35.5 C
Tirana
E hënë, 11 Gusht, 2025
type here...

Tritoli tek farmacia u vendos nga vetë Tahiri?

Ish-Kryeministri Berisha ka komentuar lirimin nga burgu të Vladimir Gjutës dhe Baftjar Brukës, të akuzuar si personat kryesorë të vendosjes së tritolit te farmacia e babait të ministrit të Brendshëm, Saimir Tahiri. Në një postim në Facebook, Berisha thotë ndër të tjera se, arrestimi i tyre ishte një hakmarrje e Saimir Tahirit, pasi Gjutajt e kishin rrahur dikur bashkë me një shokun e tij. Berisha i bën thirrje prokurorit të Përgjithshëm të bëjë transparent qëndrimin e vartësve të tij ndaj kësaj çështje. “Të dashur miq, sot prokurorët e dosjes Gjuta, që deri tani kanë bërë lojën e Saje qorrit, pasi nën presionin e vetë Sajes dhe falsifikimit të provave, arrestuan 7 pjesëtarë të familjes Gjuta për vendosje tritoli tek farmacia dhe përballë shtëpisë të kontrabandistit Bashkim Tahiri, urdhëruan lirimin e më kryesorëve prej tyre, Vladimirit dhe Brukës! Duhet thënë se, që në fillim, tingëllonte qesharak pretendimi se në vendosjen e eksplozivit kishin marrë pjesë 7 vetë, pasi për një akt të tillë nuk mund të marrin pjesë, pa qenë idiotër, 7 pjesëmarrës”, shprehet Berisha.
Ish-Kryeministri Berisha shkruan më tej në reagimin e tij se, “pavarësisht se Bashkim Tahiri është një kontrabandist i çertifikuar i ilaçeve, kam dënuar dhe dënoj si akt terrorist vendosjen e çdo eksplozivi, në farmacinë e tij apo karshi banesës së tij”. “Personalisht nuk i njoh Gjutët dhe nuk di asgjë për veprimtarinë e tyre dhe nuk bëj aspak mbrojtjen e tyre sepse kanë avoketërit e vet, por të akuzosh 7 vetë nga një familje për këtë akt, ndërkohë që thuhet gjerësisht se Gjutët, që u arrestuan me mace dhe minj përveç gjyshes 90-vjeçare, kohë më parë e kishin zhdëpur në dru Saje qorrin, shtrirë përdhe së bashku me një mikun e tij, pasi ishte sjellë ndaj tyre si rrugaç. Ndaj dhe kur Saje u bë ministër do u kthente restin jo vetëm me çunat e krimit në polici, por dhe në Prokurori, gjë që është një shkelje shumë e rëndë e të drejtave të njeriut, një vepër kriminale”, shprehet Berisha.
“Pikërisht për këtë motiv, i kërkoj prokurorit të Përgjithshëm të bëjë transparent qëndrimin e vartësve të tij dhe t’i vendosë para ligjit për mashtrimin e tyre kriminal ndaj publikut shqiptar, në rast se vërtetohet, së bashku me Saje qorrin dhe çunat e tij të krimit, si dhe për arrestimin dhe mbajtjen në burg të Gjutëve me prova të porositura apo të falsifikuara me qëllim akuzën e tyre.
I bëj thirrje prokurorit të Përgjithshëm të nisë urgjent hetimin direkt për kontrabandistin Bashkim Tahiri, djalin e tij Saje qorri, për rolin e tyre në vendosjen e tritolit në farmacinë e Bashkimit dhe karshi shtëpisë së tij nëse janë të implikuar në këtë akt, me qëllim që të lajnë hesapet e tyre me Gjutët që kishin zhdëpur më parë Saje qorrin!”, përfundon Berisha.
Ngjarja ndodhi më 10 shkurt të vitit të kaluar, ku ju vendos një sasi eksplozivi farmacisë së babait të ministrit të Brendshëm, Saimir Tahiri. Që prej asaj dite, policia ka bërë disa arrestime në Shqipëri dhe jashtë vendit, por të arrestuarit u liruan një nga një nga Gjykata për mungesë provash.

