Shane O’Mara, profesor i kërkimit eksperimental të trurit në Trinity College Dublin, Irlandë, shpjegoi në podcastin Don’t Tell Me The Score pse njerëzit duhet të ecin më shumë.
Për të humbur peshë, ju duhet të digjni më shumë kalori sesa merrni, gjë që njihet edhe si deficit kalori. Aktiviteti i rregullt fizik mund të përshpejtojë metabolizmin tonë, gjë që mund t’ju ndihmojë të humbni peshë më shpejt.
Profesor O’Mara shpjegoi se si aktiviteti i rregullt i lehtë gjatë gjithë ditës është më i mirë për metabolizmin tuaj sesa shpërthimet e shkurtra të aktivitetit intensiv, por të rrallë, siç është shkuarja në palestër.
Metabolizmi është një proces kimik që ndodh në trupin tonë për të na mbajtur gjallë dhe organet tona të funksionojnë normalisht. Ky proces kërkon energji dhe sa më i lartë metabolizmi juaj, aq më shumë kalori digjni.
O’Mara shpjegoi se si njerëzit mendojnë se të shkuarit në palestër për një orë do të ketë një efekt më të madh në metabolizmin e tyre dhe humbjen e peshës, pavarësisht nëse ata kanë qenë joaktivë pjesën tjetër të ditës.
Shërbimi Shëndetësor Kombëtar (NHS) thotë se ecja është një mënyrë e lehtë dhe falas për t’u bërë më aktiv, për të humbur peshë dhe për t’u bërë më të shëndetshëm. Ai gjithashtu thekson se “nganjëherë anashkalohet si një formë aktiviteti”, por “ecja e shpejtë mund të ndihmojë në ndërtimin e qëndrueshmërisë, djegien e kalorive të tepërta dhe e bën zemrën tuaj më të shëndetshme”.
Nuk është e nevojshme të ecni me orë të tëra çdo ditë, pasi NHS thekson se një shëtitje e shpejtë 10-minutëshe ditore do të ketë shumë përfitime shëndetësore dhe llogaritet në 150 minutat e rekomanduara të stërvitjes në javë.
Nëse nuk keni kohë për të dalë, mund të ecni edhe në shtëpi. Gjithçka që ju nevojitet është një rutine për të shfrytëzuar mirë kohën tuaj në shtëpi.
