Presidenti Frank-Walter Steinmeier shpërndau të premten Parlamentin e Gjermanisë për të hapur rrugën për zgjedhjet e parakohshme më 23 shkurt, pas rënies së koalicionit trepalësh të kancelarit Olaf Scholz.
“Veçanërisht në kohë të vështira, si tani, stabiliteti kërkon një qeveri të aftë për të vepruar dhe shumicë të besueshme në parlament”, tha Steinmeier në Berlin, duke theksuar se kjo ishte arsyeja pse zgjedhjet e parakohshme ishin rruga e duhur përpara për Gjermaninë.
Steinmeier shtoi në fjalimin e tij se pas zgjedhjeve, zgjidhja e problemeve duhet të jetë sërish fokusi kryesor i politikës.
Presidenti, posti i të cilit ka qenë kryesisht ceremonial në epokën e pasluftës, bëri thirrje gjithashtu që fushata zgjedhore të zhvillohet në mënyrë të drejtë dhe transparente.
“Ndikimi i jashtëm është një rrezik për demokracinë, qoftë ai i fshehtë, siç ishte dukshëm rasti kohët e fundit në zgjedhjet rumune, ose i hapur, siç po praktikohet aktualisht veçanërisht në platformën X (media sociale)”, tha ai.
Scholz, një socialdemokrat i cili do të drejtojë qeverinë e përkohshme derisa të formohet një e re, humbi një votë besimi në parlament në fillim të këtij muaji pasi largimi i Ministrit të Financave Christian Lindner e la koalicionin e tij qeverisës pa një shumicë legjislative.
Konservatorët mbajnë një epërsi të rehatshme prej më shumë se 10 pikësh ndaj Social Demokratëve (SPD) në shumicën e sondazheve. Alternativa e ekstremit të djathtë për Gjermaninë (AfD) është pak përpara SPD-së, ndërsa të Gjelbërit, një partner koalicioni, janë në vendin e katërt.
Partitë kryesore kanë refuzuar të qeverisin me AfD, por prania e saj ndërlikon aritmetikën parlamentare, duke i bërë koalicionet e lëkundshme më të mundshme.
