Ambasada e SHBA-ve në Tiranë i bën thirrje vendeve aleate të aleancës që të investojnë në sigurinë e tyre në nivelin e duhur, në mënyrë që të sigurohet paqe për të gjithë aleancën.
“Vetëm kur të gjithë Aleatët investojnë në sigurinë e tyre në nivelin e duhur, ne mund të sigurojmë vërtet paqe për të gjithë Aleancën e NATO-s. Paqja nuk vjen falas”, thuhet në postimin që ambasada ka publikuar në rrjete sociale.
Kohët e fundit është shtuar retorika e thirrjes për shtim të shpenzimeve për mbrojtje në aleancën euroatlantike NATO.
Sekretari i Përgjithshëm i NATO-s Mark Rutte u ka bërë vendeve të NATO-s, thirrje të vazhdueshme të rrisin shpenzimet e tyre të mbrojtjes me mbi 2% të PBB-së së tyre, një shifër e vendosur një dekadë më parë që tani shihet nga disa si shumë e ulët për shkak të sfidave të paraqitura nga Rusia.
“Ne e dimë se objektivi prej 2%, i cili është vendosur për një dekadë, nuk do të jetë i mjaftueshëm për të përballuar sfidat e së nesërmes.
Për ta mbajtur NATO-n të fortë, ne duhet të vazhdojmë të përshtatemi dhe për të garantuar sigurinë tonë në të ardhmen, ne duhet të shtojmë përpjekjet tona sot. Kjo do të thotë që ne duhet të shpenzojmë më shumë për mbrojtjen tonë”, ka thënë Rutte.
