Arrestohet menaxheri i fushatës elektorale të kandidatit republikan për Shtëpinë e Bardhë, Donald Trump.
Corey Lewandowski akuzohet se ka sulmuar fizikisht ish-reporteren, Mishel Filds.
Bëhet fjalë për një tubim politik të datës 8 mars, ndërsa gazetarja ka bërë padi në polici me 11 mars.
Filds ka dëshmuar në polici se është kapur me forcë për krahu nga Lewandowski i cili dhe e ka shtyrë në momentin që reporterja kërkoi t’i bënte një pyetje, Donald Trampit.
Policia në Florida ka publikuar dhe videon me pamjet e sulmit të pretenduar, ndërsa vetë gazetarja ka publikuar një foto me shenja të nxirash në krah si pasojë e kapjes me forcë nga Corey Lewandowski.
Tramp ka dërguar një deklaratë mbështetjeje për menaxherin e tij të fushatës menjëherë pas arrestimit.
“Zoti. Lewandowski është absolutisht i pafajshëm për këtë akuzë, do të lirohet”.
Lewandowski do të dalë para gjykatës më 4 maj.
Arrestohet menaxheri i fushatës së Trump për sulm ndaj reporteres
Gjyqi ndaj gazetarëve, Erdogan kundër diplomatëve
Në një fjalim të mbajtur në Stamboll, Presidenti i Turqisë sulmoi veçanërisht Konsullin e Përgjithshëm të Britanisë së Madhe, Leigh Turner. Pa e përmendur Turnerin me emër, Recep Tayip Erdogani kritikoi që ai angazhohet për një gazetar, i cili ka dalë para gjyqit për shkak të akuzave për spiunazh. “Dhe sikur të mos mjaftonte kjo, ai bën edhe një fotografi faqe më faqe me të dhe e nxjerr në internet”, tha Recep Tayip Erdogan sipas agjencisë së lajmeve “Anadolu”.
Turneri pati ndjekur të premten me disa diplomatë të huaj, midis tyre edhe me ambasadorin gjerman, Martin Erdmann, hapjen e procesit gjyqësor shumë të diskutueshëm kundër dy gazetarëve kritikë ndaj qeverisë, Can Dündar dhe Erdem Gül. Kryeredaktorin e gazetës “Cumhuriyet”, Dündar dhe shefin e zyrës së gazetës për kryeqytetin i akuzojnë ndër të tjera për spiunazh, tradhti të sekreteve shtetërore dhe mbështetje të një organizate terroriste. Në rast dënimi, të dy i pret burgim i përjetshëm.
Para se të shkonte për të ndjekur procesin gjyqësor, Turner publikoi disa fotografi në rrjetin e Tëitterit, midis tyre një selfie me Dündarin dhe e komentoi seancën me fjalët: “Turqia vendos vetë se çfarë vendi dëshiron të jetë”. Erdogani deklaroi se me këtë qe kapërcyer një kufi. “Nëse ky person mund ta kryejë edhe më tej shërbimin e tij në Turqi, kjo ka të bëjë me fisnikërinë dhe me mikpritjen tonë”, tha Erdogani sipas agjencisë “Anadolu”. Sipas tij, në vende të tjera, diplomatët që manifestojnë sjellje të tilla nuk durohen për asnjë ditë.
Ministri i Drejtësisë: sjellja e diplomatëve është e papajtueshme
Anadolu raporton duke iu referuar qarqeve diplomatike se Ministria e Jashtme turke është ankuar zyrtarisht në disa përfaqësi të huaja diplomatike, për shkak të pjesëmarrjes së diplomatëve të tyre në proces. Se në ç’formë konkrete është bërë ankesa, kjo është e paqartë. Edhe një konfirmim të Ministrisë së Jashtme gjermane për momentin nuk ka. Qeveria në Ankara zemërohet para së gjithash për shkak të publikimeve të diplomatëve në Twitter, siç u shpreh një diplomat turk. Kjo mund të vlerësohet si përzierje në punën e pavarur të Gjykatës dhe shkel “paanshmërinë” e diplomatëve, u tha.
