Kryetari i PD, Basha ka publikuar mesazhin e një qytetari, i cili shkruan se, Rama dhe Xhafa kanë zhdukur provat e krimit të ish-ministrit Tahiri nga zyra që ka patur tek Garda. “Rama-Tahiri-Xhafa në ethe për të zhdukur provat dhe fshehur gjurmët e krimit”, shkruan Basha në një postim në Facebook, duke publikuar të plotë mesazhin e qytetarit.
“Zoti kryetar, një ditë pasi ju publikuat në FB denoncimin tim për praninë me orë të tëra të Saimir Tahirit dhe zonjës së tij në dy zyrat që Tahiri administron te Garda, kanë ndodhur dy ngjarje:
Të mërkurën më 8 nëntor në ora 12:00 në mesditë, ka mbërritur një grup drejtuesish të Policisë dhe të Gardës, të cilët kanë kontrolluar zyrat.
Të nesërmen, ditën e enjte 9 nëntor, nga ora 9:00 deri në orën 12:00 zyrat janë boshatisur tërësisht nga bashkëpunëtorë të Saimir Tahirit të ndihmuar nga punonjës të policisë dhe të Gardës. Tre automjete janë ngarkuar me kuti të mëdha të mbushura plot: një furgon i bardhë me targë MB 403 AA, një kamionçinë ushtarake me targë MB 019 AA, dhe një “Golf 5” ngjyrë vishnje me targë AA 258 KS.
Pasi i boshatisën zyrat, i pastruan dhe ndryshuan dhe emërtimin në dyert e dy zyrave dhe u larguan. E gjitha kjo ndodhi vetëm një ditë, pasi ju publikuat denoncimin tim për ardhjen dhe qëndrimin disa orësh të Tahirit dhe të zonjës së tij në dy zyrat që Tahiri administron te Garda”, shkruan qytetari.
