Në SHBA, kandidati republikan për president Donald Trump, që shpreson të marrë emërimin  e partisë së tij po e kthen vëmendjen dhe retorikën drejt kryesueses së garës demokrate, Hillary Clinton, pas fitoreve të rëndësishme që ata të dy arritën në Nju Jork këtë javë.
Zoti Trump bëri dje fushatë në Merilend, një nga pesë shtetet që zhvillojnë zgjedhjet paraprake të martën e ardhshme.
“Mashtruesja Hillary Clinton nuk ka asnjë shans. Ajo nuk do të kthejë vendet e punës. Ajo merr vendime të gabuara. E dini se çfarë ka thënë Bernie Sanders për të dy herë. Pikë së pari, ajo nuk është e kualifikuar, goditje e rëndë. Por ai shtoi se, ajo ka një gjykim të gabuar. Ne do ta mposhtim atë keqazi”.
Por zotit Trump i duhet së pari të sigurojë emërimin, për të cilin sfidohet nga senatori Ted Cruz dhe guvernatori i Ohajos, John Kasich, që radhiten pas tij për nga numri i delegatëve dhe mund të duan ta prishin kurorëzimin e tij si kandidat përpara kuvendit të partisë në korrik.
Ndërkohë, Hillary Clinton bëri fushatë të mërkurën në Pensilvani, ku u përmbajt të përmendte Trumpin me emër, por iu referua rivalit të tij, Ted Cruz, i cili ashtu si Trump ka mbajtur një qëndrim të debatueshëm ndaj myslimanëve.
Zoti Trump kërkon të ndalojë përkohësisht myslimanët të hyjnë në Shtetet e Bashkuara, ndërsa kandidati Cruz kërkon kontrolle të posaçme në komunitetet myslimane amerikane.
“Kjo është e rrezikshme. Kjo nuk është një retorikë e lirë dhe e drejtë. Ted Cruz flet për etiketimin e amerikanëve myslimanë dhe patrullimet speciale të policisë në lagjet myslimane”.
Rruga e zonjës Clinton për të marrë emërimin demokrat në korrik duket gjithnjë e më e sigurtë, dhe do ta bënte atë të parë grua që fiton emërimin si kandidate për presidente në historinë amerikane.
Zoti Trump ka të ngjarë të përballet me më shumë rezistencë për të siguruar emërimin republikan nëse nuk siguron numrin e kërkuar të delegatëve para kuvendit të partisë.

Shtetet e Bashkuara shprehën shqetësim lidhur me njoftimet se Rusia po dërgon më tepër pajisje dhe personel ushtarak në Siri, ndërsa zyrtari më i lartë i NATO-s thotë se, armëpushimi mbetet mundësia më e mirë për një zgjidhje paqësore të krizës.
“Do të ishte diçka negative për Rusinë, që të çonte pajisje të tjera ose personel ushtarak në Siri”, tha Ben Rhodes, Zëvendëskëshilltari për Sigurinë Kombëtare i Shteteve të Bashkuara.
Zyrtarët amerikanë të mbrojtjes dhe të zbulimit thonë se, Rusia e ka rritur vazhdimisht praninë përreth qytetit të rëndësishëm verior të Alepos, në prag të një përpjekjeje të re ushtarake nga forcat besnike të Presidentit sirian Bashar al-Assad.
Në fillim të javës, në një bisedë telefonike me Presidentin rus Vladimir Putin, Presidenti Obama theksoi rëndësinë që të gjitha palët t’i mbajnë premtimet e marra kur u arrit marrëveshja e armëpushimit.
Rusia njoftoi në mars se po i tërhiqte pjesërisht forcat ushtarake nga Siria, por Sekretari i Përgjithshëm i NATO-s, Jens Stoltenberg tha se, “ajo ka ruajtur një prani të konsiderueshme ushtarake” në mbështetje të qeverisë së Presidentit sirian Bashar al-Assad. Zoti Stoltenberg, i cili foli të enjten në Ankara, tha se megjithëse marrëveshja  e armëpushimit e arritur dy muajt e fundit, është nën presion, ajo përsëri përfaqëson shansin më të mirë për paqen në Siri.

