Kryetari i Partisë Demokratike Lulzim Basha nga Farka ku kishte bashkëbisedim me qytetarët tha se opozita e bashkuar ka protestuar dhe do të protestojë sërish, me qëllim që të dëbojë këtë bandë kriminale.
Basha tha se në krye të vendit është Rama dhe banda e tij, e cila qeveris me kërbaç e duke bashkëpunuar me krimin. Në fjalën e tij, Basha paralajmëroi se më datë 11 maj, që përkon me protestën e paralajmëruar nga opozita, kjo bandë kriminale do të tundet.
“Kjo bandë kriminale më datë 11 maj do të dëbohet.
Ka ardhur koha që të bëhet e qartë si e ndarë me thikë dallimi mes një bande kriminale në pushtet dhe asaj që ne duam të bëhet kur të qeverisim nesër. Kjo bandë me në krye Ramën bashkëpunon me krimin, kurse ne premtojmë dhe realizojmë sipas standardeve më të mira europiane”, tha Basha.
Lulzim Basha theksoi se me ardhjen në pushtet të tij do të bëhen subvencione në bujqësi, do të ketë ndryshime radikale pozitive, sipas standardeve europiane. Ai premtoi nisjen e një të ardhme europiane për Shqipërinë dhe largim, sipas tij, të atyre që e duan vendin të zhytur në krim e korrupsion.
