Edi Rama tashmë zyrtarisht ka vetëm 58 deputetë, nga 65 që kishte kur fitoi zgjedhjet e 23 qershorit 2013.
Me kalimin e viteve u përjashtuan tre deputetë dhe u larguan dhe tre të tillë, duke e bërë Ramën më të varur nga Meta dhe Shpëtim Idrizi, por edhe ndaj deputetëve “zevzekë” brenda grupit të PS-së.
Largimi i Ben Blushit dhe Mimoza Hafizit nga Partia Socialiste ka ndryshuar numrat e mazhorancës qeverisëse.
Ndërkohë që deri më tani ajo ka pasur shumicë absolute, situata duket se ka ndryshuar, sidomos sa u takon ligjeve me 84 vota.
Sipas të dhënave zyrtare të publikuara në faqen e internetit të Kuvendit, PS ka përfunduar me 58 deputetë. Fillimisht kjo parti ka pasur 61 deputetë, mirëpo pak kohë më parë deklaroi largimin Vladimir Kosta, ndërsa së fundmi edhe Ben Blushi me Mimoza Hafizin.
Largimi i këtyre deputetëve ka bërë që numrat të zbresin në 58 dhe kjo e vendos në vështirësi PS dhe mazhorancën, pasi ka humbur shumicën e cilësuar prej 84 votash në Parlament. Nëse bëhet një mbledhje e gjithë votave të koalicionit, rezulton se PS ka 58 vota, LSI ka 20 vota, ndërsa PDIU ka 5 vota. Në total kjo shifër shkon në 83 vota.
Së fundmi është vënë re se mazhoranca e ka shumë të vështirë t’i mbledhë të gjithë deputetët dhe kjo është parë gjatë votimeve në Kuvend. Të enjten në sallë mazhoranca kishte 70 deputetë dhe kjo bëri që të shtyhej ligji për organet e drejtësisë.
Me praninë e Blushit dhe Hafizit sigurimi i 84 votave ishte i vështirë pa PDIU-në, por edhe mund të realizohej duke marrë parasysh qëndrimet e një sërë deputetëve të pavarur si Mirela Ferracaku, Vangjel Dule, Tom Doshi, etj. Por tani kjo gjë është e pamundur dhe shifrat tregojnë se largimi i Blushit dhe i Hafizit ka bërë që PDIU të ketë rol vendimtar në ligjet që kërkojnë shumicë të cilësuar, pasi Ramës i mjafton të gjejë një deputet të pavarur.
Shifrat e reja në Kuvend tregojnë se ndryshe nga sa ka ndodhur deri më tani, ku mazhorancës nuk i ka interesuar shumë nëse kishte konsensusin e PD-së apo deputetëve të pavarur, që tani e tutje duket se PS duhet të mendohet dy herë.
Aktualisht mazhoranca në mënyrë zyrtare ka 83 vota në Parlament, por kjo shifër mund të jetë edhe më e ulët pasi ka disa deputetë të tjerë, vota e të cilëve nuk është e sigurt. Ata janë Eduart Ndocaj dhe Mira Shehu. Ky i pari ka kritikuar ashpër Edi Ramën dhe qeverinë, duke mos e dhënë gjithmonë votën, ndërsa Mira Shehu është një deputete pranë Koço Kokëdhimës. Kjo do të thotë se mazhoranca ka pothuajse të sigurta vetëm 81 vota në sallën e Parlamentit. Kjo do të thotë po ashtu se shumë ligje nuk miratohen dot, sidomos ata të reformës në drejtësi, si fjala vjen ai për organet e drejtësisë që kërkon 84 vota. Po ashtu janë dhe disa ligje të tjera, si Kodi Penal apo Kodi i Procedurës Penale, që kërkojnë po 84 vota.