Tritoli në farmacinë e Tahirit, lirohen të gjithë të arrestuarit

Lirohen të gjithë të arrestuarit e akuzuar për vendosjen e tritolit tek farmacia e babait të ministrit të Brendshëm, Saimir Tahiri. Prokuroria për Krimet e Rënda ka pushuar çështjen edhe ndaj dy të akuzuarve të tjerë, Vladimir Gjuta dhe Baftjar Bruka dhe ka urdhëruar lirimin e tyre nga burgu. Shkak është mungesa e provave për të akuzuarit që sipas akuzës nuk mundën të siguroheshin as shkencërisht. Gjithashtu, Prokuroria thotë se gjatë hetimeve nuk zbuloi motiv se përse këta shtetas mund të kryenin veprat penale për të cilat dyshoheshin.
“Gjatë zhvillimit të hetimeve janë kryer një sërë veprimesh proceduriale, përfshirë edhe ekspertiza të specializuara në bashkëpunim me partnerët ndërkombëtarë, në përfundim të të cilave nuk u provua shkencërisht dhe nuk u siguruan fakte që të provonin përtej çdo dyshimi të arsyeshëm se të arrestuarit ishin organizatorë dhe ekzekutorë të akteve të mësipërme. Krahas faktit që nuk janë arritur të grumbullohen të dhëna konkrete mbi veprimet e të hetuarve për kryerjen e veprave penale, Prokuroria për Krime të Rënda nuk zbuloi motiv se përse këta shtetas mund të kryenin veprat penale për të cilat dyshoheshin”, thuhet në referencën e Prokurorisë.
Por pavarësisht pushimit të hetimeve, Vladimir Gjuta dhe Baftjar Bruka nuk kanë fituar lirinë pasi ndaj tyre vijon të jetë në fuqi masa e sigurimit “Arrest në burg” vendosur nga Gjykata e Kukësit, për vepra të tjera penale, si falsifikim dokumentesh dhe armëmbajtje pa leje, të cilat janë nën hetim nga Prokuroria e Kukësit.
Ngjarja ku u hodh në erë farmacia e babait të ministrit Tahiri ka ndodhur më 10 shkurt 2015. Ndërkohë ministri i Brendshëm, Saimir Tahiri ka refuzuar fletëthirrjet e Prokurorisë për Krime të Rënda. “ABCNews” ka mësuar se ministri Tahiri nuk i është përgjigjur dy ftesave të Prokurorisë për të dhënë shpjegime, me cilësinë e të dëmtuarit në dosjen ndaj të dyshuarve për vendosjen e tritolit në farmacinë e babait të tij.
Burimet thanë se ministri Tahiri, përveç mosparaqitjes, nuk ka kthyer edhe përgjigje për arsyen e refuzimit për të dhënë shpjegime. Ndërsa në një prononcim në media, në lidhje me autorësinë e vendosjes së tritolit, ministri Tahiri pati deklaruar se autorët janë në burg, duke iu referuar arrestimit të pjesëtarëve të familjes Gjuta.
Nga ana tjetër, babai i tij, Bashkim Tahiri është marrë në pyetje që pas ngjarjes, duke ngritur dyshime se tritolin ia kishin vendosur në farmaci për shkak të detyrës së djalit, si ministër i Brendshëm pasi ka mohuar në mënyrë kategorike se ai është i përfshirë në ndonjë konflikt që mund të ketë sjellë vendosjen e eksplozivit në biznesin e tij.
Ndërkohë Policia e Shtetit ishte angazhuar maksimalisht për zbardhjen e kësaj ngjarje, duke kryer edhe një sërë ekspertizash shkencore për të provuar autorësinë e tritolvënies. Ndërsa shefi i tyre, ministri i Brendshëm nuk pranon të japë dëshminë, për të sqaruar hetuesit se cili ka qenë konflikti apo arsyeja që të dyshuarit e arrestuar, pjesëtarë të familjes Gjuta, i kanë vendosur eksplozivin mëngjesin e datës 10 shkurt të vitit 2015 në farmacinë e babait të tij.
Burimet thonë se refuzimi i ministrit për të dhënë shpjegime dhe motivin e konfliktit të mundshëm me pjesëtarët e familjes Gjuta, ka zbehur edhe provat e pakta që hetuesit kanë siguruar për ngjarjen.
Në fillim të muajit shkurt u lirua Emirjon Gjuta, ndërsa një javë më pas edhe Lumjan Matmuja. Vendimi është dhënë nga Gjykata e Krimeve të Rënda. Ata janë lënë me detyrim paraqitje. Gjuta, Matmuja i liruar me kërkesë të Prokurorisë, ndërsa gjykata ka caktuar ndaj tyre masën e sigurisë “Detyrim paraqitje”. Por ditën e djeshme gjykata ka vendosur të heqë edhe këtë masë sigurie duke i lënë të lirë.

