James Rodriguez dëshiron ta vazhdojë karrierën te Reali i Madridit. Së fundmi është folur shumë në media për një largim të mundshëm të yllit kolumbian nga Los Blancos, por për t’i hedhur poshtë këto zëra ka menduar vetë James. 25-vjeçari nga Cucuta, i cili është në ditët e fundit të pushimeve, në një intervistë ka deklaruar se ai është i lumtur te Reali i Madridit dhe objektivi i tij është të qëndrojë për shumë vite te klubi merengues dhe të fitojë trofe me Realin. Sezoni i fundit nuk ishte shumë i mirë në aspektin personal për James Rodriguez, i cili për shkak të disa dëmtimeve humbi vendin e titullarit në skuadër, ndërsa më pas nuk bënte pjesë në zgjedhjet e para të trajnerit të ri Zinedine Zidane.
Gjithsesi James mendon se i ka të gjitha mundësitë për të qenë sërish i njëjti lojtar me të cilin u dashuruan të gjithë në përfundim të Botërorit Brazil 2014. James kërkon të nisë sa më shpejt përgatitjet me skuadrën në mënyrë që me formën dhe lojërat e tij të bindë francezin Zidane t’i japë një vend titullari në formacionin e Los Blancos. Reali i Madridit e bleu 25-vjeçarin për 80 milionë euro nga francezët e Monacos në vitin 2014. Përpara disa ditëve e ardhmja e James Rodriguez dukej larg Realit, por pas deklaratave të fundit të vetë futbollistit me shumë gjasa ylli i Los Cafeteros do ta vazhdojë karrierën në “Santiago Bernabeu”.
Edhe më të besueshme qëndrimin e James në Madrid e bën fakti se Reali hoqi dorë nga mesfushori portugez Andre Gomes, i cili u transferua te Barcelona për shumën e 55 milionë eurove dhe 15 milionë të tjera në bazë të paraqitjeve.
Qëndrimi i Jamesit në Madrid nuk duket e rastësishme. Sipas asaj që raporton “El Pais”, katër herë fituesi i Topit të Artë, Cristiano Ronaldo, ka kërkuar nga Florentino Perez dhe Zinedine Zidane që të mos e shesin këtë verë James Rodriguezin, fjalë të cilat e kanë bindur Zizunë se James mund të shkëlqejë sërish me fanellën e Los Blancos.
Ndërkohë, Cristiano Ronaldo ka inauguruar hotelin e tij me pesë yje në Madeira. Dje ishte ditë e veçantë për portugezin, Cristiano Ronaldo, i cili ka inauguruar hotelin me 5 yje në Madeira “Pestana CR7 Hotel”. Qindra tifozë ishin mbledhur përpara hotelit për të pritur Cristianon.
