Përmes një akti të paprecedent, ministri i Drejtësisë, Ylli Manjani bëri publikisht presion dje ndaj Gjykatës Kushtetuese në lidhje me ligjin e pronave. Ky ligj i miratuar së fundmi nga qeveria synon grabitjen e pronave të pronarëve të vërtetë, ndërsa është kundërshtuar nga Presidenti i Republikës, si dhe opozita. Edhe Presidenti, edhe opozita kanë ankimuar këtë ligj arbitrar në Gjykatën Kushtetuese. E kur pritet që gjykata të shqyrtojë ankimimet e të japë opinionin e saj, ministri i Drejtësisë dje i bëri thirrje asaj që të rrëzojë ankimimet e bëra ndaj ligjit.
Ministri i Drejtësisë, Ylli Manjani nën pretekstin e “pasojave katastrofike” ka “këshilluar” dje Gjykatën Kushtetuese për vendimin që (s’)duhet të marrë për Ligjin e Pronave. Duke paragjykuar, Manjani është shprehur kundër çdo vendimi të Gjykatës Kushtetuese që do të çonte në pezullimin e Ligjit të Pronave. Sipas tij, një vendim i tillë do të kishte pasoja katastrofike për pronarët, por edhe për shoqërinë shqiptare.
“Pezullimi i ligjit të pronave do të kishte pasoja katastrofike jo vetëm për pronarët, por edhe për shoqërinë shqiptare”, u shpreh Manjani, duke e cilësuar pezullimin e ligjit si të palegjitimuar nga ana kushtetuese. “Nuk ka asnjë rresht që të legjitimojë pezullimin e akteve nga Gjykata Kushtetuese. Kjo është Kushtetuta e Shqipërisë nga A-ja te Zh-ja”, ka vijuar më tej Manjani, “duke i dhënë mend” Kushtetueses. Sipas tij, pezullimi do të digjte 25 milionë dollarë fond për kompensimin e pronarëve, si dhe do të bllokoheshin 20 mijë hektarë tokë bujqësore.
“Gjykimi kushtetues për këtë ligj është një gjë e shtuar, sikurse është kompleks dhe i vështirë e sigurisht që do të kërkojë kohën e vet. Masa e përkohshme e pezullimit të ligjit do të ishte një çështje e pajustifikuar. Sepse pengimi për ta zbatuar këtë ligj do të thotë djegie e 25 milionë dollarëve, bllokohen 20 mijë hektarë tokë për kompensim fizik, bllokohen 11 mijë dosje dhe 26 mijë vendime.
Nëse interesi është bllokimi i kompensimit dhe pronës për pronarët, është e pakuptueshme. S’është as në interesin e pronarëve, as të shtetit shqiptar. Është një çështje e shoqërisë shqiptare, është një çështje e pronarëve”, u shpreh Manjani. Ai theksoi se ligji do të vijojë nga zbatimi, pavarësisht shqyrtimit në Gjykatën Kushtetuese. “Le të fillojmë zbatimin dhe paralelisht të shqyrtohet edhe kushtetutshmërisht”, ka sfiduar më tej Gjykatën Kushtetuese, ministri i Drejtësisë. Gjykata Kushtetuese pritet të marrë në shqyrtim 3 kërkesat ankimuese të ligjit, atë të Presidentit Nishani, Partisë Demokratike dhe asaj Republikane.
Në fakt, ligji është kundërtuar fuqimisht nga vetë pronarët, të cilët kanë refuzuar zbatimin dhe njohjen e tij ndërsa kanë paralajmëruar protesta.
I menjëhershëm ka qenë reagimi i Presidentit Nishani, i cili në një njoftim për mediat shprehu shqetësimin për presionin e Manjanit ndaj Gjykatës Kushtetuese, ndërsa paralajmëroi se ligji aktual i pronave i miratuar nga qeveria do të nxisë edhe më tej penalizimet ndaj shtetit shqiptar nga Gjykata e Strasburgut. “Presidenti i Republikës shpreh shqetësimin e thellë për presionin publik adresuar pasdite nga ana e qeverisë shqiptare ndaj Gjykatës Kushtetuese të Republikës në lidhje me shqyrtimin e ligjit për kthimin dhe kompensimin e pronave. Presioni politik i një qeverie ndaj Gjykatës Kushtetuese të vendit është një akt i paprecedent në historinë e pluralizmit shqiptar. Presidenti i Republikës si palë ankimuese, i kërkon Gjykatës Kushtetuese të mbrojë Kushtetutën e vendit dhe standardet e shtetit të së drejtës. Ligji aktual dëmton rëndë të drejtat themelore të qytetarëve shqiptarë, do ta thellojë konfliktin midis individit dhe shtetit e për rrjedhojë do të vijojnë penalizimet nga ana e Gjykatës Evropiane të të Drejtave të Njeriut”.

