Paul Pogba është me kokën ulur, i përqendruar te topi ku po hedh autografin apo kushedi ku tjetër mund ta ketë mendjen. Sapo ka dalë nga një makinë, me shumë mundësi pasi ka bërë “shopping” në New York ku ndodhet me pushime dhe një tifoz e ndal duke e pyetur nëse do të qëndrojë te Juventusi dhe përgjigjja e tij është, “Yeah”. Po-ja në anglisht për të thënë të vërtetën nuk është dhe aq bindëse, pasi Pogba të krijon përshtypjen se nuk e ka dëgjuar me shumë vëmendje tifozin, ose ndoshta thjesht është argëtuar edhe një herë duke i befasuar të gjithë, siç bëri pak ditë më parë kur bëri një postim në Twitter duke mashtruar se ishte duke kryer vizitat mjekësore.
Videoja e shpërndarë në YouTube nga “Italian Football TV” ka bërë xhiron e botës. Padyshim që ka shumë interes kur Pogba pyetet nëse do të qëndrojë te Juve dhe thotë po, por në fakt sipas mediave italiane kjo nuk e ndryshon situatën reale. Vështirë që Pogba të ketë ndryshuar mendje dhe as Juventusi, që 100 milionë eurot që do të arkëtojë nga shitja e tij do t’i përdorë për të paguar klauzolën e Gonzalo Higuain. Në fund të pushimeve, me shumë mundësi Pogba do të kryejë me të vërtetë vizitat mjekësore, por jo në Vinovo, Mourinho e pret te Manchester United.