R.POLISI

Kush është China Everbright që po blen Aeroportin e Rinasit?

China Everbright është kompania që po negocion për të blerë Tirana International Airport (TIA), që menaxhon me koncesion Aeroportin “Nënë Tereza” të Rinasit. Emri i kompanisë është konfirmuar për Monitor nga drejtori i Përgjithshëm Ekzekutiv i TIA, Z. Rolf Castro-Vasquez. Ai pohon se është kompania mëmë e TIA që po zhvillon negociatat dhe në shitje është vetëm biznesi në Shqipëri. Ishte një moment i mirë për të shitur dhe kishte kërkesa, ndaj kompania mëmë vendosi të hyjë në negociata për shitje. Pak ditë më parë u bë publik lajmi se një sipërmarrje kineze është e interesuar për të blerë TIA-n.
China Everbright Limited është një kompani e shërbimeve financiare në menaxhimin e aseteve, investimeve direkte, ndërmjetësimit dhe bankingut investues në rajonin e Kinës, përfshirë dhe Hong Kongun. Kompania e saj mëmë është China Everbright Group, me pronësi shtetërore. Aktualisht pronarët e Tirana International Airport janë: DEG-Deutsche investitions-und Entwicklungsgesellschaft mbH-31.7%; Albanian-American Enterprise Fund “AAEF”-21.3%; AviAlliance GmbH-47%. Konsorciumi Tirana International Airport (dikur Tirana Airport Partners), në vitin 2004 nënshkroi një marrëveshje koncesionare 20-vjeçare me qeverinë shqiptare për projektimin, financimin, ndërtimin, kryerjen, funksionimin, menaxhimin dhe zhvillimin e Aeroportit Ndërkombetar “Nënë Tereza”, Tiranë.
Pak javë më parë, qeveria shqiptare arriti marrëveshje me Tirana International Airport për heqjen e eksluzivitetit të kësaj të fundit. Sipas marrëveshjes së përbashkët, kompanisë Tirana International Airport i është dhënë menjëherë një zgjatje e Afatit të Koncensionit prej dy vitesh, duke mundësuar kështu hapjen e Aeroportit të Kukësit për fluturimet ndërkombëtare. Kjo do të thotë se, Afati i Koncensionit do të shtyhet deri më datë 2027. Më tej, në rast të vënies në përdorim të një aeroporti tjetër apo aeroporteve të tjera, si Vlora ose Saranda. Afati i Koncensionit do të shtyhet me 0.5 vite të tjera për çdo vit operimi të këtyre aeroporteve jugore, siç thuhet në Ndryshimin e Marrëveshjes së Koncesionit.
Tirana International Airport (TIA), kompania që ka një kontratë koncesionare për menaxhimin e aeroportit të Rinasit është në negociata për tu shitur, sipas burimeve nga institucionet shtetërore vendase. Burime zyrtare nga TIA, të kontaktuar nga Monitor, thanë se nuk kanë koment lidhur me këto negociata, ndërkohë që pohuan se janë shumë afër mbylljes së negociatave me qeverinë shqiptare për rishikimin e kontratës koncesionare.
Monitor ka mesuar se një kompani kineze, emri i të cilës mbetet i pakonfirmuar, është e interesuar për të blerë TIA, dhe negociatat po vijojnë prej disa kohësh.
Aktualisht pronarët e Tirana International Airport janë:
– DEG-Deutsche investitions-und Entëicklungsgesellschaft mbH-31.7%
– Albanian-American Enterprise Fund “AAEF”-21.3%
– AviAlliance GmbH-47%
Së fundmi, kompanitë kineze po shfaqin interes për tregun shqiptar. Jeo Jade, një nga grupet më të mëdha të pavarura të energjisë kineze, njoftoi se ka hyrë në një marrëveshje për të blerë kompaninë e prodhimit të naftës Bankers petroleum, për një shumë prej 407 milionë dollar.