Mazhoranca nuk ka lejuar dje dorëzimin në Gjykatën Kushtetuese të mandatit të dy deputetëve, të cilët në shkelje të hapur të ligjit të konfliktit të interesit kanë përfituar fonde publike. PS dhe LSI edhe dje kanë bllokuar dorëzimin e deputetit Suli në Gjykatën Kushtetuese dhe kjo ka sjellë një reagim të ashpër të opozitës, e cila ka bllokuar foltoren e Kuvendit duke mos lejuar zhvillimin e seancës.
E gjithë seanca parlamentare ka vijuar përmes tensionit dhe bllokimit dhe nuk ka zgjatur më shumë se 60 minuta. Deputetët e opozitës kanë bllokuar foltoren e Kuvendit dhe nuk kanë lejuar zhvillimin e seancës deri në zbatimin e ligjit dhe vendimeve të Gjykatës Kushtetuese.
Deputeti Halimi e konsideroi si fund të parlamentarizmit dhe grusht shteti, bllokimin e kërkesës legjitime të opozitës për deputetë në konflikt interesi që ata të mos dorëzohen në Gjykatën Kushtetuese. Halimi tha se vendimi i Gjykatës Kushtetuese nuk i lë asnjë hapësirë për interpretim Parlamentit, por kërkon dorëzimin në atë gjykatë të kërkesës së opozitës.
“Në seancën e kaluar ku mazhoranca në abuzim të plotë të pushtetit, rrëzoi kërkesën e PD për të çuar para drejtësisë dy deputetë, të cilët dyshohen se kanë përfituar fonde publike, është akti më i rëndë, pas mbajtjes dhe futjes në Parlament të deputetëve me rekorde të tmerrshme kriminale. Injorimi me arrogancë i vendimit të Gjykatës Kushtetuese që nuk i lë asnjë hapësirë Parlamentit, por kërkon që të gjithë deputetët që dyshohen se kanë përfituar fonde publike të shkojnë para drejtësisë, është padyshim grusht shteti ndaj Gjykatës Kushtetuese dhe është një fund i parlamentarizmit dhe funksionimit të një demokracie parlamentare”, tha Halimi.
“Abuzimi me pushtetin duke mbrojtur një vit më parë deputetin Kokëdhima na detyroi që t’i drejtohemi Gjykatës Kushtetuese duke e pyetur, në interpretim të Kushtetutës. Se çfarë ndodh kur Kryeministri mbron deputetët kur akuzohen për marrje fondesh me leje të tij? Çfarë ndodh me deputetët që marrin para me leje të Kryeministrit? A bëhen të paprekshëm për drejtësinë se Kryeministri nuk i lëshon, nuk ia dërgon drejtësisë? Pa as më të voglin dyshim mburoja kryeministrore për deputetët për t’i bërë të paprekshëm është abuzive, është vrastare për Kushtetutën, është vrastare për shtetin ligjor, është vrastare për demokracinë, për Parlamentin dhe pa dyshim për Gjykatën Kushtetuese.
Qeveria që qeveris jashtë normave dhe kornizave ligjore dhe kushtetuese është tirani. Shkruhet kështu në muret e Kongresit amerikan. Një qeveri që e bën zero Gjykatën Kushtetuese e injoron me arrogancë atë, nuk ka asnjë sjellje tjetër përveçse një sjellje prej grushti shteti. Prania e opozitës brenda Parlamentit është elementi më i rëndësishëm për një demokraci funksionale. Detyra e opozitës është të sigurojë transparencën në vendimmarrjen politike. Ndaj pyetëm Gjykatën Kushtetuese. Çfarë ndodh kur Kryeministri me arrogancë kërkon t’i mbrojë e t’i bëjë të paprekshëm deputetët e tij kur ata dyshohen se kanë abuzuar me fonde publike? Gjykata Kushtetuese, një vit më vonë, pak muaj më parë, foli dhe nxori këtë vendim. Vendimi nr. 7, dt. 24.02.2006, që flet për z. Kokëdhima, por bën edhe interpretimin e Kushtetutës, gjë që sipas Kushtetutës është e njëjtë me normën kushtetuese. Ky vendim i Gjykatës Kushtetuese është kthyer në normë kushtetuese. Dhe ky vendim i Gjykatës Kushtetuese thotë se Kryeministri, mazhoranca nuk mund të bëhet mburojë. Nuk mund t’i kthejë deputetët në të paprekshëm ndaj sistemit të drejtësisë. Detyra e opozitës, thotë vendimi i Gjykatës Kushtetuese, në paragrafin 13 të tij është të bëjë transparencë për procesin e qeverisë. Detyra e opozitës është të kërkojë llogari. Detyra e opozitës është të bëjë denoncime. Për denoncimet e opozitës nuk është mazhoranca që vendos, është drejtësia. Këtë thotë Gjykata Kushtetuese.
Në vendimet e Gjykatës Kushtetuese ishte një nga tre pikat për të cilat u bë marrëveshja e 24 dhjetorit. Dhe ja ku është vendimi i Gjykatës Kushtetuese, i cili u injorua dhe u shkel me arrogancë vetëm e vetëm për të mbrojtur nga drejtësia të paprekshmit, ata që kanë përfituar fonde publike me leje personale të Kryeministrit dhe duke ushtruar pushtetin e shumicës”.

