Nga Elvis Hila/ BIRN
Ura e Drojës –që lidh Kurbinin me Fushë Krujën, u inaugurua me bujë në shtator 2018, por dy vite e gjysmë më pas është në prag shembjeje.
Autoriteti Rrugor Shqiptar, ARRSH i tha BIRN se kishte konstatuar në një inspektim dëmtime të konsiderueshme, deri në shkatërrimin e mbrojtjes së shpatullës së Urës nga drejtimi i Tiranës.
ARRSH shpenzoi 12.8 milionë lekë në vitin 2018 për projektimin e 8 urave, ku përfshihej edhe ura e Drojes. Ndërtimi i saj u financua sipas Ministrisë së Infrastrukturës nga kompania e çimentos “Antea Cement” me 1 milion euro, por këmbët nuk mbajtën gjatë.
Në një postim në Facebook në gusht 2018, kryeministri Edi Rama e mburri urën e Drojes dhe në replika me komentues tha se ndonëse investimi ishte dhuratë nga një kompani private, puna e mirë dhe cilësore ishte përgjegjësi e rolit kyç të ministrisë së tij të Infrastrukturës dhe Energjisë.
“Pyetja nuk është asnjëherë në këto raste ku u gjetën lekët për ta bërë një vepër publike, po si organizohet e sa cilësore është puna ndërtuese,” shkroi Rama.
Reshjet e fillimit të këtij viti fajësohen për dëmtimin e këmbëve mbajtëse. Por banorët i thanë BIRN se kjo tregonte që punimet nuk kishin qenë serioze dhe investimi nuk ishte kryer siç ishte reklamuar.
“Për ndërtimin e kësaj ure janë harxhuar 1 milion euro, por siç e shikoni kjo urë rrezikon të bjerë sërish. Me pak fjalë, këtu nuk është shpenzuar as gjysma e parave kanë qenë planifikuar e ato që po i vuajmë pasojat jemi ne banorët, pasi po rrezikojmë sërish izolimin,” tha Preng Lala, banor i fshatit Shpërdhet.
Një tjetër banor thotë se kalimi i urës ishte bërë i frikshëm për ta. “Kalimi këtu është mjaft i frikshëm dhe i rrezikshëm, pasi ura rrezikon shembjen,” tha Maringlen Doçi nga Mamurrasi.
Ai thotë se banorët veç frikës së urës, i frikësohen edhe një izolimi të dytë, pasi ura krijon probleme për qindra familje nga Kurbini dhe Fushë-Kruja.
Autoriteti Rrugor Shqiptar tha se ishte ngritur një grup pune dhe situata është verifikuar në terren dhe pritej përfundimi i analizës për të përcaktuar shkaqet e dëmtimeve.
“Për përcaktimin e shkaqeve që kanë sjellë këtë gjendje të urës duhet të realizohet një studim i plotë teknik,” thuhet në përgjigjen e ARRSH-së, e cila shtoi se është në pritje të raporteve topografike, gjeologjike dhe hidrologjike “të cilat do të zbardhin edhe shkakun e këtyre dëmtimeve”.