Ministri i Drejtësisë, Bekir Bozdag e quajti sjelljen e diplomatëve sipas mediave turke si “të papranueshme”. Edhe Kryeministri Ahmet Davotuglou e dënoi pjesëmarrjen në procesin gjyqësor të diplomatëve. Erdogani vetë u dërgoi që të shtunën një shpërthim zemërimi vëzhguesve të paftuar të procesit gjyqësor: “Ky nuk është vendi juaj, kjo është Turqia”, u shpreh ai i revoltuar në vendin e tij. Diplomatët mund të kryejnë aktivitet në kuadër të përfaqësive të tyre, përndryshe nevojitet leje, tha Presidenti turk.
Kritika ndërkombëtare ndaj procesit gjyqësor
Shkak për procesin është raportimi i gazetës “Cumhyriet” vitin e kaluar, se Turqia ka furnizuar me armë ekstremistët islamikë në Siri. Erdogani, që i paditi vetë gazetarët në gjyq dhe Shërbimi i Fshehtë turk, MIT janë bashkuar si palë me akuzën e Prokurorisë.
Kundër këtij procesi gjyqësor protestuan në një letër të hapur Këshilli i Evropës, organizata ndërkombëtare gazetarësh si dhe midis të tjerash më shumë se njëqind autorë në një letër të hapur, midis tyre edhe nobelisti i Letërsisë, Mario Vargas Llossa. Organizata Reporterë pa Kufij dhe organizata të të drejtave të njeriut kërkojnë ndalimin e procesit gjyqësor, që për mendimin e tyre është i motivuar politikisht. Procesi gjyqësor zhvillohet me dyer të mbyllura. Gjykatësit miratuan në fillim të procesit një kërkesë përkatëse të Prokurorisë. Mbështetësit e të dy të akuzuarve në sallën e gjyqit reaguan me zemërim për përjashtimin e opinionit publik.
Nxorën sekretin!
Dy gazetarë dolën në gjyq nën akuzat se kanë nxjerrë sekrete shtetërore dhe kanë ndihmuar një organizatë terroriste me raportimet e tyre për kontrabandën e dyshuar të armëve në Siri.
Xhan Dundar dhe Erdem Gyl të gazetës “Xhumhuriyet” mund të dënohen me burgim të përjetshëm nëse shpallen fajtorë. Ata janë akuzuar për publikimin e imazheve që datojnë në janar të vitit 2014 të kamionëve me destinacion Sirinë, për të cilat gazeta thotë se provojnë që Turqia ka kontrabanduar armë në Siri.
Turqia thotë se, gazetarët kanë ndihmuar një lëvizje islamike të kryesuar nga kleriku që jeton në SHBA, Fethullah Gulen. Turqia ka një rekord të dobët të të drejtave të njeriut dhe një histori akuzash ndaj gazetarëve.
Organizatat për lirinë e medias i kanë bërë presion Ankarasë të tërheqë akuzat kundër gazetarëve Dundar dhe Gyl.
Të ardhurat sërish në gropë, janari me 26% “fsheh” shkurtin me vetëm 6%
Rritja e lartë dyshifrore me rreth 16% e të ardhurave në buxhet për 2- mujorin ishte një sinjal pozitiv se, financat i lanë pas problemet e vjetshme, kur zgjerimi real ishte afër zeros dhe plani nuk u realizua për asnjë muaj, duke detyruar rishikimin e buxhetit në mes të vitit dhe duke e mbyllur vitin me 35 miliardë lekë mangut nga plani fillestar.
Megjithatë, të dhënat e detajuara tregojnë se, performanca e mirë e financave ka ardhur nga janari, ndërsa shkurti ka qenë një muaj tepër i dobët.
Në muajin shkurt, të ardhurat buxhetore u rritën me 6 për qind në krahasim me faktin e një viti më parë, por ritmet e rritjes u ngadalësuan ndjeshëm ne krahasim me janarin.
Në muajin janar të ardhurat u rritën me 26 për qind krahasuar me janarin e vitit 2015. Rritja e fortë e janarit i dedikohet në fakt problemeve që kaluan arkëtimet e taksave në fillim të vitit që shkoi për shkak të problemeve që solli instalimi i sistemit të ri online. Niveli i ulët i të ardhurave në janar 2015 (baza më e vogël) “ndihmoi” në një rritje të lartë të të ardhurave në janarin e këtij viti, por duket se ritmet e rritjes janë ngadalësuar ndjeshëm në shkurt.