Partia Demokratike reagoi dje ndaj shpifjeve dhe trillimeve të Edi Ramës të fabrikuara përmes deputetit të tij Taulant Balla. Në një reagim për mediat, PD deklaroi se Balla sot duhet të ishte përballë drejtësisë për shkak të lidhjeve të tij me trafikun e drogës si dhe laboratorin e kokainës të zbuluar në Xibrakë.
“Shpifësi i çertifikuar zyrtarisht, T. Balla, kreu dhe sot shërbimin e langoit për shefin e tij, duke sulmuar opozitën me trillime e gënjeshtra siç di ai. Ky abuzues me pushtetin, ky bastun i Edi Ramës që e ka emrin pas qindra emërimeve në administratë e poste kyçe, në tatime e dogana, në burgje e në komisione, që e ka emrin pas dhjetëra tenderave, pas dhjetëra licencimeve, që ka emrin pas shumë vjedhjeve që i bëhen sot parave të shqiptarëve, lehu dhe sot aty ku mbllaçit çdo ditë llokmat e korrupsionit.
Një drejtësi larg kontrollit të Edi Ramës do ta kishte vënë atë para ligjit, për shumë afera, për lidhjet e tij kriminale, për trafikun e laboratorit të drogës, si ai i Xibrakës. Kakaris ky shpifës sot, pikërisht se padroni i tij ka në dorë drejtësinë. Partia Demokratike dhe qytetarët e vendit do të luftojnë dhe po luftojnë për të sjellë në vend pikërisht drejtësinë që bën drejtësi, që çon aty ku e kanë vendin të korruptuarit si T. Balla”, thuhet në reagimin e PD.

