Në debatin elektoral të organizuar nga CNN-i në shtetin e Uiskonsinit, ku javën e ardhshme zhvillohen zgjedhjet praparake, tre kandidatët e mbetur në garën e republikanëve për president, ishin të një mendimi për nevojën e mposhtjes së grupit Shteti Islamik, por ata nuk shprehën mbështetje për njëri-tjetrin lidhur me këtë çëshje.
“Ne duhet ta fshijmë ISIS-in nga faqja e globit me dhunë dhe me shpejtësi, se nuk kemi zgjedhje tjetër”, tha Donald Trump, që kryeson garën e republikanëve.
Senatori i Teksasit Ted Cruz, i cili deri tani është i dyti në radhë për nga numri i delegatëve të siguruar, tha se Shtetet e Bashkuara duhet që fillimisht të përdorin “forcë ajrore dërrmuese” pastaj të armatosin luftëtarët kurdë “që ata të luftojnë ISIS-in”. “Vendimi nëse duhen përdorur forcat speciale, apo ato tokësore amerikane, duhet marrë pas kësaj”, tha zoti Cruz. Senatori Cruz, kritikoi edhe Presidentin Obama, duke thënë se ai vetë nuk do t’i çonte trupat amerikane jashtë vendit sipas rregullave strikte luftarake që nuk garantojnë fitoren.
Administrata Obama ka patur përplasje si me qeverinë e Irakut, edhe atë të Afganistanit lidhur me kushtet e veprimit të trupave amerikane në këto vende.
Guvernatori i Ohajos, John Kasich, mbështeti idenë e një koalicioni për shkatërrimin e Shtetit Islamik, ku të kenë kontribut më të madh shtetet e Gjirit Persik. Ai tha se, fushata duhet të jetë ajrore dhe tokësore dhe pastaj trupat të kthehen në vend.
Kasich po ashtu kritikoi propozimin e zotit Cruz, që policia të patrullojë lagjet myslimane, në mënyrë që të çrrënjoset terrorizmi.
“Ne nuk mund t’i lejojmë vetes polarizimin e njerëzve në botën e civilizuar”, tha Kasich. “Në të gjithë botën ka njerëz që e dinë se ky kërcënim duhet ndalur, duhet shkatërruar dhe ne duhet të bashkëpunojmë me vendet e tjera, sepse kur vdesin njerëz të pafajshëm, gra dhe fëmijë në shpërthime me bombë si në Pakistan gjatë shërbesës fetare të Pashkëve, vdes edhe një pjesë e jona”.
Zoti Trump tha se, Shtetet e Bashkuara po paguajnë shtrenjë për mbështetjen ndaj NATO-s, që ai e cilësoi “të vjetëruar” dhe se vende të tjera të Aleancës janë duke përfituar me të padrejtë prej saj.
Trump: ISIS duhet fshirë nga faqja e dheut
Mesi synon golin e 500 në “El Clasico”
MSN apo BBC, kur na ndajnë vetëm pak ditë nga El Clasico i radhës mes Barcelonës dhe Realit të Madridit, shifrat thonë MSN, me tredhëmbëshin sulmues të skuadrës blaugrana që është më i besueseshëm se ai i Los Blancos. Falë edhe tre yjeve të saj, Barca ka grumbulluar 10 pikë më shumë se Reali pas 30 javëve të para dhe kjo është një e dhënë që tregon për efikasitetin përpara portës të treshes, Mesi-Suarez-Neymar. 69 gola numëron tredhëmbëshi i Barcelonës në këtë sezon të La Ligas kundrejt 63 finalizimeve të treshes së përbërë nga Bale-Benzema dhe Ronaldo.
