Kombet e Bashkuara kanë deklaruar se është një nevojë urgjente që mallrat komerciale të lejohen të kalojnë në Gaza, në mënyrë që të parandalohet një zi buke.
Kreu i Agjencisë së Kombeve të Bashkuara për Ndihmën dhe Punët, Philippe Lazzarini nënvizoi se vetëm ndihma humanitare nuk është e mjaftueshme që të shmanget një situatë e tillë.
“Kriza në Gaza është një katastrofë e shkaktuar nga njeriu, e përbërë nga gjuha dehumanizuese dhe përdorimi i ushqimit, ujit dhe karburantit si instrumente lufte. Vetëm ndihma humanitare nuk do të jetë e mjaftueshme për të shmangur një zi buke”, tha ai.
Lazzarini u bëri thirrje udhëheqësve që t’u kushtojnë vëmendje thirrjeve për një armëpushim humanitar dhe të mundësojnë dërgimin e më shumë ushqimeve, ilaçeve, dhe ujit.
“Fillimi i dimrit e bën jetën edhe më të vështirë, veçanërisht për ata që kanë mbetur të pastrehë”, paralajmëroi zyrtari i OKB-së.
