Kam dëgjuar për rezultatet e tua aq të mira në shkollë dhe u bë në fakt disa kohë që doja të të shkruaja. Sepse dua të të shpreh respektin për dallimin që ti bën në komunitetin e shkollës tënde, po dhe për të të pyetur:
A ke dëshirë të përfshihesh edhe në aktivizmin qytetar përmes politikës, duke u bashkuar me mua për të çuar përpara reformat për Shqipërinë e Gjeneratës Tjetër? Nëse po, e mirëpres me padurim përgjigjen tënde për të përcaktuar pastaj vendin e kohën kur mund të takohemi së bashku me të tjerë bashkëmoshatarë të tutë, të cilët njësoj si ti bëjnë dallim aty ku shkollohen. Por edhe nëse s’ke një “Po!” të menjëhershme, po je i dyzuar apo i paqartë për sa lexove, më shkruaj pa asnjë ngurrim.
Le të mbetemi sidoqoftë në kontakt dhe mbi të gjitha, edhe një herë përgëzime me respekt për gjithçka ke arritur në shkollë. Faleminderit për leximin e këtij mesazhi miqësor dhe shumë të fala e shëndet në shtëpi.
Përqafime,
Edi Rama
Përgjigjia e Mateos
I dashur Edi,
E shoh që të kam lënë dy ditë duke pritur para kompjuterit me zemër në dorë. Më fal, po s’ka internet në shtëpi vëllai. As Iphone. Mezi gjej lekët për internet kafe.
Gjithsesi e lexova e-mail-in dhe kam përshtypjen se e ke nisur e-mail-in në adresën e gabuar.
Unë jam Mateoja që është nxënës i mirë, ai që i ka notat e mira. Është Mateoja tjetër ai që të duhet ty. Ai që zihet dhe përfundon në komisariat 2 herë në javë, çdo javë. Ai mund t’i çojë reformat përpara bashkë me ty. Unë s’të duhem për asgjë. Jam thjesht një nxënës i mirë, që marr ca nota të mira dhe që në fund do të përfundoj kamerier me diplomë. S’bëj dot reforma unë ashtu siç i do ti. Se ty për reformat të duhet një si Ilir Beqaj apo Arben Ahmetaj, domethënë duhet një çun i shkathët. Po edhe deputet nuk bëhem dot se s’kam cilësitë e duhura, e ke parasysh?
Unë Italinë, Holandën, Belgjikën i njoh vetëm në hartë. Dhe “miellin” e di akoma se është produkt ushqimor. Unë edhe një herë që isha aplikant i vetëm tek Zyra e Punës për duartrokitës Kongresi, më thanë që kisha dalë i dyti. Se s’kisha eksperiencat e duhura, s’kisha qenë asnjëherë në fushatë. Kështu që më ler mua dhe merr atë Mateon tjetër. Se ai e di mirë ku bie Italia, Holanda, Belgjika. Di ça është mielli, ça është bari, si zbërthehet “vegla”, si vidhet një bankë, si i shpëtohet shtetit që mos të kapi kur vjedh. Ai është tamam çun i shkathët. Bën fiks për atë punë që të duhen ty… për reformat e gjeneratës tjetër. Unë do të mbaroj shkollën dhe, shpresoj ishalla deri atëherë t’ju jetë rritur çik rroga kamerierëve dhe do të filloj kamerier. Po s’iu është rritur rroga kamerierëve, do ta provoj një herë në call center. Po s’doli gjë as aty, me këto cilësi që kam unë dhe me 10¬-at që kam në diplomë, i bie që të mbetem pa punë. Kështu që do të provoj një herë fatin në Gjermani.
Se aty kam dhe babain dhe vëllain e madh. Se që ta dish ti, ne na ndjek budallalliku si familje. Dhe ata kanë qenë budallenj si puna ime, lexuan gjithë jetën, morën 10¬-a në shkollë dhe në fund përfunduan në kamp refugjatësh në Gjermani. Edhe unë do t’i ndjek pas. Kështu, kështu Edo. Po të duhet adresa e atij Mateos tjetër, më thuaj të ta nis. Ai nuk të vonon shumë me përgjigjet se ka Iphone 7S. Përgjigjet menjëherë. Më shkruaj po të duhet.
Të fala,
Mateo.
