Kreu i degës së Partisë Demokratike-Demokratët Euroatlantikë në Krujë, Sabah Sheta, ka vlerësuar lart vendosjen e bustit të Mustafa Merlika Krujës në qytetin e tij të lindjes. Ai e cilësoi këtë akt si një rivlerësim të vonuar për ish-kryeministrin, nënshkruesin e Aktit të Pavarësisë dhe një figurë të shquar të historisë shqiptare.
Sheta falënderoi Shoqatën “Trojet e Arbërit”, Bashkinë e Krujës dhe familjen Merlika për organizimin e kësaj ceremonie, duke theksuar rëndësinë e Merlika Krujës si patriot, gjuhëtar dhe shtetar që la gjurmë të thella në historinë kombëtare. “Nga sot, Kruja dhe krutanët mbajnë kokën lart,” u shpreh Sheta, duke vënë në dukje se ky akt është një borxh i shlyer ndaj një prej bijve më të shquar të qytetit.
Postimi i Sabah Sheta:
Mustafa Merlika Kruja nga sot mban kokën lart në vendlindje. Lartësohet në bust ish- shtetari, kryeministri dhe nënshkruesi i Dokumentit të Shpalljes së Pavarësisë
Këtë të dielë Kruja ishte në festë. Nga sot një prej djemve të saj do të mbajë kryet lart në qytetin e tij, aty lindi, ku dha një kontribut të jashtëzakonshëm për vendlindjen e tij plot histori, për Shqipërinë dhe Kombin Shqiptar. Në qytetin turistik e historik, nga nesër çdo vizitorë do të gjejë edhe të lartësuar në një bust një personalitet të jashtëzakonshëm si Mustafa Merlika Kruja, në një nga sheshet e qytetit.
Është ky minimumi, që jo vetëm Kruja dhe krutanët, por shqiptarët i detyrohen atdhetarit Mustafa Merlika-Kruja, publicistit, gjuhëtarit, historianit, kryeministrit dhe shtetarit, nënshkruesit për Krujën të Dokumentit të Shpalljes së Pavarësisë në Vlorë më 28 nëntor 1912. Krutanët nga sot marrim më frymë lirshëm, sepse një prej djemve që kanë dhënë shumë në historinë e Shqipërisë, nis të rivlerësohet në vendlindjen e tij siç i takon. Produkti i intelektual dhe patriotik i Mustafa Merlika-Kruja nuk u pranua përgjatë regjimit komunist, nuk u bë sa duhet as përgjatë viteve të demokracisë dhe ishte ky akt i sotëm ishte një borxh që ia kishim këtij personaliteti të jashtëzakonshëm.
Si krutan, si i djathtë dua të vlerësojë maksimalisht këtë personalitet të përmasave kombëtare, por dhe shpreh mirënjohje për familjen Merlika-Kruja për gjithçka kanë bërë në aktivitetin e tyre për çështjen shqiptare!
Vlerësim kam për Shoqatën ”Trojet e Arbërit” Prishtinë sepse djali nga Kruja ka bërë shumë dhe për çështjen kombëtare, si iniciuesit e ngritjes së këtij busti në Bashkinë Krujë si dhe organizimin e ceremonisë së rastit e cila u zhvillua në qytetin tonë në sallën e pallatit të kulturës “Ibrahim Berdaka”. Kënaqësi të isha sot pjesë e aktivitetit dhe vlerësimet më të mira shkojnë për të gjitha ata studiues nga Shqipëria dhe në trojet shqiptare si dhe të tjerë nga mërgata shqiptare në botë të cilët në kumtesat tyre folën për rolin patriotikë, intelektual dhe atdhetar të Mustafa Mërlikës-Kruja si një prej shqiptarëve të mirë që e deshi shumë këtë komb dhe dha më të mirën nga vetja për një Shqipëri ndryshe nga ajo që do të pasohej pas vitit 1945 e cila ra nën kthetrat e regjimit komunist. “Në qytetin ku lindi kaloi fëmijërinë, Kruja mbeti në zemrën e Mustafait, jo vetëm si vendi me të cilin u lidhën kujtimet e para e të pashlyeshme fëminore, të shoqëruara nga portretet e familjarëve, ndër të cilët spikat ai i nënës me dhimbjen e thellë të largimit të saj të parakohshëm, por edhe sepse emri i saj i u bashkëngjit mbiemrit të tij për të formuar atë tog fjalësh, që do të dukej në dokumentin më të rëndësishëm të historisë shqiptare, duke u bërë një pikë referimi në jetën politike, shoqërore e kulturore të Shqipërisë” – do të shkruante në një prej shkrimeve të tij Eugjen Merlika. Ndaj dua realisht ta vlerësoj me përzemërsi Eugjen Merlikën, nipin e Mustafait që foli në emër të fisit Merlika për rolin e shtetarit dhe kryeministrit nga Kruja, por që kurrë nuk harroi rrënjët e të parëve dhe Krujën si tokën e të parëve dhe u lidh pazgjidhshmërisht sërish më tokën e të parëve pas rënies së komunizmit!
