Skandal! Mediat kombëtare raportuan dje largimin e prokurorëve të Prokurorisë së Përgjithshme nga hetimet mbi shkaqet e vdekjes së dy pilotëve të ushtrisë pas rrëzimit të helikopterit të Ministrisë së Mbrojtjes. Mediat thanë se hetimi i tragjedisë është marrë përsipër nga prokurorë ushtarakë??? Ligji shqiptar nuk njeh as Prokurori dhe as Gjykatë Ushtarake.
Nëse mediat kanë patur parasysh Policinë Ushtarake, kjo është tërësisht diçka tjetër. Vërtet kjo polici ka të drejtë të kryejë hetime mbi veprat penale të kryera në Forcat e Armatosura, por nuk mund të jetë kurrsesi rasti që të mund të aplikohet. Që në orët e para të rrëzimit të helikopterit në ujërat e Liqenit të Shkodrës, dëshmitarët në vendngjarje dhe mediat kanë ngritur një sërë pikëpyetjesh mbi rrethanat e rrëzimit, itinerarin e helikopterit, misionin e tyre, duke etiketuar qartazi edhe përgjegjësit e kësaj tragjedie.
Mbi të gjitha që në orët e para të kësaj ngjarjeje të rëndë, burime të ndryshme kanë implikuar direkt ministren e Mbrojtjes, Mimi Kodheli, se helikopteri po transportonte mjete ndërtimi për vilën e saj familjare në Vermosh. Mediat kanë ngritur pikëpyetje të mëdha edhe për gjendjen fizike të helikopterit, moskompletimin e tyre sipas standardeve, mungesën e pajisjeve të nevojshme të mbrojtjes apo edhe deri tek cilësia e karburantit të përdorur. Edhe sikur një nga këto arsye të jetë e vërtetë, në një rast të tillë përgjegjësia e ministres së Mbrojtjes është e drejtpërdrejtë, përgjegjësi jo vetëm morale, por edhe ligjore.
Hetimet e kryera vetëm nga hetuesit e Policisë Ushtarake e komprometojnë rëndë këtë hetim. Policia Ushtarake është një strukturë e Ministrisë së Mbrojtjes në varësi direkte të ministres së Mbrojtjes, Mimi Kodheli. Nëse helikopteri është rrëzuar për shkakun se korrupsioni qeveritar në momentin e marrjes në dorëzim të helikopterëve i ka lënë ato larg standardeve të nevojshme dhe pa mjetet e duhura mbrojtëse, atëherë përgjegjësia është e ministres Kodheli. Faji i Mimit është edhe nëse cilësia e karburantit të përdorur nuk ka qenë e duhura dhe rrëzimi ka ardhur nga shuarja e motorëve. Përgjegjësia e ministres është edhe nëse helikopteri është përdorur për të furnizuar me mermer firmën që po dekoron vilën e ministres. Përgjegjësia e ministres është edhe nëse pilotët nuk kanë kryer fluturimet, trajnimet dhe nuk marrë trajtimet e duhura nga buxheti i Ministrisë së Mbrojtjes që është më i ulëti në historinë e vendit dhe pjesa që shkon për ushtrinë keqpërdoret nga korrupsioni i skalioneve të kusarëve që kontrollojnë çdo gjë në këtë vend.
Vartësit e Mimit nuk mund të hetojnë Mimin apo shefat e tjerë të lartë të ushtrisë dhe nuk mund të jenë kurrsesi të paanshëm në hetimet që po kryejnë. Prania e ekspertëve francezë dhe largimi i prokurorëve të Prokurorisë së Përgjithshme veçse e mjegullon edhe më këtë çështje. Në çdo vend normal të botës, për më tepër anëtar i NATO-s do të ndodhte e kundërta, Prokuroria e Shtetit do të ishte në krye të hetimeve dhe eksperti nga kompania prodhuese do të ishte thjesht për të asistuar ekspertë të pavarur që të hetonin në thellësi dhe detaje çdo provë apo të dhënë që do të ndihmonte në zbulimin e shkaqeve që sollën rrëzimin e helikopterit dhe humbjen e dy pilotëve shqiptarë.