Rishikimi i kontratës

Qeveria shqiptare në vitin 2004 formuloi së bashku me kompaninë koncesionare “Tirana International Airport”, një marrëveshje për ndërtimin dhe menaxhimin e aeroportit të ardhshëm ndërkombëtar të Rinasit, që parashikonte një klauzolë bllokuese. Sipas së cilës, “gjatë periudhës së koncesionit, asnjë aeroport tjetër nuk do të licensohet për fluturime komerciale (mallra apo pasagjerë), në territorin e Republikës së Shqipërisë”. Më tej thuhet se, do të lejohen ulje avionësh të linjave ndërkombëtare në aeroporte të tjera, veç atij të Rinasit, vetëm në rastet e emergjencës, ose në kohë katastrofash. Prej disa vitesh, qeveria ëhstë ne negociata me koncesionarin për ndryshimin e kontratës dhe disa herë ka deklaruar zyrtarisht se negociatat janë mbyllur. Ky eskluzivitet ka penguar hyrjen e kompanive me kosto të ulët në Shqipëri dhe ka bërë që vendi të ketë tarifat më të shtrenjta të biletave në rajon, duke bërë që shumë shqiptarë të zgjedhin aeroportet e Prishtinës, Podgoricës apo Shkupit drejt destinacioneve europiane.

Berisha në listën e largimeve

Pakënaqësitë e krijuara për hapësirat e pakta, kanë bërë që Etrit Berisha të mendojë seriozisht largimin nga Lazio në fund të sezonit. Tani vijnë edhe konfirmime rreth faktit që portieri i Kombëtares shqiptare pritet ta vazhdojë karrierën në një tjetër klub. Sipas mediave italiane, presidenti i klubit roman, Claudio Lotito ka përgatitur një listë me shitjet e mundshme, që do të realizohen gjatë merkatos së verës.

Aty figuron edhe emri i Etrit Berishës, së bashku me lojtarë si Gentiletti, Onazi, Parolo e për të vazhduar edhe me Antonio Candreva-n, që është edhe lojtari më i shtrenjtë në radhët e Lazios, e për të cilin klubi pretendon të paktën 35 milionë euro. Sipas përllogaritjeve, nga shitja e futbollistëve, klubi bardhekaltër pretendon të përfitojë rreth 80 milionë euro nga shitjet, të ardhura që më pas do të investohen në merkato, për të krijuar një skuadër konkurruese.

Etrit Berisha, kontrata e të cilit përfundon në vitin 2017, ndodhet në listën e shitjeve, me vlerën e kartonit në merkato që përllogaritet në 4 milionë euro. Kuqeziu pritet të shitet, pavarësisht faktit se, “gardiani” është paraqitur në mënyrë të shkëlqyer në pjesën më të madhe të ndeshjeve ku është aktivizuar, me performanca, që në shumë raste janë vlerësuar më të mira se ato të Marçhetti-t.

E megjithatë, portieri italian vazhdon të shihet me prioritet te Lazio, me klubin që këmbëngul t’ia besojë atij portën edhe për sezonin e ardhshëm. Etrit Berisha ka luajtur në 11 ndeshje të Serisë A gjatë këtij sezoni, të cilave u shtohen edhe 2 në Kupën e Italisë dhe 5 ndeshje në Europa League. Interesi për gardianin shqiptar nuk ka munguar, me 26-vjeçarin që ka qenë në radarin e disa skuadrave në Itali, por edhe të turqve të Besiktas, grekëve të Panathinaikos dhe belgëve të Bruges.