Gjithsesi për të fituar duelin e golave treshja sulmuese e Barcës ka zhvilluar 7 ndeshje më shumë se ajo e Los Blancos, pasi Mesi-Suarez dhe Neymar kanë luajtur në total 23 takime së bashku, ndërsa Bale-Benzema e Ronaldo vetëm 16 kjo natyrisht vjen si pasojë e dëmtimeve që kanë pësuar këta futbollistë në periudha të ndryshme. Tredhëmbëshi i Barcelonës fiton ndaj ai të Realit edhe përsa i përket golave të shënuar në El Clasico. Mesi-Suarez dhe Neymar, kur kanë qenë të tre së bashku në lojë e kanë dërguar në 12 raste topin në rrjetën e portës së Realit, ndërsa Bale-Benzema dhe Ronaldo vetëm 11 herë në atë të Barcelonës. Për të kuptuar që treshja e skuadrës katalanase është më e besueshme se ajo e asaj merengues mjafton të shikosh golat e realizuar krahasuar me goditjet në portë në këtë sezon të La Ligas.
Edhe pse numëron në total vetëm 322 goditje në kuadrat tredhëmbëshi i Barcës ka shënuar 69 gola, ndërkohë që ai i Realit pavarësisht se i ka goditur portat kundërshtare më shumë më ekzaktësisht në 333 raste ka realizuar vetëm 63 gola. Gjithsesi përqindjen më të lartë të shënimit e ka një madrilen dhe ai është Karim Benzema me 24,7, pas tij vinë Bale dhe Suarez me Cristiano Ronaldon që pozicionohet në vendin e fundit nga këta 6 lojtarë përsa i përket saktësisë përpara portës. MSN apo BBC të shohim se cili do të triumfojë këtë herë.
Lionel Mesi apo Diego Armando Maradona? Kjo pyetje do të mbizotërojë gjithmonë në kokën e të gjithëve, pasi 5-herë fituesi i Topit Artë me klasin, stilin dhe personalitetin që shfaq në fushën e lojës ngjason gjithnjë e më shumë me “El Pibe De Oro”. Në ndeshjen mes Argjentinës dhe Bolivisë, takim në të cilin shënoi golin numër 499 në karrierë, Lionel Mesi i mahniti të gjithë me lojën dhe driblimet e tij, si rast i minutës së 60-të, kur Leo dhuron spektakël me futbollistët kundërshtarë që edhe pse të shumtë në numër që nuk arrijnë ta frenojnë dot. Të shtunën luhet në “Camp Nou” El Clasico, dhe në një sfidë të tillë kaq të rëndësishme gjëja më kryesore për tifozët e Barcës dhe trajnerin Luis Enrique është që Mesi vjen në një formë fantastike dhe mbi të gjitha i motivuar për duelin ndaj Realit.
I intervistuar nga mediat në përfundim të sfidës mes Argjentinës dhe Bolivisë, 28-vjeçari la të kuptohej se vëmendja e tij tashmë e gjitha te El Clasico, takim në të cilin synon të realizojë edhe golin e tij të 500 në karrierë. Deri tani Mesi ka shënuar 449 gola me fanellën e Barcelonës dhe 50 me atë të Argjentinës. “Do të ishte diçka me të vërtetë shumë e bukur për mua ta arrija këtë shifër në një sfidë ndaj Realit sidomos nëse goli im do t’i jepte avantazhin skuadrës”, u shpreh 5-herë fituesi i Topit të Artë.
Revoltë ndaj Veliajt: Hiq nga Facebook-u foton e fëmijës tim! (Foto)
Një grua është revoltuar me kryetarin e Bashkisë së Tiranës Erion Veliaj për një foto që ka postuar në Facebook-un e tij disa ditë më parë të një fëmije.
Ina Kastrati, është nëna e fëmijës së mitur, fotografia e të cilit është publikuar nga Veliaj në Facebook pa lejen e saj. Ajo ka kërkuar nga kryebashkiaku që të heqë fotografinë e fëmijës së saj të publikuar pa leje, por edhe pse kanë kaluar disa ditë, Veliaj ende nuk e ka fshirë fotografinë.
“Z. Erion. Ky është fëmija im. Nuk më keni marrë leje për ta publikuar foton e tij në mbrëmjen e ORA e Tokës, pa lejen time si prind. Ju lutem hiqeni sa më parë”, shkruan në Facebook-un e Veliajt nëna e vogëlushit.