Sipas të dhënave nga Ministria e Financave gjatë shkurtit 2016 janë arkëtuar 27.7 miliardë lekë nga 32.5 miliardë lekë në janar 2016, pra me një rënie prej 15% në raport me muajin e mëparshëm. Shkurti ka qenë nën mesataren e të gjithë muajve në 2015-ën (shih grafikun mujor), përveç janarit dhe shkurtit, që siç u përmend ishin të dobët, për shkak të sistemit të ri online, por edhe tkurrjes së importeve të akcizës (në pritje të rritjes së akcizës së cigareve dhe të tjerave në janar 2015, bizneset kishin krijuar rezerva në muajt e mëparshëm).
Financat duket se do ta kenë të vështirë të ruajnë ritmin e lartë të rritjes së të ardhurave të konstatuara në dy muajt e parë të vitit. Niveli ulët i të ardhurave në dy muajt e parë të vitit të kaluar dhe rritja e fortë e mallrave të akcizës, dy faktorët që ndikuan në rendimentin e mirë të janar-shkurtit, nuk pritet të “ndihmojnë” më në muajt në vijim.
Në janar dhe shkurt 2015 u mblodhën më pak se 30 mld lekë në muaj (25.7 mld në janar dhe 26 mld lekë në shkurt), më pas, ritmi u përmirësua ndjeshëm dhe mesatarja mujore ishte gati 33 miliardë lekë në muaj (as shkurti as janari 2016 nuk e kapën këtë mesatare të mars-dhjetorit 2015).
Si importet e karburanteve dhe ato të cigareve u dyfishuan në janar 2016 në raport me janarin e një viti më parë, sipas statistikave fiskale, duke iu rikthyer në fakt normalitetit mujor (në janar 2015 psh importet e cigareve ishin vetëm 118 ton, nga mbi 200 ton që ishte mesatarja mujore në muajt në vijim, ndërsa në janar 2016 ishin 217 ton-shiko grafikun). Edhe për karburantet ishte e njëjta prirje-shiko grafikun.
Të ardhurat e pritshme në buxhet në 2016-ën
Të ardhurat buxhetore pritet të arrijnë këtë vit në 418.8 miliardë lekë, me një rritje mbi 8% me faktin e 2015.
Të ardhurat nga tatimet dhe doganat për vitin 2016, vlerësohen në rreth 283 miliardë lekë ose rreth 20,8 miliardë lekë (8%) më shumë se parashikimi i vitit 2015.
Të ardhurat nga lufta ndaj informalitetit pritet të gjenerojnë rreth 8.9 miliardë lekë. Vlerësohet se për vitin 2016 do të importohen 3,000 ton cigare në krahasim me rreth 2,600 ton që priten për vitin 2015.
Të ardhurat në total nga rritja ekonomike pritet të jenë rreth 5,9 miliardë lekë. Për efekt të kujdesit në parashikimin e të ardhurave, në vlerësim është përdorur vetëm indikatori i rritjes ekonomike prej 3,4%, sqaron Ministria e Financave.
Të ardhurat nga politika fiskale janë llogaritur me 1,4 miliardë lekë shtesë në buxhetin e 2016. Të ardhurat nga faktorë të tjerë vlerësohen rreth 2 miliard lekë, nga Ministria e Financave.
Eksportet provojnë krizën, bien me 6.1% të gjitha grupet
Ulja e çmimeve të naftës e mineraleve dhe dalja nga tregu e Kurum zhysin eksportet shqiptare. Shpresa kthehet sërish te industria me material porositësi, që si avantazh kryesor ka krahun e lirë të fuqisë punëtore. Struktura aktuale e eksporteve, të varura nga krahu i lirë i punës dhe konjuktura ndërkombëtare e çmimeve nuk premton asgjë pozitive të paktën për këtë vit…
Dy muajt e parë të këtij viti kanë qenë tepër të dobët për eksportet shqiptare. Sipas të dhënave të publikuara nga INSTAT, për periudhën janar-shkurt 2016, shitjet jashtë vendit arritën në gati 34 miliardë lekë, me një rënie prej 6.1% në raport me të njëjtën periudhë të vitit të kaluar. Efektin kryesor në këtë rënie e kanë shënuar “mineralet lëndët djegëse dhe energjia”, por dhe grupet e tjera, me përjashtim të tekstile e këpucë dhe produkteve ushqimore.
