Pas tërmetit, që shkatërroi dhjetra banesa në Durrës, ku mbetën të vdekur 51 persona, Prokuroria e Durrësit ka sekuestruar dokumentet në zyrën e Urbanistikës.
Do të ballafaqohen dokumentet me objektet e shembura nëse janë rrespektuar ose jo lejet e ndëritmit. Prokuroria ka sekuestruar dokumentet e 10 viteve në fundit.
Hetimi ka si objekt kryerjen e veprimeve të shpejta në drejtim të sqarimit të rrethanave konkrete, që kanë çuar në pasojat e ardhura dhe gjendjen e ndërtimeve.
Veprat penale që po hetohen janë ato të “Shpërdorim detyre”, parashikuar nga neni 248 i Kodit Penal, ku do hetohet për organet qe kanë miratuar lejet e ndërtimit dhe nëse ato janë dhënë në mbështetje të ligjit, si dhe nëse ndërtuesit kanë respektuar lejen e marrë, “Ndërtim i paligjshëm”, parashikuar nga neni 199/a i Kodit penal, si dhe “Dhënia e ndihmës për ndërtim të paligjshëm”, neni 199/b i Kodit Penal.
Nuk dihet nëse do të ketë një urdhër ndalimi për ish-kreun e Bashkisë së Durrësit Vangjush Dako, i cili akuzohet si shkaktar për shembejen e pallateve të dnëruara gjatë 10 viteve të fundit që ai ka qënë në krye të Bashkisë.
Reagon Prokuroria e Përgjithshme
Prokuroria e Përgjithshme ka reaguar lidhur me sekuestrimin e dokumentave në zyrën e urbanistikës në Durrës.
“Lidhur me rastin në fjalë grupi i hetimit të çështjes po kryen veprimet hetimore përkatëse siç parashikon K.Pr.Penale dhe një ndër to është dhe kqyrja në vend ku janë konstatuar prishje dhe dëmtime të objekteve.
Sipas parashikimeve ligjore kqyrjet janë shoqëruar dhe me fotografi dhe marrjen e provave të domosdoshme në vendngjarje për verifikimet e duhura që do të bëhen më pas.
Duke parë rrezikshmërinë që paraqesin objektet e dëmtuara dhe shpejtësinë që duhet për evitimin e pasojave të tjera nuk mund të bëhet sekuestrimi i këtyre objekteve, por është çmuar që pas kryerjes së veprimeve proceduriale në vendngjarje, ata (grupi hetimor), të jenë të lirë për të vendosur për vijimësinë e objektit nga instancat përkatëse sipas çdo rasti. Njëkohësisht vazhdojnë dhe sekuestrimi i dokumentacionit përkatës për këto objekte në zyrat që i administrojnë ato”, njofton Prokuroria.
