Numri i bizneseve që nuk paguajnë detyrimet tatimore ka ardhur në rritje. Duket se, mungesa e likuiditetit duket se është një ndër faktorët kryesorë, çka vihet re dhe në të dhënat më të fundit të publikuara nga Drejtoria e Përgjithshme e Tatimeve, ku shihet qartë numri i madh i bizneseve që nuk kanë paguar detyrimet. Sipas shifrave zyrtare nga kjo drejtori, lista e bizneseve që nuk kanë paguar detyrimet tatimore është 15502, nga 13 778 biznese që ishin në fund të muajit dhjetor. Sipas këtyre statistikave, kësaj “liste të zezë” gjatë muajve të fundit i janë shtuar mbi 1700 subjekte. Ndaj këtyre bizneseve janë marrë masat e sigurimit mbi të gjithë pasuritë për ekzekutimin e detyrimeve dhe ka filluar procedura e mbledhjes me forcë të tyre. Tatimorët e publikojnë listën e zezë në mënyrë, që personat e tretë të marrin dijeni për fillimin e këtyre procedurave dhe që organet apo institucionet, të cilët kanë bërë regjistrime të pasurive të luajtshme apo të paluajtshme të tatimpaguesve debitorë, të regjistrojnë detyrimin tatimor të papaguar si barrë mbi këtë pasuri dhe të mos lejojnë kryerjen e transaksioneve për transferimin e tyre deri kur detyrimi tatimor të jetë paguar. Që në fund të vitit 2013, ka ndryshuar rrënjësisht mënyra e administrimit tatimor, duke sjellë një forcim të procesit monitorues të të gjitha funksioneve të Administratës Tatimore si dhe procesi i administrimit të mbledhjes së borxhit tatimor. Kështu është pastruar regjistri i tatimpaguesve me mosdeklaruesit, duke ulur efektin e prodhimit të gjobave fiktive dhe të pambledhshme. Nga ky proces janë kaluar në regjistrin pasiv më shumë se 8.000 tatimpagues, kryesisht subjekte të biznesit të vogël, të cilët kishin mbi 10 vjet që nuk deklaronin. Evidentimi i tatimpaguesve, të cilët janë subjekt i Mbledhjes së Borxhit Tatimor tashmë është një proces që kryhet automatikisht me vënien në funksionim të sistemit të ri elektronik.
Tregu i sigurimeve rënie me 14% në janar
Të ardhurat nga primet e shkruara bruto të sigurimit për muajin janar 2016 kapën vlerën mbi 1,021 milionë lekë, ose 13.85% më pak se në muajin janar 2015. Gjatë muajit janar 2016, numri i kontratave të sigurimit të lidhura arriti në 72,134 me një ulje prej 3.05% krahasuar me muajin janar 2015. Tregu vazhdoi të mbetet sërish i orientuar tek sigurimet e Jo-Jetës, të cilat sollën 90.94% të vëllimit të përgjithshëm të primeve, duke i lënë sigurimet e Jetës me 9.06%. Parë nga këndvështrimi i ndarjes së tregut sipas llojit të sigurimit, i detyrueshëm dhe vullnetar, primet e shkruara bruto të sigurimit vullnetar zënë 40.31% dhe primet e shkruara bruto të sigurimit të detyrueshëm zënë 59.69% të totalit të tregut. Gjatë muajit janar 2016, dëmet e paguara bruto në tregun e sigurimeve, arritën në rreth 260 milionë lekë, ose 18.72% më shumë se në muajin janar 2015. Primet e sigurimit të detyrueshëm motorik, gjatë muajit janar 2016, arritën rreth 610 milionë lekë, ose 7.50% më pak se në muajin janar 2015. Produkti MTPL e brendshme, në muajin janar 2016, pati një ulje prej 10.10% të volumit të primeve të shkruara bruto. Kjo u shoqërua edhe me një ulje të numrit të kontratave prej 9.36% krahasuar me muajin janar 2015. Produkti Sigurim Kufitar në muajin janar 2016 pati një ulje prej 24.04% të volumit të primeve të shkruara bruto. Kjo u shoqërua nga një ulje e numrit të kontratave prej 12.95% krahasuar me muajin janar 2015. Produkti Karton Jeshil, në muajin janar 2016, pati një rritje me 10.41% të volumit të primeve të shkruara bruto krahasuar me muajin janar 2015. Po kështu edhe numri i kontratave u rrit me 15.93%. Primet e sigurimit vullnetar, gjatë muajit janar 2016 arritën mbi 412 milionë lekë, 20.43% më pak se në muajin janar 2015. Numri i kontratave të sigurimit vullnetar u rrit me 0.14% krahasuar me muajin janar 2015. Sigurimet