Kreu i Partisë Demokratike-Demokratët Euroatlantikë, Lulzim Basha, ka reaguar ndaj deklaratave të kryeministrit Edi Rama, duke e akuzuar atë për përdorimin e rastit të Veliajt për të kërcënuar drejtësinë.
Në postimin e tij në facebook, Basha thekson se tre orë në televizion, nën shembullin e Vladimir Putinit, janë simptomë e anktheve të njeriut që erdhi në pushtet me mandat të krimit të organizuar dhe që është përgjegjës për rrënimin ekonomik, kur shumica e shqiptarëve sot jetojnë në kufij të varfërisë. Ai e cilëson Ramën si nyjën lidhëse të krimit dhe politikës, dhe përdor pushtetin për mbështetje nga grupe kriminale.
Basha fton shqiptarët që më 11 maj të shkruajnë një kapitull të ri për Shqipërinë, duke lënë pas “dinosaurët e tranzicionit”.
Reagimi i plotë i Bashës:
Çyrbe-kryeministri ka hallin e tij ndonëse bën sikur vajton për Veliajn. Ai përdori rastin e pashpresë të Veliajt për të kërcënuar drejtësinë me kode mafioze për interesat e tij.
Sepse të gjitha gjurmët e qeveritarëve dhe deputetëve të tij, të zhytur në llumin e krimit dhe korrupsionit, të çojnë tek ai.
Tre orë në televizion, nën shembullin e Vladimir Putinit, janë simptomë e anktheve të njeriut që erdhi në pushtet me mandat të krimit të organizuar dhe që është përgjegjës për rrënimin ekonomik, kur shumica e shqiptarëve sot jetojnë në kufij të varfërisë, s’kanë mundësi as të ngrohin shtëpitë e tyre apo të sigurojnë ushqim të mjaftueshëm për natën e ndërrimit të viteve, si dhe depresionin ku e ka futur vendin me emigrimin masiv të shqiptarëve.
Halli i madh i Edi Ramës është “Sky ECC”, ku tregohet se nyja lidhëse e krimit me politikën, e krimit me zgjedhjet dhe e pastrimit të parave të krimit përmes korrupsionit të qeverisë së tij është vetë ai. Rama nxiti dhe garantoi grupet kriminale që e sollën dhe e mbajtën në pushtet, ndërsa pushtetin e përdori për interesat e krimit.
Prandaj 11 maji është dita e shqiptarëve , për të shkruar një kapitull të ri për Shqipërinë, duke lënë pas dinosaurët e tranzicionit dhe luftën anakronike për mbijetesë personale.
Shqipëria meriton më shumë