Për pallatin 13-katësh dhe sahanlëpirësit e zakonshëm
Exit.al
Një ndër tezat kryesore që elita mediatike po propagandon në mënyrë të ethshme për të delegjitimuar protestën e qytetarëve që kundërshtojnë ndërtimin e këndit në Parkun e Liqenit është se, ata nuk kanë protestuar për ndërtime të tjera, sidomos për 13-katëshin që po ndërtohet përballë Fakultetit Ekonomik. Është një tezë absurde: t’u kërkosh llogari qytetarëve pa pushtet— që kanë lënë shqetësimet e tyre të përditshme për t’u marrë me një çështje publike— është e paimagjinueshme në demokraci. Ndërsa t’u kërkosh qytetarëve llogari për diçka që e kanë bërë pushtetarët, pa u kërkuar aspak llogari pushtetarëve, është shitje tek pushteti. Në fakt, arsyeja pse përdoret një argument i tillë nuk ka të bëjë fare me shqetësimin për 13-katëshin. Nëse ka vërtet qytetarë të këtij vendi që shqetësohen për atë ndërtim, ata do të ishin duke u organizuar për të protestuar ndaj tij. Ata që e përdorin këtë shembull janë militantët e lëpirësit e zakonshëm partiakë, që tashmë po përpiqen të bëjnë akrobacira logjike për të shpëtuar shefat e tyre nga një problem që po i njollos jo pak. Ndonëse, ata duhet t’i kërkonin llogari, pikërisht, kryetarit të Bashkisë dhe Kryeministrit për firmën që kanë hedhur mbi lejen e 13-katëshit, në mënyrë tinëzare ata po përpiqen të kompleksojnë protestuesit. Por e vërteta dhe e drejta janë me protestuesit. Nëse, sot, i gjithë vendi e njeh problematikën e ndërtimeve në park, kjo është rezultat i përpjekjeve disa vjeçare të atyre protestuesve. Po të mos ishte për shumë prej tyre, Parku i Liqenit, sot, do të ishte një kantier gjigant në çdo cep të tij. Kështu, problemin e ndërtimeve poshtë digës së Liqenit Artificial e bëri çështje publike grupimi Qytetarët për Parkun. Arditi e Besniku e dhjetëra të tjerë nga ky grupim e ngrysin, sot, çdo natë në park, pranë atij që ata e quajnë “Ulliri i Rezistencës”. Projektin për Hyrjen e Parkut— nismën e çuditshme që synonte të betonizonte të tërë hapësirën pranë Korpusit të Universitetit— e kundërshtuan publikisht Eljani, Ervini e Rezearta e dhjetëra miq të tyre, siç ata kanë bërë për çdo cenim tjetër të natyrës këto vitet e fundit. Ata janë, sot, ndër zërat kryesorë të protestës për parkun. Ishin qytetarët e grupit Ne Tirana që gjatë zgjedhjeve lokale 2015 bënë publike hartat që tregonin si ishte tkurrur gjatë viteve kufiri i Parkut të Liqenit, nga ndërhyrjet e vazhdueshme klienteliste të dy krahëve politikë. Ishin ata që paralajmëruan që para një viti ndërtimet në park dhe që e detyruan kandidatin e atëhershëm Veliaj të betohej se nuk do të kishte asnjë ndërtim në park. Anxhelën, Mozën, Anisin, Rezin e të tjerë qytetarë të grupimit Ne Tirana (sot Ne Shqipëria) i gjen sërish mes protestuesve të parkut. Nisma “Vota e Bardhë” e përfaqësuar nga Alida, si dhe grupimi “Organizata Politike” kanë kohë që akuzojnë dy krahët e politikës se për interesa klienteliste, në bashkëpunim me njëri-tjetrin, kanë shkelur interesin publik në mënyrë të vazhdueshme. Alida dhe OP-ja janë sot në ballë të protestës së parkut. Zirkoni, Andi dhe dhjetëra të tjerë që ngritën publikun në këmbë për armët kimike dhe importin e plehrave janë, sot, gjithashtu pjesë e protestës në park. Nga ana tjetër lejet e ndërtimit të 13-katëshit u bënë publike vetëm nga dy portale të pavarura, të cilat edhe sot janë burimi kryesor i informacionit për ndërtimin dhe protestat e parkut, në kushtet kur gati të gjitha mediat refuzojnë t’i mbulojnë këto ngjarje të “sikletshme” për pushtetin dhe u bëjnë jehonë vetëm versioneve manipuluese të qeverisë rreth ngjarjeve. Nëse sot publiku e njeh problematikën e ndërhyrjeve të vazhdueshme në park, nëse sot arrijmë të kuptojmë se parku po shkatërrohet për interesa klienteliste, kjo është kryesisht falë kontributit të vazhdueshëm prej kohësh të atyre që sot po protestojnë në park. Të fundit që mund të kompleksohen, sot, duke u përmendur problemet e tjera të betonizimit të Tiranës janë ata që prej vitesh kanë luftuar në mbrojtje të qytetit! Të fundit që mund t’u japin këshilla apo kërkojnë llogari protestuesve janë mediat dhe “intelektualët” që e kanë futur kokën në sahanin e qeverisë më thellë sesa themelet e 13-katëshit!