vullnetare të Jo-Jetës gjatë muajit janar 2016, patën ulje me 25.23% kundrejt muajit janar 2015. Në portofolet e pronës, përgjegjësive, garancive, të cilat gjatë muajit janar 2016 siguruan mbi 153 milionë lekë të ardhura në total, vendin e parë e zunë zjarri dhe dëmtime të tjera në pronë me rreth 57.48%, të pasuara nga sigurimi i përgjegjësive të përgjithshme civile me 30.81% të totalit. Në portofolin sigurimi nga zjarri dhe forcat e natyrës, gjatë muajit janar 2016, vihet re një ulje prej 64.23% e volumit të primeve të shkruara bruto të këtij portofoli dhe një ulje me 2.42% e numrit të kontratave të sigurimit, krahasuar me muajin janar 2015. Të ardhurat nga sigurimet e aksidenteve dhe shëndetit, gjatë muajit janar 2016, arritën në rreth 106 milionë lekë, duke shënuar rritje prej 6.09% në krahasim me muajin janar 2015. Primet nga sigurimet e Jetës gjatë muajit janar 2016, arritën rreth 93 milionë lekë, ose 2.13% më shumë se në muajin janar 2015. Pagesat e dëmeve gjatë muajit janar 2016 u rritën me 18.72% krahasuar me muajin janar 2015. Pjesa më e madhe e dëmeve të paguara bruto i përket sigurimit motorik me rreth 157 milionë lekë, apo 60.51% të totalit të dëmeve të paguara bruto.
Kuvendi: Menaxhimi i ujësjellësve i përkeqësuar, rritja e tarifave pa ndikim
Kuvendi i Shqipërisë konstaton se në vitin 2015 të treguesit kryesorë të performancës në sektorin Ujësjellës kanalizime nuk kanë shënuar progres dhe shoqëritë nuk kanë bërë përpjekjet e duhura për të arritur objektivat. Vlerësimi negativ i Kuvendit për menaxhimin e ndërmarrjeve të ujësjellësve ka ardhur pas shqyrtimit të veprimtarisë së Entit Rregullator të Ujit për vitin që kaloi.
Kuvendi ka vënë në dukje se shoqëritë të cilave ju është miratuar ndryshimi i tarifave, përgjithësisht nuk kanë arritur objektivat e përcaktuara për Treguesit Kryesorë të Performancës (TKP). Megjithë marrëveshjen e mirëkuptimit te nënshkruar në 2014 mes ERRU-së, Ministrisë së Shëndetësisë dhe institutit të Shëndetit Publik, mbi cilësinë e ujit të pijshëm, monitorimi dhe raportimi i cilësisë së ujit të pijshëm nuk është arritur, referon Kuvendi në projektrezoluten drejtuar Entit Rregullator të Ujit.
Shlyerja e detyrimeve të operatorëve UK ndaj ERRU-së është përkeqësuar krahasuar me një vit ë parë, ndërsa niveli i mbulimit të kostove dhe tendenca e këtij treguesi, krahasuar me një vit më parë, nuk është pozitive, vlerëson Kuvendi. Më tej konstatohet se, mbulimi i kostove vetëm përmes rritjes së tarifave dhe pa një përmirësim të perfomancës ka sjellë efekte negative me ndikim të drejtpërdrejtë tek konsumatorët
Mungesa e furnizimit të vazhdueshëm vijon të mbetet problem shqetësues, duke ndikuar edhe në cilësinë e ujit. Për të përmirësuar situatë Kuvendi i sugjeron ERU-së që për vitin 2016 të tregohet më efikase dhe më e kujdesshme në politikën e miratimit të rritjes së tarifave duke e parë atë të lidhur ngushtë me rritjen e performacës së operatorëve, uljes së shpenzimeve, rritjen e efikasitetit menaxhues dhe përmirësimin e shërbimit ndaj konsumatorit.
Në veprimtarinë e saj të synojë një analizё individuale të operatorëve në lidhje me objektivat e vënë, duke u fokusuar në elementët problematike të tyre dhe sugjeruar zgjidhje të mundshme. “Duke patur parasysh qe humbjet menaxheriale te ujit janë nё nivele pothuajse tё njëjta me ato teknike, nëpërmjet instrumenteve dhe strategjive rregulluese ERU duhet të kërkoje nga shoqëritë UK një menaxhim më të mirë të shërbimit të furnizimit me ujë” sugjeron Kuvendi. Përmes politikave të licencimit e atyre tarifore, Kuvendi i sugjeron ERU, të kërkoje nga shoqëritë UK hartimin e planeve të biznesit ku në fokus të veçantë të jenë investimet në zonat e pambuluara me shërbime UK, në mënyrë që në të gjithë territorin të ofrohet shërbim i rregulluar e me standarde të njëjta.