Eksportet e tekstile e këpucëve janë grupi që po shënon ecurinë më të mirë në këto muaj të parë të vitit. Ky grup u rrit me 20%, duke përmirësuar ndjeshëm ecurinë në raport me vitin e kaluar. Industria me material porositësi është kthyer sërish në sektorin më të rëndësishëm të eksporteve shqiptare, me 51% të totalit, një rritje e ndjeshme në raport me vitin e kaluar, kur zinin 40%. Gjithsesi, industria me material porositësi, si avantazh kryesor ka krahun e lirë të fuqisë punëtore dhe rritja e kostove rrezikon ta bëjë dhe këtë sektor jo konkurrues në afatin e mesëm.
Grupi i “minerale, lëndë djegëse dhe energji”, që deri në fund të 2014-ës udhëhoqi rritjen e eksporteve dhe u bë më i eksportuari, me gati 40% të totalit, është tkurrur ndjeshëm në muajt e parë të 2016-ës, duke vijuar tendencën rënëse për të dytin vit radhazi. Sektori është tepër i varur nga konjuktura ndërkombëtare. Rënia e çmimeve të naftës dhe mineraleve e ka prekur ndjeshëm industrinë nxjerrëse. Ky grup ra me 47%, në vetëm 4.3 miliardë lekë, duke përbërë vetëm 13% të totalit të eksporteve. Ecuria pritet e dobët, përsa kohë që nafta (Bankers Petroleum është kompania me ndikimin kryesor) do të vijojë të jetë afër 40 dollarëve për fuçi në tregjet ndërkombëtare.
Grupi tjetër më i madh, ai i metaleve dhe materialeve të ndërtimit ka rënë me 28% për dy mujorin, në 4.1 miliardë lekë. Në shkurt Kurum, prodhuesi më i madh i metaleve në vend dhe eksportuesi i dytë më i madh pas Bankers shpalli falimentin.
Eksportet e “pije, ushqime e duhan” vijuan tendencën pozitive, duke u rritur me 38% në 3.1 miliardë lekë, ndonëse mbeten të ulëta për të kompensuar rënien e grupeve të mëdha.
Në rënie, me 25%, janë eksportet e “makineri pajisje e pjesë këmbimi”, që vitin e kaluar shënuan një lulëzim të vërtetë. Edhe prodhimet e drurit dhe letrës, edhe ky një grup pozitiv deri në pjesën e parë të 2015 kanë qenë me rënie 7.5%.
Struktura aktuale e eksporteve, të varura nga krahu i lirë i punës dhe konjuktura ndërkombëtare e çmimeve nuk premton asgjë pozitive të paktën për këtë vit.
Luis Enrique rinovon me Barcelonën?
Me Luis Enriquen edhe pas vitit 2017-të. Te Barcelona nuk dëshirojnë të privohen nga trajneri i tyre dhe po punojnë që t’i rinovojnë edhe për disa sezone të tjera kontratën, 45-vjeçarit nga Gijoni që në vetëm pak kohë ka arritur suksese të mëdha nën drejtimin e Barcës. Kontrata aktuale e Luis Enriques me klubin blaugrana skadon në verën e vitit 2017-të, por te Barcelona as që e mendojnë largimin e asturianit dhe janë gati ta blindojnë atë. Për të kuptuar që drejtuesit katalanas duan të zgjasin marrëveshjen aktuale me Luis Enriquen ka mjaftuar një deklaratë, e numrit 2 të Barcës, Jordi Mestre, i cili në një intervistë për mediat spanjolle u shpreh se klubi ka në plan t’i ofrojë rinvovimin Luis Enriques, që sezonin e kaluar fitoi plot 5 trofe me Barcelonën.
