Drejtoria e Përgjithshme e Policisë ka lidhur kontratë për furnizim gazi me kompaninë ‘GTS’, administratori i të cilës, Besnik Halili, u shfaq në përgjimet e Ndranghetas si pika e lidhjes mes mafiozëve italianë dhe autoriteteve të larta shqiptare.
Por, 5 muaj pas publikimit të këtyre përgjimeve, Policia e Shtetit zgjedh të nënshkruajë kontratë me kompaninë ‘GTS’. Tenderi në fjalë nuk ka ndonjë veçanti për t’u theksuar. Bëhet fjalë për një shumë të vogël, rreth 8 milionë lekë të vjetra dhe ‘GTS’ merr përsipër që të furnizojë Drejtorinë e Përgjithshme të Policisë së Shtetit me gaz helium për nevoja të saj.
Por, tenderi, më shumë se sa për vlerën e vogël, duket se është një sinjal se autoritetet ligjzbatuese shqiptare nuk duket se kanë ndërmend që të hetojnë ato që mund të konsiderohen si lidhjet e mafias me qeverinë shqiptare dhe Bashkinë e Tiranës. Përfshirja e kompanisë ‘GTS’ në tendera publikë dhe aq më tepër në ato të Policisë së Shtetit, krijon bindjen se ndaj saj apo administratorit të saj nuk ka asnjë hetim penal, pavarësisht deklaratave publike të autoriteteve ligjzbatuese shqiptare.
Në Maj të këtij viti, prokuroria e Anti-mafias e Katanzaros dërgoi për gjykim grupin e parë prej 85 personash, të arrestuar si pjesë e një maksi-procesi të konkluduar në janar të këtij viti. Andrea Gallo, personazhi kryesor i hetimit, shfaqet në përgjimet e anti-mafias italiane, duke përmendur emrin e ‘Nik shqiptarit’, referencë për Besnik Halilin, si ‘personi që kishte lidhje të fuqishme në qeverinë dhe bashkinë e Tiranës’ për lejet e ndërtimit.
Pas publikimit të këtyre përgjimeve dhe, sidomos nën presionin politik, autoritetet ligjzbatuese shqiptare, përfshirë Prokurorinë SPAK dhe Policinë e Shtetit, njoftuan se kishin nisur verifikimet, bazuar në përgjimet e anti-mafias italiane. Përgjimet e prokurisë së anti-mafias së Katanzaros hodhën dritë për herë të parë, me dokumentet, mbi penetrimin e mafias më të fortë italiane në sektorin e ndërtimit në Tiranë. Në mes e këtyre përgjimeve del Nik, shqiptari i cili nga përgjimet është pikë referimi i sipërmarrësit Gallo në Shqipëri.
Ai duket se është njohës i mirë i sektorit të ndërtimit dhe të mënyrës si funksionojnë tenderat në Shqipëri. Përgjimet i përkasin datës 19 shkurt 2018. Në këtë kohë sipërmarrësit Antonio Gallo, Saverio Brutto ndodhen në Shqipëri.
Ndërkohë në bisedën e përgjuar të datës 29 nëntor 2017 Gallo i tregon avokatit të tij Claudio Larussa për Nikun. Pas publikimit të përgjimeve, Besnik Halili reagoi në media duke mohuar përfshirjen e tij në aktivitete mafioze. Ai deklaroi se ka pasur komunikime normale biznesi me Andrea Gallon.