Rinasi, miliona euro shtesë për klauzolën e monopolit
“BIRN”
Ministria e Transportit dhe Infrastrukturës deklaroi dje se ka arritur një marrëveshje në parim me kompaninë që disponon koncesionin monopolistik të aeroportit ndërkombëtar të Tiranës për të hequr klauzolën e “ekskluzivitetit” në shkëmbim të zgjatjes së afatit të kontratës aktuale të koncesionit.
Ministri Edmond Haxhinasto deklaroi se kompania ka pranuar të heqë dorë nga monopoli me kushtin që kontrata e saj të zgjatet për dy vjet menjëherë si kompensim për uljen e mundshme të të ardhurave nga fillimi i punës në Aeroportin e Kukësit, si dhe me shtimin e afatit të kontratës me 0.5 vite për çdo vit pune që do të kryejë një aeroport i ri i mundshëm në jug të Shqipërisë.
“Është ditë e rëndësishme për aviacionin shqiptar, po hapim një faqe e re të zhvillimit të infrastrukturës. Besoj që qytetarët do të përfitojnë nga kjo marrëveshje e re”, deklaroi Haxhinasto, i cili theksoi se marrëveshja nuk do të ketë “kosto shtesë për shtetin shqiptar”.
Gjithsesi, zgjatja e kontratës së koncesionit më tej nënkupton njëkohësisht zgjatjen e kostove për konsumatorët shqiptarë, kosto që në një situatë normale nuk do të ekzistonin.
Qeveria socialiste shqiptare nënshkroi një kontratë koncesioni të pakërkuar në vitin 2004 me një kompani gjermane për zhvillimin dhe menaxhimin e Aeroportit të Rinasit për një afat 20-vjeçar, kontratë që u kritikua që gjatë kohës së shqyrtimit në Kuvendin e Shqipërisë si e pafavorshme për vendin, pasi i lejonte kompanisë koncesionare fitime të stërmëdha në kurriz të konsumatorëve më të varfër të Europës dhe që përcaktonte një monopol ligjor 20-vjeçar në tregun shqiptar të fluturimeve ndërkombëtare. Kontrata skadon në vitin 2025 sipas afatit aktual dhe mund të shtyhet deri pas vitit 2027 në rast se marrëveshja e arritur miratohet në Kuvendin e Shqipërisë.
Por pavarësisht kritikave, qeveria e kohës përdori shumicën që kishte në Parlament për ta miratuar kontratën dhe nuk mori parasysh kritikat që thoshin se një aeroport tjetër që në atë kohë qe duke përfunduar me kosto ndërtimi mbi 12 milionë dollarë, Aeroporti i Kukësit, po dënohej me vdekje që pa lindur për shkak të klauzolës së ekskluzivitetit.
Qeveria shqiptare e kuptoi shpejt problemin dhe tentoi disa herë që nga viti 2006 e pas që të negocionte heqjen e klauzolës së ekskluzivitetit, por pa sukses. Aeroporti i Rinasit përfitoi nga rritja e shpejtë e numrit të udhëtarëve, si dhe nga tarifat e majme që pati përfituar gjatë negocimit të kontratës duke realizuar fitime marramendëse në vendin më të varfër të Europës. Një investigim i mëparshëm i “BIRN” zbuloi se Rinasi kishte fitime neto prej 8 deri në 10 milionë euro në vit dhe normë fitimi neto mbi të ardhurat prej 20-30 për qind, norma fitimi të lakmueshme këto për çfarëdolloj biznesi. Shtyrja e afatit me dy vjet ia rrit automatikisht faturën e koncesionit qeverisë shqiptare me 16-20 milionë euro të tjera. Ndërkohë, nëse qeveria shqiptare krijon një aeroport të ri në jug të vendit, aeroport që rezulton i domosdoshëm dhe financiarisht i përballueshëm për një vend që synon të zhvillojë turizmin, shtimi i afatit të koncesionit me 0.5 vite për çdo vit ekzistence të aeroportit të ri mund të kushtojë miliona euro të tjera.