Ish-Kryeministri Berisha kërkoi dje shkrirjen e Parlamentit ndërsa deklaroi se ky institucion i shndërruar tashmë në një bastion të krimit dhe kusarëve ka humbur funksionimin e tij. Në një prononcim për mediat Berisha reagoi ashpër në lidhje me bllokimin e qëllimshëm nga Kuvendi të zbatimit të vendimit të Gjykatës Kushtetuese për deputetët socialistë, të cilët kanë përfituar fonde publike në shkelje flagrante të ligjit, ndërsa kanë gëzuar mandatin e deputetit.
“Prej mëse tre javësh vazhdon grushti i shtetit brenda shtetit, vazhdon grushti i shtetit konsumuar nga përvetësimi i fuqisë kushtetuese nga pushteti, anashkalojnë pushtetin që Kushtetuta i jep Gjykatës Kushtetuese dhe marrjes së këtij pushteti nga Parlamenti. Prej tre javësh, vazhdon bllokimi i vendimit të Gj. Kushtetuese, që, ata deputetë, të cilët kanë përdorur mandatin për fitime vetjake për pasuritë publike, duhet të dorëzojnë menjëherë mandatin.
Kjo është një nga situatat më të rënda në vend, një situatë të cilën në vende të tjera, por jo në Shqipëri, përmbarues i zbatimit të vendimeve të Gjykatës Kushtetuese është Presidenti i vendit, në Kushtetutë. Ndërsa këtu është e shkruajtur se është Gjykata Kushtetuese garantuese e Kushtetutës dhe përmbarues bëhet cilido nga pushtetarët.
Situata është dramatike. Në këto kushte, Parlamenti meriton vetëm një qëndrim; shkrirjen e menjëhershme të tij. Në kushtet kur Parlamenti ka konsumuar aktin më të rëndë kushtetues, grushtin e shtetit, ky Parlament nuk meriton të ekzistojë më qoftë dhe një ditë të vetme”, u shpreh Berisha në reagimin e tij.
Nga ana tjetër, Berisha ftoi opozitën që të marrë të gjitha masat në lidhje me marrëdhëniet e saj me Parlamentin ndërsa i bëri thirrje Gjykatës Kushtetuese gjithashtu të mos shndërrohet në një mekanizëm të mazhorancës.

– Do ja kërkojë PD Presidentit këtë?
E ftoj opozitën të marrë të gjitha vendimet sepse një situatë e tillë është kazmë në themelet e shtetit. Imagjinoni ju se çfarë janë në gjendje të bëjnë këta pushtetarë kur shkelmojnë vendimet e asaj gjykate, të cilat në të drejtën kushtetuese janë të barabarta me normat kushtetuese. Një vendim i Gj. Kushtetuese është i barabartë me një normë kushtetuese dhe këta qeveritarë, për të mbrojtur kusarët brenda Parlamentit, shkelmojnë harbutërisht mbi vendimet e gjykatës dhe i marrin asaj pushtetin.
Por unë ftoj Gjykatën Kushtetuese gjithashtu, të mendojë dhe të mos pranojë në këtë mënyrë, të shndërrohet në një mekanizëm, në një institucion boshi, në një institucion ku me vendimet e saj shkelmohen dhe përthyhen në një Parlament për interesa kryekëput të kusarëve. Ju e dëgjuat vetë, se edhe mandati i Koço Kokëdhimës shkoi në Gjykatë Kushtetuese, jo për të zbatuar vendimin e gjykatës, por na rezulton se u bë nga Gramoz Ruçi për t’i dhënë një ndëshkim si rival i ardhshëm për sekretar të Përgjithshëm të PS-së. Të paktën këtë thotë vetë Koçoja nëpër media, sepse vetë ai, që është një kryekusar, thotë që nuk i kishin thënë se do të votohej prandaj doli dhe foli përçart aty. Pra, Parlamenti është shndërruar në bastion të krimit dhe kusarëve në pushtet.

– Zoti Berisha, me kërkesën për shkrirjen e Parlamentit keni hequr dorë nga thirrja për qytetarët për të dalë në protesta?
Këtë Parlament mund ta shkrijnë vetëm qytetarët shqiptarë, e shkrin vetëm sovrani dhe ai është qytetari shqiptar.

