Ish-drejtuesi i Prokurorisë së Tiranës, Petrit Fusha, me 28 shkurt 2019 dhe dorëheqjen nga detyra pas një karriere 32-vjeçare në sistemin e drejtësisë.
“Pas 32 viteve pune në shërbimin e Prokurorisë, çmoj se përvojën që kam mund ta përdor në dobi të një aktiviteti tjetër me më pak ngarkesë. Koha në të cilën po jetojmë është tej ngarkuar me ngjarje e fenomene të drejta e të pa drejta. Një profesionist në moshën time natyrshëm zgjedh me maturi vendin se ku mund të kontribuojë më mirë.
Ndaj gjykova se Prokuroria nuk është më vendi ku unë mund të shërbej me përvojën 32 vjeçare. Një përvojë e akumuluar tashmë nga procese hetimore e gjykimi të çdo lloj çështje e niveli. Në këto kushte ju paraqes sot dorëheqjen time nga detyra e Prokurorit në Prokurorinë e Përgjithshme si dhe nga shërbimi i Prokurorisë”. Kështu e arsyetonte Fusha dorëheqjen e tij.
Por, Komisioni i Vettingut pretendon se janë të tjera arsye që e kanë shtyrë Fushën të largohet nga sistemi i drejtësisë.
Duket se kanë qenë prangat që e kanë trembur ish-prokurorin Fusha. Ky i fundit ka zgjedhur të largohet në një kohë që kishte nisur hetimi ndaj tij.
Për shkak të ligjit nr. 84/2016 “Për rivlerësimin kalimtar të prokurorëve dhe gjyqtarëve në Republikën e Shqipërisë”, Fusha i është nënshtruar procesit të rivlerësimit ex officio, në bazë të pikës 3, të nenit 179/b, të Kushtetutës së Republikës së Shqipërisë.
Subjekti i rivlerësimit, z. Petrit Fusha, u është nënshtruar procedurave të rivlerësimit, duke u shortuar si subjekt në shortin e hedhur, më datë 15.01.2018, nga Komisioni i Pavarur i Kualifikimit, në përputhje me “Rregulloren për procedurat e zhvillimit të shortit në Komisionin e Pavarur të Kualifikimit”.
KPK, njofton se në mbledhjen e trupit gjykues, më datë 30.01.2018, u deklarua mungesa e konfliktit të interesit me subjektin e rivlerësimit nga anëtarët e trupit gjykues, si dhe u vendos fillimi i hetimit administrativ.
Me vendimin nr. 40, datë 16.07.2017, “Për rishpërndarjen me short dhe transferimin e dosjeve të çështjeve të komisionerit Alma Faskaj”, nëpërmjet procedurës së shortit, anëtarja e trupit gjykues, znj. Alma Faskaj, për arsye shëndetësore, u zëvendësua me anëtaren Valbona Sanxhaktari.
Me datë 10.09.2018, Fusha është njoftuat me përbërjen e re të trupit gjykues dhe më datë 11.09.2018 ai ka konfirmuar mungesën e konfliktit të interesit me anëtarët e trupit gjykues.
Trupi gjykues, i përbërë nga Lulzim Hamitaj kryesues, Olsi Komiçi relator dhe Valbona Sanxhaktari anëtare, në prani edhe të vëzhguesit ndërkombëtar, me datë 26.02.2019, vendosi përfundimin e hetimit kryesisht për subjektin e rivlerësimit, z. Petrit Fusha, si dhe njoftimin e këtij subjekti për t`u njohur me materialet e dosjes, dokumentet e administruara nga Komisioni, si dhe rezultatet e hetimit, në përputhje me nenet 35 – 40 dhe 45 – 47 të Kodit të Procedurave Administrative.
Me datë 27.02.2019, ish-prokurorit Petrit Fusha iu dërguan rezultatet e hetimit administrativ kryesisht si dhe iu kalua barra e provës bazuar në nenin 52 të ligjit nr. 84/2016.
Por, një ditë më pas me datë 28 shkurt 2019, Fusha ka njoftuar për dorëhqjen nga sistemi i drejtësisë.
Në vijim, Këshilli i Lartë i Prokurorisë, pasi mori në shqyrtim kërkesën e subjektit të rivlerësimit, me vendimin nr. 37, datë 06.03.2019, “Për mbarimin e statusit të magjistratit”, vendosi të deklarojë mbarimin e statusit të magjistratit për z. Petrit Fusha, aktualisht prokuror pranë Prokurorisë së Përgjithshme, në datën 31 mars 2019, për arsye të kërkesës për dorëheqje.
Ndryshe, Petrit Fusha, është i njohur në opinionin publik si mbrojtësi i kryebashkiakut Erion Veliaj, pasi dyshohet se mbylli dosjen e Ardit Gjoklajt, pa frikë mund të konsiderohet si njeriu më i pasur i drejtësisë.
Fusha për pesë vite radhazi ka drejtuar Prokurorinë e Tiranës, katër vite si drejtues i Prokurorisë së Tiranës dhe një vit si zëvendësdrejtues. Duke i refruar deklaratave të pasurisë rezulton se pasuria e prokurorit Fusha shkonte rreth 1 milion dollarë.
“CNA.al”
