Një avion i “American Airlines” me 64 pasagjerë në bord u përplas me një helikopter të Ushtrisë Amerikane Black Hawk, pranë aeroportit të Washington-it në lumin Potomac, orët e para të mëngjesit të sotëm.
Ankthi po rritet për dhjetëra personat që ishin në bordin e aeroplanit që u rrëzua në ujërat e akullta të lumit Potomac.
Është e paqartë nëse ka të mbijetuar, por CBS News raportoi më herët se 18 trupa ishin gjetur të pajetë ndërsa të tjerët janë ende në kërkim.
Megjithatë, senatori Roger Marshall, i cili përfaqëson Kansasin, nga ku ishte nisur avioni i pasagjerëve, la të kuptohet se të gjithë në bord kanë të vdekur.
Gjatë një konference për shtyp, ai tha se është shumë e vështirë të humbësh 60 qytetarë në të njëjtën kohë.
Washington Post raportoi se ekipet e shpëtimtarëve që dolën nga lumi thanë më herët se nuk gjetën asnjë të gjallë.
Shefi i shërbimeve mjekësore të urgjencës të Uashington DC, John Donnelly, konfirmoi se ekipet po kalojnë nga një mision shpëtimi në një operacion për gjetjen e trupave të pajetë.
“Ne nuk besojmë se ka ndonjë të mbijetuar nga ky aksident”, shtoi ai.
Kreu i American Airlines, Robert Isom shprehu në një video të publikuar nga zyra e shtypit trishtimin e tij të thellë për tragjedinë, dhe tha se avioni i filialit të saj rajonal PSA kishte 60 pasagjerë dhe 4 anëtarë të ekuipazhit në bord kur ndodhi përplasja.