– Po Presidenti…?
Presidenti i Republikës nuk ka prerogativa kushtetuese. Në Kushtetuta të tjera Presidenti është përmbaruesi i vendimit të Gj. Kushtetuese, por kjo nuk ekziston në Kushtetutën tonë. Ndaj dhe unë nuk mund të them se Presidenti i Republikës e ka këtë kompetencë. Por, Presidenti i Republikës duhet të konsultohet gjerësisht me të gjithë juristët konstitucionalistë më të mirë të vendit, për të marrë këshillën dhe për të shprehur qëndrimin ndaj këtij akti antikushtetues, ndaj këtij grushti shteti që ka konsumuar Parlamenti. Kur një institucion i merr pushtetin në mënyrë antikushtetuese institucionit tjetër, ky quhet grusht shteti brenda shtetit.

– PD bllokoi seancën….
Unë solidarizohem me opozitën dhe e vërteta është se kam besim se hap pas hapi opozita do të marrë të gjitha vendimet e merituara ndaj këtij Parlamenti që nuk meriton më të ekzistojë.

– Keni diskutuar me kreun e PD për shkrirjen e Parlamentit?
Jo asnjë diskutim nuk kam bërë me njeri, por duke qëndruar në një Parlament që ka konsumuar grushtin kushtetues dhe që justifikon qytetarët të përdorin të gjitha mjetet kundër tij për të rivendosur Kushtetutën, atëherë unë mendoj se shkrirja e tij është e vetmja rrugëzgjidhje paqësore e vendit.

– Si i komentoni deklaratat e ambasadorit Lu të bëra një ditë më parë?
E para, shpreh kënaqësinë që BKH nga sqetulla e Edvin Shullazit dhe Saje qorrit kaloi aty ku ne kemi kërkuar dhe kemi mbështetur. Mendoj se u humbën disa muaj, sepse pikëpamjen se ku duhet të jetë BKH e kam shprehur edhe para se të vijnë rekomandimet e para të Venezias për këtë Byro. Ajo u konfirmua dy herë që të ngrihet në Prokurorinë speciale, vendi i saj aty është, të bëhen të gjitha ndryshimet dhe grupi negociator i yni ka shprehur të gjitha qëndrimet e tij. Mendoj përsëri ta votojmë menjëherë sepse Edi Rama e ka betejë për jetë dhe vdekje këtë Byro. Jo vetëm që ka marrë një amanet nga Viktor Ponta dhe ju të gjithë si media e keni marrë vesh, por nuk ja u thoni shqiptarëve, dini detaje më shumë se unë për takimin e tyre të fshehtë dhe e mbani edhe ju të fshehtë, çka nuk ju nderon, por Edi Rama nuk ka nevojë të marrë amanete nga Ponta sepse kur i del vila e Surrelit, kur i del pallati në pajë apo afera me 600 milionë euro me CEZ, i dalin koncesionet me ndrikull Nushin, si dhe aferat me vëllain famoz Olsi, etj., ai nuk e voton atë. Prova, është jo miratimi aty në letër, prova është që ta votojmë që nesër. Do e konsideronim këtë si dëshmi të vullnetit nëse e bën, por nuk e bën dot ai këtë.

– Zoti Berisha, ju thoni që nesër, por ambasadori amerikan tha shumë qartë që BKH duhet të kalojë me Reformën në Drejtësi.
Jo, s’ka ndonjë dallim. Ata që bëjnë dallime nuk kanë kuptuar se çfarë kam thënë. Unë nuk them që të votohet Byroja dhe të mos votohet Reforma. Skema ime është që të votohet Byroja si kapitull i parë, sepse janë një seri ligjesh dhe amendamentesh për t’u përgatitur dhe në një marrëveshje, e cila të detyrojë palët që të votojnë çdo kapitull të reformës, por nuk ka nevojë të presim fundin sa të miratohet amendamenti i fundit dhe të fillojë votimi.

– Por nëse ka vullnet….
Të besosh se Rama ka vullnet politik, njeriu që e shtyu me makinacione teknike një vit rresht metodologjinë e punës. Ku e ka të grupin për të cilin thoshte se bënte çfarë t’i thonë ekspertët? I patë ekspertët, i hoqën maskat tani, ekspertë “të pavarur” dolën kunati me Sokol Sadushin. Kështu që, këto janë hipokrizira, të cilat i shërbyen Edi Ramës për ta shtyrë një vit kohë një reformë që do të ishte përfunduar dhe arkivuar dhe vendi do të kish marrë kredite të mëdha në BE në rrugën e integrimit.