Kukësi, në vend të gabuar
Aeroporti i Kukësit u ndërtua në vitin 2004 me synimin për të shërbyer pjesërisht për tregun e Kosovës, në një kohë kur Aeroporti i Prishtinës kishte një kapacitet përpunues të ulët. Aeroporti, i cili kushtoi 12 milionë dollarë, mbeti i ngrirë për më shumë se një dekadë. Qeveri të ndryshme u përpoqën ta përdorin për reklama elektorale aeroportin e ri në prag zgjedhjesh, duke premtuar vende pune në zonën e Kukësit, rajoni më i varfër në Shqipëri. Në vitin 2009, mazhoranca e kohës menaxhoi edhe uljen e një avioni në formë prove në Kukës si pjesë e fushatës elektorale. Në zgjedhjet e fundit për pushtetin vendor në vitin 2015, kryetari i Kuvendit të Shqipërisë deklaroi në Kukës se aeroporti i ri mund të “punësojë 500-700 vetë”, një deklaratë që u përqesh nga ekspertët, të cilët thanë se Aeroporti i Rinasit punëson aktualisht po kaq njerëz. Ministri Haxhinasto deklaroi dje se aeroporti i ri mund të hapë “rreth 200 vende të reja pune”.
Gjithsesi, ekspertët mendojnë se ndryshimet e ndodhura përgjatë këtyre 10 vjetëve e bëjnë Aeroportin e Kukësit “të ndërtuar në vend të gabuar” dhe me pak gjasa për t’u zhvilluar, pavarësisht se kostot e shërbimit për avionët mund të jenë shumë më të ulëta se sa ato të Rinasit. Që nga koha kur Kukësi është ndërtuar si aeroport, një autostradë e re lidh Tiranën me Kukësin me një udhëtim prej dy orësh, nga tetë orë që qe koha e udhëtimit në kohën kur aeroporti u ndërtua. Gjithashtu, tregu i Kosovës ka pësuar ndryshime pasi Aeroporti i Prishtinës është zhvilluar duke rritur kapacitetet.
Përgjatë viteve, ekspertë të ndryshëm kanë sugjeruar që ekskluziviteti i Aeroportit të Rinasit të hiqej duke e sulmuar këtë klauzolë në kontratën e koncesionit në bazë të ligjit për konkurrencën. Në të gjitha vendet e zhvilluara, posedimi i një monopoli ligjor është i paligjshëm dhe qeveria mund të luftonte ekskluzivitetin në bazë të ligjit kundër monopoleve. Por në vend të kësaj, qeveria hyri në bisedime dhe pranoi zgjatjen e kontratës së koncesionit.
Monopoli aktual konsiderohet si shkaku i një pjese jo të vogël të çmimeve të larta të biletave të fluturimeve ajrore në Shqipëri, të cilat janë krahasimisht shumë më të larta se sa fluturimet drejt vendeve fqinje, duke u bërë një ankesë permanente e operatorëve turistikë.
UEFA analizon Shqipërinë
Faqja zyrtare e UEFA-s i kushton Shqipërisë një shkrim të detajuar, të bazuar në dy ndeshjet miqësore të kuqezinjve kundër Austrisë dhe Luksemburgut. Në fillim të shkrimit, UEFA i kushton një hapësirë të madhe ndeshjes me Austrinë në “Ernst Happel Stadium” dhe më pas përqendrohet te transferta e Luksemburgut ku Shqipëria triumfoi 2-0. UEFA veçon faktin që stadiumi “Josy Barthel” u pushtua nga rreth 3 mijë tifozë kuqezi, të cilët mbështetën Shqipërinë gjatë gjithë 90 minutëshit.
Në vijim, analiza përqendrohet te fakti që në të dyja miqësoret, Shqipëria u zhbllokua në pjesën e tretë të dy ndeshjeve, ndërsa shton se formacioni që De Biasi ka në kokë për Europianin nuk është ende i qartë. Sipas UEFA-s, përveç Etrit Berishës që e ka vendin të sigurt në katërkëndësh, pjesa tjetër janë në pikëpyetje dhe këtë e treguan 2 miqësoret, ku trajneri italian zgjodhi dy formacione të ndryshme, duke mos dhënë pika referimi.
“Në të dyja takimet, Shqipëria e përmirësoi lojën në pjesën e dytë me 3 gola të shënuar në total”. Një nga pikëpyetjet më të mëdha që UEFA ngre është edhe ajo që lidhet me Milot Rashicën. “Pas debutimit që playmeakeri i Vitesses bëri të martën, a do të jetë ai një emër i së ardhmes rreth të cilit do të ndërtohet ekipi?
