Real Madridi ka marrë një ofertë në ditët e fundit, që ka tërhequr vëmendjen e menaxhmentit sportiv të “Los Blancos”. Ky është Arthur (21 vjeç), mesfushori sulmues i Gremios, i cili është evidentuar si një nga yjet e kampionatit brazilian, duke e çuar ekipin e tij drejt pushtimit të “Copa Libertadores”. Në fakt, Gremio de Porto Alegre do të jetë rivali i Real Madridit në finalen e Botërorit për Klube, që do të zhvillohet sot. Ideja e udhëheqësve të Gremios nuk është tjetër, përveç marrjes së 50 milionë eurove, që shfaqen si klauzolë e largimit të talentit 21-vjeçar. Reduktimi i mundshëm i çmimit të Arthur do të arrinte në një vonesë, sa i përket kohës së largimit nga Brazili. Gremio dhe futbolli brazilian në përgjithësi janë shitës të lojtarëve të spikatur, pasi nuk mund të konkurrojnë me pagat e ofruara nga ekipet e mëdha europiane. Arthur ishte drejtpërdrejt i lidhur me Barcelonën javë më parë, si rezultat i një takimi me Robert Fernandez, drejtor sportiv i klubit katalanas, me të cilin pozoi edhe me fanellën blaugrana.
Sidoqoftë, as Arthur, as Jorge Machado, agjenti i tij, nuk kanë nënshkruar ndonjë angazhim me klubin e kryesuar nga Josep Maria Bartomeu. Siç ka mësuar “MARCA”, lojtari pëlqehet nga trajneri Zidane. Në “Bernabeu” konsiderojnë se do të ishte një shtesë interesante, pasi mendojnë se ky futbollist është një nga më të mirët e tregut brazilian në vitet e fundit, me Viniciusin tashmë të nënshkruar. Burime të afërta me lojtarin e kanë siguruar këtë gazetë spanjolle se Arthur nuk është zotuar për Barcelonën dhe se ekipi brazilian në këtë kohë nuk dëshiron të dijë asgjë për katalanasit e kryesuar nga Josep María Bartomeu. André Zanotta, ekzekutivi i Gremios, pranoi dje se klubi i tij nuk mund t’i mbyllë dyert e dëshirës së Arthurit për të luajtur në Europë, edhe pse qëllimi është të vazhdojnë së bashku deri në vitin 2020, më së paku.
Disa futbollistë të Real Madrid dhe gratë e tyre kanë vizituar xhaminë e Sheikut Zayed, gjatë kësaj jave në Abu Dhabi. Kjo xhami është më e madhja në Emiratet e Bashkuara Arabe. Disa nga këta vizitorë shkuan në xhami menjëherë pas fitores 2-1 që “Los Blancos” arritën ndaj Al Jazira në gjysmëfinalen e Botërorit për Klube, luajtur të mërkurën në “Zayed Sports City Stadium”. Ky stadium është vetëm një kilometër larg nga xhamia.
“Duke shijuar fitoren”, shkroi në mesazhin e tij në rrjetet sociale, Lucas Vasquez, krahas fotos pranë xhamisë, ku ishte veshur me kostumin tradicional që përdorin myslimanët. Gratë dhe të dashurat e futbollistëve Theo Hernandez, Marcelo dhe Keylor Navas gjithashtu ishin të pranishme në këtë vizitë. Adriana Pozueco, Clarice Alves dhe Andrea Salas postuan në rrjetet sociale fotografitë e tyre gjatë turit në xhami.