Prokuroria duhet të hetojë mbi këtë ngjarje tragjike, pasi jeta e atyre dy pilotëve nuk mund të kthehet mbrapsht dhe nuk mund të shitet as me gradat që shpërndan Mimi për vartësit e saj, as me llokmat e korrupsionit të pushtetit që po rrëzojnë këtë vend rrëmbimthi në mjerim dhe fatkeqësi. Pse humbën jetën dy pilotët, pse u rrëzua helikopteri nuk mund të hetohet nga Mimi. Kjo bëhet vetëm për fshehur shkaqet dhe përgjegjësinë e Mimit dhe bandës që ka rreth vetes.

Një skandal që ka shpërthyer në Belgjikë me një tender të zhvilluar për studimin e fizibilitetit për realizimin e projekteve në Shqipëri ka nxjerrë në sipërfaqje lidhjet e arkitektëve që janë nën hetim nga autoritetet belge me Edi Ramën. Jo vetëm kaq, por pas këtyre fijeve lidhen edhe familjarë e bashkëpunëtorë të ngushtë të Kryeministrit shqiptar.
Peter Swinnen, drejtues i Qendrës së Arkitektëve flamanë, këshilltar i qeverisë flamane dhe themelues i studios “51N4E” po hetohet për shkak se një tender, sipas nismës “Atelier Albania” të Edi Ramës, ia ka dhënë një miku të tij në konflikt interesi, edhe ai i njohur i Kryeministrit shqiptar.
Swinnen konsiderohet si njeri me lidhje të forta me qeverinë shqiptare për shkak të njohjeve me Ramën. Ai nuk është i lidhur me kryetarin e qeverisë së Tiranës vetëm përmes projekteve publike kur Rama drejtonte bashkinë e kryeqytetit, por edhe me projekte private të tij të kohëve të fundit. “51N4E” është projektuese e vilës së Edi Ramës në fshatin Surrel, rrëzë malit të Dajtit.
Veç projekteve të fituara në Bashkinë e Tiranës, në regjistrat e “51N4E” zbulohet edhe një lidhje familjare mes Peter Swinnen dhe Ramës. Një prej bashkëpunëtorëve të kësaj studioje arkitekturore rezulton të jetë Rea Xhillari, vajza e Linda Bashës, bashkëshortes së Kryeministrit shqiptar. Emri i saj është në listën e mëposhtme që pasqyron skuadrën e “51N4E”.
Veç familjares së Kryeministrit, “51N4E” është e lidhur edhe me një prej bashkëpunëtorëve të tij më të ngushtë. Anri Sala, një prej miqve më të afër të Ramës (bashkëpunëtor në lyerjen e fasadave të kryeqytetit) ka bashkëpunuar me “51N4E” në projektin për rehabilitimin e sheshit “Skënderbej”, sipas projektit belg që Rama synonte të implementonte në Tiranë kur ishte kryetar i bashkisë.
“51N4E” është jo rastësisht edhe projektuesja e kullës shumëkatëshe (TID) të ndërtuar në rrugën “Abdi Toptani” nga një prej miqve të ngushtë të Ramës.
Peter Swinnen u shkarkua nga detyra dhe po hetohet në Belgjikë pasi favorizoi në tenderin për studimin e fizibilitetit të projekteve në Shqipëri studion “Centrum voor Stadsontwikkeling” CVBA, që drejtohet nga Patrick Janssens. “Lapsi.al” zbulon se lidhjet mes tyre të çojnë sërish në Shqipëri.
Janssens, kryetar i Partisë Socialiste flamane në Belgjikë dhe kryetar i Bashkisë së Atnwerpit, kohë gjatë së cilës mendohet se është njohur me Ramën, ka qenë pjesë e jurisë së konkursit për projektin e “Lungomares” – shëtitores së Vlorës.
Ky projekt u fitua nga “XDGA”, e drejtuar nga Xaveer de Geyter. Fijet e lidhjes shtrihen nga Geyter tek “51N4E” e Peter Swinnen, pasi Xaveer de Geyter rezulton të ketë qenë pjesë e komisionit të vlerësimit për projektin e sheshit “Skënderbej”, të hartuar nga “51N4E”. Ai ka qenë edhe redaktor i manualit të “51N4E”.