Nëse një gjë e tillë nuk ndodh gjatë kësaj vere, është e sigurt se do të ndodhë në të ardhmen”, nënvizon UEFA që shton se në repartin e avancuar, Cikalleshi duket se është preferenca kryesore pas 90 minutave të luajtura në Luksemburg. Një pyetje UEFA e ngre edhe për repartin e mbrojtjes, duke u bazuar në dy golat e pësuar në Austri. “Shqipëria duket e brishtë, kur skuadra kundërshtare e vendos nën presion. Kontrolli i topit është një problem për këtë skuadër që mesatarisht gjatë eliminatoreve e ka pasur kontrollin e lojës në masën 45%. Pasimet në total janë 1886, më pak se çdo finalist, por kjo edhe për faktin se, Shqipëria bënte pjesë në një grup me 5 skuadra”, vë në dukje UEFA.
De Biasi drejt Italisë
Gianni de Biasi braktis Shqipërinë në prag të Europianit të “Francë 2016”. Mediat italiane kanë publikuar disa foto të një takimi sekret të trajnerit me drejtues të Federatës Italiane të Futbollit, pranë zyrave të institucionit. Në fakt emri i De Biasit prej kohësh përflitej si pasuesi i Antonio Contes te të Kaltërit, por tashmë gjithçka është konfirmuar dhe pritet vetëm zyrtarizimi, që po sipas mediave të vendit fqinj, do të ndodhë në pasditen e sotme.
Ky lajm është një goditje e madhe për Kombëtaren Shqiptare, që pas kualifikimit historik në Europian, tashmë duhet të mendojë urgjentisht për pasuesin e 59-vjeçarit. Emrat që mendon Federata Shqiptare janë ato të Besnik Hasit, i cili është drejt largimit nga Anderlecht si dhe ai i Igli Tares, Drejtor Sportiv te Lazio. I menjëhershëm ka qenë edhe reagimi i disa prej lojëtarëve të Kombëtares Kuqezi, të cilët janë shokuar nga ky lajm, duke mos e kuptuar arsyen e këtij vendimi nga ana e De Biasit.
Fitore ndaj Empolit
Duhet një fitore ndaj Empolit, për të shkuar, për të paktën një natë me një diferencë prej 6 pikësh nga Napoli. Juventusi kryesues riniset pas pauzës së ndeshjeve kombëtare me një objektiv të qartë, me trajneri Massimiliano Alegri që dha informacione të rëndësishme edhe për sa i përket gjendjes së grupit në prag të sfidës me skuadrën toskane.
“Dybala me siguri nuk do të jetë në ndeshje. Chiellini është rikuperuar dhe të tjerët janë mjaft mirë. Do të vlerësoj gjendjen e secilit para se të vendos. Marchisio është goxha mirë, po fillon të punojë me skuadrën dhe mund të jetë në dispozicion. Që sot fillon një mini kampionat prej 8 ndeshjesh, kemi 3 pikë avantazh dhe duhet ta ruajmë këtë avantazh, e ndoshta edhe ta rrisim”, u shpreh Alegri.
Alegri nuk i zë besë kundërshtarit të radhës, ndërsa për rivalitetin me Napolin e di se nuk mund të gabojë me të kaltërit të gatshëm për të përfituar. “Me Empolin do të jetë një ndeshje e komplikuar, ata nuk kanë asgjë për të humbur. Tani e tutje kemi 5 ndeshje në shtëpi, dhe Napoli nuk do të dorëzohet. Nuk na mbetet gjë tjetër veçse të fitojmë. Këtë të shtunë nuk duhet të gabojmë për sa i përket frymës me të cilën do të futemi në fushë. Motivimi ka shumë rëndësi. Kampionatin e luajmë në shtëpi”, tha ai. Në fund dy fjalë edhe për të ardhmen me tij, me Alegrin që ndërsa u pyet për kontratën u përgjigj, “Mos kini frikë, unë nuk arratisem kurrë”.
Në moshën 38-vjeçare, Gianluigi Buffon po përjeton një rini të dytë. Një garanci për Juventusin dhe për përfaqësuesen italiane. Megjithatë, i vetëdijshëm se koha nuk është më në krahun e tij, portieri e ka të qartë projektin për të ardhmen. Edhe dy vjet në fushat e lojës, për t’u tërhequr më pas nga futbolli i luajtur. Numri 1 bardhezi zbuloi gjithçka rreth planeve të tij. “Pas këtij viti do të luaj edhe për dy sezone të tjerë dhe më pas do të tërhiqem. Nuk dua të luaj pas të 40-ve. Por, synoj që edhe në moshën 40-vjeçare, të paraqitem në fushë njësoj si tani”, tha Bufon.