Euro 2016, Cana dhe Lenjani vlerësojnë Rumaninë

Nga Franca, ku praktikisht e kanë mbyllur sezonin me Nantes, me skuadrën që arriti objektivat në Ligue 1, Lorik Cana dhe Ermir Lenjani kanë nisur të mendojnë për finalet e Euro 2016. Në një intervistë për televizionin rumun, “Digi Sport”, dy kuqezinjtë u shprehën me besim se Shqipëria mund ta kalojë grupin në evenimentin në Francë.
“Natyrisht që kalimi përtej grupit është i mundur. Kjo edhe duke marrë parasysh formatin e aktivitetit, ku në fazën tjetër të Euro 2016 kualifikohen edhe katër ekipet më të mira të renditura në vendin e tretë”, u shpreh Cana.
“Nuk shoh ndonjë arsye përse Shqipëria dhe Rumania të mos kualifikohen së bashku nga faza e grupeve. Do të kualifikohen skuadrat që vrapojnë dhe luftojnë më tepër”, tha Lenjani.
Shqipëria do të përballet me Rumaninë më 19 qershor në Lyon, në ndeshjen e fundit të Grupit A. Kapiteni Cana, që së fundmi vuan një dëmtim në muskujt e kofshës, vlerësoi potencialin e rivalëve, që përveçse një skuadër me traditë, aktualisht ka në skuadër lojtarë cilësorë dhe teknikë, që i mbyllën kualifikueset pa pësuar asnjë humbje.
“Te Rumania peshon shumë brezi i artë, me lojtarë si Hagi, Popesku e të tjerë. Kjo përfaqësuese nuk e ka të lehtë të përsëritë arritjen e tyre në vitin 1994. Megjithatë, brezi i tanishëm te Rumania bazohet te lojtarë mjaft cilësorë, që zotërojnë teknikë të mirë dhe kanë shumë eksperiencë. Ata kanë bërë punë të jashtëzakonshme në drejtim të mbrojtjes dhe mendoj se ata do të jenë një kundërshtar shumë i vështirë për të gjithë ekipet në Kampionatin Europian”, tha Cana.

De Biasi: Jam gati për stolin e Italisë

Gianni de Biasi i hap derën kombëtares së Italisë. Madje, trajneri shprehet jo vetëm tejet i tërhequr nga ideja për të drejtuar stolin e të kaltërve, por edhe gati për një detyrë kaq të rëndësishme. Pasi është cilësuar si një prej kandidatëve më të fortë, trajneri i Shqipërisë u shpreh edhe personalisht rreth mundësisë për të zëvendësuar Antonio Conte-n, pas përfundimit të Euro 2016. Me deklaratën e dhënë për “Quotidiano Sportivo” e më pas të publikuar me bujë në të gjitha mediat më të rëndësishme italiane, De Biasi e tha qartë se pret një telefonatë të mundshme nga kreu i federatës, Tavecchio. “Të qenurit trajner i kombëtares së kaltër përbën një eksperiencë shumë tërheqëse, megjithatë për momentin nuk ka asgjë konkrete. Ndihem gati për këtë aventurë, e cili nuk do të ishte?”, tha De Biasi.
Në fjalët e tij, tekniku që udhëhoqi Shqipërinë drejt kualifikimit historik në një eveniment madhor, zbuloi edhe një detaj, që deri më tani ishte mbajtur konfidencial. “Kontrata ime me Federatën Shqiptare përfundon në vitin 2017, por kam edhe një marrëveshje me presidentin, që në rast të një oferte shumë të rëndësishme për karrierën time, ai do të më linte të largohesha”, tha ai.
Fjalët e De Biasit erdhën pak pak ditë pasi Marcello Lippi e cilësoi trajnerin italo-shqiptar si alternativën më logjike për stolin e Italisë. Ndërkohë, sipas mediave, 59-vjeçari do të emërohej në krye të përfaqësueses së kaltër, në rast se Fabio Capello nuk do ta marrë detyrën.

Parashikimi, FMN pesimizëm për eurozonën

Ekonomia e eurozonës do të rritet më ngadalë se sa mendohej dhe inflacioni ‘do e marrë veten’ shumë gradualisht, duke e vendosur barrën mbi Bankën Qendrore Evropiane për të ruajtur një politikë monetare ultra-të lirshme për të ardhmen e parashikueshme, tha FMN. Në Perspektivën e saj Ekonomike Botërore, në të cilën ajo i bëri gjithashtu thirrje qeverive të ecin përpara me reformat e përqëndruara tek rritja, Fondi Monetar Ndërkombëtar parashikon se ekonomia e 19-vendeve do të zgjerohet 1.5 për qind këtë vit dhe 1.6 për qind në vitin 2017. Në perspektivën e saj të janarit ajo parashikoi 1.7 përqind për të dy vitet. Inflacioni i eurozonës do të arrijë në 1.1 për qind në vitin 2017, teksa normat tepër të ulëta të interesit të BQE-së dhe blerjes së obligacioneve u tërhoqën, por do të rritet vetëm gradualisht në vitet e ardhshme. BQE e parashikon inflacionin këtë vit në 0.1 për qind dhe 1.3 për qind në vitin 2017, ende larg objektivit të saj prej vetëm pak nën 2 për qind. Për të ndihmuar normat tepër të ulëta që të ndikojnë në ekonominë reale, Fondi tha se duhet të focohen bilancet e bankave, ndërsa qeveritë e eurozonës duhet të luajnë gjithashtu rolin e tyre. Gjithashtu kërkohen reforma në përmirësimin e produktivitetit të firmave, konkurrueshmërisë, dhe mundësitë e investimeve, ndërsa Bashkimi Evropian duhet të përdorë fleksibilitet të plotë në rregullat e tij buxhetore. Berlin drejton një suficit buxhetor, ndërsa nivelet e investimeve në vend janë ende relativisht të ulëta.

