Ndërkohë që deputetët e grupimit të Sali Berishës dhanë shfaqjen e radhës në Kuvend, duke ndezur zjarr, flakë e tym në seancën më të rëndësishme të vitit, atë të buxhetit, deputetët e PD-së e kanë votuar kundër.
Edhe pse përgjatë këtyre ditëve deputetët e PD-së kanë dorëzuar amendamente dhe kanë diskutuar për buxhetin, në Parlament ka mbizotëruar zhurma dhe kaosi.
Përveç kësaj, Berisha vijon të linçojë deputetët e PD-së, herë me televizionin e tij, herë me njerëzit e tij të afërt.
Në një postim në facebook, dhëndri i Berishës, Jamarbër Malltezi, i cili është me masë “arrest shtëpie” nga Gjykata e Posaçme dhe në hetim nga SPAK-u për aferën korruptive të kompleksit PArtizani, ka sulmuar deputetët e PD-së si “palaço”.
I menjëhershëm ka qenë reagimi i deputetes së PD-së, Flutura Açka, e cila, nëpërmjet një reagimi në facebook, duket se i ka dhënë përgjigje dhëndërit të Berishës, i cili akuzohet për korrupsion dhe vijon të reagojë sikur të jetë një person i ndershëm dhe jo nën hetim nga SPAK.
Reagimi i plotë i nënkryetares së PD, shkrimtares Flutura Açka:
“Doktor, mblidhi zagarët!
Unë votoj siç më urdhëron ndërgjegjja ime dhe siç ma ndien sentimenti politik, të cilin, veç Zotit, nuk ka kush fuqi ta urdhërojë.
Ky shqetësim i madh që ju paska zënë, më thotë se kam vepruar drejt.
Unë nuk e votoj këtë qeveri, as me heshtje, as me kinse!”