Edhe në këtë sezon me ish-trajnerin e Romës dhe Celta Vigos në drejtim, blaugranat po ecin me hapa të frikshëm, pasi përveçse kryesojnë La Liga me 9 pikë avantazh ndaj Atleticos ndjekëse, kanë siguruar edhe pjesëmarrjen në çerekfinalet e Champions League dhe finalen e Kupës së Mbretit. Në fakt konfirmimi i Luis Enriques edhe për sezonet që do të vinë nuk ishte vendosur asnjëherë në diskutim, dhe rinovimi i trajnerit spanjoll me Barcelonën është vetëm çështje kohe.
Ndërkohë, Riyad Mahrez, është lojtari që i nevojitet Barcelonës. Nëse Leicester City i Claudio Rainieri-it po shkëlqen në Premier League, përveç Jamie Vardy-it, merita të jashtëzakonshme ka edhe futbollisti i përfaqësues algjeriane, që sëfundmi po përflitet si një përforcim i mundshëm i Barcelonës. Me 16 gola dhe 10 asiste në 30 ndeshje të kampionatit anglez, Mahrez është padiskutim vlera e shtuar e Dhelprave siç njihet ndryshe klubi i Leicester-it. Për tia sugjeruar 25-vjeçarin e lindur në Francë drejtuesve katalanas, ka menduar një legjendë e Barcelonës si Xavi Hernandez, i cili në një intervistë nga Katari i largët ka nënvizuar se Mahrez do t’i bënte shumë punë skuadrës blaugrana.
36-vjeçari spanjoll aktualisht pjesë e skuadrës së Al Saad është shprehur se nuk e kishte ndjekur më parë me vëmendje të madhe lojtarin e përfaqësueses algjeriane por sëfundmi ka mbetur i mahnitur nga paraqitjet e tij dhe nga ecuria e skuadrës së Ranieri-it. “Mahrez është një futbollist shumë i fortë deklaroi Xavi. Me atë që po bën për klubin e tij aktual, ai po tregon që është një lojtar i madh. Riyad mund të luajë shumë mirë edhe te klub i madh si Barcelona”. Me këtë fjalë vlerësuese ish- mesfushori i Barcës përfundoi deklaratat e tij në lidhje me Mahrez. Kur këshillat vijnë nga një futbollist si Xavi Hernandez ato duhet marrë në konsideratë.
Qetësohen te Napoli, dëmtimi i Hysajt nuk është serioz
Pas alarmit fillestar, te Napoli u rikthye qetësia. Dëmtimi i Elseid Hysajt, në miqësoren që Shqipëria luajti në Vienë përballë Austrisë nuk është serioz. Mbrojtësi kuqezi pësoi një goditje në kavilje në minutat e para të sfidës, ku edhe pse imazhet treguan se dhimbja ishte e madhe, ai ishte në gjendje të luante, madje qëndroi gjatë gjithë 90 minutëshit në fushë. Për shkak të lëndimit, Hysaj u largua përpara kohe nga grumbullimi i Kombëtares. Stafi kuqezi i dha leje shkodranit të rikthehej në Napoli, për të vijuar vizita të specializuara mjekësore, duke mos rrezikuar me aktivizimin e tij në ndeshjen me Luksemburgun.
Lajmi për dëmtimin e Hysaj fillimisht shkaktoi panik te Napoli. Klubi, stafi teknik i trajnerit Sarri, por edhe mediat dhanë alarmin se problemet e mbrojtësit në kavilje mund të ndikonin në ambicien e skuadrës drejt titullit kampion në Itali. Por, në pritje të kontrolleve të specializuara, që do të zbulojë shkallën e dëmtimit dhe ku do të përcaktohet ekzaktësisht afati për kalimin e lëndimit, te Napoli janë optimistë. Bëhet fjalë vetëm për një goditje në kavilje dhe asgjë më e rëndë. Elseid Hysaj pritet të vijojë rregullisht stërvitjen me pjesën tjetër të ekipit.
Trajneri Maurizio Sarri shpreson të rikuperojë mbrojtësin shqiptar për sfidën me Udinesen, por ndërkohë do të vlerësojë edhe alternativat për aktivizimin e Maggio-s ose kalimin e Koulibaly-t në krahun e djathtë.
Gotze: Dua të luaj sërish për Klopp
Mario Gotze kërkon transferimin te Liverpool. Sipas asaj që publikohet në median britanike, mesfushori i përfaqësueses gjermane nuk po ndihet mirë te Bayern Munchen dhe u ka shprehur miqve të tij më të afërt dëshirën për t’u vënë sërish nën urdhrat e Jurgen Klopp.