Kosovë, kushtëzimet në ligj frenojnë zbatimet e faljes së borxheve

Falja e borxheve publike për personat juridik dhe fizik në Kosovë, të akumuluara deri më datën 31 dhjetor 2008, ka hasur në vështirësi për shkak të disa kushtëzimeve që paraqet ligji që rregullon këtë çështje, thonë përfaqësues të cilët mbrojnë interesat e bizneseve në Kosovë. Sipas të dhënave të Ministrisë së Financave në Qeverinë e Kosovës, shuma e borxhit të raportuar për periudhën deri më 31 dhjetor 2008, është afër 730 milionë euro. Prej këtyre borxheve ndaj institucioneve shtetërore dhe ndërmarrjeve publike, personat fizik dhe juridik, deri më tani kanë shlyer vetëm 27 milionë euro. Përfaqësuesit e bizneseve, thonë se afaristët apo edhe qytetarët, nuk po aplikojnë për shlyerje të borxheve për periudhën 2000 deri në 2008, pasi që të njëjtit, nuk po kanë mundësi që të shlyejnë borxhet pas kësaj periudhe. Sipas Ligjit për faljen e borxheve për periudhën deri më 31 dhjetor 2008, përfitojnë të gjithë personat të cilët kanë obligime të pashlyera ndaj institucioneve shtetërore dhe ndërmarrjeve publike, me kusht që të njëjtit të kryejnë pagesën e plotë të obligimeve për periudhën nga 1 janar 2009 deri më 31 dhjetor 2014. Kryetari i Aleancës Kosovare të Biznesit, Agim Shahini, i ka thënë Radios Evropa e Lirë, se Ligji për faljen e borxheve ka qenë hap i mirë për të ndihmuar bizneset, por kushtëzimet kanë qenë të panevojshme. “E kemi kundërshtuar kushtëzimin që bën Ligji për faljen e borxheve, pasi që sikur bizneset të ishin në gjendje të mirë financiare nuk do të lejonin t’ju grumbulloheshin borxhet. Ka mungesë të aplikimit për falje të borxheve nga bizneset po ashtu edhe nga qytetarët, pasi që nuk po arrijnë t’i mbledhin paratë për të paguar borxhet që i kanë në periudhën 2009 – 2014”, thotë Shahini. Ndërkohë, përfaqësuesit e institucioneve të Kosovës, bëjnë të ditur se të gjitha ndërmarrjet publike dhe mekanizmat tjerë janë duke zbatuar procedurat për faljen e borxheve. Agim Dibrani, këshilltar i ministrit të Financave, Avdullah Hoti, ka thënë për Radion Evropa e Lirë, se shuma e shlyerjes së borxheve është e ulët krahasuar me vlerën e përgjithshme të borxheve. “Për këtë periudhë kohore deri më tani kemi afër 27 milionë euro borxhe që janë shlyer. Nuk janë rezultatet e pritura ashtu siç kemi llogaritur. Kemi pasur probleme me ndërmarrjet publike në veçanti me Korporatën Energjetike të Kosovës ku vetëm kësaj kompanie qytetarët dhe bizneset i kanë borxhe afër 360 milionë euro. Është premtuar se kjo kompani e cila përmban afër 50 për qind të borxhit kryesor do ta intensifikojë procesin e faljes së borxheve”, sqaron Dibrani. Personat fizik dhe juridik, tregon Dibrani, afatin e fundit për shlyerjen e borxheve e kanë deri më 2 shtator të këtij viti. “Personat të cilët nuk aplikojnë për shlyerje të borxheve deri në këtë datë, do t’i përfshijë Ligji për inkasimin e detyrueshëm të këtyre borxheve“, ka bërë të ditur Dibrani. Për faljen e borxheve, Qeveria e Kosovës kishte marrë vendim në muajin shkurt të vitit të kaluar, kurse në muajin shtator ishte miratuar Ligji për Faljen e Borxheve Publike. Iniciativa e faljes së borxheve, nga shoqëria civile ishte konsideruar e padrejtë për konsumatorët e disiplinuar të cilët kanë paguar të gjitha detyrimet gjatë asaj periudhe. Falja e borxheve, nuk ishte pëlqyer edhe nga partitë opozitare të cilat patën vlerësuar se me këtë masë janë shpërblyer qytetarët dhe bizneset që nuk kanë respektuar pagesat dhe borxhet, duke shmangur tatimet dhe duke mos paguar për shërbimet publike, kurse janë dënuar të gjithë qytetarët e ndërgjegjshëm të cilët i kanë shlyer vet dhe me kohë këto borxhe