– Po pse duhet të miratohet një herë BKH pastaj të vijohet me Reformën…?
Sa të hyjë në fuqi ajo, besoj e dëgjuat ambasadorin, që vetëm policët gjyqësorë duhet të kenë një trajnim serioz pranë zyrave të FBI. Pra, nuk është se e miratove ti sot dhe ajo do të hyjë në fuqi nesër. Por sa më shpejt që ta miratosh, aq më shpejt do të hyjë ajo në fuqi. Natyrisht, çfarëdo që të bëjmë ne, ajo do të kërkojë një kohë të duhur për t’u strukturuar tërësisht. Por unë jam dakord që të vijohet me përparësi me kapitujt që lidhen me funksionimin e kësaj Byroje sepse për mua, në bindjen më të thellë, thelbi dhe themeli i reformës është njësia antikorrupsion dhe lufta kundër korrupsionit. Natyrisht Prokuroria speciale dhe BKH janë një institucion, që duhet të jenë në një kontekst me institucionet e tjera, por ky është institucioni më i rëndësishëm.

Kompania gjermane do të sigurojë ekspertizën e nevojshme për koordinim dhe bashkëpunim në nivel politik, ndërmjet qeverisë shqiptare dhe qeverive të shteteve të Ballkanit Perëndimor, për bashkëpunimin në zonat kufitare strategjike në fushën e transportit. Kompania gjermane e konsulencës “Roland Berger” është e njohur në qarqet e qeverisë shqiptare, pasi ka ofruar shërbimet e saj gjatë negociatave për gazsjellësin Trans Adriatic Pipeline ( deri në vitin 2013). Por, këtë herë është qeveria “Rama” që ka kërkuar shërbimet e kompanisë gjermane për një periudhë 6-mujore e për të cilën do të paguhet 480 mijë euro ( pa TVSH) për llogari të Ministrisë së Transportit dhe Industrisë. Vendimi që tashmë është zyrtarizuar edhe me hyrjen në fuqi në Fletoren Zyrtare parashikon që studioja konsulente “Roland Berger” të zhvillojë një kuadër ligjor, kontraktual dhe bashkëpunimi në nivele kombëtare ndërkombëtare, së bashku me një vlerësim paraprak për 3-4 projekt propozime të infrastrukturës së transportit, të cilësisë së lartë, tërësisht të vlerësuara e të përshtatshme për përpunim të mëtejshëm, në propozime për t’u investuar. Kompania gjermane do të sigurojë edhe ekspertizën e nevojshme për koordinim dhe bashkëpunim në nivel politik, ndërmjet qeverisë shqiptare dhe qeverive të shteteve të Ballkanit Perëndimor, për bashkëpunimin në zonat kufitare strategjike në fushën e transportit. Kjo vlen edhe në lidhje me realizimin e bashkëpunimit ndërmjet shtetit shqiptar dhe vendimmarrësve kryesorë të Bashkimit Evropian, me secilin shtet anëtar, veçanërisht me Republikën Federale të Gjermanisë,por edhe me çdo donator e partner publik të huaj, me qëllim gjetjen e financimit për projektet e cilësuara si prioritare. Këtu bëhet fjalë për angazhimet që qeveria shqiptare ka marrë në kuadër të asaj që njihet si “Procesi i Berlinit”, i krijuar gati një vit më parë me inicitivën e kancelares gjermane Angela Merkel. Shqipëria synon të bëhet pjesë e projektit të madh infrastrukturor që njihet si “Korridori i Kaltër” e që zbret nga Kroacia, në të gjithë bregdetin, Malin e Zi dhe Shqipëri e deri në pjesën veriore të Greqisë, në Igumenicë (Autostrada Adriatiko–Joniane). Ky është një projekt shumë i rëndësishëm, i cili u miratua përfundimisht në Samitin e Vjenës dhe vjen si një zgjatim i korridoreve europiane, që njihen me emërtesën “Ten T”.