Shqipëria fiton 2-0 në Luksemburg, shënojnë Sadiku e Cikalleshi
Shqipëria rigjen buzëqeshjen me një ndeshje bindëse në Luksemburg ku arriti të dhuronte një paraqitje bindëse për të kaluar 2-0 vendasit në “Josy Barthel”. Edhe pse gjatë pjesës më të madhe të takimit kuqezinjtë luajtën me linjat e dyta, 11 i përzgjedhur nga De Biasi dha një provë bindëse duke treguar soliditet në mbrojtje dhe agresivitet në sulm. De Biasi e niste me formacion krejt ndryshe nga ai ndaj Austrisë, vetëm Berisha ishte i njëjti mes titullarëve, me Veselin, Alijin, Gjimshitin, Ajetin e Cikalleshin në mbrojtje, në mesfushë Memushaj me shiritin e kapitenit në mungesë të Canës, bashkë me Kukelin e Bashën, ndërsa para Cikalleshi me Shalën e Gashin nga krahët. E ndërgjegjshme se këtë herë i duhej të bënte lojën, Shqipëria e nisi në sulm, Cikalleshi tentoi në minutën e 5 me një goditje komplet jashtë shënjestre, ndërsa në minutën e 18 Shkëlzen Gashi shfaqi klasin e tij me një goditje dënimi duke kaluar barrierën por jo portierin Joubert që u përgjigj gati. Në goditjen e këndit menjëherë më pas është Cikalleshi që tenton këtë herë me kokë pa gjetur karërkndëshin, ndërsa Joubert mes shtyllave i thotë jo dy herë rradhazi Veselit në tentativën e tij me kokë dhe më pas edhe Herolind Shalës. Pas gjysmë ore lojë Luksemburgu fillon të nxjerrë kokën para me Delgadon që impenjon Berishën, por gjithsesi pa shumë rrezikshmëri. Episod vendimtar në ekstremin e pjesës së parë me Cikalleshin që merr një krosim të ghjatë dhe avancon i vetëm drejt portës, zotëron topin dhe kalon dhe Joubert që detyrohet ta ndalë në mënyrë të parregullt, duke merituar kështu kartonin e kuq. Në goditjen e dënimit, sulmuesi kavajas gabon vetëm për pak centimetra dhe pjesa e parë përfundon me porta të paprekura.
E dyta nis me Ergys Kacen që zë vendin e Kukelit, rast për Luksemburgun në të 55 me Bensi që kërcënon portën e Berishës. Në të 60 momenti i debutimit te Milot Rashices me Kombetaren e madhe me talentin e ri që futet bashkë me Shehin, Sadikun, dhe Lenjanin me Berishen, Bashën, Memushaj, Shalën dhe Alijin që ju bëjnë vend. Vetëm 3 minuta i duhen Sadikut për të gjetur golin e avantazhit, me Ergys Kacen që kombinon në të djathtë me Veselin, merr krahun dhe kroson në qendër, aty ku nuk fal sulmuesi nga Elbasani. 1-0 me gol të Sadikut që feston me përqafimin me kapitenin Cana në stol, ndërsa De Biasi në momentin e clirimit përgëzimin e ka me shpulla. Në minutën e 67 futet dhe Roshi për Ajetin, dhe në të 75 Shqipëria gjen golin e dyfishimit me Sokol Cikalleshin. Sulmuesi kavajas merr një pasim në zonë nga Gashi, reziston bukur duke ju shmangur markimit me driblim për të shënuar golin e 2-0. Fantastik Cikalleshi në këtë veprim që tregon forcë dhe klas.Në të 78 provon golin e befasisë nga larg Milot Rashica me një goditje të ulët që del jashtë shtyllës në të djathtë të Moris, porta e të cilit kthehet menjëherë më pas në tabelë qitje me Ermir Lenjanin dhe Ergys Kacen që tentojnë me goditjet e tyre. Minutat e mbetura ka vend dhe për spektakël, me këtë driblim të Kaces në zonën e Luksemburgut. Nuk ka më shumë gjëra për të treguar dhe mbyllet gjithcka 2-0 me Shqipërinë që jep një prpovë pozitive.