Tallja e ambasadorit Lu me Ramën: Koshi në zyrë të bën Kryeministër më të mirë?

Ambasadori amerikan nuk i ka kursyer talljet me Ramën në një takim në Shtetet e Bashkuara. Ambasadori Lu ka diskretituar Ramën para të pranishmëve të huaj duke i treguar atyre se cfarë Kryeministri ka sot Shqipëria, që në zyrë ka një kosh basketbolli, ndërsa para Kryeministrisë një fushë basketbolli.

Donald Lu: Amerikanët dashurojnë basketbollin zoti Kryeministër. A ka diçka për të cilin basketbolli ju ndihmon që të jeni një Kryeministër më i mirë? Për të gjithë ata që nuk e dinë, Kryeministri Rama jo vetëm që ka ndërtuar një fushë basketbolli në ambientet e Kryeministrisë, por ai ka vendosur një kosh basketbolli edhe në zyrën e tij, ndaj edhe mund të gjesh në të ndonjë send të thyer.

Kësaj pyetje të diplomatit amerikan, kryeministri shqiptar i ktheu përgjigjen: “Kjo nuk është një çështje për të cilën do të flas nesër me Presidentin Obama; për fusha basketbolli në institucione apo për mënyrën se si basketbolli të ndihmon të jesh më i mirë se të tjerë”

Pak ditë më parë në media u publikuan foto nga fusha e basketbollit që Rama ka ndërtuar në oborrin e brendshëm të Kryeministrisë.

