Drejtori i Informacionit në Televizionin Shijak, Basir Çollaku është thirrur sot në orën 13:00 në Prokurorinë e Tiranës. 
Çollaku është kallëzuar penalisht nga kreu i grupit parlamentar të Partisë Socialiste Taulant Balla për ‘kallzim të rremë’ dhe ‘fyerje’ të qëllimshme.
Kallëzimi erdhi menjëherë pas publikimit të dëshmisë së nënkomisarit Emiljano Nuhu, i cili akuzon numrin dy të Partisë Socialiste Taulant Balla, deputetin Rrahman Rraja dhe kryebashkiakun Artur Bushi për kërcënim me armë në zyrën e tij në komisariatin e Krujës.
Sipas dëshmisë, nënkomisari u kërcënua për të liruar djalin e deputetit Rrahman Rraja i cili ishte paditur nga Xhisiela Maloku.
Çollaku do të paraqitet sot në Prokurorinë e Tiranës.
Çollaku thotë se, ne do t’i kërkojmë prokurorisë hetimin e plotë të të gjitha deklarimeve të nënkomisarit për çdo zyrtar dhe politikan, për çdo përgjegjësi të tyre.
‘Kërkojmë dhënien e drejtësisë’, thekson ai.
Në kallëzimin e tij Balla kërkon: ‘Fillimin e hetimeve dhe regjistrimi i procedimit penal ndaj shtetasit ‘Kallëzimit të rremë’ për kryerjen e një krimi që dihet se nuk është kryer ose për kryerjen e një krimi nga një person që dihet se nuk e ka kryer atë, si edhe, krijimi i provave të rreme me qëllim që të bëhen ndjekje penale, ‘Fyerjes’ së qëllimshme e personit e cila përbën kundërvajtje penale dhe kur kryhet botërisht përbën kundërvajtje penale të parashikuar në nenin 305, 119 dhe 120 të Kodit Penal.’