Dhuna ndaj protestuesve, PD padi penale ndaj dy drejtuesve të policisë
Partia Demokratike depozitoi në Prokurorinë e Tiranës kallëzimin penal për drejtorin e Policisë Bashkiake të Tiranës dhe drejtorin e Policisë së Tiranës, për dhunën e ushtruar dje në protestën për mbrojtjen e Parkut të Liqenit. Partia Demokratike e konsideron të paligjshme dhunën brutale të ushtruar dje me urdhër politik ndaj protestuesve dhe mbështetësve të PD, dhe kërkon vendosjen e drejtësisë. Sekretari i Përgjithshëm, Arben Ristani, dhe Ivi Kaso u prononcuan për mediat.
“Partia Demokratike paraqiti në Prokurorinë e Tiranës një kallëzim penal ndaj kryeinspektorit të Policisë Bashkiake dhe drejtuesit të Qarkut të Policisë të Tiranës për veprat penale të shpërdorimit të detyrës dhe veprës penale të pengimit me dhunë të të drejtës si dhe lirive për tubime dhe manifestime. Të dy këto vepra penale janë konsumuar nga këta dy njerëz dhe nga të urdhëruarit prej tyre dje gjatë protestës së PD tek Parku i Liqenit. Ne shprehim dhe një herë para publikut konsideratën tonë, përpjekjen tonë për të respektuar shtetin ligjor, atë pak gjë që ka ngelur nga shteti ligjor, sepse pjesa tjetër po përdhoset çdo ditë nga kjo oligarki e dhunshme në pushtet. Ajo që unë dua të përcjell dhe një herë është se dhuna nuk të çon askund, dhuna nuk ka çuar askund edhe burra më të mirë dhe në shtete të tjera në botës, përkundrazi i ka njollosur me damkën e antikombëtarizmit dhe antivlerave” u shpreh Ristani.
Ai u shpreh se ndalimi dhe arrestimi i protestuesve paqësorë të PD, për më tepër me dhunë, me maska sikurse dhe i patë nga pamjet, është e gjitha në kundërshtim me ligjin, në tubime të tilla policia nuk shkon me armë pa numra identifikimi. Nga ana tjetër, Ristani theksoi se Policia Bashkiake nuk është e detyruar nga ligji dhe nuk ka tagrin ligjor të merret me tubimet që zhvillohen. “Përsa i përket deputetit Strazimiri, unë jua thashë dhe herë tjetër, është një lojë që zhvillohet për të tërhequr vëmendjen nga gjërat kryesore, nga beteja kryesore që ne kemi me paligjshmërinë që ka kapur këtë klasë politike në mazhorancë, e cila ka mbushur jo vetëm Parlamentin me kriminelë, jo vetëm administratën publike me kriminelë, por deputetët e tyre vrasin publikisht qëllojnë me armë, duke lënduar njerëz të pafajshëm. Pra e gjithë kjo bëhet për të shpërqendruar vëmendjen. Ai nuk ka pasur armë dhe nuk kishte pse të kishte armë” sqaroi ndër të tjera Ristani.
– Prokuroria dihet që ka më shumë se tri muaj çështjen e protestës të 8 Dhjetorit lidhur me gjobën e falsifikuar, çfarë besimi keni?
Ristani: Ne vazhdojmë të kemi besimin tonë dhe konsideratën tonë për atë pjesë që ka ngelur te shtetit ligjor. Besojmë që në ndërgjegjen e njerëzve të ligjit duhet të ketë ngelur detyrimi i tyre ndaj këtij vendi për të zbatuar ligjin. Ne besojmë tek njerëzit e përgjegjshëm, që me siguri kanë ngelur në këto institucione, vazhdojnë të punojnë në këto institucione dhe nuk i binden urdhërit të oligarkëve.
– Si do ta komentoni arrestimin e 13 personave dhe çfarë qëndrimi keni për pretendimin e Policisë, se deputeti Gent Strazimiri kishte armë dje në protestë?
Ristani: -Ndalimi dhe arrestimi i protestuesve paqësorë të PD, për më tepër me dhunë, me maska sikurse dhe i patë nga pamjet, është e gjitha në kundërshtim me ligjin, në tubime të tilla policia nuk shkon me armë pa numra identifikimi. Për më tepër, Policia Bashkiake nuk është e detyruar nga ligji dhe nuk ka tagrin ligjor të merret me tubimet që zhvillohen. Përsa i përket deputetit Strazimiri, unë jua thashë dhe herë tjetër, është një lojë që zhvillohet për të tërhequr vëmendjen nga gjërat kryesore, nga beteja kryesore që ne kemi me paligjshmërinë që ka kapur këtë klasë politike në mazhorancë, e cila ka mbushur jo vetëm Parlamentin me kriminelë, jo vetëm administratën publike me kriminelë, por deputetët e tyre vrasin publikisht qëllojnë me armë, duke lënduar njerëz të pafajshëm. Pra e gjithë kjo bëhet për të shpërqendruar vëmendjen. Ai nuk ka pasur armë dhe nuk kishte pse të kishte armë.
