Sulmuesi spanjoll, Alavro Morata, do të largohet nga Real Madridi dhe destinacioni i mundshëm është Manchester Unitedi. Por, sipas “Dario Goal”, paqartësia për të ardhmen e Cristianos Ronaldos, i cili flitet se mund të largohet nga “Santiago Bernabeu”, po i mban peng “Los Blancos” e “Djajtë e Kuq” që hezitojnë të arrijnë marrëveshje.
Presidenti i klubit, Florentino Perez dhe trajneri Zinedine Zidane, duan që çështja e Ronaldos të zgjidhet sa më parë në mënyrë që ta hapen negociatat për Alvaro Moratan. Sido që të jetë, në Spanjë janë të bindur se CR7 do të vazhdojë të qëndrojë në klubin ku ka shkruar historinë, ndërsa Morata do t’i bashkohet “Djajve të Kuq”. Madje e dashura e spanjollit, Alice Campello, i ka bërë follow Manchester Unitedit në Instagram.
Alberto Toril, i cili ka qenë trajner i Alvaro Moratas gjatë viteve të tij në Real Madrid, beson se sulmuesi spanjoll do të largohet nga “Santiago Bernabeu”. Spanjolli ka qenë gjithmonë zgjedhja e dytë për trajnerin Zinedine Zidane, pavarësisht paraqitjeve më të mira se Karim Benzema, ku edhe ka përfunduar sezonin si golashënuesi i dytë, pas Cristiano Ronaldos.
Kjo e ka shtyrë atë që të heqë dorë nga ëndrra fëmijërore dhe të gjejë klub tjetër. Ai është shumë afër transferimit në Manchester United. “Është vendim personal. Ai meriton të jetë 9-sh i padiskutuar në sulmin e Real Madridit. Paraqitjet e tij kanë qenë të mrekullueshme këtë sezon dhe ka pasur shumë sukses para portës”, tha Toril për “Goal”.
“Ai do të tentojë të gjejë një vend që do t’ia mundësojë të përmirësohet para Kupës së Botës dhe të marrë minuta të mjaftueshme për të qenë titullar me përfaqësuesen. Në Real Madrid, do të jetë e komplikuar për Moratan”, shtoi ai. Morata e mbylli sezonin me Realin me 20 gola në 43 paraqitje.
Ish-futbollisti i Bayern Munich dhe Francës, tashmë në pension, Bixente Lizarazu, thotë se Cristiano Ronaldo nuk do të largohet nga “Santiago Bernabeu”.
“Mendoj se është një blof i madh, për shkak se problemet financiare do të mund të zgjidhen nga Real Madrid shumë lehtë. Unë nuk e shoh të largohet nga Real Madrid”, tha ish-anëtari i Bayern Munich. Veç të tjerash, ai tha se edhe Cristiano përfiton që të vazhdojë me Madridin. “Nuk ka klub më të mirë se Madridi për Cristianon, kanë lojtarët më të mirë dhe janë ekipi më i mirë në botë”, shtoi Lizarazu.