Komisioneri Hahn-Ramës: Dekriminalizimi të bëhet sa më shpejt
Komisioneri europian për Zgjerimin, Johaness Hahn, deklaroi sot nga Tirana se Shqipëria e ka urgjente për dekriminalizimin.
“Duhet të jemi të qartë që legjislacioni duhet të zbatohet shpejt dhe në mënyrën e duhur”, tha Hahn. Gjatë konferencës së përbashkët për shtyp me kryeministrin Edi Rama, Hahn e vuri theksin tek reforma nw drejtwsi si njw nevojw urgjente. Po ashtu, ai vuri në dukje, se nuk ka datë të përcaktuar për hapjen e negociatave për anëtarësim.
“Mund t’ju them vërtet që ishte një takim produktiv, shkëmbim idesh, jo vetëm me Kryeministrin por edhe me përfaqësuesit e opozitës dhe u bë një debat i gjallë dhe kështu duhet të jetë nw fakt, të ketë diskutime duke përfshirë edhe shoqërinë civile, por në fund të jetë e qartë që wshtw e ardhmja evropiane e Shqipërisë, interesi kombëtar i këtij vendi, pasi bëhet fjalë për perspektivën europiane të vendit. Vend do të thotë qytetarët, brezi i ri dhe duhet t’u japim atyre një shans për të ardhmen.
Ka qënë e rëndësishme se cilat janë çështjet më urgjente dhe më lejoni të them që për momentin, kyç është reforma në drejtësi. Këtu na duhen shumë shpejt zbatime dhe kjo reformë krahasuar me ç’po ndodh në vende të tjera fqinje, është në një shkallë të paprecedentë. Pra, është e rëndësishme të ketë një vendim para se të fillojë zbatimi i saj.
Tahiri, “Griselda” e radhës
Nga Gent Strazimiri
Një tjetër “Griseld” i Partisë paska njoftuar masat punonjëse për suksesin e radhës: Gent Strazimiri paskësh dorëzuar armën me leje…duke mos qenë më “në paligjshmëri”…
Gent Strazimiri as ka qenë dhe as do jetë kurrë në paligjshmëri, sepse që në gen është e kundërta e “Mekes”…
Ende në këtë moment, Griseldi i radhës nuk ka sjellë njoftim tek Gent Strazimiri për dorëzim arme.
E ka çuar kudo, madje në çdo “mjero tv”, “mjero gazetë” online dhe offline por tek Gent Strazimiri ende jo.
Kjo është e vetmja PALIGJSHMËRI, ashtu sikurse është paligjshmëri, MEGASKANDAL, fakti që Ministri i Brendshëm vendos në shërbim të trafikantëve të drogës makinën e tij, kapet në flagrancë dhe përpiqet të justifikohet me “shitjen” e saj, duke pranuar që ka falsifikuar transaksionet në deklaratën e pasurisë…dhe për këto heshtin edhe Prokuroria edhe ILDKPKI…
Që Ministri i Brendshëm ka fshehur mandatin e arrestit ndërkombëtar për deputetin e tij vrasës, ka prishur provat për deputetin tjetër vrasës, duke detyruar edhe policët të luajnë “siçilianin” para gjykatës…
Që Ministri i Brendshëm pret në zyrë vrasësin e penduar e të paguar për të eleminuar deputetë, dhe arreston deputetin bashkë me vrasësin e penduar por jo paguesit…
Që Ministri i Brendshëm, është në atë detyrë me kontributin dhe votën e jo më pak se 19 deputetëve me rekorde kriminale, për trafiqe prostitutash, droge, vjedhje vilash e deri në vrasje…
Që çeta e “mekeve” dhe “nafijeve” që dot sundojnë Shqipërinë sërish, as nuk skuqet e as nuk zverdhet të ulet në krah të llumit të vendit!