Mario Gotze u largua nga Borussia Dortmund për te Bayern Munchen në verën e vitit 2013, për 29 milionë paund, ndërkohë që një vit më vonë shënoi golin që i dha titullin botëror Gjermanisë, në finalen me Argjentinën. Megjithatë, kjo nuk i garantoi atij vendin e titullarit të padiskutueshëm te Bayerni.
Përkundrazi, me kalimin e kohës, aktivizimi i tij te skuadra bavareze është reduktuar ndjeshëm. Në këtë sezon, Gotze ka luajtur vetëm 7 ndeshje në Bundesligë me Bayernin, 3 nga të cilat i ka nisur si zëvendësues.
Kjo është edhe arsyeja, që ai po kërkon largimin nga kampionët e Gjermanisë dhe tashmë ka zhvilluar bisedimet e para me trajnerin Klopp.
Gotze ka edhe një vit kontratë me Bayern Munchen, por largimi i tij nuk është i pamundur. Te Liverpool kërkojnë ta shfrytëzojnë këtë situatë delikate të tij, madje te “The Reds” është rritur ndjeshëm besimi se mund ta sjellin atë në “Anfield Road” për 15 apo 20 milionë paund.
Morata drejt Dortmundit
E ardhmja e Alvaro Moratas varet krejtësisht nga Reali i Madridit dhe këtë e ka të qartë vetë sulmuesi spanjoll dhe drejtuesit e Juventusit.
Merkatoja e kësaj vere mund të jetë mundësia e fundit për skuadrën madrilene që të shfrytëzojë klauzolën e nënshkruar me bardhezinjtë për Moratan, duke qenë se në dy merkatot e 2017-s, ndaj tyre ekziston një vendim i FIFA-s që i penalizon.
Kjo ka bërë që në mediat sportive të qarkullojnë skenare të ndryshme, ku më i fundit përfshin në këtë mes edhe gjermanët e Borusias së Dortmundit.
Sipas Bild, Reali do të shfrytëzojë klauzolën që i jep të drejtën të blejë Moratan për ta dërguar më pas në Dortmund, së bashku me një shumë të caktuar parashë në këmbim të Aubameyang. Megjithatë, deri më tani gjithçka është në kuadër të thashethemeve mediatike, por sa më shumë ditë kalojnë aq më i fortë bëhet presioni i vetë sulmuesit ndaj Juventusit dhe Realit për të mësuar të ardhmen e tij.
Skandali, si manipuloi Veliaj me shëndetin e policeve bashkiake
Erion Veliaj nxitoi të shpërndante me shpejtësi të madhe dje në mediat pranë, lajmin se protestuesit kishin dhunuar tre police femra të Policisë Bashkiake. E teksa bashkë me lajmin shpërndau edhe foto tre, policet shfaqeshin të shtrira në barrelat e spitalit teksa merrnin ndihmën e shpejtë mjekësore.
Inskenimin e ulët të Erion Velisë dhe manipulimin e tij në spital me shëndetin e policeve bashkiake! Fotot flasin vet!
“Zoti Berisha shihni si gënjen Erjon Velija për shëndetin e policis bashkiake.
Shihni dy fotot në momente të ndryshme një para se të vinte Erjoni e një pas”.
Polici bandit i Veliajt, i dënuar për grabitje me armë në 2004
Inspektori Dritan Hardhia, i cilësuar nga Veliaj si “heroi” i Bashkisë së Tiranës, rezulton të jetë një person me të shkuar kriminale. Ai u bë i njohur gjatë protestës së Shoqërisë Civile kundër ndërtimit të Parkut të Lojërave, ku u shfaq si viktimë e dhunës së protestuesve. Dritan Hardhia prentendoi se më 6 mars u godit me lopatë në kraharor nga një vajzë protestuese, ndërkohë që u vizitua nga Veliaj në Spitalin e QSUT.
