Altin Dumani mori vetëm katër vota dje nga KLP duke mos mundur të zgjidhej kreu i SPAK-ut, garë e humbur ndaj Arben Krajës që mori gjashtë vota.
Por, një ditë para se të kandidonte siç duket në një foto të publikuar nga 27.al ai është ulur gjatë me kryetarin e Komisionit të Ligjeve, Ulsi Manja. Një foto e shkrepur të dielën e vërteton këtë.
Njeriu, i cili është me shpinë në fotografi është pikërisht Altin Dumani.
Sipas ndryshimeve të mëdha ligjore që u bënë në kuadër të Reformës në Drejtësi, anëtarët e SPAK nuk duhet të kenë asnjë kontakt me elementë kriminalë apo personazhe politike.
Nuk dihet se cila ka qenë tema e diskutimit mes personazheve në fjalë, megjithatë duket aspak i rastësishëm një takim i tillë vetëm pak orë para se të fillonte votimi për kreun e SPAK.
Edhe pse nuk u zgjodh kryetar, Dumani është anëtar i kësaj strukturë dhe një foto e tillë nuk i shërben as atij dhe as SPAK-ut që duhet të ndjekë këmba këmbe kriminelët dhe politikanët e korruptuar…të paktën kështu iu tha shqiptarëve që filluan të shpresonin se ky vend mund të bëhej kur filloi Reforma në Drejtësi.