– Keni bërë kallzim ndaj punimeve tek Parku i Liqenit. Keni besim tek Prokuroria, duke qenë se nuk ka asnjë të re nga hetimet?
Ivi kaso: -Mbetet të përsëris vetëm se besimi i PD është se në këto institucione kanë mbetur njerëz profesionistë dhe të përgjegjshëm.
Ristani: -Kauza jonë nuk është vetëm për Liqenin. Kauza jonë është në tërësi për paligjshmërinë që ka zënë këtë vend. Kauza jonë është kudo për shtetin ligjor që nuk funksionon, për betonizimin e Parkut “Rinia”, për betonizimin e Sheshit “Skënderbej”. Kauza jonë është për vendimet e Gjykatës Kushtetuese që nuk zbatohen. Kauza jonë është për dekriminalizimin, për Reformën në Drejtësi. Kauza jonë është për çdo gjë që ka të bëjë me shtetin ligjor.
Gati programi i PD, oferta për punësim, zhvillim ekonomik, ulje taksash e antikorrupsion
Kryetari i Partisë Demokratike, Lulzim Basha mblodhi mbrëmjen e djeshme departamentet e PD, në një takim ku u konkludua mbi platformat në çdo sektor, që përbëjnë programin dhe ofertën për shqiptarët, për zhvillimin ekonomik, daljen nga varfëria, uljen e taksave, luftën ndaj korrupsionit, nxitjen e punësimit, zhvillimin e degëve më të rëndësishme dhe përmirësimin e arritjen e standardeve në fushën e shëndetësisë, rendit dhe sigurisë.
Programi i Partisë Demokratike është gati dhe në javët në vazhdim ai do të publikohet. 23 departamentet kanë finalizuar kështu punën disa mujore. Pas mbledhjes, nënkryetari i Partisë Demokratike, Edmond Spaho, dha një prononcim për mediat.
“Siç ju njoftuam, patëm një mbledhje me drejtuesit e të gjithë departamenteve të Partisë Demokratike në lidhje me finalizimin e hartimit të programit elektoral të Partisë Demokratike. Tashmë mund të themi që pas një pune disa mujore dhe diskutimeve brenda grupeve që ishin ngritur për këtë qëllim dhe diskutimeve me ekspertë të fushës, programi i Partisë Demokratike për zgjedhjet e ardhshme parlamentare është i përfunduar në linjat kryesore.
Objektivat e tij do të jenë që të nxisë ekonominë e vendit në mënyrë që të gjenerojmë vende pune, të mund t’i jepet një impuls sa më i madh ekonomisë me synimin e tërheqjes së investimeve të huaja, uljen e taksave, krijimin e hapësirave sa më të mëdha për punësim dhe zhvillimin e degëve të tilla të rëndësishme si bujqësia, turizmi, mjedisi. Programi synon reduktimin e varfërisë, rritjen e pagave dhe pensioneve, në mënyrë që vendi të futet në rrugën e zhvillimit dhe rritjes së mirëqënies për të gjithë qytetarët shqiptarë. Në javët e ardhshme ne do të vazhdojmë me fazën e dytë për prezantimin e të gjithë pjesëve të programit, tek grupet e interesit, tek qytetarët, për të marrë ide dhe sugjerime të tjera finale, të cilat do të bëjnë të mundur paraqitjen e një varianti përfundimtar për zgjedhjet e ardhshme parlamentare”, tha Spaho.
Skandal, Bashkia e Durrësit jep dy herë fonde për të njëjtën rrugë
Bashkia e Durrësit ka dhënë dy herë fonde brenda vitit për rrugën “Pavarësia” në Plazhin e Durrësit. Partia Demokratike në Durrës ka denoncuar këtë rast duke u shprehur se kjo rrugë u ndërtua me nxitim të madh në kohën e fushatës, ndërsa sot, pa kaluar ende një vit po rikualifikohet nënkalimi tek “Ura e Dajlanit”.
