Autoritetet italiane kanë sekuestruar në bregdetin e Leçes rreth 500 kg lëndë narkotike, e cila dyshohet se ka mbërritur nga Shqipëria në Itali.
Guardia di Finanza ka ushtruar kontroll, pas dyshimeve mbi një automjet që po tërhiqte një karroceri, mbi të cilën ishte vendosur një varkë rreth 6 metra të gjatë.
Automjeti po ecte përgjatë rrugës provinciale që lidh Salenton me marinën e Torre Chianca. Efektivët janë vënë në ndjekje të automjetit dhe kanë identifikuar vendin dhe pronarin e tij.
Policia ka identifikuar shtetasin italian Mauro Centonze, 45 vjeç, si pronarin e mjetit.
“Karabinierët ushtruan kontroll në një shtëpi në lagjen Borgo San Nicola, ku ishin parkuar mjetet, në një vend larg syve të qytetarëve. Brenda sheshit, përveç disa automjeteve të punës dhe copëzave të materialeve të ndërtimit, aty ishte automjeti jashtë rrugës i vërejtur në mëngjes dhe tre varka”, njoftojnë mediat italiane.
Brenda barkës, u konstatuan 450 kilogramë marihuanë të ndarë në 219 pako, 75 kilogramë hashash të ndarë në 31 pako dhe tre litra e gjysmë vaj hashashi.
Gjithashtu u sekuestruan dy pushkë të kalibrit 45, një pistoletë të tipit Beretta me kalibrin 45, një pistoletë gjuetie të kalibrit 8, me 23 fishekë.
Sasia e madhe e lëndës narkotike të sekuestruar, sigurisht e mbërritur nga ana tjetër e detit Adriatik, rapotojnë mediat e vendit fqinj duke iu referuar Shqipërisë.
Autoritetet dyshojnë se sasia e drogës mund të ishte destinuar për tregun Salento dhe mbase jo vetëm.
Personi që u arrestua në flagrancë pritet të japë dëshminë e tij në Prokurorinë e Leçes.