“Dritani është realisht një aktivist i Shoqërisë Civile dhe ky është njeriu që realisht e nderon qytetin. Ky është një aktivist i vërtetë. Sot, pamë një protestë që mund të ishte realisht një protestë e Shoqërisë Civile dhe s’kishte arsye për një protestë të dhunshme”, deklaroi atëherë Veliaj, duke e cilësuar si një polic shembullor. Por e shkuara problematike e Hardhisë tregon të kundërtën. Në vitin 2004, ai rezulton të ketë kryer një grabitje me armë në zonën e Fushës së Aviacionit në Tiranë. Ai është arrestuar nga policia për veprën penale të vjedhjes me dhunë dhe në bashkëpunim.
Grabitja nga Hardhia është publikuar në njoftimin zyrtar të Policisë së Shtetit në atë kohë. “Përfundojnë në prangat e policisë 2 grabitës dhe shoqërohen 2 të tjerë. Një qytetar, me iniciale P.N., ishte ndaluar nga persona të armatosur me automatik, duke e kërcënuar që t’u jepte të gjithë paratë dhe sendet me vlerë që posedonte. Ai u qe përgjigjur negativisht kërkesave të tyre, por pak sekonda më pas e pa veten pre e dhunës së tyre. Viktima P.N. lajmëroi menjëherë policinë për t’i ardhur në ndihmë. Pas një aksioni të rrufeshëm, u bë i mundur arrestimi i 2 prej tyre, Dritan Hardhija, 25 vjeç dhe Roland Dervishi, 18 vjeç”, thuhej në njoftimin e Policisë së Shtetit në atë kohë.
Pasioni i tij për armët dhe dhunën shihen edhe në fotot e publikuara sëfundmi nga mediat. Por telashet e kaluara për Dritanin nuk mbarojnë me kaq. Në Gjykatën e Rrethit Gjyqësor Tiranë rezultojnë 2 padi penale ndaj Dritan Hardhisë për dhunë në familje dhe detyrimin për pension ndaj djalit të vet. Në të dy rastet, denoncuesja është bashkëshortja e Inspektorit të Bashkisë, Rezarta Hardhia.
Padia e parë është bërë në vitin 2005, me akuzën e “Rrahjes”. Në vendimin e Gjykatës shihet se Hardhia rezulton të jetë i dënuar më përpara, ndërkohë që bashkëshortja nuk është paraqitur në seancën gjyqësore për shkaqe që nuk dihen. Për këtë mosprezencë, Prokuroria kërkon pushimin e çështjes, kërkesë kjo e plotësuar nga Gjykata.
Pas këtij vendimi, Rezarta Hardhia kërkon divorcin për bashkëshortin dhunues. Padia e dytë është regjistruar në vitin 2008, dhe ka të bëjë me akuzën ndaj inspektorit Hardhia për “detyrimin e pensionit ushqimor” ndaj djalit të tij, Valentino Hardhia. Edhe në këtë rast, Gjykata pushon çështjen për shkak të tërheqjes nga ankimimi të bashkëshortes Rezarta (Kamberi) Hardhia.
Fundjavën që lamë pas, Dritan Hardhia është rikthyer sërish në skenë. Ky inspektor “shembullor” është akuzuar nga Shoqëria Civile për dhunë të ushtruar ndaj tyre. Sipas “Qytetarët për Parkun”, Hardhia ka qëlluar me shkelma në bark protestuesen Rezearta Çaushaj, e cila u dërgua me ambulancë të shtunën në Spitalin e Traumës për të marrë mjekimin e nevojshëm.
Për t’u maskuar, polici bandit Dritan Hardhia është zhveshur nga uniforma dhe i veshur civil ka ushtruar detyrën e funksionarit të Bashkisë së Tiranës. Ai ka ushtruar dhunë ndaj protestuesve tek Parku i Liqenit, ku si pasojë e dhunës një aktiviste e Shoërisë Civile përfundoi në spital. Mes qytetarëve të dhunuar ka qenë edhe një adoleshent rreth 15 vjeç, i cili është dhunaur dhe shtrirë në tokë nga policia. Ndërkohë, disa qytetarë u dërguan me ambulancë në spital pasi humbën ndjenjat nga dhuna e policisë. Dritan Hardhia është standardi i vendosur nga kryebashkiaku Erion Veliaj për të prezantuar Policinë Bashkiake.
Kryesore
Continue to the category