Në momentin kur do të vendosë të varë dorezat në gozhdë, Buffon e ka të qartë se çfarë do të bëjë dhe futbolli pritet të mbetet një pjesë e rëndësishme e jetës së tij. “Kam fituar shumë eksperiencë nga karriera ime, por nuk dëshiroj që të bëhem trajner. Më pëlqen më tepër roli i seleksionuesit, një detyrë si trajner i një ekipi Kombëtar. Jam ambicioz. Nëse e nis një punë, qëllimi është të arrij gjithmonë lart. Pa këtë karakteristikë nuk do të isha më i gjallë”, tha ai.
Gardiani duket se i ka përcaktuar destinacionet e ardhshme, ndërsa pranon se për aq kohë sa do të luajë, do të mbrojë vetëm ngjyrat e Juventusit. “Do të shkoja në vende si Shtetet e Bashkuara apo Kina, që kanë popullsi të madhe dhe shumë potencial. Pas një dekade këto shtete mund të realizojnë gjëra të rëndësishme. Por, për aq kohë sa do të luaj, do të qëndroj te Juventusi, edhe nëse dikush tjetër më ofron dyfishin e rrogës. Krenohem që jam pjesë e këtij klubi dhe ajo që ka më tepër rëndësi janë vlerat, të cilat sot duken disi jashtë mode”, tha portieri i Juves.
Më ka çu nëna me la gojën
Fatmir GUDA
“Më ka çu nëna me la gojën”, është të paktën në dukje fabula e letrës publike që kryetari i qeverisë i adreson kryetarit të opozitës për bashkëpunim në Reformën në Drejtësi. Letra publike që në fakt në stilin e Edi Ramës është një hile e vjetër e tij për të kaluar lumin e radhës, kësaj here mbyllet edhe me një fund provokativ: “ne jemi gati, ju a jeni gati?” Nëpërmjet të cilit më shumë sesa ofron duket qartë që sfidon.
Në mënyrë diplomatike e aspak refuzuese, zoti Basha në lidhje me këtë letër që i është shpërndarë më parë publikut, konstatoi vetëm brenda pak orësh gatishmërinë e tij për t’ju përgjigjur pozitivisht ftesës për takim, duke mos u treguar aspak paragjykues ndaj saj. Njëkohësisht shefi i opozitës në përgjigje të letrës së Edi Ramës u paraqit i vendosur për të mos hequr dorë nga kërkesa e vet për krijimin e kushteve për zgjedhje të lira e të ndershme si dhe zbatimin prej mazhorancës të vendimeve të Gjykatës Kushtetuese, për heqje mandati të dy deputetëve socialistë Valentina Leskaj dhe Rakip Suli, të cilët akuzohen se janë kapur, duke përfituar fonde dhe pasuri publike në shkelje të Kushtetutës.
Ndërkohë, ndaj kësaj kthese të papritur të Edi Ramës jashtë ngacmimit nuk kanë mbetur as zyrtarë të lartë të BE. Komisioneri për Zgjerimin në Bashkimin Europian, Johannes Hahn më shumë i entuziazmuar, por ndoshta aspak i mësuar nga ky avaz i Ramës për të maskuar mosdakortësinë dhe mosgatishmërinë për dialog politik gjoja me letra publike dakortësie e gatishmërie, padjallëzisht ka reaguar në Twitter se “mbështeste të gjitha iniciativat për dialog politik në interes të vendit dhe qytetarëve”.
Por më shumë të njohura janë bërë tashmë edhe piruetat e Edi Ramës të tipit “Po provokoj, që t’ja fus kundërshtarit dhe po s’e hëngri, po e haj vetë”, megjithëse kjo taktikë e rënon si të paqëndueshëm karakterin e lidershipit, paçka se për momentin nëpërmjet saj ai zgjedh të mbahet në lojën.