Swinnen dhe Janssens kishin vendosur të bashkëpunonin më në fund hapur për projektet e “Atelier Albania”, një organizëm në vartësi të Ministrisë së Zhvillimit Urban dhe Turizmit, i drejtuar nga arkitekti Joni Baboçi. “Atelier Albania” është një “njësi laboratorike” në brendësi të Agjencisë Kombëtare të Planifikimit të Territorit të drejtuar nga Adelina Greca. Zonja Greca ka qenë funksionare në Drejtorinë e Planifikimit Urban dhe shefe e Departamentit të Planifikimit në Bashkinë e Tiranës, në kohën kur ajo drejtohej nga Edi Rama.
Misioni i “Atelier Albania” është: “’Atelier Albania’ do të hartojë procesin për projektet transformuese urbane dhe territoriale në bashkëpunim të ngushtë me të gjitha ministritë e interesuara, me shoqërinë civile, si dhe të gjithë palët publike apo private me interes të drejtpërdrejtë në zhvillimin territorial dhe atë urban. ‘Aterlier Albania’ do të projektojë dhe koordinojë planin për hartimin e një plani. Ajo do të funksionojë si një platformë e përhershme bashkëpunimi midis ekspertëve vendas, ekspertëve të huaj dhe grupeve të interesit; duke ndërtuar kapacitete në të gjitha nivelet e shoqërisë për sa i përket zhvillimit hapësinor, territorial dhe urban në Shqipëri. ‘Atelier Albania’ do të jetë një instrument për ndërtimin e projekteve dhe për ndërlidhjen e donatorëve me prioritete të vendit dhe me ekspertizën e duhur lokale dhe të huaj”.
Tenderi për të cilin po hetohet kreu i studios belge, i cili ka projektuar edhe shtëpinë e Ramës në Surrel, ishte pikërisht për studimin e fizibilitetit për projektet që mund të zhvilloheshin në bashkëpunim me “Atelier Albania”, që siç shihet drejtohet nga një “besnike” e Ramës.
Kështu, afera e fundit që ka shpërthyer në Belgjikë, ashtu siç thonë tashmë mediat belge, nuk ka qenë e rastësishme. Arsyet që të çojnë në këtë përfundim janë lidhjet e forta që Swinnen ka me Kryeministrin shqiptar Edi Rama, jo vetëm nga bashkëpunimi i hershëm për projekte të rëndësishme miliona euroshe në Bashkinë e Tiranës apo i atyre në rang kombëtar tani që Rama është zgjedhur Kryeministër, por edhe nga njohja dhe bashkëpunimi me familjarët dhe miqtë më të afërt të kreut të qeverisë shqiptare.

Lidhjet e forta të kompanisë belge me Ramën

Kompania “51N4E” e bashkëthemeluar nga Peter Swinnen, shpallësi i tenderit për nismën “Atelier Albania”, ka qenë një nga kompanitë arkitekturore më të rëndësishme për Ramën. Kjo kompani ka bërë projektin për Sheshin “Skënderbej”, që zgjati për 4 vite me radhë, duke mbajtur peng gjithë trafikun në Tiranë dhe si përfundim nuk u realizua kurrë. Po ashtu, fituesi i tenderit të projektit të “Lungomares” në Vlorë u shpall më 21 shkurt 2014 Xaveer de Geyter me studion “XDGA”. Vetëm disa muaj më pas, në korrik të 2014, u evidentua, se projekti kishte probleme. Xaveer de Geyter ka qenë pjesë e komisionit vlerësues për projektin e Sheshit “Skënderbej” dhe i njohuri Peter Swinnen. Xaveer de Geyter rezulton gjithashtu se ka redaktuar manualin për kompaninë “51N4E”.
Në jurinë ndërkombëtare për seleksionimin e projektit të “Lungomares” ka qenë edhe fituesi i tenderit për nismën “Atelier Albania”, Patrick Janssens. Janssens nuk është një i panjohur për Edi Ramën. Ai duket se është njohur me të gjatë kohës që ka mbajtur postin e kryetarit në Partinë Socialiste flamane në Belgjikë, si dhe kur drejtonte (për shumë vite) Bashkinë e qytetit të Antwerpenit, bashkia më e madhe në vend. Në Shqipëri, studioja e tij ka projektuar edhe të tjera objekte si qendra e biznesit që ngrihet pranë sahatit të Tiranës, pikërisht në rrënjët e hamamit të njohur si objekt kulture. Lidhjet e belgut me Kryeministrin Rama duket se janë edhe personale, pasi është pikërisht Janssens që ka ideuar dhe projektuar shtëpinë e re të Kryeministrit Rama.

