Kryeministri Edi Rama ka njoftuar përfundimin e rrugës Korçë – Ersekë, ndërsa ka shigjetuar opozitën duke përmendur akuzat e saj për rrëshqitjen e këtij segmenti gjatë punimeve.
“Ja edhe rruga e rilindur Korçë – Ersekë e përfunduar, si një aks i ri që i lidh dy bashkitë për 20 minuta dhe krijon kushte optimale transporti për banorët, prodhimet bujqësore po edhe nxitjen e mëtejshme të zhvillimit të turizmit që ka nisur me hapa të shpejtë edhe në Kolonjën e në Leskovikun e deri dje të braktisur dhe izoluar krejtësisht.
U vunë shumë kuje e u hodh shumë baltë për një rrëshqitje të rrugës gjatë punimeve, e cila u rindërtua me shpenzimet e bëra tërësisht nga firma.
Qesh mirë kush qesh i fundit”, ka theksuar Rama.
Rrugë e florinjtë
Rruga Korçë Ersekë është e ndarë në dy lote. Loti i parë me gjatësi 18 kilometra u tenderua nga ish qeveria e Partisë Demokratike për një kosto totale prej 15 milionë eurosh. Ndërsa loti i dytë me gjatësi 17 kilometra u tenderua nga qeveria aktuale me një vlerë fillestare prej 5 miliardë lekësh ose gati 50 milionë euro.
Qeveria e tenderoi lotin e dytë të rrugës Korçë-Ersekë në vitin 2020 duke e ndarë atë në dy pjesë. Pjesa e parë me gjatësi 4.15 kilometër tenderua tek kompania A.N.K e zotëruar nga familja e ish deputetit socialist Ndue Kola, me vlerën 2.352 miliardë lekë ose 23.5 milionë euro me kursin aktual.
Pjesa e dytë me gjatësi prej 12.85 kilometra u fitua sërish nga e njëjta kompani me vlerë me vlerë 22 milionë euro ose sa 99.9 për qind e fondit limit të përcaktuar. Me këto dy tendera loti i dytë dhe rrjedhimisht edhe e gjitha rruga duhet të kishte përfunduar. Por kostot u shtuan sërish.
Këtë vit, pas shembjes së segmentit në pjesën e parë, qeveria e shtoi kontratën e rrugës sërish, ndonëse për pjesën e dytë duke dhënë edhe me 5 milionë euro të tjera përmes procedurës së modifikimit të kontratës.
Për pasojë kostoja e rrugës me gjatësi totale 35 kilometra tashmë arrin në gati 65 milionë euro, nga të cilat 18 kilometrat e ndërtuara nga qeveria e Partisë Demokratike kushtuan vetëm 15 milionë euro, ndërsa 17 kiliometrat e ndërtuara nga qeveria e Ramës kushtuan 50 milione euro.