Po le t’i rikthehemi argumentit të ditës, letrës publike të Edi Ramës për ta ftuar opozitën në dialog politik për Reformën në Drejtësi dhe për një moment të kalojnë para syve kanosjet me tone të larta të zërit dhe arroganca e Kryeministrit, sipas të cilit “donte, s’donte opozita, Reformën në Drejtësi AI do e bënte edhe pa të, brenda muajit mars”. Madje, përjashtimi i opozitës nga ky proces i leverdisi aq shumë zotit Rama, saqë me gojë të tellallëve të tij Majko e Balla, arriti të kërcënonte me zgjedhje të parakohshme megjithëse jo drejtpërdrejt aleatin e vet LSI, në rast se nuk do i jepte votbesim për variantin socialist të Reformës në Drejtësi. Por tashmë shantazhet mbi këtë çështje mesa duket do t’i përkasin arkeologjisë dhe nga halli apo nga malli po kalon në planin B, atë të “dashurisë” ndaj opozitës. Pa u marrë me aktorët dhe faktorët që e bënë Edi Ramën të lëpijë atë që pështyu, pra konsensusin e munguar me opozitën, tashmë kemi një klimë krejt tjetër “dashamirësie” ndaj PD. Se sa hipokrizi apo sinqeritet do ketë letra publike e Edi Ramës, si dhe sa do zgjasë hipokrizia apo sinqeriteti i tij, ngelet të shihet nga reflektimi i tij ndaj kërkesave të opozitës për Reformën Zgjedhore, krijimin e kushteve për zgjedhje të lira dhe zbatimin e vendimeve të Gjykatës Kushtetuese prej shumicës parlamentare. Pavarësisht se edhe në këtë drejtim duket se ka një gjysëm lëvizje, teksa deputetët Leskaj e Suli i kanë drejtuar kryetarit të Kuvendit një letër të stilit “Arben Ndoka”, nga ku shprehin dakortësinë e tyre për t’u gjykuar nga Kushtetuesja, ndonëse që të ndodhë kjo duhet ajo që kërkon opozita, miratimi nga Kuvendi i një vendimi të tillë. Pra, bëri si bëri deri tani Edi Rama “e mprehu shpatën, dhe një herë për situatën”, pa menduar se brenda ditës do t’i vinte pozitive përgjigjja rrufe prej opozitës. Atij i ka mbetur tashmë të dëshmojë se letra që i nisi më parë publikut se opozitës për Reformën në Drejtësi, nuk do të rezultojë sërisht një marifet për të mos e bërë kurrë këtë Reformë në letër!
Ibra kërkon 750 mijë euro në javë nga anglezët
Edhe pse në moshën 34-vjeçare, Zlatan Ibrahimovic nuk i ul pretendimet e tij. Sipas asaj që publikiohet tek tabloidi britanik “Daily Mail”, sulmuesi suedez u ka kërkuar klubeve angleze të interesuara për të një kontratë me pagë prej 750 mijë euro në javë.
Nëse kërkesa e tij e çmendur do të aprovohej, atëherë suedezi do të përfitone 36 milionë euro në sezon, shifër kjo që është 2 herë më e lartë se ajo që ai përfiton aktualisht te PSG.
Ky pretendim i Ibrahimovic erdhi menjëherë pasi ai mësoi për ofertën që po përgatitet në Kinë për një kontratë 3-vjeçare me 25 milionë euro në sezon.
Sipas “Daily Mail”, skuadrat që janë të interesuara për të siguruar shërbimet e Ibrahimovic janë Arsenali, Manchester United, Chelsea dhe West Ham, por që tani duket se janë frenuar në pretendimet e tyre pasi tashmë te drejtuesit e tyre ka lindur pyetja nëse ia vlen të bësh një shpenzim të tillë për një lojtar që po shkon drejt moshës 35-vjeçare.
Plani i Contes, ja kush qëndron te Chelsea
Antonio Conte pritet të marrë drejtimin e skuadrës londineze të Chelseat sezonin e ardhshëm, por trajneri italian dëshiron që të mbyll disa punë para se të fillojë Europiani.
Besohet se Conte ka dorëzuar dosjen e tij te drejtuesit e skuadrës londineze ku parashikohet edhe fati i disa prej lojtarëve kyç të kampionëve anglez. Çfarë do të thotë emërimi i Contes për Diego Costan, Eden Hazard e John Terry? Ja plani i italianit.
Sulmuesit
Ateltico Madrid nuk e ka fshehur faktin që dëshiron të rikthejë Diego Costan, sulmuesin të cilën e shiti pë 32 milionë paund në vitin 2014. Madje, “Sky Sports” raportoi se braziliani me pasaportë spanjolle i ka t hënë “po” rikthimit në Madrid.
Ai ka edhe tre vite kontratë me Chelsean, por duket shumë i palumtur me mënyrën si po trajtohet nga mediat ne ishull por edhe nga federata, e cila të premten e pezulloi edhe për një tjetër ndeshje.
Por, Conte ka plane të tjera për Conten, pasi italiani kërkon ai të qëndrojë në Londër. Ndërkohë Alexandre Pato dhe Radamel Falcao pritet të largohen në fund të sezonit, duke mbyllur marrëveshjet e huazimit. Po ashtu, pritet edhe largimi i Loic Remy.
Eden Hazard
Real Madrid dhe PSG do të tentojnë të joshin belgun Eden Hazard në merkaton e verës, pas një sezoni për t’u harruar për anësorin e londinezëve. 25-vjeçari është larg formës së një sezoni më parë ku udhëhoqi Chelsean drejt dy trofeve, ndërsa vet u shpall “Lojtari më i mirë”.
