Sali Berisha i ka shtrirë Edi Ramës dorën për një tjetër pazar në kurriz të reformës në drejtësi. Pas paktit për të amnistuar të korruptuarit, nëpërmjet votimit të Amnistisë Penale, dhe atij për Reformën Zgjedhore, çka praktikisht zhbëhu mundësinë e listave të hapura, Berisha duket se tani ka dalë te qëllimi i vërtetë.
Edi Rama krijoi komisionin e famshëm “Xhafaj” me qëllim ndryshimin e ligjeve të reformës dhe organizmin e organeve kushtetuese. Mirëpo si duket Berisha nuk i zë besë këtij komisioni dhe ka hedhur teorinë e një komisioni të ri, me qëllim rishikimin total të reformës në drejtësi. Madje, duket se kjo do të jetë dhe pjesë e premtimeve para zgjedhjeve të 2025.
Deklarata u bë dje nga ballkoni, ku duket se është dhe një lloj ftese për mazhorancën. Berisha e di se asnjë parti nuk e ndryshon dot reformën, pasi kërkohen 84 vota. Dhe deklarata e tij duket se vjen erë e keqe, pasi nuk është çudi që të negociohet për tjetërsimin e reformës, në një kohë kur ambasadori amerikan nuk ka mbërritur ende.
“Krijimi i komisionit të së vërtetës është rruga e vetme për të bërë radiografi, në mënyrë që Dumanër, Gjoka, gjykatës, prokurorë kriminelë të mos mund t’i fshehin qytetarëve shqiptarë krime të shëmtuara të deputetëve të tyre, ministrave të tyre, kryeministrit të tyre. Vetëm krijimi i një komisioni të së vërtetës që do të jetë pjesë integrale e programit të PD do mund të ndajë në mënyrë përfundimtare Shqipërinë nga bota e krimit shtetëror-qeveritar të sotëm”, tha Berisha.
Mbetet të shihet se cila do të jetë lëvizja e demokratëve të Berishës, do kemi bashkim te komisioni Xhafaj, apo do kërkohet një komision i ri. Deri tani opozita e ka bojkotuar komisionin, por nga e hëna politika rikthehet në normalitet dhe duket se njerëzit e oborrit të Berishës do vijnë me ide të reja për të zhbërë SPAK dhe GJKKO-në, gjë që i intereson njëkohësisht edhe Berishës, edhe Ramës.