Që komandanti i çetës së “mekeve” dhe “nafijeve”, sapo përcjell John Kerryn, niset menjëherë t’u bëjë qokën secilit prej kriminelëve që ambasadori i John Kerryt i ka përmendur me emra si “poshtërim për shqiptarët”…
Kjo është paligjshmëria, dhe përballë kësaj, Gent Strazimirin do ta kenë përballë sa të ketë frymë! Do ta kenë përballë këta dhe të gjithë mjerot, “çufot” dhe “bubat kaçurrel” që montojnë skenare, japin pretenca madje dhe vendime përfundimtare “në emër të popullit”…
Lirohen të gjithë protestuesit e parkut, Tahiri të japë dorëheqjen
Gjykata e Tiranës ka lënë të lirë të gjithë protestuesit e arrestuar nga policia pas protestës tek parku i liqenit. Gjykata ka hedhur poshtë vendimin e policisë së Tahirit duke dhënë masën e detyrim paraqitjes për protestuesit që u mbajtën për 48 orë në qelitë e Drejtorisë së Policisë. Ky vendim i Gjykatës provon se kemi të bëjmë me një vendim politik të policisë për arrestimin e protetsuesve. Rrëzimi I veprës penale duhet të imponojë edhe dorëheqjen e Tahirit si ministër i Brendshëm.
Takimi me Hahn, Nishani: Më shumë vëmendje nga Komisioni Europian për ligjin e pronave
Presidenti i Republikës, Bujar Nishani priti sot në një takim të veçantë Komisionerin për Politikën e Fqinjësisë Evropiane dhe Negociatat e Zgjerimit, Johannes Hahn.
Presidenti Nishani i përcolli Komisionerit Han simpatinë dhe solidaritetin e qytetarëve shqiptarë me qytetarët evropianë dhe ata belgë mbi sulmet terroriste që ndodhën në Bruksel. Kreu i Shtetit e siguroi Komisionerin se populli shqiptar u qëndron përkrah në këto momente të vështira, por edhe mbetet i palëkundur në besimin ndaj lidershipit evropian. Ky besim, theksoi Kreu i Shtetit, buron nga vokacioni i thellë evropian i popullit shqiptar, i cili e ka vendosur integrimin në Bashkimin Evropian si të vetmen alternativë të perspektivës së vet.
Presidenti Nishani vuri në dukje se zbatimi i reformave sipas udhërrëfyesit të përcaktuar nga Komisioni Evropian duhet të jetë prioritet i prioriteteve, përfshirë reformën në drejtësi, por edhe të katër prioriteteve të tjera që përfshijnë luftën kundër krimit të organizuar dhe korrupsionit, administratën publike, të drejtat e njeriut si dhe çështjen e pronës.
Duke u ndalur tek reforma në drejtësi, Presidenti Nishani evidentoi se mbetet i palëkundur në bindjen dhe mbështetjen e tij për një reformë që zhvillohet në suazën e rekomandimeve të Komisionit të Venecias dhe standardit evropian, si dhe se kjo reformë që kapërcen kufijtë e mekanizmave të sistemit të drejtësisë dhe përbën një reformë kushtetuese duhet të sigurojë medoemos jetëgjatësi. “Vullneti i palëve për të ecur në këtë trajektore mbetet kyç në këtë fazë të procesit,” tha Presidenti.
Kreu i Shtetit u ndal edhe tek çështja e pronës, si një e drejtë themelore, e cila është e lidhur pazgjidhshmërisht me fusha të rëndësishme të zhvillimit të vendit. Në këtë kontekst ai kërkoi një vëmendje më të madhe të Komisionit Evropian lidhur me këtë prioritet kyç, dhe veçanërisht ndaj ligjit të miratuar rishtazi në Parlamentin shqiptar, i cili shkon përkundër standardit të vendosur nga Gjykata Evropiane e të Drejtave të Njeriut.