“Investimi i vitit 2015 për rrugën ‘Pavarësia’ në plazhin e Durrësit, synonte të sillte realizimin e korsive të biçikletave, gjelbërimit dhe ndriçimin. Rrugë, e cila iu dha për ndërtim me fondet e bashkisë, pra nga taksapaguesit firmës me çmimin më të lartë të ofertës me një fond prej 168 milionë lekësh pa TVSH. E gjithë kjo rrugë u ndërtua në një nxitim të madh në kohën e fushatës zgjedhore lokale, ku dhe u quajt një ndër projektet vizionare të Bashkisë së Durrësit. Sot, gjendemi përpara faktit ku pa kaluar ende viti, po rikualifikohet nënkalimi, rotondo tek Ura e Dajlanit, rikualifikim i cili vjen në një kohë kur sapo është mbyllur një investim”, thuhet në deklaratën e PD-së.
Më tej, në deklaratë thuhet se: “Të realizosh një investim me fondet e buxhetit të shtetit më 2016 do të thotë që minimalisht ky investim duhet të ishte në listën e prioriteteve të Bashkisë për vitin 2015-2016 dhe për më tepër duhet të jetë pjesë e listës së parashikimeve 4-vjeçare për investimet prioritare ku duhej të kalohej dhe në Këshillin Bashkiak. Ky projekt përveçse nuk është një investim prioritar nuk është diskutuar në Këshill Bashkiak dhe me grupet e interesit, kjo sepse nuk mund të jetë kurrsesi prioritet një investim i ri, i cili zhbën atë ekzistues të sapopërfunduar pa e vënë ende në eficiencë. Tabela e punimeve, e cila është një nga elementet e transparencës, paraqet Bashkinë Durrës si investitor, ndërkohë që investitor është buxheti i shtetit dhe Bashkia Durrës është përfituesi. Nuk ka qytetar taksapagues të Durrësit dhe banor apo vizitor të plazhit që të mos revoltohet kur sheh në rrugën e sapopërfunduar një tabelë punimesh për ‘Rikualifikimin e saj’ në një hark kohor që nuk kalon vitin duke prekur ndjeshëm sezonin turistik të vitit 2016 dhe duke u ndërhyrë në një ndërtim të sapopërfunduar. Rikualifikimi i këtij projekti synon të ndërhyjë tek ndriçimi dhe gjelbërimi dy pikat kyçe të projektit të 2015 dhe që ndodhet ende brenda garancisë dhe afateve ligjore”.
Partia Demokratike në Durrës shprehet se do t’i drejtohet drejtësisë për këtë rast, ndërsa i ka bërë thirrje Prokurorisë të verifikojë këtë investim të Bashkisë Durrës.
“Ekzistojnë fakte dhe argumente, të cilat ngarkojnë Bashkinë Durrës me përgjegjësi institucionale, por dhe morale për keqmenaxhimin e territorit nën juridiksionin e saj. Fakte, të cilat Partia Demokratike Durrës do i drejtohet drejtësisë. Kjo Bashki demonstron qartë se nuk ka një vizion për qytetin, pasi projektet ndryshojnë në varësi të klientelës dhe jo interesave të taksapaguesve. Partia Demokratike, Dega Durrës denoncon faktin se kryebashkiaku, nuk po i shërben qytetarëve, të cilët e votuan dhe nuk po punon për interesat afatgjata të qytetit të Durrësit, por synon vetëm të grabisë fondet publike apo dhe buxhetin e shtetit. I bëjmë thirrje Prokurorisë të marrë të gjitha masat për verifikimet e këtij investimi të Bashkisë Durrës”, përfundon deklarata e PD.
Babëzia Beqja nuk ndalet, tjetër pazar me dy tendera 3 milionë dollarë
Ministria e Shëndetësisë ka realizuar në datën 9 mars dy tendera me vlerë të konsiderueshme, fondi limit i të cilëve arrinte në 339 milionë lekë ose mbi gati 3 milionë dollarë. Sipas Syri.net objekti ka qenë “Blerje materiale mjekimi të përgjithshme për nevojat e institucioneve spitalore” në tenderin e parë dhe “Blerje materiale mjekimi konsumabël dhe kirurgjikale për nevojat e institucioneve spitalore” në tenderin e dytë. Por në të dy tenderat ka patur një koinçidencë të çuditshme.
Në tenderin e parë, atë për “Blerje materiale mjekimi të përgjithshme për nevojat e institucioneve spitalore” kanë marrë pjesë 6 kompani. Por vetëm njëra prej tyre ka paraqitur ofertë financiare, ndërsa 5 kompanitë e tjera nuk kanë paraqitur fare ofertë. Si rezultat tenderi, me fond limit 168 milionë lekë, është fituar nga ofertuesi i vetëm bashkimi i shoqërive Montal sh.p.k dhe Biometrics Albania, për vlerën 164.4 milionë lekë ose vetëm 2 për qind poshtë fondit limit.
