Qindra banorë të fshatrave Mbyet, Plyk, Drizë, të mbështetur nga shoqëria civile dhe nga anëtarë e simpatizantë të PD kanë protestuar mëngjesin e djeshëm para Bashkisë Fier kundër ndërtimit të impiantit të përpunimit të plehrave që do të ndërtohet në Plyk të Njësisë Administrative Portëz, Bashkia Fier. Me parulla në duar: “Nuk i duam plehrat”; “Mos vrisni jetë” banorët kanë rrethuar Bashkinë duke brohoritur kundër vendimit të marrë nga Këshilli Bashkiak pa marrë mendimin e pa diskutuar me banorët që preken nga ky ndërtim. Ata pohuan se janë kundër ndërtimit të këtij impianti për përpunimin e plehrave. “Bashkia ta ndërtojë, por të gjejë vendin e duhur jashtë zonave të banuara”, u shprehën ata.
Protesta e banorëve të fshatrave Mbyet, Plyk, Drizë ka detyruar Bashkinë e Fierit që të tërhiqet nga vendimi për ndërtimin e impiantit të plehrave në Plyk. Bashkia e Fierit ka bërë të ditur se po kërkon një vend tjetër për ndërtimin e impiantit të përpunimit të plehrave.
Kreu i PD Fier, Luan Baçi, ka pohuar se, Partia Demokratike është në mbështetje të banorëve dhe kundër ndërtimit të këtij impianti përpunimi mbetjesh jo vetëm në Mbyet apo Plyk, por në çdo vend që është pranë zonave të banuara të Bashkisë Fier.
“Ju banorë që filluat të parët protestat, që larguat fuqishëm një vendim korruptiv, të dëmshëm për banorët tuaj dhe gjithë Bashkinë e Fierit. Një vendim të Këshillit Bashkiak që këshilltarët e djathtë të PD e kundërshtuan me forcë. E votuan kundër. Por me arrogancën e tyre zotërinjtë e mazhorancës e votuan pro. Duke thënë se nuk pyesim për ju.
Ne u thamë jo dhe pas protestave të fuqishme kanë dhënë sinjalin e parë se do të tërhiqen, kanë njoftuar për një mbledhje urgjente ditën e hënë, mbledhje të Këshillit Bashkiak për një anulim të vendimit, për një rishikim të vendimit. Ne do t’u themi sërish jo, larg zonave të banuara. Ne jemi për t’u bërë një impiant për të pastruar qytetin, por për qytet të pastër, jo të dëmtojmë fëmijët tanë, të ardhmen dhe qytetarët tanë”, u shpreh kreu i PD të Fierit, Luan Baçi.
Baçi pohoi faktin se policia duhet të qëndrojë larg protestuesve sepse protesta është paqësore e jo pas protestës të shkojnë e të bëjnë arrestimin e protestuesve në banesat e tyre. Pasi kanë protestuar për afro një orë para Bashkisë, protestuesit janë larguar duke pohuar se do të rikthehen përsëri në protestë deri në anulimin e vendimit.
Kjo është protesta e tretë brenda një jave që banorët e rrethit të Fierit ngrihen kundër ndërtimit të impiantit të përpunimit të plehrave. Në dy protestat e mëparshme banorët bllokuan rrugën nacionale Fier-Ballsh duke u përleshur edhe me policinë. “Gjynah për këta fëmijë, është trashëgimi toka. Na vjen keq, i kemi vërselit ata ullinjtë, me këtë tokë ushqehemi”, tha një banore. “Siç jemi këtu do të ngrohemi gjatë gjithë kohës, do të bëjmë protesta nga më të ndryshmet që Këshilli Bashkiak dhe të tërë ata zotërinjtë që janë zgjedhur atje dhe që tallen me këtë popull të marrin një vendim të drejtë në drejtim të këtij komuniteti”, tha një grua e moshuar. Një tjetër banor thotë se e ndan gardhi me plehrat.
Një tjetër protestë është zhvilluar kundër ndërtimit të HEC-it në Poçem. Bëhet e ditur se, banorët e Kutës në Mallakastër, kanë bllokuar rrugën nacionale në shenjë kundërshtimi ndaj ndërtimit të HEC-it në Poçem. Sipas tyre tokat do të përmbyten, pemët e ullinjve do të shkatërrohen dhe banorët do ta kenë të pamundur për të jetuar në këto zona.
Mbi të gjitha protesta e djeshme kishte kryefjalë mbrojtjen e lumit të egër Vjosë. Ata e bllokuan rrugën në dy akset për më shumë se 30 minuta, ndërkohë që edhe qytetarë të tjerë u solidarizuan, duke zbritur nga mjetet për t’ju bashkuar protestës.
R.POLISI