Presidenti Nishani dhe Komisioneri Han diskutuan edhe mbi politikën rajonale të Shqipërisë, ku bashkëndanë vlerësimin e një kursi konstruktiv dhe kontribues për paqen, stabilitetin dhe bashkëjetesën harmonike në rajon. Kreu i Shtetit theksoi se ofrimi i një perspektive shpresëdhënëse për brezin e ri është një nga sfidat më madhore të vendeve tona, dhe se forumet rajonale qoftë në kuadër të Procesit të Berlinit, qoftë në kuadër të Procesit të Brdo-Brijunit dhe nismave të tjera rajonale kanë krijuar mundësinë e diskutimit serioz mbi këtë çështje prioritare për vendet e rajonit tonë.
Përgjigjja e të riut ndaj Ramës pas shantazhit të studentëve për anëtarësime në parti
Studentë të ekselencës e maturantë në të gjithë vendin, ditët e fundit janë befasuar teksa në email-et e tyre personale, u ka vajtur një ftesë e pazakontë e Kryeministrit Rama për tu anëtarësuar sa më shpejt me Partinë Socialiste. Përmes këtij email-i, Rama shantazhon e u bën presion të rinjve që të anëtarësohen me detyrim në Partinë Socialiste.
Por një i ri, me emrin Mateo nuk i ka kursyer aspak një përgjigje ironike Ramës duke i shkruajtur një email si përgjigje e ftesës së bërë për tu anëtarësuar në PS dhe për tu bërë pjesë e reformave të “gjeneratës tjetër”. Në përgjigjen e tij, Mateo ironizon situatën e sotme dhe mënyrën skandaloze se si po qeverisen sot shqiptarët ndërsa thotë se që të bëhesh pjesë e ekipit ku bëhen “reformat” e vendit duhet të jesh i lidhur me trafikun e drogës, krimin, vjedhjet, korrupsionin e paratë e pista. Këndvështrimi i të riut vijon më tej ndërsa thotë se, notat dhe rezultatet e tij në mësime, nuk përmbushin kushtet e kriteret e qeverisë Rama dhe administratës së tij për tu bërë pjesë por sipas tij duhet të jesh pjesë e botës së krimit e mafies që të mund ti bashkohesh ekipit të Ramës për “reformat e gjeneratës së vjetër”.
Teksti i email-it të Ramës
I dashur Mateo,
Uroj që ky mesazh të të gjejë mirë dhe çdo gjë të shkojë mirë edhe në familjen tënde. Kam dëgjuar për rezultatet e tua aq të mira në shkollë dhe u bë në fakt disa kohë që doja të të shkruaja. Sepse dua të të shpreh respektin për dallimin që ti bën në komunitetin e shkollës tënde, po dhe për të të pyetur:
A ke dëshirë të përfshihesh edhe në aktivizmin qytetar përmes politikës, duke u bashkuar me mua për të çuar përpara reformat për Shqipërinë e Gjeneratës Tjetër? Nëse po, e mirëpres me padurim përgjigjen tënde për të përcaktuar pastaj vendin e kohën kur mund të takohemi së bashku me të tjerë bashkëmoshatarë të tutë, të cilët njësoj si ti bëjnë dallim aty ku shkollohen. Por edhe nëse s’ke një “Po!” të menjëhershme, po je i dyzuar apo i paqartë për sa lexove, më shkruaj pa asnjë ngurrim.
Le të mbetemi sidoqoftë në kontakt dhe mbi të gjitha, edhe një herë përgëzime me respekt për gjithçka ke arritur në shkollë. Faleminderit për leximin e këtij mesazhi miqësor dhe shumë të fala e shëndet në shtëpi.
Përqafime,
Edi Rama
Përgjigjia e Mateos
I dashur Edi,
E shoh që të kam lënë dy ditë duke pritur para kompjuterit me zemër në dorë. Më fal, po s’ka internet në shtëpi vëllai. As Iphone. Mezi gjej lekët për internet kafe.
Gjithsesi e lexova e-mail-in dhe kam përshtypjen se e ke nisur e-mail-in në adresën e gabuar.