Lekë Tuna është kreu i një grupi kriminal që vidhte dhe trafikonte makina, e pikërisht me Edi Ramën u shpërblye duke u bërë drejtori i OSHEE për Kurbinin. Emërimi u denoncua dje nga Kryetari i Departamentit për Rendin dhe Sigurinë në PD, Enkelejd Alibeaj, i cili përmes një denoncimi për mediat deklaroi se inkriminimi i institucioneve nuk ndalet dhe pasurimi i zyrave me trafikantë vazhdon me të njëjtat ritme.
“Lajme të reja vijnë nga inkriminimi Ramist i zyrave publike. Pas një hetimi të gjatë të Prokurorisë së Shkodrës ky person u arrestua natën e 5 prillit, nën akuzën e trafikimit të mjeteve motorike. Por lajmi po mbahet i fshehtë, dhe megjithëse nën arrest për këtë vepër të rëndë penale, Tuna vazhdon të jetë zyrtarisht kreu i OSHEE për Kurbinin. Inkriminimi i institucioneve nuk ndalet dhe pasurimi i zyrave me trafikantë vazhdon me të njëjtat ritme.
Ndërsa Edi Rama krekoset me represionin ndaj të pamundurve, banda e tij në OSHEE vazhdon të dhunojë qytetarët, vazhdon të shtojë radhët me kriminelë me damkë. Në gjithë Kurbinin, mes qindra të rinjve e të rejave, burrave e grave me integritet e të arsimuar, Edi Rama i vuri gishtin pikërisht këtij vjedhësi dhe trafikanti makinash, kreut të një grupi të strukturuar kriminal, me lidhje dhe me mafian rajonale, për t’i besuar drejtimin e OSHEE”, bëri të ditur Alibeaj.
Ndaj dhe ai bëri thirrje për nisjen pa humbur kohë të ligjit për dekriminalizimin në mënyrë që të nisë spastrimi i politikës dhe administratës publike nga personat e inkriminuar.
“Prandaj dhe pikërisht për këta trafikantë me të cilët ndan pushtetin, me të cilët sundon qytetet dhe i ka sjellë deri në Parlament, Edi Rama nuk e donte dekriminalizimin dhe bëri çdo përpjekje për ta ndalur atë. Prandaj dekriminalizimi është jetik dhe duhet të zbatohet një orë e më parë, që zyrat publike dhe politika të pastrohen nga banditët e Edi Ramës”, tha Alibeaj.

Rama po zvarrit qëllimisht dekriminalizimin

Me nisjen e zbatimit të ligjit për dekriminalizimin, të gjithë funksionarët, duke nisur nga Kryeministri e deri tek zyrtarët e çdo niveli të administratës publike brenda dy muajve nga hyrja në fuqi e vendimit janë të detyruar të depozitojnë formularin e vetëdeklarimit pranë organit përgjegjës. Çdo formular vetëdeklarimi regjistrohet me një numër unik identifikimi, si dhe ruhet e dokumentohet në rrugë elektronike. Subjekti që ka lënë mangësi ka dhe një mundësi për ta plotësuar vetëdeklarimin për 5 ditë të tjera. Nëse ai nuk e dorëzon vetëdeklarimin të plotësuar sipas konstatimeve fillestare të strukturës apo personit përgjegjës, ai konsiderohet se nuk e ka dorëzuar formularin e vetëdeklarimit.
Në këtë rast, organi përgjegjës e trajton këtë si refuzim për të deklaruar dhe personi trajtohet sikur të ketë rezultuar në një nga rrethanat që përbën kusht për ndalimin e zgjedhjes apo emërimit të tij në funksionin publik. Brenda 3 muajve nga skadimi i afatit, organi përgjegjës për administrimin e formularit të vetëdeklarimit është i detyruar të verifikojë të dhënat e deklaruara nga personi sipas hapave të parashikuar në mënyrë të detajuar. Organi përgjegjës dhe më pas Prokuroria brenda 10 ditëve nga përfundimi i rezultateve të verifikimit, nëse provohet ekzistenca e rekordeve kriminale për funksionarët aktualë, organi përgjegjës zbaton procedurat kushtetuese apo ligjore për mbarimin e mandatit apo shkarkimin nga detyra. Për të ardhmen ligji parashikon që për deputetët, Kryeministrin dhe ministrat jo deputetë dhe të zgjedhurit vendorë, formulari i vetëdeklarimit dorëzohet dhe administrohet nga Komisioni Qendror i Zgjedhjeve. Prefekti e kryen këtë për kandidatët në funksione publike që emërohen nga këshillat bashkiakë ose të qarkut.