Ish-udhëheqësi sovjetik Mikhail Gorbachev u bëri thirrje vendeve perëndimore për të ndalur izolimin e Rusisë dhe t’i japin fund të gjitha sanksione individuale. Ai i bëri këto komente në një artikull të botuar në gazetën e përditshme qeveritare “Rossiyskaya” të enjten.
Zoti Gorbachev, 85-vjeçar, shkruan se Rusia luan një rol të rëndësishëm dhe pozitiv në marrëdhëniet ndërkombëtare dhe tha se vendi nuk do të pranojë një rol të dytë përulës.
“Është koha që Perëndimi të heqë dorë nga përpjekjet për të izoluar Rusinë. Izolimi nuk ka qenë efektiv”, shkruan ai, “aq më tepër kur bëhet fjalë për sanksione individuale, të cilat nuk kanë gjasa të  arrijnë ndonjë rezultat. Ato duhet të braktisen të parat, përndryshe, nuk do të ketë dialog apo mundësitë për të rivendosur besimin”, thotë zoti Gorbachev në artikullin e tij.
Marrëdhëniet diplomatike mes Rusisë dhe Perëndimit kanë arritur një pikë të ulët që prej Luftës së Ftohtë, pasi Moska aneksoi Krimenë nga Ukraina në vitin 2014 dhe përfshirja e supozuar e Rusisë në kryengritje të armatosur në rajonin lindor të Ukrainës.
Zoti Gorbaçov vuri në dukje bashkëpunimin mes SHBA-së dhe Rusisë për të gjetur një zgjidhje për konfliktin në Siri, dhe shtoi se ky bashkëpunim mund të përdoret si plan-projekt për lehtësimin e tensioneve, duke shkuar përpara.
“Nëse kjo prirje vazhdon, ne duhet ta zgjerojmë atë në sfera të tjera të marrëdhënieve”, shkruan ish-udhëheqësi sovjetik, edhe pse e pranon se ky do të jetë një proces i gjatë dhe i vështirë.

Presidenti amerikan Barak Obama ka hyrë mes një debati të ndezur mbi referendumin e 23 qershorit në Britani, në të cilën votuesit do të vendosin nëse vendi i tyre do të mbetet në Bashkimin Evropian apo jo.
Në një artikull të publikuar në gazetën “The Telegraph” pak çaste, pasi Presidenti Obama mbërriti në Aeroportin “Stansted” të Londrës, të enjten vonë, ai i bëri thirrje Britanisë për të qëndruar në BE, duke thënë se ky vendim do ta bëjë Britaninë më të fortë.
“Në fund të fundit, çështja nëse Mbretëria e Bashkuar mbetet pjesë e BE-së, kjo i përket votuesve britanikë të vendosin”, shkruan zoti Obama. “Bashkimi Evropian nuk e zbut ndikimin britanik, por e zmadhon atë. Një Evropë e fortë nuk është kërcënim për udhëheqjen globale të Britanisë, por e forcon këtë udhëheqje”, shkruan zoti Obama.
Shtetet e Bashkuara dhe Britania kanë një “marrëdhënie të veçantë”, siç shprehen shpesh udhëheqësit e Uashingtonit dhe SHBA e shohin Britaninë si zërin e Uashingtonit në grupin prej 28-vendesh të BE-së.
“Shtetet e Bashkuara shohin se si zëri juaj i fuqishëm në Europë ndikon që Europa të marrë një qëndrim të fortë në botë, dhe e mban të hapur BE-në dhe të lidhur ngushtë me aleatët e saj në anën tjetër të Atlantikut. Shtetet e Bashkuara dhe bota kanë nevojë që ndikimi juaj i madh të vazhdojë, duke përfshirë edhe në Evropë”, shkruan zoti Obama.
Deklaratat e Presidentit Obama tërhoqën kritika të ashpër nga ata që mbështesin daljen e Britanisë nga BE-ja. Kryetari i Bashkisë së Londrës, Boris Johnson tha se, udhëheqësit amerikanë kurrë nuk do të pranonin një organizëm si BE-ja për veten e tyre. Zoti Johnson e ka akuzuar udhëheqjen amerikane për hipokrizi për këtë çështje, duke thënë se ai beson se Uashingtoni nuk do të lejonte Kanadanë ose Meksikën, të cilat me Shtetet e Bashkuara janë pjesë e Marrëveshjes së Tregtisë së Lirë të Amerikës së Veriut, për të imponuar ligjet e tyre ose për të diktuar politikat e tyre në tokën amerikane.
Udhëheqësi i partisë së djathtë  “Independence”, Nigel Farage u shpreh me një ton edhe më të ashpër, duke thënë se “presidenti amerikan duhet nxjerrë jashtë”. Të premten, Presidenti Obama ka në plan të takohet me Mbretëreshën Elizabeth, e cila festoi ditëlindjen e saj të 90 një ditë më parë.
Ai do të takohet më pas me kryeministrin David Cameron, ku përveç çështjes së BE-së, do të diskutojnë për luftën kundër grupit Shteti Islamik, përpjekjet për stabilizimin e Lindjes së Mesme, si dhe përpjekjet për t’u marrë me krizën e refugjatëve të Evropës.
Para mbërritjes në Londër, Presidenti Obama mori pjesë në një takim të Këshillit të Bashkëpunimit të Gjirit në Arabinë Saudite.