Unë jam Mateoja që është nxënës i mirë, ai që i ka notat e mira. Është Mateoja tjetër ai që të duhet ty. Ai që zihet dhe përfundon në komisariat 2 herë në javë, çdo javë. Ai mund t’i çojë reformat përpara bashkë me ty. Unë s’të duhem për asgjë. Jam thjesht një nxënës i mirë, që marr ca nota të mira dhe që në fund do të përfundoj kamerier me diplomë. S’bëj dot reforma unë ashtu siç i do ti. Se ty për reformat të duhet një si Ilir Beqaj apo Arben Ahmetaj, domethënë duhet një çun i shkathët. Po edhe deputet nuk bëhem dot se s’kam cilësitë e duhura, e ke parasysh?
Unë Italinë, Holandën, Belgjikën i njoh vetëm në hartë. Dhe “miellin” e di akoma se është produkt ushqimor. Unë edhe një herë që isha aplikant i vetëm tek Zyra e Punës për duartrokitës Kongresi, më thanë që kisha dalë i dyti. Se s’kisha eksperiencat e duhura, s’kisha qenë asnjëherë në fushatë. Kështu që më ler mua dhe merr atë Mateon tjetër. Se ai e di mirë ku bie Italia, Holanda, Belgjika. Di ça është mielli, ça është bari, si zbërthehet “vegla”, si vidhet një bankë, si i shpëtohet shtetit që mos të kapi kur vjedh. Ai është tamam çun i shkathët. Bën fiks për atë punë që të duhen ty… për reformat e gjeneratës tjetër. Unë do të mbaroj shkollën dhe, shpresoj ishalla deri atëherë t’ju jetë rritur çik rroga kamerierëve dhe do të filloj kamerier. Po s’iu është rritur rroga kamerierëve, do ta provoj një herë në call center. Po s’doli gjë as aty, me këto cilësi që kam unë dhe me 10¬-at që kam në diplomë, i bie që të mbetem pa punë. Kështu që do të provoj një herë fatin në Gjermani.
Se aty kam dhe babain dhe vëllain e madh. Se që ta dish ti, ne na ndjek budallalliku si familje. Dhe ata kanë qenë budallenj si puna ime, lexuan gjithë jetën, morën 10¬-a në shkollë dhe në fund përfunduan në kamp refugjatësh në Gjermani. Edhe unë do t’i ndjek pas. Kështu, kështu Edo. Po të duhet adresa e atij Mateos tjetër, më thuaj të ta nis. Ai nuk të vonon shumë me përgjigjet se ka Iphone 7S. Përgjigjet menjëherë. Më shkruaj po të duhet.
Të fala,
Mateo.
Për pallatin 13-katësh dhe sahanlëpirësit e zakonshëm
Exit.al
Një ndër tezat kryesore që elita mediatike po propagandon në mënyrë të ethshme për të delegjitimuar protestën e qytetarëve që kundërshtojnë ndërtimin e këndit në Parkun e Liqenit është se, ata nuk kanë protestuar për ndërtime të tjera, sidomos për 13-katëshin që po ndërtohet përballë Fakultetit Ekonomik. Është një tezë absurde: t’u kërkosh llogari qytetarëve pa pushtet— që kanë lënë shqetësimet e tyre të përditshme për t’u marrë me një çështje publike— është e paimagjinueshme në demokraci. Ndërsa t’u kërkosh qytetarëve llogari për diçka që e kanë bërë pushtetarët, pa u kërkuar aspak llogari pushtetarëve, është shitje tek pushteti. Në fakt, arsyeja pse përdoret një argument i tillë nuk ka të bëjë fare me shqetësimin për 13-katëshin. Nëse ka vërtet qytetarë të këtij vendi që shqetësohen për atë ndërtim, ata do të ishin duke u organizuar për të protestuar ndaj tij. Ata që e përdorin këtë shembull janë militantët e lëpirësit e zakonshëm partiakë, që tashmë po përpiqen të bëjnë akrobacira logjike për të shpëtuar