Qindra qytetarë dhe aktivistë po protestojnë përpara Kuvendit në mbrojtje të Godinës së Teatrit Kombëtar, që po synohet të prishet përmes një ligji të posatshëm të miratuar nga ana e qeverisë, dhe rikthyer sot në Kuvend përmes amendimit të dekretit të presidentit.
Aktivistë janë shprehur se kalimi i këtij ligji sot në Kuvend është në shkelje me Kushtetutën e vendit dhe është gjetur në shkelje dhe nga vetë institucionet e BE-së. “Reflektoni o njërëz, se ka marrë fund Shqipëria! “Të tilla thirrje nga artistët dhe qytetarët, me megafon, kanë shpërthyer para godinës së Kuvendit sot, në orën 10:00, kur sapo ka nisur seanca parlamentare dhe kur pritet që të votohet ligji që i hap rrugën shembjes së Teatrit Kombëtar.
Në deklaratën e Aleancës për Mbrojtjen e Teatrit thuhet se vendoi me kalimin e këtij ligji po shkon drejt diktaturës dhe ata janë të gatshëm që të mbrojnë me forcë godinën.
Mundësinë e rezistencës fizike nuk e ka përjashtuar mëngjesin e sotëm dhe regjisori Edmond Budina, i cili tha se do të merrte parasysh edhe burgun vetëm e vetëm që ky vendim diktatorial të hidhej poshtë.
Për aktivistin Sazan Guri kjo që po ndodh me Teatrin është një vjedhje ditën për diell i pasurisë kombëtare dhe pronës publike.
“Është e dhimbshme të pretendosh që në vendin tonë sot pas 28 vitesh ka demokraci, ky ëhstë një ligj masakara. Ti nuk mund të quhesh përfaqësues i popullit kur ti je në kundërshtim me vullnetin e qytetarëve të tu në Kuvend. Nuk mund të trajtohet Shqipëria si çiflig i babait të kryeministrit”, u shpreh avokatja Mirela Jorgo.
“Kryeministri e ka pranuar vetë në Top Channel që kushdo kompani që të hyjë në garë Fusha është e avantazhuar për shkak se ka prokurën e një pjese të pronarëve. Pra kjo ishte vetëm një lojë e pistë në sy të BE-së”, u shpreh aktivisti Ervin Goci.
Nga ana tjetër sot opozita ka vendosur që të mos jetë në Kuvend, duke organizuar takimin mes deputetëve në qytetin e Vlorës.