Dyshimet shtohen për faktin se e njëjta skemë është përsëritur edhe në tenderin e dytë atë të, “Blerje materiale mjekimi konsumabël dhe kirurgjikale për nevojat e institucioneve spitalore”, i zhvilluar në po të njëjtën ditë, pra më 9 mars. Edhe në këtë tender kanë marrë pjesë 7 kompani, por çuditërisht vetëm njëra ka paraqitur ofertë, ndërsa 6 të tjerat nuk kanë dhënë asnjë ofertë financiare.
Si rezultat tenderi me fond limit 171.7 milionë lekë është fituar nga ofertuesi i vetëm, bashkimi i operatoreve ekonomik O.E.S Distrimed dhe Euromed. Edhe ky tender është fituar me një çmim vetëm 1.2 për qind nën fondin limit. Në të dy rastet Ministria e Shëndetësisë ka shpallur fitues ofertuesit e vetëm.
Kryqëzim konkurrentësh
Por një tjetër fakt i çuditshëm është se dy kompanitë që kanë marrë tenderin e parë kanë marrë pjesë në tenderin e dytë, por pa paraqitur ofertë. Po kështu një nga fituesit e tenderit të dytë OES Distrimed ka marrë pjesë në tenderin e parë, por pa paraqitur ofertë. Sipas dokumentave rezulton se kompanitë pjesëmarrëse janë kryqëzuar me njëra-tjetrën, por pa garuar, një skemë që hedh dyshime për marrëveshje paraprake mes kompanive dhe paracaktim të fituesve, një skemë që funksionon vetëm nëse përfshihet edhe autoriteti kontraktor, pra, në këtë rast ministria që drejtohet nga Ilir Beqja. Ministria e Shëndetësisë ka qenë shpesh në qendër të akuzave për korrupsion si me konçesionet ashtu dhe tenderat publik.
Beqaj centralizoi tenderat
Më 28 dhjetor 2015, ministri i Shëndetësisë Ilir Beqaj, ka nxjerrë një urdhër që u heq të drejtën të gjitha spitaleve rajonale anembanë vendit për të realizuar procedura tenderimi mbi shumën e 800 mijë lekëve për blerjen e barnave ose të materialeve mjekësore.
Urdhri është përqendrim dhe monopolizim i paprecedentë i kompetencave të spitaleve rajonale, të cilat jo shumë vite më parë fituan disa të drejta për vetë-menaxhimin e tyre në kuadër të procesit të decentralizimit dhe rritjes së efiçencës, raporton Hashtag.al.
Beqaj ka ngritur një Grup-Pune që do të shërbejë si njësi prokuruese për të gjitha spitalet, do të jetë kjo njësi që do të marrë kërkesat e spitaleve mbi nevojat që ato kanë për barna dhe mjete spitalore dhe më pas i njëjti Grup-Pune do të zhvillojë dhe procedurat e tenderimit për të gjitha ato blerje që janë mbi 800 mijë lekë.
Në grupin e punës prej 4 personash spikat dhe prezenca e zonjës Shpresa Bello, e cila është dhe kunata e Drejtoreshës së Përgjithshme të Tatimeve, Briseida Shehaj.
Pronarët e shpronësuar të komunizmit zvarriten në procesin e rikthimit të pronave
Orhan Jegeni, 80 vjeç, inxhinier mekanik në pension, është një nga zërat kryesorë mes ish-familjeve të pasura të Shqipërisë, pronat e të cilëve u sekuestruan nga komunistët pas Luftës së Dytë Botërore dhe që sot janë duke luftuar për të rifituar asetet e tyre të humbura.
Ai është një nga trashëgimtarët e fundit të familjes Frashëri, e cila nxori një numër patriotësh dhe shkrimtarësh të famshëm, përfshirë vëllezërit Abdyl, Naim e Sami Frashëri, të cilët krijuan një pjesë të lëvizjes për rilindje kombëtare në fund të shekullit të 19, lëvizje që udhëhoqi përpjekjet për pavarësinë e Shqipërisë nga Perandoria Osmane në vitin 1912.
Para ardhjes së komunistëve, gjyshërit e tij, Mehmet Frashëri dhe Vesime Toptani Frashëri, kishin 100 hektarë tokë në pronësi në periferi të Tiranës si dhe disa shtëpi në qytetin e Tiranës.
Orhani qe vetëm 10 vjeç kur Lufta e Dytë Botërore përfundoi dhe regjimi komunist i Enver Hoxhës mori kontrollin, duke sekuestruar pasuritë e të pasurve.
“Mbaj mend dëshpërimin tonë si fëmijë, kur ata sekuestruan edhe lojërat tona në oborr”, rikujton ai.