shefat e tyre nga një problem që po i njollos jo pak. Ndonëse, ata duhet t’i kërkonin llogari, pikërisht, kryetarit të Bashkisë dhe Kryeministrit për firmën që kanë hedhur mbi lejen e 13-katëshit, në mënyrë tinëzare ata po përpiqen të kompleksojnë protestuesit. Por e vërteta dhe e drejta janë me protestuesit. Nëse, sot, i gjithë vendi e njeh problematikën e ndërtimeve në park, kjo është rezultat i përpjekjeve disa vjeçare të atyre protestuesve. Po të mos ishte për shumë prej tyre, Parku i Liqenit, sot, do të ishte një kantier gjigant në çdo cep të tij. Kështu, problemin e ndërtimeve poshtë digës së Liqenit Artificial e bëri çështje publike grupimi Qytetarët për Parkun. Arditi e Besniku e dhjetëra të tjerë nga ky grupim e ngrysin, sot, çdo natë në park, pranë atij që ata e quajnë “Ulliri i Rezistencës”. Projektin për Hyrjen e Parkut— nismën e çuditshme që synonte të betonizonte të tërë hapësirën pranë Korpusit të Universitetit— e kundërshtuan publikisht Eljani, Ervini e Rezearta e dhjetëra miq të tyre, siç ata kanë bërë për çdo cenim tjetër të natyrës këto vitet e fundit. Ata janë, sot, ndër zërat kryesorë të protestës për parkun. Ishin qytetarët e grupit Ne Tirana që gjatë zgjedhjeve lokale 2015 bënë publike hartat që tregonin si ishte tkurrur gjatë viteve kufiri i Parkut të Liqenit, nga ndërhyrjet e vazhdueshme klienteliste të dy krahëve politikë. Ishin ata që paralajmëruan që para një viti ndërtimet në park dhe që e detyruan kandidatin e atëhershëm Veliaj të betohej se nuk do të kishte asnjë ndërtim në park. Anxhelën, Mozën, Anisin, Rezin e të tjerë qytetarë të grupimit Ne Tirana (sot Ne Shqipëria) i gjen sërish mes protestuesve të parkut. Nisma “Vota e Bardhë” e përfaqësuar nga Alida, si dhe grupimi “Organizata Politike” kanë kohë që akuzojnë dy krahët e politikës se për interesa klienteliste, në bashkëpunim me njëri-tjetrin, kanë shkelur interesin publik në mënyrë të vazhdueshme. Alida dhe OP-ja janë sot në ballë të protestës së parkut. Zirkoni, Andi dhe dhjetëra të tjerë që ngritën publikun në këmbë për armët kimike dhe importin e plehrave janë, sot, gjithashtu pjesë e protestës në park. Nga ana tjetër lejet e ndërtimit të 13-katëshit u bënë publike vetëm nga dy portale të pavarura, të cilat edhe sot janë burimi kryesor i informacionit për ndërtimin dhe protestat e parkut, në kushtet kur gati të gjitha mediat refuzojnë t’i mbulojnë këto ngjarje të “sikletshme” për pushtetin dhe u bëjnë jehonë vetëm versioneve manipuluese të qeverisë rreth ngjarjeve. Nëse sot publiku e njeh problematikën e ndërhyrjeve të vazhdueshme në park, nëse sot arrijmë të kuptojmë se parku po shkatërrohet për interesa klienteliste, kjo është kryesisht falë kontributit të vazhdueshëm prej kohësh të atyre që sot po protestojnë në park. Të fundit që mund të kompleksohen, sot, duke u përmendur problemet e tjera të betonizimit të Tiranës janë ata që prej vitesh kanë luftuar në mbrojtje të qytetit! Të fundit që mund t’u japin këshilla apo kërkojnë llogari protestuesve janë mediat dhe “intelektualët” që e kanë futur kokën në sahanin e qeverisë më thellë sesa themelet e 13-katëshit!
