Kreu i PD Euroatlantike, dega Krujë, Sabah Sheta, i cili ka qenë një ndër organizatorët dhe mbështetësit kryesorë të banorëve që preken nga aksi Thumanë-Kashar, nëpërmjet një postimi në rrjetin social facebook shprehet se aksesi për të dalë nga kjo rrugë në shtëpitë e tyre, është një e drejtë e mohuar padrejtësisht nga qeveria.
Ai siguron banorët se protesta do të vijojë derisa të vihet në vend një e drejtë e mohuar.
“Apeli im është që t’i jepet zgjidhje sa më shpejt këtij problemi. Krutanët nuk do të tërhiqen derisa të fitojnë një të drejtë morale dhe legjitime. Kërkojmë nga ministrja e Transporteve Balluku dhe kryeministri Rama që të mos qëndrojnë indiferent ndaj një problemi që shkakton kosto sociale dhe ekonomike për një zonë turistike dhe historike si Kruja.” – shprehet Sheta.
Më poshtë reagimi i plotë:
Qytetarët krutanë edhe sot protestuan për të kërkuar një të drejtë të mohuar padrejtësisht nga qeveria, aksesi për të dal nga rruga Thumanë-Kashar për në shtëpitë dhe pronat e tyre.
Falenderim kam për secilin që po i reziston arrogancës së pashembullt të Rilindjes, e cila me paturpësinë më të madhe krijoi një problem që nuk ishte. Mbyllja e rreth rrotullimit të Thumanës izoloi mijëra biznese si dhe 85 mijë banorët e Krujës. Ekzekutivi i detyroi qytetarët e Krujës jo vetëm që të shkojnë deri në Kashar, por dhe të paguajnë për të shkuar në shtëpitë e tyre. Kjo është e patolerueshme.
Apeli im është që t’i jepet zgjidhje sa më shpejt këtij problemi. Krutanët nuk do të tërhiqen derisa të fitojnë një të drejtë morale dhe legjitime. Kërkojmë nga ministrja e Transporteve Balluku dhe kryeministri Rama që të mos qëndrojnë indiferent ndaj një problemi që shkakton kosto sociale dhe ekonomike për një zonë turistike dhe historike si Kruja.
Nuk do të bëjmë asnjë hap pas! Krujën askush nuk e ka nënshtruar, ndaj mos kujtoni se do të mund të fitoni në këtë histori të krijuar prej jush. Çdo vonesë vetëm do ta përkeqësojë situatën pasi krutanët nuk do të pajtohen më këtë maskardë!