Kryetari i Kuvendit për drejtues apo anëtarë të organeve kushtetuese apo të krijuara me ligj që zgjidhen nga Kuvendi. Kështu me radhë çdo organ përgjegjës ka subjektet e veta dhe secili prej tyre krijon një strukturë të posaçme ose cakton personat përgjegjës për regjistrimin, administrimin dhe përpunimin e formularit. Formulari me numër unik identifikimi ruhet dhe dokumentohet elektronikisht. Publikimi i tyre në faqet zyrtare në internet është i detyrueshëm dhe organi përgjegjës brenda muajit mars të çdo viti informon Kuvendin dhe Prokurorin e Përgjithshëm, për numrin e personave që kanë rezultuar në kushtet e ndalimit apo që nuk kanë dorëzuar formularin e vetëdeklarimit. Por dekriminalizimi ende vijon të mbahet peng nga Rama.

Deputeti i PS, Ben Blushi deklaroi nga Dibra se referendumi në PS i cili pritet të mbahet sot është një proces i manipuluar, pasi sipas tij, kutitë e votimit janë mbushur një ditë përpara zhvillimit të votimit. Sipas Blushit, në listat e votuesve nuk ka socialistë të vërtetë. Blushi u bëri sërish thirrje anëtarëve të PS-së të bojkotojnë këtë referendum dhe të japin dëshmi për manipulimin e procesit. Një ditë më parë, në një prononcim për gazetarët, në mjediset e jashtme të Kuvendit, deputeti Blushi e cilësoi “Pa-Rama Papers” referendumin e ditës së shtunë, duke sqaruar se këto janë letrat e Ramës me rezultat të trukuar. “U bëj thirrje të gjithën socialistëve në gjithë Shqipërinë që me çdo formë dhe çdo mjet që kanë, me shumë prej tyre unë kam folur në shumë rrethe dhe qytete të Shqipërisë, të bëjnë ç’është e mundur për ta monitoruar këtë referendum ditën e shtunë. Të gjejnë mundësitë për të shmangur manipulimin dhe grabitjen e këtij mandati, që nuk është i imi dhe as i askujt, është mandati i anëtarësisë së PS. U bëj thirrje të kthejnë sytë brenda kutive të votimit, sepse po përgatitet një manipulim i madh, e gjitha është manipulim”, tha deputeti Blushi. “Këto ditë po flitet shumë për të famshmin “Panama Papers”. Ky referendum është “Pa-Rama Papers”, këto janë letrat e falsifikuara nga Rama brenda PS për të grabitur një mandat. Doni fakte? Lista për delegatë u votua në fund të muajit shkurt, ju jap rastin që ka ndodhur në Pogradec, pyesni deputetët e Pogradecit nëse e pohojnë, historia është shumë e thjeshtë 400, 500, 600. Në Pogradec kanë qenë në listën e votuesve të PS 500 anëtarë, morën pjesë 400, në kutitë e votimit dolën 600 fletë votimi. Kjo është historia e votimit në PS”, tha Ben Blushi. Sipas tij, tashmë nuk është e qartë, nëse anëtarësia e PS-së është 94 mijë apo 81 mijë apo 150 mijë. Edhe deputetja siocialiste Mimoza Hafizi e quajti referendumin tentativë për të mohuar votën e anëtarëve të PS dhe mekanizëm për të hequr proçesin e zgjedhjes së kryetarit. “Në këtë kongres u vendos që data e referendumit të jetë 9 prilli në kundërshtim me të gjitha noramt e partisë dhe kodin e zgjedhjeve që përcakton se referendumet nuk mund të mbahen pas dy muaj para kongresit ose jo më parë se 2 muaj pas kongresit. Në këtë referendum është mohuar e drejta e fushatës për alternative të ndryshme. Pra është vendosur që ky referendum të zhvillohet pa asnjë fushatë në kundërshtim me të gjitha normat e një jete demokratike. Ndonëse në kodin zgjedhor është përcaktuar se në alterantivat referendare kanë të drejtë vëzhguesit e tyre në të gjitha nivelet e zgjedhjeve kjo e drejtë është shkelur sepse është mohuar e drejta e pasjes së vëzhguesve të alterantivave. Ky referendum tenton të zëvendësojë procesin e zgjedhjes së kreut të PS. Pra është një referendum që tenton ti heqë  të drejtën e votës dhe kandidimit anëtarëve të PS” u shpreh Hafizi.