Mirëpo, Conte dëshiron që të takojë Hazardin përpara ndonjë vendimi për ta lënë të lirë. Trajneri italian kërkon ta dëgjojë nga goja e 25-vjeçarit kërkesën për t’u larguar.
Conte mund ta bind për një “fillim të ri” belgun, por gjithçka do varet nga vendimi i lojtarit.
Kapiteni
John Terry pritet të largohet në fund të këtij sezoni, atëherë edhe kur kontrata e tij me klubin do të skadojë. Mirëpo, Conte duket se ka urdhëruar klubin q të përgatisë rinovimin për kapitenin.
34-vjeçarit mund t’i ofrohet një tjetër kontratë 1-vjeçare, por trajneri italian po mendon ta bëjë pjesë edhe të stafit teknikut.
Thibaut Courtois
Thibaut Courtois refuzoi t’i premtonte besnikëri Chelseat gjatë kohës sa ishte i angazhuar me kombëtaren belge, me Realin i cili synon ta rikthejë në kryeqytetin spanjoll këtë verë.
Real nuk arriti të bind Manchester United për David de Gean, prandaj vëmendja është përqendruar te Courtois.
Në rast largimi, Conte ka “planin B” dhe ai quhet Gianluigi Donnarumma. Trajneri i ardhshëm i Chelseat është një adhurues i madh i adoleshentit të talentuar të Milanit, ndërsa ka miqësi edhe me agjentin, Mino Raiola.
Të rinjtë
Gjatë bisedimeve mes Chelseat dhe Conte, klubi ia ka bërë të qartë italianit se duhet me patjetër të mbajë një sy nga ekipet zinxhirë. Mediat britanike raportojnë se londinezët janë njohur me planin e Contes për të rinjtë dhe janë shumë optimistë.
Conte është pajtuar që t’i apë mundësinë të rinjve të Chelseat, edhe pse do të ketë në dispozicion që këtë verë 150 milionë euro për transferime.
Hajdutëria e Al-Capone-ve në pushtet, Qeveria, 9.5 mln USD për 950 metra rrugë
Kryeministri Rama është përfshirë në një tjetër aferë korruptive në ndërtimin e rrugës së Linit që ka kushuar 9.5 mln dollarë. Sekretarja për marrëdhëniet me Publikun në PD, Grida Duma i ka kërkuar kryeministrit Rama përgjigje se cila është pjesa e tij në këtë aferë. “Një aferë skandaloze zbulon mekanizmin se si Edi Rama dhe qeveria e tij ndajnë paratë e shqiptarëve me miqtë e tyre.
Mbi 9 milionë e gjysëm dollarë, ose 9 miliardë e 720 milionë lekë i ka dhënë Edi Rama një firme ndërtuese për të bërë më pak se një kilometër, saktësisht 950 metra rrugë në Lin të Pogradecit. Nuk është një shaka e 1 prillit, por kjo është në praktikë marrëveshja e 1 prillit. Një shifër rekord abuzimi dhe korrupsioni”, tha Duma.
Përveç kësaj, sipas PD-së, ky tender ka dhe paligjshmëri të tjera, si fakti që mungon mbikqyrësi i këtyre punimeve. “Një kërkesë kjo e ligjit, dhe ende nuk ka një mbikqyrës të shpallur zyrtarisht nga autoriteti rrugor, të dhëna këto që mungojnë edhe në tabelën e objektit, siç mund ta dalloni edhe në foton në ekran. Qeveria me kontratën e lidhur me 2 shkurt ka favorizuar firmën PE-VLA-KU, pasi siç shihet qartë nga dokumentacioni, ky ndërtues ka marrë 99 përqind të fondit limit. Eshtë e dukshme se nuk ka pasur garë”, tha sekretarja për marrëdhëniet me Publikun në PD.
Ajo theksoi se 9 milionë e gjysëm dollarë për 950 metra rrugë kanë shkuar drejt e tek miku i qeverisë. “Cila është pjesa e Edi Ramës në këtë aferë, i cili jo më kot cilësohet edhe nga mediat ndërkombëtare si politikani më i pasur në Europë? Kjo është pra oligarkia në veprim, ku 9 milionë e gjysëm dollarë jepen pa garë, me fitues të përcaktuar, për vetëm 950 metra rrugë. Ky është korrupsioni galopant dhe alarmant i Edi Ramës me paratë e shqiptarëve. Kjo është hajdutëria e Al-kaponeve në pushtet”, deklaroi Duma.
Kryesore
Continue to the category