Gjatë viteve që pasuan, të gjitha pronat e familjes u sekuestruan me përjashtim të një shtëpie në Tiranë, ku ai dhe familja e tij e numërt jetoi në kushte të vështira për shumë dekada.
Në të njëjtën kohë, emrat e paraardhësve të tij iu vunë shkollave, rrugëve dhe monumenteve në të gjithë vendin.
Ata vuajtën vështirësitë e asaj kohe si të gjithë shqiptarët e tjerë, duke ëndërruar rënien e regjimit një ditë dhe duke shpresuar se do të merrnin pronat e trashëguara.
Ndryshimet politike më në fund erdhën në vitet 1990, por qeveria e re që mori pushtetin nuk e lejoi familjen Jegeni dhe gjashtë familjet e tjera trashëgimtare të merrnin pronat që dikur qenë nën pronësinë e Frashërllinjve dhe Toptanëve.
“Pata jetë të vështirë, duke kërkuar pronat e familjes dhe ajo që vijon të më mbajë duke i kërkuar është thjeshtë nostalgji”, tha ai për BIRN.
“Nuk pata menduar kurrë që çështja jonë do të zvarritej në këtë mënyrë. Kjo qe përtej imagjinatës”, shtoi ai.
Familja e tij dhe shumë familje të tjera janë ende duke vuajtur në përpjekje për të rimarrë pronat e tyre, apo së paku, të marrin kompensimin financiar.
Orhani u bë një nga zërat në këtë betejë që kur ai kërkoi të drejtat ligjore për veten dhe familjen e tij në vitin 1994.
Ndërkohë, që nga fillimi i viteve 1990, dhjetëra mijëra njerëz zbritën në Tiranë nga pjesa tjetër e vendit ku zaptuan toka dhe ndërtuan shtëpi pa të drejta pronësie dhe pa leje ndërtimi.
Në vitet që pasuan, qeveria miratoi ligje që mundësuan legalizimin e pronave të zaptuara dhe të shtëpive pa leje. Politikanët shpresuan se këto ligje do t’i sillnin atyre popullaritet dhe do t’i mundësonin të rizgjidheshin.
“Rreth 70 për qind e pronave tona në periferi të Tiranës tashmë janë të zëna nga të ardhurit që u sollën nga politikanë që deshën të fitonin politikisht”, tha Orhan për BIRN.
Në shtator 1996, Komisioni për Kthimin dhe Kompensimin e Pronave e njohu të drejtën e tyre të pronësisë për 208,696 metra katrorë tokë.
Por deri tani familja e tij ka arritur të rimarrë efektivisht pas shumë vitesh betejash ligjore vetëm 7,452 metra katrore në periferinë e largët të Tiranës.
Pasi pritën për shumë vite për të marrë pjesën tjetër të tokës, apo kompensim financiar, në korrik 2010 familja e dërgoi çështjen e tyre në Gjykatën Europiane të të Drejtave të Njeriut.
Dy javë më parë, më 17 mars, vendimi erdhi më në fund, duke e detyruar qeverinë shqiptare të paguajë 3.3 milionë euro për trashëgimtarët e familjes Frashëri si kompensim për pjesën e mbetur prej 201,244 metrash katrorë, pronë që qe njohur nga qeveria shqiptare si e tyrja, por që nuk qe kompensuar financiarisht.
Jegeni i tha BIRN se, familjet janë rraskapitur nga zgjatja e proceseve gjyqësore dhe ka gjasa do ta pranojnë vendimin e Strasburgut pa e ankimuar, megjithëse disa prej tyre mendojnë se kompensimi i dhënë është tepër i ulët.
“Unë duhet të pranoj këtë shumë kundër arsyes për shkak se trashëgimtarët e tjerë janë lodhur dhe nuk duan ta apelojnë”, tha ai.
“Unë do t’ia jap shumicën e këtyre parave që do të marr nga vendimi i Strasburgut dy djemve të mi që jetojnë me familjet e tyre jashtë vendit dhe që do të bëjnë pas kësaj një jetë më të mirë”, shtoi ai.
“Por unë do të vijoj betejat e tjera për pronat e familjes, për shkak se paratë që do të marr do të më ndihmojnë të mbuloj shumë më tepër shpenzimet që kam akumuluar gjatë këtyre viteve, duke luftuar për të drejtat tona”, tha ai.
Kryesore
Continue to the category
Migena Kapllani: Një mësuese përballë politikës së vjetër
“Arsimi është në ditën më të zezë, dhe një zyshë duhet në atë parlament.” Me këtë thirrje, Migena Kapllani, kandidate e Koalicionit Euroatlantik në...