Deputetët gjermanë do të mbështesin Partinë Demokratike si alternativë që i duhet Shqipërisë dhe shqiptarëve për të sotmen dhe të nesërmen e saj europiane. Kryetari i Partisë Demokratike, Lulzim Basha priti në një takim deputetët e Parlamentit gjerman, përfaqësues të partisë së kancelares Angela Merkel, Peter Weiss, Andreas Lämmel, Peter Beyer. Basha shprehu mirënjohjen për mbështetjen e madhe që CDU po i jep Partisë Demokratike në hartimin e programit elektoral dhe betejën e saj për ruajtjen dhe konsolidimin e standardeve demokratike dhe shtetin ligjor.
Një vend të veçantë në bisedën e Bashës me deputetët gjermanë zuri alternativa e Partisë Demokratike dhe standardet e demokracisë në funksionimin e saj. Hartimi i programit, theksoi Basha është paraprirë nga konsultimet intensive me qytetarë në të gjithë vendin, grupe interesi, me ekspertët më të mirë në fushën e ekonomisë dhe financave, si dhe me mbështetjen e ekspertëve të CDU dhe PPE.
Partia Demokratike ka shpallur alternativën e saj qeverisëse për një ekonomi që prodhon, punëson dhe pasuron shqiptarët. Në programin e Partisë Demokratike parashikohen taksat më të ulëta në rajon, përmirësimi i klimës së biznesit, investimet në infrastrukturë, mbështetja financiare për bujqësinë dhe në veçanti përmirësimi i klimës së biznesit, në mënyrë që vendi të bëhet tërheqës për investime të huaja që hapin vende pune.
Programi i Partisë Demokratike do t’i nënshtrohet një konsultimi të gjerë, theksoi kryetari i Partisë Demokratike, me qytetarët dhe grupet e interesit në mënyrë që produkti final të jetë një program i zbatueshëm që siguron zhvillim ekonomik dhe mirëqenie për qytetarët, dhe jo siç ka ndodhur me të ashtuquajturën “Rilindje” që erdhi me një program të mbushur me mashtrime dhe prodhoi një ekonomi në krizë të thellë dhe një shoqëri në depresion.
Një vëmendje e veçantë, theksoi Basha po i kushtohet hapjes dhe ripërtëritjes së Partisë Demokratike përmes proceseve demokratike dhe pjesëmarrëse, të cilat përbëjnë një garanci se standardet demokratike që aplikohen brenda PD do të aplikohen nesër në qeverisjen e vendit. Basha theksoi se me parimin “një anëtar-një votë” janë zgjedhur të gjitha strukturat drejtuese. Po kështu, i njëjti standard është aplikuar edhe me zgjedhjet e drejtuesve të Forumit Rinor të Partisë Demokratike.
Basha ka theksuar se një model i ri, jo vetëm në Shqipëri, por në Ballkan e më gjerë do të aplikohet për zgjedhjen e kandidatëve të rinj për deputet, duke nënvizuar vendimin e tij për t’i propozuar Këshillit Kombëtar që 35% e kandidatëve për deputetë të jenë të rinj.
Basha ka marrë vlerësimet dhe mbështetjen e deputetëve gjermanë të CDU për lidershipin e demonstruar në këtë standard të ri për demokracinë në Shqipëri, si dhe për betejën për garantimin e zgjedhjeve të lira dhe të ndershme.
Deputetët e Bundestagut kanë vlerësuar vizionin e zotit Basha dhe alternativën e tij për zhvillim ekonomik dhe punësim. CDU dhe grupi parlamentar i CDU/CSU, theksuan deputetët gjermanë do të mbështesin Partinë Demokratike si alternativë që i duhet Shqipërisë dhe shqiptarëve për të sotmen dhe të nesërmen e saj europiane.