Bashkimi Europian e anuloi pak para fillimit takimin e planifikuar pёr tё premten (22.04) nё Vjenё pёr zgjidhjen e krizёs politike nё Maqedoni. Zёdhёnësja e Politikёs sё Jashtme tё BE-sё, Maja Kocijançiç, komunikoi nё Bruksel, se takimi i planifikuar nuk do tё zhvillohet.
Katёr partitё kryesore politike ishin ftuar nё bisedimet e Vjenёs, shtoi zёdhёnёsja e BE-sё. Opozita njoftoi, se ajo do t’i bojkotojё bisedimet nёse qeveria nё Shkup nuk i shtyn zgjedhjet e planifikuara pёr nё qershor dhe nёse nuk heq dorё nga amnestia e shpallur prej presidentit Gjorgje Ivanov. Si BE-ja ashtu edhe SHBA-ja patёn deklaruar, se ndёrkohё nё Maqedoni nuk ekzistojnё kushtet e pёrshtatshme pёr zgjedhje mё 5 qershor.
Kryetari i partisё opozitare LSDM, Zoran Zaev, e anuloi pjesёmarrjen nё takimin e Vjenёs dhe kёrkoi, qё shfuqizohet ligji i diskutueshёm i amnistisё sё shpallur nga presidenti Gjorgje Ivanov. Ky amnistoi sё fundi tё gjithё politikanёt, tё cilёt janё implikuar nё skandalin e korrupsionit dhe tё aferёs sё pёrgjimeve. Zaev kёrkoi edhe shtyrjen e zgjedhjeve parlamentare tё shpallura pёr 5 qershor.
Opozita do t’i bojkotojё zgjedhjet, sepse nuk janё pёrmbushur kushtet. Ndonёse Gruevski dha dorёheqjen nё janar, mendohet qё ai vazhdon tё luajё fijet nё prapaskenё.

Paralajmёrim pёr “pasoja tё rёnda”
BE-ja shprehu shqetёsim dhe paralajmёroi pёr “pasoja shumё tё rёnda” pёr Maqedoninё, nё rast se nuk arrihet njё marrёveshje pёr krizёn, qё po vazhdon prej mё shumё se njё viti. Konflikti u shkaktua prej bisedave tё pёrgjuara ilegalisht tё ish-kryeministrit Nikola Gruevski gjatё telefonatave me bashkёpunёtorё tё ngushtё. Regjistrimet dёshmojnё pёr korrupsion nё shkallё tё gjerё, nepotizёm, presion ndaj drejtёsisё dhe nёnshtrim i mediave e kriminalizim i kundёrshtarit politik.
Ditёt e fundit Maqedonia ёshtё pёrfshirё edhe nga protestat masive kundёr vendimit tё presidentit pёr amnistimin e politikanёve tё korruptuar.