Luciano BOÇI
Edi Rama mblodhi sot (dje) pedagogë, profesorë e akademikë, në atë që e quan bashkëbisedim, po ku flet vetëm ai për dy orë me radhë.
Sigurisht, si gjithmonë nuk përtoi t’i etikojë si të paaftë e të korruptuar duke i futur të gjithë në një thes. Në thesin e tij.
Nga takimi me elitën e vendit, Rama e degradoi atë në një tubim partiak.
I nisi fyerjet me Linditën e tij të Arsimit dhe i ndau pedagogët në miq e armiq, që kanë krijuar kaos dhe kanë mbjellë mediokritet.
Predikoi autonominë universitare, por i hoqi 2 orë pedagogët nga auditorët ditën e hënë, për t’u mbajtur një leksion të gjatë e po aq mediokër, politik. Rama dhe Lindita recituan edhe një herë para pedagogëve po të njëjtat mashtrime:
Na lavdëruan, me këmbëngulje të lavdërueshme sistemin hyrës të palavdi, në universitete, por nuk thanë pse degët më të kërkuara, si asnjëherë në këto 25 vite, si Stomatologji, Farmaci, Inxhinieri Mjedisi, Telekomunikacion etj., janë ende bosh.
U krekosën për ekselentët dhe meritën, por asnjëri nuk shpjegoi, pse më të mirët sot, si asnjëherë në këto 25 vite, u degdisën në degë të dorës së dytë.
Nuk dhanë as llogari për çorbën që gatuan, duke kufizuar lirinë e preferencës, vetëm e vetëm të çonin maturantët tek mullinjtë e privatit.
Rama dhe Lindita fshehën faktin se Agjencia e Sigurimit të Cilësisë në Arsimin e Lartë, vazhdon të akreditojë me shpejtësi rrufe programe për klientelën dhe politikën, pavarësisht se Agjencia britanike vazhdon të lëvrojë në terren me vandakët e letrave në duar.
Pasi i hoqën pagesat për p-time, pasi i reduktoi në maksimum pedagogëve të drejtën e orëve suplementare, shpërblimin për udhëheqet e temave e vlerësimin financiar për punën shkencore, u thotë se në nars, meqë hyjmë në fushatë, do i rrisë pagat.
Rama dhe Lindita mbetën sot përsëri, para pedagogëve, profesorëve e akademikëve.
