Nga Red VARAKU
Edi Rama, kryeministri më i korruptuar i Europës dhe përfaqësuesi i shtetit më të varfër në Europë, ka nisur një sulm histerik mbi Bashkimin Europian me një fjalor dhe gjuhë identike me autokratët e korruptuar të Ballkanit.
Për herë të parë, ai po paralajmëron dhe kërcënon se është gati të nderpresë përfundimisht procesin e integrimit të Shqipërisë, duke u bërë kështu dhe kryeministri i parë shqiptar që futet në përplasje të hapur me kontinentin e vjetër dhe kryeministri i parë në historinë tridhjetë vjeçare të pluralizmit, që vë në dyshim ëndrrën e lashtë të popullit shqiptar për tu ribashkuar me Europën.
Edhe pse në pamje të parë ky reagim mund të duket shumë ekstrem, në fakt është një reagim krejt normal përballë shtatë refuzimeve të njëpasnjëshme dhe një BE-je të vendosur, që po i thotë troç se problemi më i madh i Shqipërisë nuk janë dhe aq reformat, por problemi më i madh i saj është dhe mbetet ai vetë personalisht.
Nevoja për të fshehur ndarjen përfundimtare me Europën shkakton dhe gjoja nervozizmin dhe histerinë e tij , të cilat në këtë kuptim nuk janë gjë tjetër vetëm se një përpjekje për të neutralizuar mesazhin e qartë dhe të palëkundur që vjen nga BE si përgjigje për përpjekjet e tij për të asgjësuar demokracinë.
Pra, spektakli banal që ai po na ofron në këtë vapë me një gjuhë lafarakësh ordinerë, në fakt nuk lidhet dhe aq me dështimin e integrimit në vetvete.
E vërteta është që ai nuk është se e ka dashur ndonjëherë integrimin përndryshe do të plotësonte pesëmbëdhjetë kushtet e vendosura nga BE ku kryekushti ishte rikthimi i demokracisë përmes zgjedhjeve të lira me një kod zgjedhor të dakortësuar.
Beteja e tij lidhet me përpjekjen e tij për të fshehur çarjen e tij përfundimtare me Europën dhe faktin që ndarja që ka ndodhur midis tyre është e pakthyeshme dhe nuk ka më asnjë shans që të rikuperohet.
Tani problemi është se rezistenca e Edi Ramës ndaj presionit për largimin e tij nuk dëmton Edi Ramën, por ajo është një taksë që duhet ta paguajnë të gjithë shqiptarët.
Për pasojë, kjo nga një situatë komike që është, ku gomarit i duket vetja kalorës, tani po kthehet në tragjike, pasi Shqipëria po hyn përfundimisht në një epokë të errët, në një tunel pa dritë.