Ronaldo “kërcënon” Leo Messin

Lionel Messi është i paralajmëruar. Forma e dobët e argjentinasit që nuk arrin të shënojë në kampionat që prej 4 ndeshjesh, përkon me shpërthimin e Cristiano Ronaldos që me tregolëshin ndaj Wolfsburgut u rikthye sërish në qendër të vëmendjes. Statistika të pabesueshme po regjistron portugezi gjatë muajve të fundit, duke hedhur sërish kandidaturën për një tjetër Top të Artë. Me tre rrjetat ndaj gjermanëve ai e çon në 16 numrin e golave sezonalë në Europë dhe 94 në total në këtë kompeticion. Messi në krahun tjetër mbetet në kuotën 83. Asnjëherë më parë ai nuk ka dështuar në çerekfinale pasi ishte hera e 9 nga 9 në total që siguron një biletë mes 4 më të mirave, ndërsa në 36 sfidat e luajtura me eliminim direkt në Champions League, portugezi ka shënuar plot 34 herë. Rilindja e Ronaldos vjen në momentin më delikat për të, pasi vetëm pak javë më parë përflitej një lamtumirë e mundshme nga Madridi, por ai rikonfirmohet sërish jetik për Realin e Madridit dhe shifrat i japin të drejtë.
Një tjetër gol me peshë ishte edhe ai i shënuar në El Clasico, ku “luzitani” i dha një shuplakë të rëndë Barcelonës që nuk arrin të shikojë dritë në fund të tunelit në kampionat. Ajo disfatë peshoi në moralin e katalanasve që humbën madje edhe në San Sebastian, duke ndjerë frymëmarrjen e rivalëve madrilenë në klasifikim edhe pse përpara El Clasicos, çështja titull konsiderohej e mbyllur. Një lojtar që edhe pse tashmë e ka kaluar kufirin e 30 viteve e gjen me një lehtësi të pabesueshme rrugën e rrjetës. 42 ndeshje të luajtura në La Liga dhe Champions me 46 realizime. Zidane nuk është aspak diplomatik, ai e pranon se Ronaldo arrin të bëjë diferencën në fushën e lojës. Lionel Messi është i paralajmëruar sepse Cristiano Ronaldo nuk njeh limite, Topi i 4 i Artë nuk është thjesht një iluzion, “luzitani” është rikthyer më në formë se kurrë.
Cristiano Ronaldo arriti kuotën e 30 golave në La Liga për të 6-tin sezon radhazi, një rekord më vete, që tregon se çfarë lojtari është portugezi. Me përjashtim të sezonit të tij të parë kur u ndal në kuotën e 26 golave në 29 ndeshje të zhvilluara gjithsej, Cristiano gjithmonë ka arritur ta kalojë shifrën 30. Në këtë sezon 31-vjeçari ka një mesatare prej 0,93 finalizimesh për ndeshje dhe po lufton me argjentinasin Higuain dhe brazilianin Jonas për të fituar Këpucën e Artë europiane. Falë aftësive fantastike që zotëron përpara portës portugezi e ka fituar në 4 raste këtë trofe, 3 herë me Realin dhe 1 herë me Manchester United.
Vetëm Lionel Messi i afrohet disi luzitanit me argjentinasin e Barçës që ia ka dalë ta arrijë shifrën 30 në La Liga në 5 sezone gjithsej. Sulmuesit e tjerë që e kanë kaluar këtë shifër në Primera Division janë Diego Forlan që shënoi 32 gola me Atleticon e Madridit në sezonin 2008-2009 dhe Samuel Eto’o që me fanellën e Barçës arriti shifrën 30 në të njëjtin edicion.

Inter mban Icardin, sakrifikon Brozoviç

Interi e ka ngushtuar në 6 pikë diferencën nga Roma e vendit të tretë, në garën për biletën e fundit në Champions League. Në rast të mos arritjes së objektivit, te zikaltërit nuk ka dyshime: një emër i madh i skuadrës do të sakrifikohet, për të mbajtur në ekuilibrat e kërkuar bilancin financiar të klubit.
Sipas përllogaritjeve, bilanci i klubit për vitin 2017 pritet të mbyllet me 50 milionë euro minus, por shifra që duhet marrë si bazë për fair play-n financiar është që humbje në nivelin e 30 milionë eurove. Kjo e bën të detyrueshëm shitjen e një emri të rëndësishëm. Por, me Mauro Icardin që cilësohet ikona e klubit, shitja e sulmuesit argjentinas do të përkthehej në një autogol në sytë e tifozëve. Kjo është arsyeja, përse te Interi nuk duan të heqin dorë nga kapiteni i skuadrës.
E vështirë duket edhe shitja e portierit Samir Handanoviç. Ashtu siç ndodhi edhe gjatë merkatos së kaluar, për aq kohë sa Thohir pretendon të fitojë nga 12 deri në 15 milionë euro për gardianin, largimi i sllovenit duket thuajse i pamundur.
Në këtë rast, lojtari më i lehtë për t’u sakrifikuar që financat e klubit të jenë brenda rregullave të vendosura nga UEFA është Brozoviç. Edhe pse trajneri Mançini dhe drejtori sportiv, Ausilio shpresonin që nuk do të ishin të detyruar të hiqnin dorë nga asnjë prej titullarëve, shitja e kroatit duket e paevitueshme.
Për më tepër që për shërbimet e Brozoviç interesohet Arsenali dhe nga kjo lëvizje, zikaltërit do të përfitonin një shifër që varion në 20 deri në 25 milionë euro. Edhe pse Mançini e cilëson 23-vjeçarin si mesfushorin më të mirë të skuadrës, kroati është ai që mund të sakrifikohej më lehtësisht në merkato.

1...8 3348 3358 336...8 382Faqja 8 335 nga 8 382

Kryesore

Continue to the category
Më shumë
© 2024 Rilindja Demokratike Euroatlantike