Shqipëria fiton 2-0 në Luksemburg, shënojnë Sadiku e Cikalleshi
Shqipëria rigjen buzëqeshjen me një ndeshje bindëse në Luksemburg ku arriti të dhuronte një paraqitje bindëse për të kaluar 2-0 vendasit në “Josy Barthel”. Edhe pse gjatë pjesës më të madhe të takimit kuqezinjtë luajtën me linjat e dyta, 11 i përzgjedhur nga De Biasi dha një provë bindëse duke treguar soliditet në mbrojtje dhe agresivitet në sulm. De Biasi e niste me formacion krejt ndryshe nga ai ndaj Austrisë, vetëm Berisha ishte i njëjti mes titullarëve, me Veselin, Alijin, Gjimshitin, Ajetin e Cikalleshin në mbrojtje, në mesfushë Memushaj me shiritin e kapitenit në mungesë të Canës, bashkë me Kukelin e Bashën, ndërsa para Cikalleshi me Shalën e Gashin nga krahët. E ndërgjegjshme se këtë herë i duhej të bënte lojën, Shqipëria e nisi në sulm, Cikalleshi tentoi në minutën e 5 me një goditje komplet jashtë shënjestre, ndërsa në minutën e 18 Shkëlzen Gashi shfaqi klasin e tij me një goditje dënimi duke kaluar barrierën por jo portierin Joubert që u përgjigj gati. Në goditjen e këndit menjëherë më pas është Cikalleshi që tenton këtë herë me kokë pa gjetur karërkndëshin, ndërsa Joubert mes shtyllave i thotë jo dy herë rradhazi Veselit në tentativën e tij me kokë dhe më pas edhe Herolind Shalës. Pas gjysmë ore lojë Luksemburgu fillon të nxjerrë kokën para me Delgadon që impenjon Berishën, por gjithsesi pa shumë rrezikshmëri. Episod vendimtar në ekstremin e pjesës së parë me Cikalleshin që merr një krosim të ghjatë dhe avancon i vetëm drejt portës, zotëron topin dhe kalon dhe Joubert që detyrohet ta ndalë në mënyrë të parregullt, duke merituar kështu kartonin e kuq. Në goditjen e dënimit, sulmuesi kavajas gabon vetëm për pak centimetra dhe pjesa e parë përfundon me porta të paprekura.
E dyta nis me Ergys Kacen që zë vendin e Kukelit, rast për Luksemburgun në të 55 me Bensi që kërcënon portën e Berishës. Në të 60 momenti i debutimit te Milot Rashices me Kombetaren e madhe me talentin e ri që futet bashkë me Shehin, Sadikun, dhe Lenjanin me Berishen, Bashën, Memushaj, Shalën dhe Alijin që ju bëjnë vend. Vetëm 3 minuta i duhen Sadikut për të gjetur golin e avantazhit, me Ergys Kacen që kombinon në të djathtë me Veselin, merr krahun dhe kroson në qendër, aty ku nuk fal sulmuesi nga Elbasani. 1-0 me gol të Sadikut që feston me përqafimin me kapitenin Cana në stol, ndërsa De Biasi në momentin e clirimit përgëzimin e ka me shpulla. Në minutën e 67 futet dhe Roshi për Ajetin, dhe në të 75 Shqipëria gjen golin e dyfishimit me Sokol Cikalleshin. Sulmuesi kavajas merr një pasim në zonë nga Gashi, reziston bukur duke ju shmangur markimit me driblim për të shënuar golin e 2-0. Fantastik Cikalleshi në këtë veprim që tregon forcë dhe klas.Në të 78 provon golin e befasisë nga larg Milot Rashica me një goditje të ulët që del jashtë shtyllës në të djathtë të Moris, porta e të cilit kthehet menjëherë më pas në tabelë qitje me Ermir Lenjanin dhe Ergys Kacen që tentojnë me goditjet e tyre. Minutat e mbetura ka vend dhe për spektakël, me këtë driblim të Kaces në zonën e Luksemburgut. Nuk ka më shumë gjëra për të treguar dhe mbyllet gjithcka 2-0 me Shqipërinë që jep një prpovë pozitive.
Kryesore
Continue to the category
